လူၤကၣ် 7
7
ယ့ၣ်ရှူးမဲၤမှးက့ၤကျံဗဳၤဓဳၤအဇိၤဖဳး
(မး ၈:၅-၁၃)
1ဘ့ယ့ၣ်ရှူးဒီထိးဒီတလဲၤဝှါပၠၤတစီာ်ဒဳၣ်, စလ့ၤနံၢ်ကဲၤဒဳ ကပ့းရနီၣ်အူးပူၤနဳၤ. 2ဘ့နဳၤ ကျံအပွဲၤ တကယဲၤအခဳးဗဳၤဓဳၤတပွဲၤ အဇိၤဖဳးထဲၢ် စဘဲာ်လီၢ်တပွဲၤနဳၤရွှံးဆိးကဲၤပွ့ စသးမီသံကဲၤနဳၤ. 3ကျံဗဳၤ ဓဳၤတပွဲၤနဳၤသၱာ်ဟဲဘဲာ်ယ့ၣ်ရှူးအဝၱၤ အကဲဒဳၣ်, စသဓဳလ့ၤကဲၤယူ ဒၤဖဳးအဓဳၤအပွ့ၤတစီာ်ဒဳ ယ့ၣ်ရှူးအီၣ်နဳၤစာ်ဘိထဲၢ်စကမဲၤမှးက့ၤ ပီၢ်လၢ် ဝၤနဳၤ. 4ဘ့စဲာ်တစီာ်ဓဳၤထၱးယ့ၣ်ရှူးနဳၤ, စတၤမီၤ လၢ်ဝၤအဇၱၢ်အဇိၢ်, ကၱာ်စဒီၣ်, “စမီၤတးနံၤတပွဲး နကမဲၤနံၤစဲာ်တဲၤအယဳၤနဳၤ. 5မၤနဲၢ်ကဒီၣ်ဓဳၤ ဒဳၣ်, စဘဲာ်လီၢ်ဝၤထံဝၤက့ၤ, ကၱာ်စဲာ်သဲန့ၤ ပြးနံၤကဲၤ ဝၤ ဘူၣ်ဘျီၣ်,” စဒီၣ်ကဲၤလၢ်ဝၤဒဳၣ်.
6မဲၤကနဳၤဒဳၣ်ယ့ၣ်ရှူးလ့ၤကိာ်ကဲၤစကါ. ဘ့စဓဳၤလ့ၤဘိးထၱး လၢ်ဝၤအရှံၣ်နဳၤ, ကျံဗဳၤဓဳၤသဓဳ လ့ၤကဲၤအသီၣ်တစီာ်အကဒီဆးစဲာ်, “ဘၱာ်စဲာ်, ခးဆီးဝဲပီၢ်မဲး, မၤနဲၢ်ဒဳၣ်, ယတတးမဲၤနကလ့ၤ နံၢ်ယရှံၣ် ခဳး လဲၢ်နီး. 7မဲၤကနဳၤ, ယကမဳၤကီ ယဲၤသဲန့ၤ, ယတတးမဲၤအကလ့ၤထၱးနဲၤနီးနဳၤ. မၱာ် ဒီၣ်ပီၢ်နလ့ၢ်တမှိလီၤကၱာ်ယဇိၤဖဳးကမှးက့ၤတပွဲး. 8မၤနဲၢ်ကဒီၣ်ဓဳၤဒဳၣ်, ယဲၤမၱာ်ပၠၤအအီၣ်တဲၤကါ လဲၢ်တပွဲၤ, ကၱာ် ကျံဖဳးအအီၣ်ယကါလဲၢ်တစီာ်စီာ်, ကၱာ်ဘ့ယဒီၣ်ကျံဖဳးတပွဲၤပွဲၤ, ‘လ့ၤ,’ ဒဳၣ်စလ့ၤတပွဲး. ကၱာ်ယဒီၣ်အလဝ့ၤတပွဲၤပွဲၤ, ‘လ့ၤဘ့ယဳၤ,’ ဒဳၣ်စလ့ၤ ထၱးတပွဲးယဲၤ, ကၱာ်ဘ့ဒီၣ်ယဇိၤယပွဲၤတပွဲၤပွဲၤ, ‘မဲၤတဲၤအယဳၤ,’ ဒဳၣ်စမဲၤတပွဲး.”
9ဘ့ယ့ၣ်ရှူးသၱာ်ဟဲဘဲာ်တဲၤအယဳၤဒဳၣ်, စထဲးတမိၢ်တမှါ, စစာ်ဘးဝှါ ပၠၤအပဳၤအဟီးအလ့ၤ ကိာ် စလ့ၤတစီာ်ဒဳၣ်, “ယဒီဆးသံ အတၱၢ်အမှး, ဒဳအံၣ် စရ့လးဖဳးတစီာ်အကျဲနှီနူၤ, ယတပးထၱးတဲၤဘူၣ်အဓဳၤ ပွ့ ကယဳၤနီး.”
10ကၱာ်ဒီ ဘ့ပၠၤအဘဲာ်သဲလ့ၤတစီာ် ဓဳၤက့ၤရှံၣ်နဳၤ, စစာ်ထၱး ဘဲာ် ဇိၤဖဳးအရွှံးဆိးကဲၤတပွဲၤ အီၣ်မိၢ်အီၣ်မှးက့ၤတပွဲးကဲၤနဳၤ.
ယ့ၣ်ရှူးမဲၤသမိထာ်က့ၤအမှူးကမဲၤအဖဳးခဳ
11အလ့ၤကါတနံၤနဳၤ, ယ့ၣ်ရှူးလ့ၤကဲၤဒဳ အူး ထဲၢ်ပၠၤယဳၤနၤအံၣ်အူးနဳၤ. စပျဲၢ်စဘီၣ်ကၱာ်ပၠၤအပဳၤအဟီးလ့ၤကိာ်ကဲၤစကါ. 12ဘ့စဓဳၤဘိးထၱး အူး အခးကျဲၢ်ထၱးနဳၤ, စာ်ပီၢ်ပၠၤယးလ့ၤအမံၤခဳအသံ တပွဲၤအစဳး, ထဲၢ်အမှူးကမဲၤအဖဳးအီၣ်တပွဲၤလီၤနဳၤ. ပၠၤအပဳၤအဟီးအအီၣ်ဒဳ အူးပူၤတစီာ်မၱာ်မၱာ် လ့ၤ ကိာ် ကဲၤစကါကါ. 13ဘ့ဘၱာ်စဲာ်ယ့ၣ်ရှူး စာ်ထၱးစဲာ် နဳၤ, စခီၣ်ဝဲၤမှီးဘဲာ်လၢ်ဝၤဒဳၣ်စဒီၣ်, “ဟးပီၢ်မဲး.” 14မဲၤဝှါဒဳၣ်, စလ့ၤအလှီမီၢ်ကၱာ်တီးဘဲာ်ကဲၤလှီ, ကၱာ်ပၠၤအယးလူၢ်တစီာ်ဆီ ထဳးအီးကဲၤ. မဲၤဝှါစဒီၣ်, “အဘီာ်လီးဖဳး, ယဒီၣ်နဲၤ, ဝဲၢ်ထဳးပီၢ်တခး.” 15ဘ့နဳၤလီၤ, အသံတပွဲၤဝဲၢ်ထဳးဆးနါကၱာ်ယၱၢ်ဘဲာ်ကဲၤ. ကၱာ်ဒီ ယ့ၣ်ရှူးအံာ်က့ၤကဲၤစဲာ်ဒဳစမဳၤအစူးခီးပူၤနဳၤ.
16ပၠၤလဳစါစဲးၡံးဆါသးပဳၤဒဳၣ် စဲာ်တစီာ် ပဲၢ်တီၤပဲၢ်သ့းကဲၤကဘၱာ်စဲာ်, စဒီၣ်, “ဝံအဓဳၤပီးထာ် ကဲၤဝၤကျဲတပွဲၤ, ကၱာ်ကဘၱာ်စဲာ်လ့ၤထၱး ကဲၤစပၠၤ.” စဒီၣ်ကဲၤဓဳၤ.
17တဲၤအဝၱၤအကဲယဳၤ, ဒဲးလီၢ်ဒဲးခီကဲၤ ဒဳယူဒၤက့ၤကၱာ်က့ၤ ဝ့ၢ်က့ၤဝၤတစီာ်နဳၤ.
အဖဳးစူထံစီၤယိၤဟၣ်သဓဳလ့ၤအပွဲၤဇဳၤ
(မး ၁၁:၂-၁၉)
18စီၤယိၤဟၣ်အပျဲၢ်အဘီၣ်တစီာ်လ့ၤ ဒီဆးကဲၤစဲာ်တဲၤအဝၱၤ အကဲအယဳၤ. မဲၤကနဳၤဒဳၣ်, စီၤယိၤဟၣ်ယဳၤဝှါ အပျဲၢ်အဘီၣ်တစီာ်အကျဲ ကၠံၢ်ပွဲၤ ဒဳၣ်, 19စသဓဳလ့ၤကဲၤလၢ်ဝၤဒဳဘၱာ်စဲာ်ယ့ၣ်ရှူး အီၣ်ကၱာ် ဒီၣ်ကဲၤ, “နမၱာ်စဲာ်ထဲၢ်အကလ့ၤလၤဘဲာ်တပွဲၤနဳၤဧါ. မၱတမၱာ်နီးဝၤကဝၢ်လှဲး ဘဲာ်အလဝ့ၤတပွဲၤပွဲၤဧါ.” စဒဲလၢ်ဝၤဒဳၣ်.
20ဘ့စဲာ်တစီာ်ဓဳၤထၱးယ့ၣ်ရှူးဒဳၣ်, စဒီၣ်, “အဖဳးစူထံစီၤယိၤ ဟၣ်သဓဳလ့ၤကဲၤဝၤဒဳနအီၣ်နဳၤ, စနှး ဒဲစာ်ဝၤ, နမၱာ်စဲာ်ထဲၢ်အကလ့ၤလၤ ဘဲာ်တပွဲၤနဳၤဧါ. မၱတမၱာ်နီးဝၤကဝၢ်လှဲးဘဲာ်အလဝ့ၤတပွဲၤပွဲၤဧါ.” စဒဲကဲၤ လၢ်ဝၤတစီာ်ဓဳၤ.
21ဘ့နဳၤအခၠၱးမၱာ်ယ့ၣ်ရှူးမဲၤမှးက့ၤပၠၤ အရွှံးအဆဲ, တဲၤဆဲအမဳမဳၤ, တဲၤနှဲးဖၱးဘဲာ်တစီာ်ကၱာ် စမဲၤလှၱထာ်က့ၤပၠၤကၢ်ဓူအခၠၱးအီၣ်အဲဗွဲၤ နဳၤ. 22မဲၤကနဳၤဒဳၣ်, စဒီၣ်ကဲၤလၢ်ဝၤတစီာ်, “က့ၤကၱာ်ဒီဆး ပီၢ် စီၤယိၤဟၣ်တဲၤထဲၢ်သံသၱာ်ဟဲဘဲာ်ကၱာ် စာ်ထၱးဘဲာ် ကဲၤတစီာ်နဳၤ. အကၢ် ဓူခံးစာ်ထၱးဘဲာ်က့ၤ, အခၣ်ဒ့ာ်တစီာ်ခဲဇၤက့ၤ, အနံၤကူၤတအဳတစီာ် အအဲဖျီထာ်က့ၤ, အကလးကၠံးတစီာ်ပျၱစါက့ၤ, အသံတစီာ်ထာ်ပဳၤက့ၤ, အဆဲးညဲဖဳးတစီာ်နံၤဘဲာ်ဒီၣ်အူဒီဆးတဲၤသးလဳၢ် သးလၤအံာ်အဝၱၤအကဲ. 23ကၱာ်အဘဲာ်ဟိးဝၱၤ မၱာ်ပၠၤထဲၢ်အတအီၣ်ကၱာ်တဲၤသးပျဲၢ်သးယိၤ ယခဳးယစဲ နီးတစီာ်နဳၤ” စဒီဆးကဲၤလၢ်ဝၤတစီာ်ဓဳၤ.
24ဘ့စီၤယိၤဟၣ်အပွဲၤဇိၤတစီာ်က့ၤဝှါ နဳၤ, ယ့ၣ်ရှူးဒီဆးကဲၤ ပၠၤတစီာ်အဘဲာ်ကၠးစီၤယိၤဟၣ် အဝၱၤအကဲကယဳၤ, “သံလ့ၤစာ်ကဲၤတၤ ဒဳမှၱးလဲၢ်ကျဲ နဲၢ်. ကပီးသယဲအကျ့ၤကျၢ်ဒဳကလံၤကျဲနဳၤဧါ. 25မၱာ် သံလ့ၤစာ်လှဲး ကဲၤတၤနဲၢ်. ပၠၤအကိအသီး ကပဳၢ်ဖူ တပွဲၤတခီဧါ. စာ် ပီၢ်, ပၠၤအကိသံးသီး သံးကၱာ်အအၣ် ဝံာ်အၣ်ၡံတစီာ်အီၣ်တပွဲးဒဳဆဳးဖြဳ ဆးဖြးအရှံၣ်ပူၤ လီၤ. 26မၱာ်သံလ့ စာ်ကဲၤတၤနဲၢ်. ဝံတပွဲၤဧါ. ဘဲာ်ဟဳ, ယဒီဆးသံ, ပၠၤအဓဳၤချဳလံကၱာ်ဝံနဳၤ. 27အယဳၤမၱာ်စဲာ်ထဲၢ် တဲၤဝှ့းလၤတီၤလီၤကဲၤစဝၱၤစကဲနဳၤ, ‘စာ်ပီၢ်, ယသဓဳလ့ၤယပွဲၤဇိၤဒဳနလှီ မီၢ်နဳၤ, ထဲၢ်အကပြးနှဲးနကျဲးနသအီနဳၤ.’ 28ယဒီဆးသံ ကယါ ပၠၤအအီၣ်လၤကိာ်ကၱာ်အမံၤမှူးတစီာ်အကျဲ, ဝံအဓဳၤ ဒဳၣ်လံစီၤယိၤဟၣ် နဳၤတအီၣ်နီး. ပရၤဆါ အအီၣ်လၤဒဳ ကဘၱာ်စဲာ်အထံအက့ၤပူၤအၡံးဖဳး ကဓူၤတပွဲၤနှီနူၤ ဓဳၤ ဒဳၣ်လံဝ့ၤစဲာ်.”
29ကၱာ်ဒီဘ့ပၠၤတစီာ်သၱာ်ဟဲဘဲာ်ဝှါစတဲၤယၱၢ်ဘဲာ်ဒဳၣ်, ပၠၤလဳ စါစဲးကၱာ် အတၤတဲၤမှူတစီာ်ထါ ထာ်အံာ်ကဘၱာ်စဲာ်ဒဳစဲာ်တစီာ်နံၤဘဲာ် ကဲၤစီၤယိၤဟၣ် အတဲၤဖဳးစူထံအခဳးအစဲနဳၤ. 30ပရၤဆါ ဖၤရံၤၡဲ ဖဳးကၱာ်အဝှ့းစဲာ်တစီာ်တဖၱးကဲၤစတဲၤဖဳးစူထံနီး ကၱာ်ထဲးကဲထဲးအိးကဲၤတဲၤ ထဲၢ်ကဘၱာ်စဲာ်မဲၤနံၤကဲၤ စဲာ်တစီာ်နဳၤ.
31“ယကဒိးသီတြီၤအံာ်ကဲၤပၠၤအယဳၤ တစိၤကၱာ်တၤနဲၢ်. စဲာ် တစီာ်လၤကၱာ်တၤနဲၢ်. 32စဲာ်တစီာ်လၤကၱာ်တပွဲးအပံၤစဖဳးအဆး နါလၤ အီၣ်ဒဳ ပၠၤပွၱၤဆဲတဲၤအလ့ၤ, ကဲာ်ဧဳၤထာ်ကၱာ်ဒီၣ်လှဲးလၢ်ဝၤ, ‘ဝၤ အူးနံၤသံပလဳး, ပရၤဆါသံတဝဲၢ်ထဳး က့ၤစူး က့ၤခးနီး. ဝၤသါပိၢ်တဲၤသံ အတဲၤဒီလ့ၢ်, ပရၤဆါ သံတဟးနီး.’ 33မၤနဲၢ်ဒဳၣ်, အဖဳးစူထံ စီၤ ယိၤဟၣ်လ့ၤ, စတအၣ်တကဳာ်နီး, စတအီသဳာ် ပၡံးထံနီးကၱာ်သံဒီၣ်တပွဲး, ‘နှဲးပိာ်စဲာ်.’ 34ပၠၤအဖဳးလ့ၤ, စအၣ်အၣ်ကၱာ်စအီအီ, မဲၤကနဳၤ သံဒီၣ်, ‘စာ်ပီၢ်, ပၠၤအဓဳၤအၣ်, အအီသဳာ်ပၡံးထံတပွဲၤနဳၤ, စဲာ်မၱာ်အတၤ တဲၤမှူကၱာ်တဲၤခီၣ်ဝဲၤဖဳးတစီာ်အသီၣ်.’ 35ပရၤဆါတဲၤသၱာ်ဟဲ တဲၤ ဇၤတဲၤပျၤမၱာ်အလှၱ ထာ် ဖျီထာ်တပွဲးဒဳစဖဳးစလံၤတစီာ်အလီၤနဳၤ.”
အမံၤမှူးအဆးလၤက့ၤအသး
36ဖၤရံၤၡဲဖဳးတပွဲၤယဳၤကဲၤယ့ၣ်ရှူး လူၤမူၤဟဲးအတဲၤအၣ်အနံၤခံ, မဲၤကနဳၤဒဳၣ် ယ့ၣ်ရှူး လ့ၤနံၢ်ကဲၤဒဳ ဖၤရံၤၡဲအနဳၤတပွဲၤအရှံၣ်ပူၤနဳၤ ကၱာ် လ့ၤအီၣ်တီၤလီၤကဲၤဒဳတဲၤအၣ်အလ့ၤနဳၤ. 37ကၱာ်စာ်ပီၢ်, အမံၤမှူးထဲၢ်အမၱာ်တဲၤခီၣ်ဝဲၤဖဳးဒဳ အူးပူၤ နဳၤတပွဲၤ, သၱာ်ဟဲဘဲာ်ထဲၢ် ယ့ၣ်ရှူး လ့ၤအၣ်တဲၤအၣ်ဒဳ ဖၤရံၤၡဲအရှံၣ်နဳၤဒဳၣ်, စလ့ၤအံာ်ကဲၤလဳၤဘိ အမွှ့းအအီၣ်ပ့ထာ်ကၱာ်ဆံးနှူဝံာ်တမွှ့း, 38ကၱာ်ဆီထဳးအီးကဲၤဒဳယ့ၣ်ရှူး အကါတဆူ လါနဳၤ. စထဲလါကဲၤစကၢ်ဓူထံဒဳယ့ၣ်ရှူးအခၣ်လှဲာ်ခဳး ကၱာ်ထိ ဘါအံာ်ကဲၤစခူၣ်လူကၱာ်စစွၱးကဲၤ. မဲၤဝှါစသဖြိးကဲၤလၢ်ဝၤအခၣ်ခဳးကၱာ် ဆံးအနှူဝံာ်. 39ဘ့နဳၤဖၤရံၤၡဲ ဖဳးတပွဲၤစာ်ထၱးကဲၤဒဳၣ်, စဒီၣ်ဒဳစသးအဳးပူၤ, “ပၠၤအယဳၤတပွဲၤ, စကမၱာ်မၤဝံဒဳၣ်, အမံၤမှူးအတီးဘဲာ်စဲာ်တပွဲၤမၱာ် ပီၢ်ပွဲၤနဳၤစကသၱာ်ဟဲလၤဓူဧဲၤ, မၤနဲၢ်စဲာ်မၱာ်တဲၤခီၣ်ဝဲၤ ဖဳး,” စကမဳၤဓဳၤ.
40ယ့ၣ်ရှူးဒီၣ်ၡံက့ၤစဲာ်, “စီၤၡံမိၣ်, ယမီၤဒီဆးနဲၤတဲၤအီၣ်တမံၤ,” စဒီၣ်လၢ်ဝၤဓဳၤ.
ကၱာ်စဒီၣ်, “ဆရၣ်, ဒီဆးပီၢ်ယဲၤ,” စဒီၣ်ၡံက့ၤယ့ၣ်ရှူးဓဳၤ.
41“ပၠၤအအံာ်လီၤပၠၤဝှိတပွဲၤနဳၤ, အကအံာ် က့ၤဘဲာ်စဝှိအီၣ် ကၠံၢ်ပွဲၤ. တပွဲၤကအံာ်က့ၤဘဲာ်စဲာ်ဒန့ၤ ရံယဲၢ်ကယဲၤ, အလဝ့ၤတပွဲၤ, ယဲၢ် ခဲ. 42စဲာ်တစီာ် တအံာ်က့ၤကဲာ်ထာ်နီးဒဳၣ်, စဘးလှိလၢ်ဝၤကၠံၢ်ပွဲၤ လဳၢ်လဳၢ်. မဲၤကနဳၤဒဳၣ်, အကဘဲာ်လီၢ်ဒဳၣ်ချဳ စဲာ် မၱာ်ဘဲာ်လဲၢ်တပွဲၤပွဲၤ” စဒဲကဲၤလၢ်ဝၤဓဳၤ.
43“ယကမဳၤမၱာ်အကအံာ်က့ၤဘဲာ် ဒဳၣ် ဆဲးတပွဲၤနဳၤ” စီၤၡံ မိၣ်ဒီၣ်ၡံက့ၤစဲာ်ဓဳၤ.
ယ့ၣ်ရှူးဒီၣ်ကဲၤစဲာ်, “နဒီၣ်တၱၢ်ဒီၣ်မှးကဲၤဟဳ.” 44စစာ်ဘးဝှါအမံၤမှူးဒဳၣ်, စဒီၣ်ကဲၤ စီၤၡံမိၣ်, “နစာ်ထၱးတပွဲးအမံၤမှူးယဳၤဧါ. ယလ့ၤနံၢ် ကဲၤဒဳနရှံၣ်ပူၤ, နတအံာ်ယဲၤထံအကအူ ဆးဘါ ယခၣ်ခီးနီး. ပရၤဆါစဲာ်နဳၤ, စအူဆးဘါကဲၤယခၣ်ခီး ကၱာ်စကၢ် ဓူထံ, ကၱာ်ထိသိအံာ်ကဲၤစခူၣ်လူ. 45နတစွၱးကဲၤယဲၤနီး, ပရၤဆါ စဲာ်နဳၤ, ဓါယလ့ၤနံၢ်ဝှါရှံၣ် ပူၤလီၤနဳၤ, စတဆီးဒဲကဲၤအစွၱးယခၣ် ခီးတကၱနီး. 46နတသဖြိးအံာ်ယကဳာ်ကၱာ်တဲၤသဳးတမံနီး, ပရၤ ဆါစဲာ် နဳၤ, စလှီးလၤကဲၤယခၣ်လှဲာ်ခဳးတဲၤသဳးအနှူဝံာ်. 47မဲၤကနဳၤဒဳၣ် ယဒီဆးနဲၤ, စတဲၤခီၣ်ဝဲၤအီၣ် အဲးအီးအီးနီၣ်သီနှီနူၤ, ဒဳစတဲၤဘဲာ်လီၢ်ဓဳၤ အခဳးအစဲ, စတဲၤခီၣ်ဝဲၤတစီာ်ဘဲာ်ဘးလှိလဳထဳ,” စဒီဆးကဲၤ လၢ်ဝၤဓဳၤ.
48မဲၤဝှါစဒီၣ်ကဲၤအမံၤမှူး, “နတဲၤခီၣ်ဝဲၤ တစီာ်ဘဲာ်ဘးလှိလဳ ထဳ” စဒီၣ်လၢ်ဝၤဓဳၤ.
49ဘ့နဳၤပၠၤအအီၣ်ပျဳာ်စဲာ်ဒၱဝၢ်ထၱးတစီာ် ဒီၣ်ကဲၤဒဳအသးပူၤ, “ပၠၤအယဳၤတပွဲၤမၱာ်ကဲၤပီၢ်ပွဲၤ. စဘါပျဲးမၤပၠၤအတဲၤခီၣ်ဝဲၤနဲၢ်.”
50ပရၤဆါစဒီၣ်ကဲၤအမံၤမှူး, “နတဲၤဘူၣ် မဲၤလှိထာ်က့ၤထဳ နဲၤ, က့ၤပီၢ်ဒဳတဲၤစဳးတဲၤမီၤအပူၤနဳၤ” စဒီၣ်လၢ်ဝၤဓဳၤ.
ទើបបានជ្រើសរើសហើយ៖
လူၤကၣ် 7: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
