လူၤကၣ် 8
8
အမံၤမှူးအဖၱးဇဳၤမဲၤဇဳၤတဲၤမဲၤတစီာ်
1တအီၣ်ယၱၢ်နီးယ့ၣ်ရှူးဟဲပိးဒဳကဲၤဒဳ အူးတစီာ် ကၱာ် ဒဳဖါတစီာ်အပူၤ, ကၱာ်စသိာ်အံာ်သီ အံာ်တဲၤကၱာ်ဒီၣ်အူဒီဆးကဲၤပၠၤကဘၱာ်စဲာ်အထံအက့ၤ အတဲၤသးလဳၢ်သးလၤအံာ်အဝၱၤအကဲ, အအီၣ်ကိာ်စကါ မၱာ်အပျဲၢ်အဘီၣ်ရှံးကၠံၢ်ပွဲၤ, 2ကၱာ် အမံၤမှူးအဘဲာ်မဲၤလှိမဲၤလၤက့ၤတဲၤ ၡံးတဲၤနှဲးကၱာ် တဲၤရွှံးတဲၤဆဲတစီာ်နဳၤ, နီၢ်မၤရၱ, ပၠၤယဳၤအမံၤ နီၢ်မၤကဒါ လၣ် ထဲၢ်ဘၱာ်စဲာ်နှးဟဲးထာ်ဖျီးမံကဲၤ ဒဳစဟၱးကျဲ တဲၤၡံးတဲၤနှဲးသါသိး တဒဳနဳၤတပွဲၤ, 3နီၢ်ယိၤအၣ်နၣ်, ဟ့ၤရိာ်အပွဲၤဓဳၤ စီၤဃူၤစါအမှဲတပွဲၤ, ကၱာ်နီၣ်စူၤစၣ်နၤ, ကၱာ်အမံၤမှူး အီၣ်အဲးအီးအီးအအံာ် အစာ်က့ၤ တဲၤဒဳအတဲၤအီၣ်နံၤ စဲာ်တစီာ်တကၱာ်တကီ တစီာ်နဳၤ.
အပၢ်တဲၤခွံအကလဲၤ
(မး ၁၃:၁-၉, မၢ် ၄:၁-၉)
4ဘ့ပၠၤအီၣ်အဲးအီးအီး အအီၣ်ဒဳအူး အလဝ့ၤတစီာ်လ့ၤဘီာ် ချဳးယ့ၣ်ရှူးအခၠၱးနဳၤ, စဒီဆးကဲၤ လၢ်ဝၤတဲၤကလဲၤတဓဲ—
5“ပၠၤတပွဲၤလ့ၤပၢ်ကဲၤတဲၤခွံ. ဘ့စပၢ်တဲၤခွံအခၠၱးနဳၤ, တစီာ် စီာ်လၤဓ့ၢ်ကျဲးဝဳၢ်ခဳး ဝဳၢ်လီၤကၱာ်ပၠၤခဲထာ် ယၢ်ထာ်အခဳး, ကၱာ်ထဳၣ်ဖဳးတစီာ် စီးအၣ်ကဲစဲာ်. 6တစီာ်စီာ်လၤဓ့ၢ်နံၤလဳၤဆီးခဳး, အထူးထာ်တဒဳးလီၤကၱာ် အသံဝံၤတြိၤဝှ့လဳၢ်ကြးလဳၢ်, မၤနဲၢ်ဒဳၣ်လၢ်ခဳးဟၱးတစီာ်ပွၱး နီး အခဳးအစဲနဳၤ. 7တဲၤခွံအလဝ့ၤတစီာ်လၤတ့ၢ်နံၤတၤဆူးတဲၤဖၱကျဲ, အဓဳၤထာ်ပျဳာ်လၢ်ဝၤ, ပရၤဆါတဲၤ ဆူးတဲၤဖၱယၱၤသံ တပွဲး 8တဲၤ ခွံအလၤတ့ၢ်နံၤဟၣ်ဟၱး ဝၱၤအခဳးတစီာ်နဳၤဓဳၤထာ်ဆးထာ်ဝှါအသဲာ်ထာ် ဖီ ထာ်တပွဲးအပျာ်တကယဲၤအပူၤ” စဒီၣ်ဓဳၤ.
“ပၠၤအနံၤကူၤအီၣ်တစီာ်ကသၱာ်ဟဲဒီဧဲၤ” စဒီၣ်ကဲၤဓဳၤ.
တဲၤကလဲၤအထာ်ပဳၤထာ်ဘါ
(မး ၁၃:၁၀-၁၇, မၢ် ၄:၁၀-၁၂)
9စပျဲၢ်စဘီၣ်တစီာ်ဒဲစာ်ကဲၤစဲာ် ထဲၢ်တဲၤ ကလဲၤအယဳၤ အထာ်ပဳၤထာ်ဘါမၱာ်ကဲၤတၤနဲၢ်နဳၤ. 10စဒီဆးလၢ်ဝၤတစီာ်, “မီၢ်ခဳး အထံက့ၤအတဲၤအီၣ် ဟူၣ်နဳၤသံသၱာ်ဟဲဘဲာ်တပွဲး. ပရၤဆါပၠၤအလဝ့ၤ တစီာ်အနံၤခံနဳၤမၱာ်စာ်ဘိတဲၤဒီၣ်အီၣ်အဓ့နဳၤလီၤ. ‘စစာ်နီၣ်သီစတကဲာ် ထၱးနီး, စဆီးခ့န့းနီၣ်သီ စတသၱာ် ဟဲနီး’ စဒီၣ်ကဲၤလၢ်ဝၤတစီာ်ဓဳၤ.
ယ့ၣ်ရှူးဒီဆးအပၢ်တဲၤခွံအတဲၤကလဲၤ
(မး ၁၃:၁၈-၂၃, မၢ် ၄:၁၃-၂၀)
11“ခဳနူၤယဳၤတဲၤကလဲၤမၱာ်ကယဳၤ, တဲၤခွံမၱာ်ကဘၱာ်စဲာ်အလ့ၢ်အဝှဲး. 12တဲၤခွံ အအီၣ်ကျဲးဝဳၢ်လီၤ တစီာ်မၱာ်ပၠၤထဲၢ်အသၱာ်ဟဲဘဲာ်ဝှါ ကဘၱာ်စဲာ်အလ့ၢ်အဝှဲးဒဳၣ်တဲၤၡံးတဲၤနှဲး လ့ၤကၱာ်ဖၱးကဲ တပွဲးဒဳစသးအပူၤနဳၤစာ်ဘိထဲၢ် စကတဘူၣ်နီးကၱာ် ဘဲာ် လှိထာ်က့ၤပီၢ်နီးနဳၤ. 13တဲၤခွံအလၤတ့ၢ် လဳၤဆီးခဳးတစီာ် မၱာ်ပၠၤ ထဲၢ်အသၱာ်ဟဲဘဲာ်ဝှါကဘၱာ် စဲာ်အလ့ၢ်အဝှဲး, ဒဳၣ်အဖၱးနံၤသးလဳၢ်သး လၤအံာ် တပွဲး. ပရၤဆါ မဲၤအစာ်ဘိတဲၤခွံထဲၢ်အခၣ်ဝံၤတလၤယီၢ်နီးအခီနဳၤ. စဲာ်တစီာ်အတဲၤဘူၣ်မၱာ်တဒဳတဆး, ကၱာ် ဘ့တဲၤနှးကါဘဲာ်စဲာ် အခၠၱး, စက့ၤဖျီးတပွဲး. 14တဲၤခွံအလၤတ့ၢ်နံၤတၤဆူးတဲၤဖၱအကျဲတစီာ်မၱာ် ပၠၤထဲၢ်အဆီးခ့န့းဝှါကဘၱာ်စဲာ်အလ့ၢ်အဝှဲး အလိၤကိာ် အတဲၤသး အဲးနံၤအကါ, အဘဲာ်အဳးထာ်သံဒဳ တဲၤဘဲာ် ၡဳဘဲာ်မၤ, အူစာ်လဲၤခၠါ ကၱာ် တဲၤမဲၤမီၤမဲၤမၤ အန့ၤအပူၤနဳၤဒဳၣ် အသဲာ်အဖီတမှံဇၤနီးတစီာ်နဳၤ. 15ပရၤဆါတဲၤခွံထဲၢ်အလၤတ့ၢ်နံၤဟၣ်ဟၱးအဝၱၤခဳး တစီာ်နဳၤ, မၱာ်ပၠၤ ထဲၢ်အအီၣ်အံာ်တဲၤသဳးဝၱၤသးမီၤ တစီာ်နဳၤသၱာ်ဟဲဘဲာ်ဝှါကဘၱာ်စဲာ်အလ့ၢ် အဝှဲးဒဳၣ် ဖၱးကျဳၤပိာ်ကျဳၤမှ့းကၱာ်သဲာ်ထာ်ဖီထာ်ဒဳ တဲၤခီးသးဒီ ဝၱၢ်သးဇဳၤ အပူၤတစီာ်နဳၤ.
မှၱးအူဒဳအအီၣ်ပးလှူၣ်လဲၢ်
(မၢ် ၄:၂၁-၂၅)
16“ပၠၤတဓဳၤလၤဝှါမှၱးအူဒဳကၱာ်ဖျး လၤဘံာ် အံာ်ပးလှူၣ်ဒးကဳ မၱတမၱာ်နီးဒီလါလ့ၤမံအတဓၢ်လဲၢ်တပွဲ နီး. မၱာ်ပၠၤဘဲထာ်စဲာ် ဒဳအလ့ၤထာ် ယၱၤနဳၤစာ်ဘိထဲၢ် ပၠၤအလ့ၤနံၢ်ရှံၣ်ပူၤတစီာ်ကစာ်ထၱးဇၤပီၢ်တဲၤလှၱနဳၤ.
17“မၤနဲၢ်ဒဳၣ်တဲၤအဟူၣ်အဇီၤတလှၱ တပျါနီးနဳၤတအီၣ်တမံ နီး, ကၱာ်ပၠၤလဲၢ်ဟူၣ်တဲၤတစီာ် နဳၤကလၱၢ်ထာ်ကီတဲၤလှၱအကျဲ.
18“မဲၤကနဳၤဒဳၣ်, သံဆီးခ့န့းစာ်တဲၢ်နဳၤ သဓံအံာ်ပီၢ်. မၤနဲၢ် ပၠၤအတဲၤအီၣ်တစီာ် ကနံၤဘဲာ် ဒဳၣ်ချဳကီ, မၱာ်ပၠၤအတဲၤတအီၣ်နီးတပွဲၤ နဳၤ စကမဳၤစအဲအီၣ်တကၱာ် တကီနှီနူၤကဘဲာ်ဖၱးသံဝံၢ် ကီစဲာ်” စဒီဆး ကဲၤလၢ်ဝၤတစီာ်ဓဳၤ.
ယ့ၣ်ရှူးအမဳၤကၱာ် စသဲပူၤဝ့ၤတစီာ်
(မး ၁၂:၄၆-၅၀, မၢ် ၃:၃၁-၃၅)
19ယ့ၣ်ရှူးအမဳၤကၱာ်စသဲပူၤဝ့ၤတစီာ် လ့ၤထၱး ကဲၤယ့ၣ်ရှူး, မၱာ်ဒဳပၠၤအပဳၤအဟီးအစဲ စတဓဳၤနံၢ်ထၱးဇၤလၢ်ဝၤနီး. 20ပၠၤတစီာ် ဒီဆး ကဲၤစဲာ်, “နမဳၤကၱာ်နသဲပူၤဝ့ၤတစီာ် ဆီထဳးအီၣ်ဒဳအချဳ နဳၤ, စဲာ်တစီာ်သးအဲးစာ်ထၱးနဲၤ” စဒီဆးလၢ်ဝၤဓဳၤ.
21စဒီၣ်က့ၤလၢ်ဝၤတစီာ်, “ယမဳၤကၱာ်ယသဲပူၤဝ့ၤမၱာ်ကယါ အဆီးခ့န့းကဘၱာ်စဲာ်အလ့ၢ်ကၱာ် အမဲၤကိာ်အကါတစီာ်နဳၤ.”
ယ့ၣ်ရှူးနှးအီၣ်ဇီၤလီၤကလံၤမဳၤဘံ
(မး ၈:၂၃-၂၇, မၢ် ၄:၃၅-၄၁)
22တနံၤတသဲယ့ၣ်ရှူးကၱာ်စပျဲၢ်စဘီၣ် တစီာ်ထာ်နံၢ်ချံပူၤကၱာ် စဒီၣ်ကဲၤလၢ်ဝၤတစီာ်, “လ့ၤကလ့ၤဒဳနှီးအလဝ့ၤတခီဝဳၢ်နဳၤ.” မဲၤကနဳၤ ဒဳၣ် စဲာ်တစီာ်လ့ၤကဲၤဒဳပဲာ်လဲာ်ထံခဳး. 23ဘ့စဲာ်တစီာ် ဝၤသဗ့ချံနဳၤ, ယ့ၣ်ရှူးဆီးမံကဲၤ. ယူခန့ ကလံၤတပဳၢ် ဆိးကဲၤဒဳနှီးပူၤနဳၤဒဳၣ်, စဲာ်တစီာ် အီၣ်ကဲၤတဲၤဘဲာ်ၡဳ ဘဲာ်မၤအပူၤ. 24မဲၤကနဳၤဒဳၣ်အပျဲၢ်အဘီၣ် တစီာ်လ့ၤထၱးကဲၤယ့ၣ်ရှူး, ထဳးဝဲၢ်စဲာ်, ကၱာ်ဒီၣ်, “ဆရၣ်, ဆရၣ်, ဝၤကသံကလှဲမဲၢ်တပွဲးကဲၤယဳၤ” စဒီၣ်လၢ်ဝၤဓဳၤ.
ဘ့နဳၤယ့ၣ်ရှူးဝဲၢ်ထဳးကၱာ်ဟီကဲၤဝှဲးထံကလံၤ ကၱာ်အဆီတဘးဒဳၣ်, ပွဲးအလၤပွဲး, တဲၤအီၣ်ဇီၤ လီၤကဲၤ. 25ကၱာ်ယ့ၣ်ရှူးဒီၣ်ကဲၤစပျဲၢ်စဘီၣ် တစီာ်, “သံတဲၤ ဘူၣ်အီၣ်ဒီၣ်လဲၢ်” စဒီၣ်ကဲၤ လၢ်ဝၤဓဳၤ.
စဲာ်တစီာ်ၡံးဆါ, ထဲးတမိၢ်တမှါ ကၱာ်လၤဒီၣ်လှဲး ကဲၤလၢ်ဝၤ, “အယဳၤမၱာ်ကဲၤပီၢ်ပွဲၤ, စထူးလၤမှဲးလၤ ကလံၤမဳၤဘံကၱာ်ပဲာ်လဲာ်ဓဳၤဒဳၣ် အဆီးခ့န့းမၤကဲၤ စလ့ၢ်နဲၢ်” စဲာ်တစီာ်ဒီၣ်ကဲၤဓဳၤ.
တဲၤနှးဟဲးထာ်တဲၤနှဲးဒဳကဒါရၤက့ၤနဳၤ
(မး ၈:၂၈-၃၄, မၢ် ၅:၁-၂၀)
26စဲာ်တစီာ်ဓဳၤလ့ၤကဲၤဒဳ ကဒါရၤအက့ၤ ပူၤနဳၤ, ထဲၢ်အအီၣ် ဝဲၢ်ကနၤကၤလံၤလဲက့ၤနဳၤ. 27ဘ့စခဲထာ် ခီခဳးနဳၤ, အူးဖဳးထဲၢ်တဲၤ နှဲးဖၱးဘဲာ်အီၣ် ယၱၢ်အီၣ်ကၠးကဲၤ တပွဲၤလ့ၤၡံစဲာ်. စတအီၣ်ရှံၣ်အီၣ်ဖါ နီး, တကိတသီးနီး, ကၱာ်ဟဲးအီၣ်ကဲၤဒဳလူၢ်ဘံာ်ခဳး တစီာ်အကျဲနဳၤ. 28ဘ့စစာ်ထၱးယ့ၣ်ရှူးနဳၤ, စကီၢ်လၤဘၱးတဒဲးလၢ်ဝၤအလှီမီၢ်, စထဳထာ်စလ့ၢ် ကၱာ်စဒီၣ်, “ယဘဲာ်ကၠးဘဲာ်ထီကၱာ်နဲၤတၤနဲၢ်, အဳ ယ့ၣ်ရှူး, ဘၱာ်စဲာ် အထာ်ယၱၤကဓူၤအဖဳး. ယတၤမီၤနဲၤ, မဲၤဆဲးညဲပီၢ်မဲးယဲၤမဲး” စဒီၣ်လၢ် ဝၤဓဳၤ. 29မၤနဲၢ်ဒဳၣ်, ယ့ၣ်ရှူးမှဲးလၤကဲၤတဲၤနှဲးအကၱကဲာ် အကဟဲးထာ်ဒဳပၠၤအနဳၤတပွဲၤအလီၤအခဳးအစဲနဳၤ. အီၣ် အဲပျာ်အပိာ်ကျဳၤၡး ကျဳၤစဲာ်, ကၱာ်ပၠၤစဳကျဳၤကၠၱၢ်ကျဳၤ စဲာ်ကၱာ်ထးလးပံၤကၱာ်တိၤအံာ် နီၣ်သီ စဲာ်နှီနူၤ စဒးထဳး ထဲဓူၢ်ဝှါထးလးပံၤတဲၤနှဲးမှီးလ့ၤစဲာ်ဒဳ လဳၤသံမံးဇ့ၤ ခဳးနဳၤ.
30ကၱာ်ယ့ၣ်ရှူးဒဲစဲာ်, “နမံၤမၱာ်တၤနဲၢ်” ကၱာ်စဒီၣ်က့ၤ, “ယမံၤမၱာ်လ့းကူၣ်” မၤနဲၢ်တဲၤနှဲးလ့ၤ နံၢ်အီၣ်အဲးအီးအီးစဟၱးကျဲ.
31တဲၤနှဲးတစီာ်တၤခီၣ်ဝဲၤယ့ၣ်ရှူးအကတမှဲး လၤပီၢ်စဲာ် တစီာ်အကက့ၤလၤဒဳ တဲၤလၤယီၢ် တပံၤအပူၤနီးနဳၤ.
32ဘ့နဳၤ ထီးအီၣ်အဲးအီးစရး အၣ်ကဲၤအဆဲၣ်ဒဳခီးလီလီၤတပဳၤ. မဲၤကနဳၤဒဳၣ် တဲၤနှဲးတလၢ်တၤ မီၤဇၱၢ်ယ့ၣ်ရှူးအကအံာ်စဲာ်တစီာ်လ့ၤ နံၢ်ဒဳ ထီးတစီာ်အပူၤနဳၤဒဳၣ်, ယ့ၣ်ရှူးအံာ်တပွဲးစဲာ်အခွဲး. 33တဲၤနှဲး တစီာ်ဟဲးထာ်ကၱာ်လ့ၤနံၢ်ကဲၤထီးတစီာ်အပူၤ, ထီးဟီး တစီာ်စွဲးလၤပျၤ ပူၤ, လၤတ့ၢ်နှီးပူၤကၱာ်လၤပြူးသံတပွဲး ထံ.
34အစာ်အံာ်ထီးတစီာ်စာ်ထၱးတဲၤဖၱထာ် ကနဳၤဒဳၣ်, စဲာ်တစီာ် စွဲးလ့ၤဒဳအူးပူၤကၱာ်ဒဳလါဖါပူၤ ကၱာ်ဒီဆးကဲၤပၠၤ. 35ကၱာ်ပၠၤတစီာ်ဟဲးထာ်ကၱာ် လ့ၤစာ်ကဲၤ တၤဖၱထာ်ကဲၤနဲၤ နဳၤ. စဲာ်တစီာ်လ့ၤထၱးယ့ၣ်ရှူး ကၱာ် စာ်ထၱးကဲၤပၠၤနှဲး ဟဲးထာ်ကဲၤအဟၱး ကျဲတပွဲၤဆးနါ လါအီၣ်ယ့ၣ်ရှူးအခၣ်ထၱး, ကိသီးသအူသအဲးကၱာ် အီၣ် သါပြၢ်စွံးဒဳးဒဳၣ်, စဲာ်တစီာ်ၡံးဆါကဲၤ. 36ကၱာ်ပၠၤအစာ်ထၱးကဲၤတစီာ်မၱာ်မၱာ် ဒီဆးအံာ်ကဲၤတဲၤ ထဲၢ်လ့းကူၣ်လှိထာ်ကဲၤစာ်တဲၢ်နဳၤ. 37ပၠၤထဲၢ်အအီၣ်ကဒါရၤက့ၤသဒဲက့ၤတစီာ် တၤမီၤ ယ့ၣ်ရှူးအကဟဲးထာ် စထံစက့ၤအပူၤ, မၤနဲၢ်ဒဳၣ်, ကမးဖဳးတစီာ်ၡံးဆါသးကနၢ်ဆိးကဲၤ. ယ့ၣ် ရှူးခဲထာ် နံၢ် ချံပူၤကၱာ် က့ၤဘးကဲၤအလ့ၤကါ. 38ပၠၤထဲၢ်တဲၤရှံး တဲၤနှဲး ဟဲးထာ်ဝှါအဟၱးကျဲတပွဲၤ တၤခီၣ်ဝဲၤစဲာ်အကအီၣ်ကိာ်စကါ.
39ပရၤဆါ ယ့ၣ်ရှူးနှးက့ၤစဲာ်, စဒီၣ် လၢ်ဝၤ, “က့ၤပီၢ် နရှံၣ်ကၱာ်ဒီဆးပီၢ်ပၠၤထဲၢ်ကဘၱာ်စဲာ် မဲၤနံၤနဲၤတစီာ်နဳၤ” စဒီၣ်လၢ်ဝၤဓဳၤ.
မဲၤကနဳၤစလ့ၤကဲၤဒဳအူးပူၤကၱာ် ဟဲးပီၢ်အံာ်ကဲၤလဳ တဲၤထဲၢ်ယ့ၣ်ရှူး မဲၤနံၤကဲၤစဲာ်တစီာ်နဳၤ.
စီၤယၤအ့ၤရူးအဖဳးမူၤကၱာ်အမံၤမှူးသွံၣ်ဖျီးတပွဲၤ
(မး ၉:၁၈-၂၆, မၢ် ၅:၂၁-၄၃)
40ဘ့ယ့ၣ်ရှူးဓဳၤဘးက့ၤနဳၤ, ပၠၤအပဳၤအဟီးၡံ အံာ်ကဲၤစဲာ်, မၤနဲၢ်ဒဳၣ်, စဲာ်တစီာ်အီၣ်ဆိဧိၢ် တိၤလၤအံာ်စကျဲး. 41ကၱာ်စာ်ပီၢ်, ပၠၤအစာ်အံာ် ဘူၣ်ဘျီၣ်အခဳးအမံၤမၱာ်စီၤယၤအ့ၤရူးတပွဲၤလ့ၤ, စကီၢ်လၤ ဝှါဒဳယ့ၣ်ရှူး အခၣ်ထၱးနဳၤ စတၤခီၣ်ဝဲၤ လၢ်ဝၤအကလ့ၤဒဳစရှံၣ်နဳၤ. 42မၤနဲၢ်ကဒီၣ် ဓဳၤဒဳၣ်, စဖဳးမူၤအအီၣ်ကီၡံးကၠံၢ်ဒ့ာ်တပွဲၤနဳၤ, သးမီ သံ ကဲၤအစဲနဳၤ.
ဘ့ယ့ၣ်ရှူးလ့ၤကိာ်ကျဲးအခၠၱးနဳၤ, ပၠၤ အပဳၤအဟီးဆးသနၱးဝဲၢ်ကဲၤစလီၤ. 43အမံၤမှူးအသွံၣ်ဖျီး ဘးကဲၤၡံးကၠံၢ်ဒ့ာ်အီၣ်ကဲၤတပွဲၤ, ကၱာ်ကမးဖဳးလဳၢ် ဝှိလဳၢ်ထဲကဲၤဒဳတဝှံးဆရၣ်တစီာ်အဆိးအလှဲနှီနူၤ, ဆရၣ်တပွဲတပြးလှဲမဲၢ်ဇၤကဲၤနီး. 44စလ့ၤဒဳ ယ့ၣ်ရှူးအလ့ၤကါ ကၱာ် ဖၱးဘဲာ်ကဲၤစၡံာ်ဒဳအကါပဇွဲၤ ကၱာ်တပျာ် ခါလီၤစသွံၣ်ဖျီးဆီတဘးကဲၤ. 45ယ့ၣ်ရှူးဒဲကဲၤပၠၤ, “ပီၢ်ပွဲၤတီးဘဲာ်ယဲၤပွဲၤ” စဒီၣ်ဓဳၤ.
ပၠၤတဒီၣ်ကဲၤအတီးဘဲာ်စဲာ်တဗွဲနီး. စီၤပ့းတရူးကၱာ် ပၠၤအအီၣ်ကိာ်စကါတစီာ်ဒီၣ်, “ဆရၣ်, ပၠၤအပဳၤအဟီးတစီာ်ဆးကနၱၤကနိၤတပွဲး နဲၤပွ့ ကနဳၤဒဳၣ်, ပီၢ်ပွဲၤတီး ဘဲာ်နဲၤပွဲၤ နဒဲဇၤဝ့ၤတပွဲးဒီဒဳၣ်ဧါ” စဒီၣ်ၡံက့ၤကဲၤ ဓဳၤ.
46ပရၤဆါယ့ၣ်ရှူးဒီၣ်, “ပၠၤတီးဘဲာ်ယဲၤ တပွဲၤ, မၤနဲၢ်ကဒီၣ် ဓဳၤဒဳၣ်, ယသၱာ်ဟဲတပွဲးထဲၢ် တဲၤစိသလဲဟဲးထာ်ကဲၤဒဳယလီၤနဳၤ” စဒီၣ်ၡံ က့ၤကဲၤလၢ်ဝၤတစီာ်ဓဳၤ. 47ဘ့အမံၤမှူး တပွဲၤစာ်ထၱးကဲၤထဲၢ်စတအီၣ်တဘံတဘးဇၤပ့ၤနီး နဳၤဒဳၣ်, စလ့ၤအလှီမီၢ်, စကနၢ်တဇၱၤဝှါ ကီၢ်လၤကဲၤ ဒဳယ့ၣ်ရှူးအခၣ်ထၱးကၱာ်ဒီၣ်လှၱထာ်ဖျီထာ်ကဲၤ ထဲၢ် စတီး ဘဲာ်မၤလၢ်ဝၤအဝၱၤအကဲ, ကၱာ်စတဲၤဆဲလှဲမဲၢ် တပျာ်ခါလီၤအဝၱၤအကဲဒဳ ပၠၤလဳစါစဲးအလှီမီၢ်နဳၤ. 48ယ့ၣ်ရှူးဒီၣ်စဲာ် “အဖဳးမူၤ, နတဲၤဘူၣ်မဲၤ လှိထာ်ထဳနဲၤထဳ. က့ၤမီၤမီၤပီၢ်.”
49ဘ့စယၱၢ်ဘဲာ်ဖါသးနဳၤ, ဒဳအစာ်အံာ်ဘူၣ်ဘျီၣ် အရှံၣ်ပူၤ ပၠၤလ့ၤကဲၤတပွဲၤကၱာ် စဒီၣ်လၢ်ဝၤ, “နဖဳးမူၤသံထဳ, မဲၤဆီးဝဲဘဲသးပ့ၤပီၢ် မဲး ဆရၣ်မဲး” စဒီၣ်ကဲၤလၢ်ဝၤဓဳၤ.
50ပရၤဆါ ဘ့ယ့ၣ်ရှူးသၱာ်ဟဲဘဲာ် တဲၤယၱၢ်ဘဲာ်အယဳၤဒဳၣ်, စဒီၣ်ကဲၤအမံၤမှူးဖဳး အပာ်ကယဳၤ, “ၡံးဆါပီၢ်မဲး, အီၣ်အံာ်ပီၢ်တဲၤဘူၣ်လီၤ ကၱာ်စကလှိထာ်က့ၤတပွဲး” စဒီၣ်ကဲၤလၢ်ဝၤဓဳၤ.
51ဘ့စဓဳၤလ့ၤရှံၣ်အခၠၱးနဳၤ, စတအံာ်ကဲၤ ပၠၤကလ့ၤနံၢ်ကိာ်စကါရှံၣ်ပူၤတဗွဲနီး, မၱာ်စီၤပ့းတရူး, စီၤယၤကိာ်, စီၤယိၤဟၣ် ကၱာ်အမံၤ မှူးဖဳးအမဳၤအပာ် လီၤ. 52ကၱာ်ပၠၤလဳစါစဲးဟးအံာ်ကဲၤ အမံၤမှူးဖဳး တခီ. ပရၤဆါယ့ၣ်ရှူးဒီၣ်စဲာ်တစီာ်, “ဟးပီၢ်မဲး, စဆီးမံ. တဘဲာ်စသံနီး” စဒီၣ်ကဲၤလၢ်ဝၤတစီာ်ဓဳၤ.
53မဲၤကနဳၤဒဳၣ်, စဲာ်တစီာ်ယဲၢ်ကးရးအံာ် ကဲၤယ့ၣ်ရှူး, မၤနဲၢ် စဲာ်တစီာ်သၱာ်ဟဲကဲၤအမံၤမှူးဖဳး သံထဳနဳၤ. 54ပရၤဆါယ့ၣ်ရှူး ဖီး ကျဳၤစစူးခီး, ထဳထာ်စလ့ၢ်ကၱာ်ဒီၣ်, “အမံၤမှူးဖဳး, ဝဲၢ်ထဳးပီၢ်.” 55ဘ့နဳၤစသးက့ၤဘးထၱးစန့ၤဘၱစဲာ်ကၱာ် စဝဲၢ်ထဳးတနၢ်ကဲၤ. ကၱာ်ဒီယ့ၣ်ရှူး နှးပၠၤအံာ်စအၣ် တဲၤအၣ်တမံၤမံၤ. 56ဘ့နဳၤစမဳၤစပာ် ထဲးတမိၢ် တမှါဆိးကဲၤ, ပရၤဆါ ယ့ၣ်ရှူးမှဲးလၤစဲာ်တစီာ်အကတဒီဆးပၠၤတဲၤဖၱ ထာ်အယဳၤတဗွဲနီးနဳၤ.
ទើបបានជ្រើសរើសហើយ៖
လူၤကၣ် 8: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
