မၢ်ကူး 9
9
1စဒီၣ်ဝ့ၤလၢ်ဝၤတစီာ်, “ယဒီဆးသံအတၱၢ်အမှး, ဒဳအဆီ ထဳးအီၣ်ဘ့ယဳၤတစီာ်အကျဲနဳၤ, တစီာ်စီာ်ကတတၱၢ်စာ်ဘဲာ်ကီတဲၤသံနီး, ထိစကစာ်ထၱး ဘဲာ် ကဘၱာ်စဲာ်အထံအက့ၤဒဳစတဲၤလ့ၤလၤတဲၤတီၤ တဲၤသ့းအကျဲနဳၤ.”
ယ့ၣ်ရှူးဘါချဲးထာ်အဟိအယီၤ
(မး ၁၇:၁-၁၃, လူၤ ၉:၂၈-၃၆)
2ဘ့အနံၤသါသိးဝှါဒဳၣ်, ယ့ၣ်ရှူးယဳၤ စီၤပ့းတရူး, စီၤယၤ ကိာ်ကၱာ် စီၤယိၤဟၣ် ကၱာ်ထာ်အံာ် ဟူကဲၤစဲာ်တစီာ်ဒဳခီးလီအထာ်ယၱၤ တမဲအခဳးကၱာ် စဘါ ချဲးထာ်ကဲၤစဟိစယီၤဒဳလၢ်ဝၤတစီာ်အလှီမီၢ်နဳၤ. 3စတဲၤကိတဲၤသီးကဲၢ်ကပြီၤ, အဘိာ်သါဒဳၣ်လံ ကၱာ်တဲၤၡံးထံဖီ, ပွ့အစာ်ဘိလၢ်ခဳးချဳအၡၱပိၢ်တဲၤ တစီာ်မဲၤဘိာ်သါတကဲာ်ထာ်နီးနဳၤ. 4ဘ့နဳၤ စီၤအ့ၤလံယၤကၱာ်စီၤမိၤၡ့ ပီၤထာ်ထၱးစဲာ်တစီာ် ကၱာ်တီၤတီၢ်ထၱးကဲၤ ယ့ၣ်ရှူး.
5စီၤပ့းတရူးယဳၤထာ် ယ့ၣ်ရှူးကၱာ်စဒီၣ်, “ဆရၣ်, ကအီၣ်ဘ့ ယဳၤမၱာ်အမီၤဟဳ. ကပြးထာ်ၡံၣ်ဖဳး သဳဝၤတခီ, မၱာ်နနံၤခံတဝၤ, စီၤမိၤၡ့ အနံၤခံ တဝၤ ကၱာ်စီၤအ့ၤလံယၤအနံၤခံတဝၤနၢ်.” 6စၡံး ဆါ ဆိးအခဳးအစဲ, စဒီၣ်တၤနဲၢ်နဳၤစတသၱာ်ဟဲလါ က့ၤစအဲနီး.
7ဘ့နဳၤတဲၢ်သဘဳာ်လၤကၢ်ဘံာ်ကဲၤစဲာ် တစီာ်ကၱာ်တဲၤအလ့ၢ်သဲာ်ထာ်ဒဳတဲၢ်သဘဳာ်အကျဲ, အဒီၣ်. “အယဳၤတပွဲၤမၱာ်ယဖဳးခဳ ယဘဲာ်လီၢ်, ဆီးခ့န့းပီၢ်စလ့ၢ်.”
8တပျာ်ခါလီၤ, စစာ်တဝၱၢ်တဝ့ၤဒဳၣ် စတစာ်ထၱးပၠၤအလဝ့ၤ တဗွဲနီး, မၱာ်ထ့ယ့ၣ်ရှူးကၱာ်တပွဲၤ လီၤ.
9ဘ့စက့ၤလၤခီးလီအခၠၱး, ယ့ၣ်ရှူးထိး လၤမှဲးလၤစဲာ်တစီာ် တဲၤထဲၢ်စစာ်ထၱးဘဲာ်တစီာ်နဳၤ အကတဒီဆးပီၢ်ပၠၤတဗွဲနီးထိစသံ ဝှါပၠၤ အဖဳးကထာ်ပဳၤက့ၤ တဲၤသံကျဲအခၠၱးနဳၤ.
10စဲာ်တစီာ်အီၣ်အံာ်အအဳးလၢ်သးပူၤ ကၱာ်ထိးစာ်ဒဲစာ်လှဲး လၢ်ဝၤစတဲၤယၱၢ်ဘဲာ်အဒီၣ်, “စကထာ်ပဳၤက့ၤဝှါတဲၤသံအကျဲ” မၱာ်တၤ နဲၢ်နဳၤ.
11စဒဲစာ်ကဲၤယ့ၣ်ရှူး, စဒီၣ်, “ဖၤရံၤၡဲဖဳး ကၱာ်အသဲာ်စဲာ်တစီာ်ဒီၣ်မါ စီၤအ့ၤလံယၤကလၤဘဲာ် အူဆူးမၤနဲၢ်.”
12ယ့ၣ်ရှူးဒီၣ်က့ၤစဲာ်တစီာ်, “စီၤအ့ၤလံယၤကလၤဘဲာ်အူ ဆူး, ကၱာ်ဘဲပျဳာ်က့ၤ တဲၤကိမံၤမံၤ. မၤနဲၢ် ပၠၤအဖဳးနဳၤကခးဘဲာ်တဲၤဆဲး ညဲပွ့ တမံၤကၱာ်ကဘဲာ်ထဲးကဲထဲးအိးကီအဝှ့းလၤမၤဒဳၣ်နဲၢ်. 13ပရၤဆါယဒီဆးသံ, စီၤအ့ၤလံယၤလၤဝှါထဳ, မၱာ်ပၠၤတစီာ်မဲၤစဲာ်အစာ်ဘိစသးအလဳၢ်, အစာ်ဘိ အဝှ့းလၤကဲၤတဲၤဒီၣ်တီၤလီၤအပူၤနဳၤ.”
အပံၤစဖဳးတဲၤနှဲးမဲၤယဳၤတပွဲၤ
(မး ၁၇:၁၄-၂၁, လူၤ ၉:၃၇-၄၃က)
14ဘ့ယ့ၣ်ရှူးက့ၤလၤထၱးစပျဲၢ်စဘီၣ် အလဝ့ၤ တစီာ်အခၠၱး နဳၤ, စစာ်ထၱးကဲၤပၠၤအီၣ်အဲး အီးအီးဝ့ၤခွဲဘးစဲာ်တစီာ်, ကၱာ်အဝှ့းစဲာ်တစီာ်ဒီၣ်လှဲး ဆးလှဲးကဲၤစဲာ်တစီာ်. 15ပၠၤအပဳၤအဟီးစာ်ထၱး ကဲၤ ယ့ၣ်ရှူးဒဳၣ်ထဲးတမိၢ်တမှါၡံးဆါသးပဳၤ, စွဲးလ့ၤ ထၱးကၱာ်နှူဆဲးကဲၤစဲာ်. 16စဒီၣ်ကဲၤလၢ်ဝၤတစီာ်, “သံတီၤတီၢ်တသီအံာ်ကဲၤတၤအဝၱၤအကဲနဲၤ.”
17ဒဳပၠၤအပဳၤအဟီးအကျဲတပွဲၤဒီၣ်, “ဆရၣ်, ယလ့ၤအံာ်ယဖဳးခဳဒဳနအီၣ်နဳၤ. တဲၤနှဲးအခဲး ကျဳၤဖၱးဘဲာ်တပွဲၤနဳၤ. 18တဲၤနှဲးဖၱး ဘဲာ်စဲာ်ကိ အပျာ်နဳၤ, အထၱးလၤခူးစဲာ်, စဧီၢ်ဗူသဘဳာ်ထာ် ကၱာ် စအ့းတံၤ သိအ့းတံၤသဲ, မဲၤဝှါစဝဲၢ်လၤဓရ့ၤဓရ့ၤ. ယဒီဆးနပျဲၢ်နဘီၣ်တစီာ် အကနှးဟဲးဖျီးမံတဲၤနှဲး, ပရၤဆါ, စဲာ်တစီာ်တကဲာ်ထာ်တပွဲးနီး.”
19ယ့ၣ်ရှူးဒီၣ်က့ၤစဲာ်တစီာ်, “အဳပၠၤအတဲၤဘူၣ်တဲၤနဲၢ်တအီၣ်နီး တခွံ, ယကအီၣ်ကိာ်ဘဲာ်သံ ကါတၢ်ဓဲၢ်. ယဘဲာ်ကီးသးဒီသံထိး တဲၢ်. လ့ၤအံာ်စဲာ်ဒဳ ယအီၣ်ယဳၤ.” 20စဲာ်တစီာ်လ့ၤအံာ်စဲာ်ဒဳ ယ့ၣ်ရှူးအီၣ်နဳၤ.
တဲၤနှဲးစာ်ထၱးယ့ၣ်ရှူးဒဳၣ် အထၱးလၤတ့ၢ်အပံၤ စဖဳးထိစသံမူၢ်ကျဲး ကဲၤနဳၤ. စလၤတ့ၢ်လၢ်ခဳး, စဖျီး တကျဳကၱာ်စဧီၢ်ဗူသဘဳာ်ထာ်ကဲၤ.
21ယ့ၣ်ရှူးဒီၣ်ကဲၤစပာ်, “တဲၤဖၱထာ်နံၤစဲာ် ကယဳၤ, အအီၣ် တၢ်ဓဲၢ်ထဳ.”
စဒီၣ်, “လှ့စၡံးဖဳးဝ့ၤနဳၤ. 22အီၣ်အဲပျာ် အထၱးလၤတ့ၢ်စဲာ်မှၱး ကျဲ, ထံကျဲဒဳအကသံကအီၣ်အကြီာ် ပူၤနဳၤ. နမဲၤကဲာ်ထာ်ဘ့ာ်မ့ဒဳၣ်, ခီၣ် ဝဲၤမှီးဘဲာ် ပီၢ်ဝၤ ကၱာ်မဲၤဇဳၤပီၢ်ဝၤ.”
23ယ့ၣ်ရှူးဒီၣ်က့ၤစဲာ်, “နဘူၣ်ကဲာ်ထာ် မၤဒဳၣ်, တဲၤဖၱထာ်နံၤ ဇၤတပွဲးစဲာ်ကိမံၤမံၤထဲၢ်အဘူၣ် တပွဲၤနဳၤ.”
24ဘ့နဳၤအပံၤစဖဳးစပာ်ထဳထာ်အလ့ၢ်, စကၢ်ဓူထံလၤကၱာ်စဒီၣ်ကဲၤ, “ယဘူၣ်တပွဲး. မဲၤဇဳၤပီၢ်ယဲၤဒဳယတဲၤဘူၣ်တအီၣ်နီးအပူၤ.”
25ယ့ၣ်ရှူးစာ်ထၱးပၠၤစွဲးလ့ၤဘီာ်ချဳး ကဲၤ စဲာ်ဒဳၣ်, စဟီကဲၤတဲၤ နှဲးကၱာ် စဒီၣ်, “နဲၤ, တဲၤနှဲးအနံၤ ကူၤတအဳကၱာ်အပျၱၤကျဳၤ, ယမှဲးလၤနဲၤ, ဟဲထာ်ကဲ ပီၢ်ကၱာ်က့ၤဘးပ့ၤမဲးတပျါပ့ၤမဲး.”
26တဲၤနှဲးကဲာ်ဧဳၤကၱာ်ထၱးလၤခူးဝှါအပံၤ စဖဳး, ဟဲးထာ်ကဲၤ. အပံၤစဖဳးမဲၤကဲၤစာ်ဘိအသံနဳၤ, မဲၤကနဳၤပၠၤအီၣ်အဲပွဲၤဒီၣ်, “စသံထဳ.” 27ပရၤ ဆါယ့ၣ်ရှူးပိာ်က့ၤစစူးခီး, စစွံးဝဲၢ်ထဳးလၢ်ဝၤဒဳၣ်စဆီ ထဳးအီၣ်တပွဲၤကဲၤ.
28ဘ့ယ့ၣ်ရှူးက့ၤနံၢ်ၡံၣ်ပူၤတပျာ်, စပျဲၢ် စဘီၣ်တစီာ်ဒဲစာ် ဟူၣ်ဇီၤကဲၤစဲာ်, “ဝၤတနှးဟဲးထာ် ဇၤမၤတဲၤၡံးတဲၤနှဲးနီးနဲၢ်.”
29စဒီၣ်က့ၤလၢ်ဝၤ, “တဲၤနှဲးအယဳၤတမဳၤ နဳၤ, ကနှးဟဲးထာ် ကဲာ်ထာ်စဲာ်ကၱာ်တဲၤသဘဲ ကၱာ်တဲၤ ဒူၣ်တဲၤအၣ်တဲၤအီလီၤ.”
တဲၤဒီဆးတီၤလီၤတဲၤဆဲးညဲပီၤတီၤကၠံၢ်ပျာ်တပျာ်
(မး ၁၇:၂၂-၂၃, လူၤ ၉:၄၃-၄၅)
30ယ့ၣ်ရှူးဟဲးထာ်ဝှါစလ့ၤကိာ်ကဲၤ ကၤ လံၤလဲက့ၤကၱာ်စတသးအဲးနံၤကဲၤပၠၤကသၱာ်ဟဲကိာ် တဗွဲနီး. 31မၤနဲၢ်, စသိၣ်အံာ်သီ အံာ်စပျဲၢ်စဘီၣ်တစီာ်ကၱာ်စဒီၣ်, “ပၠၤအဖဳးနဳၤကဘဲာ်ဟိလါကီ ဒဳပၠၤတစီာ်အစူးခီးပူၤ, ဒဳၣ်စကမဲၤသံကီလၢ်ဝၤ, စသံ ဝှါသဳနံၤတနံၤနဳၤ, စကထာ်ပဳၤက့ၤကီ.”
32ပရၤဆါစဲာ်တစီာ်တသၱာ်ဟဲလၢ်ဝၤ အအဲနီး. မၱာ်စတဒဲစာ် ဘူၣ်ကဲၤလၢ်ဝၤနီး.
အဓဳၤအမူၤချဳမၱာ်ပီၢ်ပွဲၤ
(မး ၁၈:၁-၅, လူၤ ၉:၄၆-၄၈)
33အလ့ၤကါစဲာ်တစီာ် လ့ၤကဲၤဒဳကပ့းရနီၣ်အူးနဳၤ. ဘ့စအီၣ်ၡံၣ်ပူၤနဳၤ, စဒဲကဲၤစပျဲၢ်စဘီၣ် တစီာ်, “ဒဳကျဲးလီၤနဳၤသံတရၤလှဲး ကဲၤလၢ်ဝၤတၤအဝၱၤအကဲနဲၤ.”
34စအီၣ်ဇီၤလီၤကဲၤတစီာ်. မၤနဲၢ်, ဒဳကျဲးလီၤနဳၤစတရၤလှဲး လၢ်ဝၤထဲၢ်ဒဳစကျဲနဳၤအဓဳၤ အမူၤချဳမၱာ်ပွဲၤပွဲၤနဳၤ. 35စဆးနါ, ယဳၤ လၤတ့ၢ် ပျဳာ်ဝှါအပျဲၢ်အဘီၣ်ၡံးကၠံၢ်ပွဲၤကၱာ်ဒီၣ်ကဲၤစဲာ်တစီာ်, “အကသး အဲးဖၱထာ်အအူဆူးတပွဲၤပွဲၤနဳၤ, စကမၱာ် ဘဲာ်အကဓူၤလါကၱာ်လဳစါစဲး အဇိၤအပွဲၤလီၤ.” 36စယဳၤဝှါအပံၤစဖဳးတပွဲၤ, စဘဲလါလၢ်ဝၤဘ့အသကျါ မဲပူၤနဳၤ. စဇၢ်ကျဳၤဝှါလၢ်ဝၤဒဳၣ်, စဒီၣ်လၢ်ဝၤ, 37“ယမံၤ အပူၤ, အဖၱးနံၤအပံၤစဖဳးတပွဲၤနဳၤ, စဖၱးနံၤ တပွဲးယဲၤ. ကၱာ်ကယါပၠၤအဖၱးနံၤယဲၤတပွဲၤနဳၤ, စဖၱး နံၤတပွဲးအသဓဳလ့ၤယဲၤတပွဲၤနဳၤ.”
ဒဳယ့ၣ်ရှူးတခီဘဲာ်
(လူၤ ၉:၄၉-၅၀)
38စီၤယိၤဟၣ်ဒီၣ်က့ၤစဲာ်, “ဆရၣ်, ဝၤ စာ်ထၱးကဲၤပၠၤတပွဲၤ, ထဲၢ်အတမၱာ်ဝၤကျဲနီးနဳၤ နှးဟဲးထာ်ဖျီးမံတဲၤၡံးတဲၤနှဲးဒဳနမံၤအပူၤနဳၤဒဳၣ်, ဝၤမဲၤ ဒၱာ်ဒါကဲၤစဲာ်.”
39ယ့ၣ်ရှူးဒီၣ်, “မဲၤဒၱာ်ဒါပီၢ်မဲးစဲာ်မဲး. မၤနဲၢ်, ပၠၤအမဲၤတဲၤပီၤ တဲၤပၤဒဳယမံၤအပူၤတပွဲၤနဳၤ, တဒီမ့ၢ်ဆ့းပွဲးရှဳကးကၱးဇၤအံာ်တပွဲးယဲၤနီး. 40ပၠၤထဲၢ် အတထာ်ဒ့ဒီၣ်သံနီးတစီာ်နဳၤ မၱာ်အအီၣ်ဒဳ သံအီၣ်တခီ. 41ပၠၤတပွဲၤပွဲၤကအံာ်အီသံထံ ဒဳယမံၤအပူၤနဳၤ, ဒဳသံမၱာ်ပၠၤအဘဲာ် ကၠးခရၱာ်အစဲနဳၤဒဳၣ်, ယဒီဆးသံအတၱၢ်အမှး, စတနံၤဘဲာ်စဆိးစလှဲနီး တအီၣ်နီး.
တဲၤဆဲးကိနံၤတဲၤဒဲလၱၢ်ကျဲးအတအဲးနီးအလ့ၤ
(မး ၁၈:၆-၉, လူၤ ၁၇:၁-၂)
42“ကယါပၠၤအနှးအပံၤစဖဳးအဘူၣ်ယဲၤ တစီာ်မဲၤတဲၤခီၣ်ဝဲၤ နဳၤ, အမီၤဖျးဝဲၢ်စကီၢ်လီၤၡံာ်ဆဳး လဳၤ, ဆးလၤတ့ၢ်နံၢ်စဲာ်ဒဳပဲာ်လဲာ်ပူၤနဳၤ တခီ. 43နစူးခီးကမၱာ်ဘ့ာ်မ့တဲၤအဖၱထာ်နနံၤခံ တဲၤခီၣ်ဝဲၤဒဳၣ်, ဒာ် ဓူၢ်ကဲ. 44နလ့ၤနံၢ်မီၢ်ခဳးထံက့ၤကၱာ်နစူး ခီးတခီလီၤနဳၤ အအဲးဒဳၣ် လံကၱာ်နလၤလရာ်ကၱာ် နစူးခီးကၠံၢ်ခီလဳၢ်လဳၢ်, ‘ထဲၢ်ဒဳတဲၤအလှဳးသရးတသံနီး, ကၱာ်မှၱးတလၤပၱၢ်နီးအလ့ၤနဳၤ.’ 45နခၣ် ခီး ကမၱာ်ဘ့ာ်မ့ တဲၤအဖၱထာ်နနံၤခံတဲၤခီၣ်ဝဲၤဒဳၣ်, ဒာ်ဓူၢ်ကဲ. 46နလ့ၤနံၢ်မီၢ်ခဳး ထံက့ၤကၱာ်နခၣ်ခီး တခီလီၤနဳၤအအဲးဒဳၣ်လံကၱာ်နလၤလရာ်ကၱာ် နခၣ်ခီး ကၠံၢ်ခီ လဳၢ်လဳၢ်, ‘ထဲၢ်ဒဳတဲၤအလှဳးအသရးတသံနီး, ကၱာ်မှၱး တလၤပၱၢ် နီးအလ့ၤနဳၤ.’ 47နကၢ်ဓူကမၱာ်ဘ့ာ်မ့ တဲၤအဖၱထာ်နနံၤခံတဲၤခီၣ် ဝဲၤဒဳၣ်, စၱးဝၱဖျီးထာ်ကဲ, ကၱာ် ဝှ့ဖျီးမံစဲာ်. နလ့ၤနံၢ်မီၢ်ခဳးထံက့ၤကၱာ် နကၢ် ဓူအီၣ် တခီလီၤနဳၤ အအဲးဒဳၣ်လံကၱာ် နလၤလရာ်ကၱာ် နကၢ်ဓူကၠံၢ်ဖျဳးလဳၢ် လဳၢ်နဳၤ. 48‘ထဲၢ်ဒဳတဲၤ အလှဳးအသရး တသံနီး, ကၱာ်မှၱးတလၤပၱၢ် နီးအလ့ၤ နဳၤ.’
49“ပၠၤကိအပွဲၤကဘဲာ်မဲၤဝၱၤမဲၤစါအံာ်မှၱး အစာ်ဘိတဲၤလှူၣ် ထာ်အံာ်ဘဲာ်မဲၤဝၱၤမဲၤစါအံာ်ကၱာ်ဒံာ် သဲာ်အခီနဳၤ.
50“ဒံာ်သဲာ်မၱာ်အအဲးတပွဲး. ပရၤဆါအကတၡံမၤနီးဒဳၣ်, ကမဲၤၡံအံာ်ဒီတၤနဲၢ်.
“အီၣ်အံာ်ပီၢ်ဒံာ်သဲာ်သံကျဲကၱာ်အီၣ်ပျဳာ်ဆီယံၢ် လှဲးပီၢ်လၢ်ဝၤ.” စဒီၣ် လၢ်ဝၤဓဳၤ.
ទើបបានជ្រើសរើសហើយ៖
မၢ်ကူး 9: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.