လူၤကၣ် 22
22
တဲၤဟိလါယ့ၣ်ရှူး
(မး ၂၆:၁-၅, မၢ် ၁၄:၁-၂, ယိၤ ၁၁:၄၅-၅၃)
1အခၠၱးဘိးထၱးကဲၤတကဳာ်ကမံၤ တပာ်နီးအပွဲထဲၢ်ပၠၤယဳၤ ပွဲး လ့ၤတလိးနဳၤ. 2ပၠၤလှူၣ်တဲၤအဓဳၤကၱာ်အဝှ့းစဲာ်တစီာ် ကဳထာ်ကၠး လၤကဲၤအကမဲၤသံယ့ၣ်ရှူး, မၱာ် စၡံးဆါနံၤကဲၤပၠၤအပဳၤအဟီးအလ့ၤ.
စီၤယူဒၤဟိလါယ့ၣ်ရှူး
(မး ၂၆:၁၄-၁၆, မၢ် ၁၄:၁၀-၁၁)
3မဳၤဒဲးလၱးလ့ၤနံၢ်ကဲၤစီၤယူဒၤ ထဲၢ်အမံၤ မၱာ်အံၣ်စကၤရံၤ အိာ်ကၱာ်အမၱာ်အပျဲၢ်အဘီၣ်ရှံး ကၠံၢ်ပွဲၤအကျဲတပွဲၤနဳၤအပူၤ. 4စဟဲးထာ်ကၱာ် ယၱၢ်ဘဲာ်တတီၤထၱးကဲၤပၠၤလှူၣ်တဲၤအဓဳၤတစီာ် ကၱာ်အတိၤ အံာ်တဲၤသဘဲတဲၤလှူၣ်ရှံၣ်ကျံဖဳးအခဳးအန့ၤတစီာ် စာ်ဘိထဲၢ် စကအံာ် လၤဖျီးမံပီၢ်ယ့ၣ်ရှူးဒဳလၢ်ဝၤ တစီာ်အစူးခီးပူၤနဳၤ. 5စဲာ်တစီာ်သး ကနၢ်အံာ် ကၱာ်လၤကျၤလှဲးလၢ်ဝၤအကအံာ်စဲာ်ဝှိလီၤ. 6စီၤယူဒၤ မၱာ်မၱာ်အဳလါကဲၤလၢ်ဝၤတစီာ်အကဝၢ်လှဲး ဟူၣ်ဇီၤအကြီာ်အပ့ၤစာ်ဘိ ထဲၢ်အကအံာ်လၤယ့ၣ်ရှူး အနံၤခံတဲၤအဒၱာ်ဒါကးကျဲးတအီၣ်ပီၢ်နီးနဳၤ.
တဲၤပြးတီၤလီၤပွဲးလ့ၤတလိးအတဲၤအၣ်
(မး ၂၆:၁၇-၂၅, မၢ် ၁၄:၁၂-၂၁, ယိၤ ၁၃:၂၁-၃၀)
7ဘ့တကဳာ်ကမံၤတပးနီးအပွဲဘဲာ်နဳၤ, ပွဲးလ့ၤတလိးအတဲၤ အၣ်အနံၤခံ သဳကဘဲာ်တဲၤမဲၤ သံကဲၤ. 8ယ့ၣ်ရှူးသဓဳလ့ၤစီၤပ့း တရူးကၱာ် စီၤယိၤဟၣ်, စဒီၣ်, “လ့ၤကၱာ်ပြးတီၤလီၤပီၢ်ဝၤနံၤခံ စာ်ဘိ ထဲၢ်ဝၤကအၣ်ပီၢ် ပွဲးလ့ၤတလိးအတဲၤအၣ်နဳၤ” စဒီၣ်လၢ်ဝၤဓဳၤ.
9စဲာ်တစီာ်ဒီၣ်, “နသးအဲးနံၤတဲၤလ့ၤဒီၣ် လဲၢ်” စဒဲလၢ်ဝၤတစီာ်ဓဳၤ.
10မၱာ်စဒီၣ်လၢ်ဝၤတစီာ်, “စာ်ပီၢ်, ဘ့သံလ့ၤနံၢ်အူးပူၤ အခၠၱး နဳၤ, သံကထဲးကျဲၢ်နံၤပၠၤအဟဲးယးအံာ်ထံကပဳၤတပွဲၤ, ဟဲးကိာ်စလ့ၤထိ သံဓဳၤလ့ၤ ရှံၣ်ဒဳ စလ့ၤနံၢ်အပူၤတဝၤနဳၤ. 11မဲၤဝှါသံ ကဒီၣ်ဘဲာ် ရှံၣ်ဘၱာ်စဲာ်ကယဳၤ, ဆရၣ်သးအဲးသၱာ်ဟဲ ရှံၣ်ဒဳးထဲၢ်စကအၣ် ပျဳာ်စပျဲၢ်စဘီၣ်တစီာ်ပွဲးလ့ၤ တလိးအတဲၤအၣ်အီၣ်ဒီၣ်လဲၢ်နဳၤ, စမှဲးလၤလၢ်ဝၤ တစီာ်ဓဳၤ. 12ရှံၣ်ဘၱာ်စဲာ်ကဒဲလၱၢ်သံဒဳရှံၣ် အကီၢ်ထာ်တတီၤ ရှံၣ်အီပူၤအအီၣ်ပြးတီၤလီၤ, ဒဳနဳၤ ပြးတီၤလီၤပီၢ်တဲၤအၣ်ပွဲအနံၤခံ” စဒီၣ်လၢ်ဝၤတစီာ် ဓဳၤ.
13စဲာ်တစီာ်လ့ၤကၱာ် စာ်ထၱးကဲၤအစာ်ဘိ ယ့ၣ်ရှူးဒီ ဆးစဲာ် တစီာ်အသရ့နဳၤလီၤ. ကၱာ်စဲာ်တစီာ်ပြးတီၤလီၤကဲၤပွဲးလ့ၤတလိးအတဲၤ အၣ်အနံၤခံ.
လူၤမူၤဟဲးအတဲၤအၣ်
(မး ၂၆:၂၆-၃၀, မၢ် ၁၄:၂၂-၂၆, ၁ ကရံၣ် ၁၁:၂၃-၂၅)
14ဘ့အခၠၱးဘဲာ်နဳၤ, ယ့ၣ်ရှူးဖၱးကဲၤအလ့ၤ ဒဳစူးဒဲးခဳးနဳၤ ကၱာ်စအပျဲၢ်အဘီၣ်တစီာ်အီၣ်ကိာ် ကဲၤစကါ. 15စဒီၣ်ကဲၤလၢ်ဝၤတစီာ်, “တချူးကၱာ်ယခးဘဲာ်တဲၤဆဲးညဲပီၤတီၤနှၱနီးနဳၤ, ယသးအဲးအၣ်ကိာ်ဆိး ကဲၤသံကါ ပွဲးလ့ၤတလိး အတဲၤအၣ်အယဳၤ. 16ယဒီဆးသံ, တဲၤ အယဳၤ ကတဖၱထာ်ဒဳ ကဘၱာ်စဲာ်အထံအက့ၤအပူၤနီး အသူ သရ့, ယကတအၣ်ပ့ၤကီတဲၤအၣ်အယဳၤတပျါပ့ၤနီး” စဒီၣ်လၢ်ဝၤတစီာ်ဓဳၤ.
17မဲၤဝှါစဖၱးဖးလါ, စထါထာ်အံာ်ကဘၱာ် စဲာ်, စဒီၣ်, “ဖၱးပီၢ် ဖးလါအယဳၤ, ပ့ၤလၤနံၤလှဲးပီၢ်လၢ် ဝၤကၱာ်အီပီၢ်. 18ယဒီဆးသံ, စးထာ်ခဳနူၤယဳၤ ထိဓဳၤကဘၱာ်စဲာ်အထံအက့ၤအပူၤတဲၤကတဖၱထာ်နှၱနီး နဳၤ, ယတအီပ့ၤကီဖလါအယဳၤနီး.”
19မဲၤဝှါစဖၱးတကဳာ်, စထါထာ်အံာ်ကဘၱာ် စဲာ်, စဘးဖးကၱာ် စအံာ်ကဲၤလၢ်ဝၤတစီာ်, ကၱာ်စဒီၣ်, “အယဳၤမၱာ်ယန့ၤဘၱစဲာ်ထဲၢ်အကဘဲာ်အံာ်လၤသံနံၤခံ. မဲၤပီၢ်တဲၤ အယဳၤ တဲၤကမဳၤထာ်နံၤယဲၤအနံၤခံ,” စဒီၣ် လၢ်ဝၤဓဳၤ. 20စာ်ဘိကနဳၤအခီ, စအၣ်ဝှါတကဳာ်ဒဳၣ်, စဖၱးဖးလါ, စဒီၣ်, “ဖးလါအယဳၤမၱာ်တဲၤအဳ လါ ဖျးလၤအသဲဒဳယသွံၣ်အပူၤနဳၤ, ထဲၢ်အကဘဲာ်လှီး လၤကီသံနံၤခံတဓဲနဳၤ.
21“စာ်ပီၢ်, အဟိလါယဲၤတပွဲၤအီၣ်ကိာ်ဝ့ၤ ယကါဘ့စူး ဒဲး ခဳးနဳၤ. 22ပၠၤအဖဳးနဳၤစလိၤကိာ် တဲၤထူးလၤမှဲးလၤနံၤစကျဲးအလ့ၤ ကၱာ်စသံဘဲာ်တပွဲး. ပရၤဆါ တဲၤကပၤကီပၠၤအဟိလါယဲၤတပွဲၤအနံၤခံ” စဒီၣ်ဓဳၤ.
23မဲၤကနဳၤဒဳၣ်, စဲာ်တစီာ်ဒဲစာ်လှဲးကဲၤ လၢ်ဝၤထဲၢ်အကမဲၤ တဲၤအနဳၤဒဳစကျဲကမၱာ်ကဲၤပီၢ်ပွဲၤ နဳၤ.
တဲၤတရၤအဘဲာ်ကၠးအဓဳၤကဓူ
24အပျဲၢ်အဘီၣ်တစီာ် တရၤလှဲးကဲၤ လၢ်ဝၤထဲၢ်ဒဳစဲာ်တစီာ် အကျဲအဓဳၤကဓူမၱာ်ပီၢ်ပွဲၤနဳၤ. 25ဒဳၣ်ယ့ၣ်ရှူးဒီၣ်ကဲၤစဲာ်တစီာ်, “ပွဲၤ သူကူာ် ဖဳးအလဝ့ၤတစီာ်ဆးဖြးအူအံာ်စာ်အံာ် တပွဲးစဲာ်အစာ် ဘိစဘၱာ် စဲာ်ကျဲးထီးနဳၤ, ကၱာ်ပၠၤအဒဲလၱၢ်ထာ်အၡံအထဲ တစီာ်နဳၤမဲၤတပွဲးအစာ်ဘိ အအံာ်က့ၤစာ်က့ၤတဲၤအခီ နဳၤ. 26ပရၤဆါသံတမၱာ်ဘဲာ်ကနဳၤနီး. မၱာ်ဒဳသံ ကျဲအဓဳၤကဓူၤတပွဲၤကမၱာ်ဘဲာ်အစာ်ဘိအၡံးဖဳးကဓူၤ နဳၤ, ကၱာ် အခဳးအန့ၤတပွဲၤနဳၤကမၱာ်ဘဲာ် အစာ်ဘိဇိၤပွဲၤ နဳၤတခီ. 27အဆး နါအီၣ်ဒၱဝၢ်ထၱးတပွဲၤကၱာ် အမဲၤအၣ်မဲၤအီနံၤစဲာ်တပွဲၤအဇဳၤနဳၤ အဓဳၤဒဳၣ် ဆဲးမၱာ် ဘဲာ်လဲၢ် တပွဲၤပွဲၤ. အဆးနါလါအၣ်တဲၤတပွဲၤနဳၤဧါ. ပရၤဆါ ဒဳ သံကျဲနဳၤယမၱာ်အစာ်ဘိအမဲၤအၣ်မဲၤအီ နံၤပၠၤတပွဲၤလီၤ.
28“သံမၱာ်ဝ့ၤတပွဲးအစာ်ဘိအခးဘဲာ်ပျဳာ် ယဲၤတဲၤလှီးတဲၤပျဲး တစီာ်နဳၤလီၤ. 29အစာ်ဘိ ယပာ်အံာ်လၤနံၤယဲၤထံက့ၤအခီနဳၤ, ယအံာ်လၤနံၤ သံထံက့ၤ, စာ်ဘိထဲၢ်သံကအၣ်ကအီပျဳာ်ပီၢ်ယဲၤဒဳ ယထံ ယက့ၤအပူၤ နဳၤ. 30ကၱာ်သံကအၣ် အီကိာ်ဘဲာ်ဒဳယထံယက့ၤအစူးဒဲးခဳး, ကၱာ်သံကဆးနါ လါအီၣ်ဒဳယကါဆးနါတစီာ်အခဳးကၱာ်စံးရး ဘဲာ်ကီ အံၣ်စရ့လးဖဳးၡံးကၠံၢ်ခွံနဳၤ” စဒီၣ်ကဲၤလၢ်ဝၤတစီာ်ဓဳၤ.
စီၤပ့းတရူးအတဲၤယၤဘံာ်
(မး ၂၆:၃၁-၃၅, မၢ် ၁၄:၂၇-၃၁, ယိၤ ၁၃:၃၆-၃၈)
31ယ့ၣ်ရှူးဒီၣ်ကဲၤ, “စီၤၡံမိၣ်, စီၤၡံမိၣ်, ဆီးခ့န့းပီၢ်, မဳၤဒဲး လၱးနံၤဘဲာ်အခွဲးစာ်ဘိထဲၢ်အကမဲၤ စာ်သံကိအပွဲၤကၱာ်ဝှဲးဘါသံ စာ်ဘိ ဘူၣ်နဳၤ. 32မဲၤကနဳၤဒဳၣ်, ယသဘဲဝှါထဳနနံၤခံစာ်ဘိထဲၢ် နတဲၤ ဘူၣ်ကမှ့းပီၢ်နဳၤ. နဲၤတခီမၱာ်မၱာ်နဘဲာ်မဲၤမှ့းက့ၤ နခီ တစီာ်” စဒီၣ်ကဲၤလၢ် ဝၤဓဳၤ.
33စီၤပ့းတရူးဒီၣ်ၡံက့ၤစဲာ်, “ဘၱာ်စဲာ်, ယအီၣ်တီၤလီၤထဳအကလၤတ့ၢ်နံၢ်ပျဳာ်နဲၤ တဲၤကၱတၱၢ် အပူၤကၱာ်သံပျဳာ်နဲၤထဳ” စဒီၣ်ၡံက့ၤ လၢ်ဝၤဓဳၤ.
34ယ့ၣ်ရှူးဒီၣ်က့ၤစဲာ်, “စီၤပ့းတရူး, ယဒီဆးနဲၤ, ခိတဟဲးယဳၤ တချူးကၱာ်ၡၱဖဲအိးထာ်နှၱနီး နဳၤ, နကဆီသိပိၢ်နှဲးဘံာ်ယဲၤ, ထဲၢ်နတသၱာ် ဟဲယဲၤနီး နဳၤသဳပျာ်” စဒီဆးလၢ်ဝၤဓဳၤ.
ပံဆး, ဟူသကံကၱာ်ဒာ်ဆ့
35ဝှါဒဳၣ်, စဒဲစာ်ကဲၤလၢ်ဝၤ, “လှ့ယလှိ လ့ၤသံအကဟဲးဒီ ထိးတဲၤကၱာ်ယဒီၣ်သံတဟဲးအံာ် ဘဲာ်ပံဒဳပံဆး, ဟူသကံကၱာ်ခၣ်တကီး နီၤနဳၤ, တဲၤအလဳၤပၤသံနံၤခံအီၣ်ပီၢ်အမဳၤမဳၤဧါ” စဒဲစာ်လၢ်ဝၤဓဳၤ.
“တဲၤတလဳၤပၤတမံနီး” စဲာ်တစီာ်ဒီၣ်ၡံက့ၤလၢ်ဝၤ ဓဳၤ.
36“ပရၤဆါ ခဳနူၤယဳၤသံကဟဲးအံာ်ဘဲာ် ပံဆး, ဟူသကံ, ကၱာ်အဒာ်ဆ့တအီၣ်နီးတပွဲၤပွဲၤနဳၤ, စဆဲကဲဘဲာ်ဝှါစၡံာ်ဒဳဓဳၤ, စကပွၱၤဘဲာ် ဒာ်ဆ့တဘဲာ်. 37မၤနဲၢ်, တဲၤဝှ့းလၤအီၣ်တပွဲးဒဳစဲာ်စါထံ အပူၤ ကယဳၤ, ပၠၤဘဲလါနံၤစဲာ်အစာ်ဘိပၠၤအကၱ ကဲာ်တပွဲၤ ပွဲၤနဳၤ, ကၱာ်ယဒီၣ်သံ, တဲၤအယဳၤကပ့ထာ်ဇီၤထာ်ကီ ဒဳယလီၤနဳၤ” စဒီဆးကဲၤလၢ်ဝၤတစီာ်ဓဳၤ.
38အပျဲၢ်အဘီၣ်တစီာ်ဒီၣ်စဲာ်, “ဘၱာ်စဲာ်, စာ်ပီၢ်, ဒာ်ဆ့အီၣ် တပွဲးဘ့ယဳၤကၠံၢ်ဘဲာ်” စဒီၣ်လၢ်ဝၤ ဓဳၤ.
“တးဟဳ” စဒီၣ်က့ၤလၢ်ဝၤဓဳၤ.
ယ့ၣ်ရှူးအတဲၤဆဲးညဲပီၤတီၤကၱာ်အတဲၤသံ
(မး ၂၆:၃၆-၄၆, မၢ် ၁၄:၃၂-၄၂)
39မဲၤဝှါယ့ၣ်ရှူးလ့ၤကဲၤဒဳ စလ့ၤနဲၤနီၤအလ့ၤ, ထဲၢ်အမံၤမၱာ်သဳာ်စၤယံးခီးလီအီၣ်နဳၤ. စပျဲၢ် စဘီၣ်တစီာ်လ့ၤ ကိာ်ကဲၤစကါ. 40ဘ့စဓဳၤလ့ၤ ကဲၤအလ့ၤအကျဲးနဳၤ, စဒီၣ်ကဲၤလၢ်ဝၤတစီာ်, “သဘဲ ထာ်ပီၢ်စာ်ဘိထဲၢ် သံတလၤခူးနံၤပီၢ်တဲၤနှးကါအကျဲ နီးနဳၤ.”
41မဲၤဝှါဒဳၣ်, ယ့ၣ်ရှူးလ့ၤဒဳအလှီမီၢ်တဝှ့ လဳၤကၱာ်ဓဳၢ်နှဳလါ, သဘဲကဲၤကယဳၤ, 42“အဳအပာ်, အကဘဲာ်ဘ့ာ်မ့နသးဒဳၣ်, ဖၱး ကဲနံၤပီၢ်ယဲၤဖးလါ အယဳၤ, ပရၤဆါ, တဘဲာ်ယတဲၤသးအဲးနံၤအီၣ် အဓ့ နီး, မၱာ်အကမၱာ်ဒီဧဲၤထ့အဘဲာ်နသးလီၤ” စဒီၣ်ဓဳၤ. 43မီၢ်ခဳးပွဲၤဇဳၤ အအီၣ်ဒဳမီၢ်ခဳးတပွဲၤပီၤထာ်ထၱးစဲာ်ကၱာ် ဒီၣ်ခူဒီၣ်မီၤကဲၤစဲာ်. 44ဒဳ တဲၤသဳးၡံးလၤသးဇ့ၤ လၤအဇၱၢ်အဇိၢ်အပူၤ, စသဘဲထာ်လဳၢ်သဳးလဳၢ်သး ကဲၤ ကၱာ်စထံစသဳးဖၱထာ်ကဲၤအသွံၣ်ထ့းတစီာ်, အစိလှိး လၤကဲၤဒဳလၢ် ခဳးနဳၤ.
45စဝဲၢ်ထဳး လ့ၤဘးကဲာ်စာ်အပျဲၢ်အဘီၣ် တစီာ်နဳၤ, မၱာ်စဲာ်တစီာ်ဆီးမံသဗ့ကဲၤတဲၤအဳးသဳး အဳးသးအပူၤ. 46စဒီၣ်ကဲၤလၢ်ဝၤတစီာ်, “သံ ဆီးမံသဗ့မၤနဲၢ်. ဝဲၢ်ထဳးကၱာ်သဘဲထာ်ပီၢ်စာ်ဘိထဲၢ် သံတခး ဘဲာ်ပီၢ်တဲၤနှးကါနီးနဳၤ” စဒီၣ်လၢ်ဝၤဓဳၤ.
တဲၤဖီၣ်ယ့ၣ်ရှူး
(မး ၂၆:၄၇-၅၆, မၢ် ၁၄:၄၃-၅၀, ယိၤ ၁၈:၃-၁၁)
47ဘ့စဒီၣ်သဗ့ကနဳၤ, စီၤယူဒၤ, ထဲၢ် အမၱာ်သဓဳဖဳးၡံး ကၠံၢ် ပွဲၤအကျဲတပွဲၤနဳၤ, လ့ၤအံာ်ဟူကဲၤ ပၠၤအပဳၤအဟီးတဖဳးဒဳစအီၣ်နဳၤ, စီၤ ယူဒၤလ့ၤဘိးထၱး ယ့ၣ်ရှူးကၱာ်စဖီးဘးနှူဝံာ်ကဲၤလၢ်ဝၤ. 48ယ့ၣ်ရှူး ဒီၣ်ကဲၤစဲာ်, “စီၤယူဒၤ, နလ့ၤဟိလါ ကဲၤပၠၤ အဖဳးတဲၤနှူဝံာ်တချံးလီၤဧါ” စဒီၣ်ကဲၤလၢ်ဝၤဓဳၤ.
49ဘ့ယ့ၣ်ရှူးအခီတစီာ်စာ်ထၱးဘဲာ် ကဲၤ တဲၤသးမီဖၱထာ် တမံၤမံၤဒဳၣ်, စဲာ်တစီာ်ဒီၣ်ယ့ၣ်ရှူး, “ဘၱာ်စဲာ်, ဝၤကမဲၤအံာ်ဘဲာ်ဒာ်ဆ့ဧါ” စဒီၣ်ဓဳၤ. 50စဲာ်တစီာ်အကျဲတပွဲၤလှီဝဲၢ်ပ့ၢ်ကဲၤပၠၤလှူၣ်တဲၤ အဓဳၤအဇိၤဖဳးတပွဲၤအနံၤကူၤအတထွဲးတခီနဳၤ.
51ယ့ၣ်ရှူးဒီၣ်ကဲၤစဲာ်တစီာ်, “တးဟဳ.” မဲၤဝှါဒဳၣ်ယ့ၣ်ရှူး ဖဳး ဒီၣ်ဝဲၢ်က့ၤအနဳၤတပွဲၤအနံၤကူၤ.
52ကၱာ်ယ့ၣ်ရှူးဒီၣ်ကဲၤပၠၤလှူၣ်တဲၤအဓဳၤ ကၱာ်အန့ၤဓဳၤသး ပွ့ၤ တစီာ်ကယဳၤ, “သံဖၱးဒာ်ဆ့ကၱာ် နှဲးမူၢ်, ကၱာ်လ့ၤထၱးမၤယဲၤအစာ် ဘိယဲၤ မၱာ်ပၠၤအကၱ ကဲာ်တပွဲၤနဲၢ်.” 53“ယအီၣ်ကိာ်ဝ့ၤသံကါတနံၤ ဝှါတနံၤဒဳ တဲၤလှူၣ်ၡံၣ်အပူၤနဳၤ, သံတယ့ၤထာ်မါ သံစူးခီးယခဳးတဗွဲနီး. ပရၤ ဆါခဳနူၤယဳၤမၱာ်ကဲၤသံအဲ အခၠၱးအကျၤ, ကၱာ်တဲၤခံးအတဲၤနဳၤတဲၤပဲၤ” စဒီၣ် လၢ်ဝၤဓဳၤ.
စီၤပ့းတရူးအတဲၤယၤဘံာ်
(မး ၂၆:၅၇-၅၈,၆၉-၇၅, မၢ် ၁၄:၅၃,၅၄,၆၆-၇၂, ယိၤ ၁၈:၁၂-၁၈,၂၅-၂၇)
54ပၠၤဖီၣ်ယ့ၣ်ရှူးကၱာ်ဟဲးအံာ်ဖျီးမံကဲၤစဲာ် ဒဳပၠၤလှူၣ်တဲၤအဓဳၤ အခဳးအရှံၣ်နဳၤ, ကၱာ်စီၤပ့းတရူး လိၤကိာ်စလ့ၤဒဳအတပီၤလီၤ. 55ပၠၤဘိကဲၢ်ထာ် မှၱးဒဳရှံၣ်အဒဳတကျၢ်နဳၤကၱာ်ဆးနါလါကဲၤမှၱးအခၣ်ထၱး ကၱာ်စီၤပ့းတရူးဆးနါလါအီၣ်ကိာ်ကဲၤပၠၤအကါ. 56ဇိၤမဳၤတပွဲၤစာ် ထၱးကဲၤစဲာ်ဒဳမှၱးအလှၱကျဲနဳၤ. စစာ် ဝဲၢ်တကြၱၢ်နၱၢ်ဝှါလၢ်ဝၤဒဳၣ်, စဒီၣ်ကဲၤ, “အယဳၤတပွဲၤ အီၣ်ကိာ်သဲယ့ၣ်ရှူးအကါနၱၢ်” စဒီၣ်ဓဳၤ.
57စီၤပ့းတရူးယၤဘံာ်ကၱာ်စဒီၣ်, “အမံၤမှူး, ယတသၱာ်ဟဲစဲာ် နီး” စဒီၣ်ကဲၤဓဳၤ.
58အလ့ၤကါတဒဳးပ့ၤ, အလဝ့ၤတပွဲၤစာ် ထၱးစဲာ်ကၱာ်စဒီၣ်, “နဲၤမၱာ်သဲစကျဲတပွဲၤလီၤနၱၢ်.”
စီၤပ့းတရူးဒီၣ်ၡံက့ၤစဲာ်, “အသီၣ်, တဘဲာ်ယဲၤနီး” စဒီၣ်ဓဳၤ.
59မဲၤဝှါအီၣ်ဒီတနၣ်ရၱၣ်ဗ့ဒဳၣ်, အလဝ့ၤ တပွဲၤဒီၣ်ဆိးဒီၣ်မှး ကဲၤ, “အယဳၤတပွဲၤမၱာ်ပၠၤအအီၣ် ကိာ်နှဲးနှဲးစကါဟဳ. မၤနဲၢ်, စဲာ်မၱာ်ပၠၤကၤ လံၤလါဖဳး” စဒီၣ်ဓဳၤ.
60စီၤပ့းတရူးဒီၣ်ကဲၤစဲာ်, “အသီၣ်, နဒီၣ် တၤနဲၢ်မၱာ်ယတသၱာ်ဟဲနအဲနီး” စဒီၣ်ကဲၤဓဳၤ.
ဘ့စဒီၣ်သဗ့ကနဳၤ, ရှၱဖဲတဘဲာ်အိးထာ်ကဲၤ.
61ကၱာ်ဒီဘ့နဳၤ, ယ့ၣ်ရှူးဒးဘးကၱာ် စာ်ဝဲၢ် ကဲၤစီၤပ့းတရူး, ကၱာ်စီၤပ့းတရူးကမဳၤထာ်နံၤကဲၤ ဘၱာ်စဲာ်အတဲၤယၱၢ်ဘဲာ်, “ခိတနဲၤယဳၤ တချူးကၱာ်ၡၱဖဲ အိးထာ်နှၱနီးနဳၤ, နကယၤဘံာ်ကီယဲၤသဳပျာ်” နဳၤ. 62စီၤပ့းတရူးစွဲးထာ်အချဳကၱာ်စဟးသ့ပွ့ၤသၱးလၱ ကဲၤ.
ယ့ၣ်ရှူးဘဲာ်မဲၤယဳၤမဲၤလဲၢ်ကၱာ်ဘဲာ်တ့ၤဘဲာ်ပဳၤ
(မး ၂၆:၆၇-၆၈, မၢ် ၁၄:၆၅)
63ပၠၤအတိၤအံာ်ယ့ၣ်ရှူးတစီာ်မဲၤယဳၤ မဲၤလဲၢ်ကၱာ်မူၢ်ထာ်ကဲၤ စဲာ်. 64စဲာ်တစီာ်ဘီဘံာ် ဝှါလၢ်ဝၤအကၢ်ဓူတကၱယၢ်ကၱာ်စဒဲကဲၤ လၢ်ဝၤ, “ဒီၣ်စမး, အမူၢ်နဲၤမၱာ်ပီၢ်ပွဲၤ.” 65ကၱာ်စဒီၣ်ယူၢ် လၤကါ ကဲးဝ့ၤလၢ်ဝၤပွ့တမံၤပ့ၤ.
ယ့ၣ်ရှူးဘဲာ်ထိးဘဲာ်ဒဲ
(မး ၂၆:၅၉-၆၆, မၢ် ၁၄:၅၅-၆၄, ယိၤ ၁၈:၁၉-၂၄)
66အလ့ၤကါတဂီၤအန့ၤဓဳၤသးပွ့ၤ, ပၠၤလှူၣ်တဲၤအဓဳၤကၱာ် အဝှ့းစဲာ်တစီာ်လ့ၤအံာ်ကဲၤ ယ့ၣ်ရှူးဒဳတဲၤလၤတ့ၢ်ပျဳာ်အလ့ၤကၱာ်စဒီၣ်လၢ် ဝၤ, 67“ဒီဆးပီၢ်ဝၤ, နဲၤနဳၤ, နမၱာ်ခရၱာ်ဟဳဧါ.”
ယ့ၣ်ရှူးဒီၣ်က့ၤစဲာ်တစီာ်, “ယကဒီဆးသံမၱာ်တဘဲာ်သံကဘူၣ်ယဲၤ နီး. 68ယကဒဲသံမၱာ်တဘဲာ် သံကဒီၣ်ၡံနီးနီး. 69ခဳနူၤယဳၤ ဖျီအလှီမီၢ်နဳၤ, ပၠၤအဖဳးတပွဲၤနဳၤ, စကဆးနါလါကီဒဳကဘၱာ်စဲာ် တဲၤတီၤ ဓဳၤသ့းဓဳၤအစူးတထွဲးတခီဘဲာ်နဳၤ” စဒီၣ်လၢ် ဝၤဓဳၤ.
70“မဲၤကနဳၤနမၱာ်ကဘၱာ်စဲာ်အဖဳးဧါ” စဲာ် တစီာ်ဒဲစာ်ပျဳာ်ပျဳာ် ကဲၤလၢ်ဝၤဓဳၤ.
စဒီၣ်ၡံက့ၤလၢ်ဝၤတစီာ်, “သံဒီၣ်တပွဲးသဲယမၱာ် ဟဳနၱၢ်” စဒီၣ်လၢ် ဝၤတစီာ်ဓဳၤ.
71စဲာ်တစီာ်ဒီၣ်ကဲၤ, “အလဳၤပၤဝ့ၤဒီတၤ သဲသၱးပ့ၤနဲၤ. ဝၤ သၱာ်ဟဲဘဲာ်ထဳစဲာ်သဲန့ၤအလီၤမီၤပူၤ” စဲာ်တစီာ်ဒီၣ်ကဲၤဓဳၤ.
ទើបបានជ្រើសរើសហើយ៖
လူၤကၣ် 22: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
