လူၤကၣ် 23
23
ယ့ၣ်ရှူးဒဳစီၤပံၤလးအလှီမီၢ်နဳၤ
(မး ၂၇:၁,၂,၁၁-၁၄, မၢ် ၁၅:၁-၅, ယိၤ ၁၈:၂၈-၃၈)
1ပၠၤအပဳၤအဟီးတစီာ် ဝဲၢ်ထဳးကၱာ်လ့ၤ အံာ်ကဲၤယ့ၣ်ရှူးဒဳစီၤ ပံၤလးအလှီမီၢ်, 2ကၱာ် ဆးဝဲၢ်ကဲၤစလီၤတဲၤကမဲာ်အမဳမဳၤကၱာ် စဒီၣ်ကဲၤ, “ဝၤစာ်ထၱးကဲၤပၠၤအယဳၤတပွဲၤမဲၤဆဲးဆီးဧီၢ်ထာ် ထံက့ၤဖဳးတစီာ်, စမဲၤဒၱာ်ဒါကဲၤပၠၤအကအံာ်ကဲစၢ် တဲၤသွဲတစီာ်နဳၤကၱာ်စဒီၣ်ကဲၤစန့ၤ ခရၱာ်, ထဲၢ်ဆးဖြး နဳၤ” စဒီၣ်ဓဳၤ.
3စီၤပံၤလးဒဲစာ်ကဲၤယ့ၣ်ရှူး, “နမၱာ်ပီၢ်ယူဒၤဖဳး အဆးဖြးဟဳ ဧါ.”
ယ့ၣ်ရှူးဒီၣ်ၡံက့ၤစဲာ်, “နဒီၣ်ကဲၤဓဳၤ.”
4စီၤပံၤလးဒီၣ်ကဲၤပၠၤလှူၣ်တဲၤအဓဳၤ တစီာ်ကၱာ်ပၠၤအပဳၤအဟီးတစီာ်, “ယတစာ်ထၱးတဲၤ ကမဲးဒဳပၠၤအယဳၤတပွဲၤအလီၤတမံနီး.”
5ပရၤဆါ ပၠၤအပဳၤအဟီးတစီာ်ကဲာ်ဧဳၤ ထာ်ဆိး, “ပၠၤအယဳၤ တပွဲၤယဳၤ, စသိၣ်အံာ်သီအံာ်ပၠၤ အကထာ်ဒ့ဒီၣ်တဲၤဒဳယူဒၤက့ၤသဒဲက့ၤ အပူၤလီၤ. စစးထာ်ဘ့ကၤ လံၤလဲအက့ၤကၱာ်ခဳနူၤယဳၤအဓဳၤထဳဘ့ ယဳၤ ထဳ.”
ယ့ၣ်ရှူးဒဳစီၤဟ့ၤရိာ်အလှီမီၢ်နဳၤ
6ဘ့စီၤပံၤလးသၱာ်ဟဲဘဲာ်တဲၤအယဳၤဒဳၣ်, စဒဲစာ်ကဲၤပၠၤ, “အယဳၤတပွဲၤမၱာ်ကၤလံၤလဲဖဳးဧါ.” 7စသၱာ်ဟဲကဲၤယ့ၣ်ရှူးအီၣ်ဒဳစီၤ ဟ့ၤရိာ်အတဲၤအူ အံာ်အကါလဲၢ်နဳၤဒဳၣ်, စဘါလှိးလ့ၤကဲၤလၢ်ဝၤဒဳ စီၤ ဟ့ၤရိာ်အီၣ်နဳၤ, ကၱာ်ဘဲာ်နံၤဘ့စီၤဟ့ၤရိာ်လ့ၤအီၣ် ကဲၤဒဳယရူၤၡလ့ၣ် အူး ပူၤအခၠၱးနဳၤ. 8စီၤဟ့ၤရိာ် စာ်ထၱးယ့ၣ်ရှူးဒဳၣ်, စသးလဳၢ်သးလၤအံာ် ကဲၤအဇၱၢ် အဇိၢ်ဒဳး. မၤနဲၢ် စသၱာ်ဟဲနှဲးကဲၤလၢ်ဝၤအဝၱၤအကဲ ကၱာ်စသး အဲးစာ်ထၱးလၢ်ဝၤအီၣ်ယၱၢ်ကဲၤအခဳးအစဲနဳၤ. စဆးရှံအံာ်ဒဳယ့ၣ်ရှူးကမဲၤတဲၤပီၤတဲၤပၤစလှီမီၢ်တမဳၤမဳၤအစဲနဳၤ. 9စဒဲအီၣ်အဲးအီးအီး လၢ်ဝၤတဲၤ, ပရၤဆါ ယ့ၣ်ရှူးတဒီၣ်က့ၤကဲၤစဲာ်တမံနီး. 10ပၠၤလှူၣ် ဘၱာ်စဲာ်တစီာ်ကၱာ်အဝှ့းစဲာ်တစီာ် ဝဲၢ်ထဳးဆးဝဲၢ်ကဲၤ စလီၤတဲၤကမဲာ် အမဳအမဳၤလီၤ. 11စီၤဟ့ၤရိာ် ကၱာ်စကျံဖဳးတစီာ်ထဲးကဲထဲးအိး, မဲၤယူၢ် လၤကါကဲး ဝှါစဲာ်ဒဳၣ်, အကဓူၤလါစသီးထာ်နံၤလၢ်ဝၤ ၡံာ်ဒဳဓဳၤ တဘဲာ်ကၱာ်စဘါလှိးက့ၤကဲၤလၢ်ဝၤဒဳစီၤပံၤလး အီၣ်တပျာ်ဗ့. 12စီၤဟ့ၤရိာ်ကၱာ်စီၤပံၤလးမၱာ်နီၣ်သီ အသဲဒ့ဒီၣ်လှ့အအူဆူးနှီနူၤ, အနဳၤတနံၤလီၤ, စဲာ်ကၠံၢ် ပွဲၤဖၱထာ်ကဲၤအသဲသီၣ်.
ယ့ၣ်ရှူးဘဲာ်စံးရးသံ
(မး ၂၇:၁၅-၂၆, မၢ် ၁၅:၆-၁၅, ယိၤ ၁၈:၃၉—၁၉:၁၆)
13စီၤပံၤလးယဳၤလၤတ့ၢ်ပျဳာ်ဝှါပၠၤလှူၣ်တဲၤ အဓဳၤတစီာ်, အစာ်အံာ်အူအံာ်တဲၤတစီာ် ကၱာ်ပၠၤအပဳၤ အဟီးတစီာ်ဒဳၣ်, 14စဒီၣ် ကဲၤလၢ်ဝၤတစီာ်, “သံလ့ၤအံာ်ပၠၤ တပွဲၤဒဳယအီၣ်အစာ်ဘိပၠၤအထၣ် ဒ့ ဒီၣ်တဲၤတပွဲၤနဳၤ. ယထိးစာ်ဒဲစာ်ထဳစဲာ်ဒဳ သံလှီမီၢ်နဳၤ ကၱာ်ယတပးနံၤကဲၤ တဲၤကမဲာ်သံဆးဝဲၢ်စလီၤတမံနီး. 15စီၤဟ့ၤရိာ်မၱာ်မၱာ်စတပးထၱး ကဲၤတဲၤကမဲာ် တမံနီးအစဲ, စသဲဘးက့ၤကဲၤလၢ်ဝၤဒဳယအီၣ်ယဳၤ. ပၠၤအယဳၤတပွဲၤတမဲၤကဲၤ တဲၤကမဲာ်အတးနံၤတဲၤသံ တမံနီး. 16မဲၤကနဳၤအခဳးအစဲ, ယကမူၢ်ထး ဝှါစဲာ်ဒဳၣ်, ယကဘါလှိစဲာ်လီၤ” စဒီၣ်လၢ်ဝၤ တစီာ်ဓဳၤ. 17(ဘ့တကဳာ်ကမံၤတပာ်နီးအပွဲအခၠၱးနဳၤ ပၠၤဘါလှိးနဲၤ နီၤကဲၤပၠၤအလၤတ့ၢ်တဲၤကၱတၱၢ်အပူၤ တပွဲၤပွဲၤ.)
18ပၠၤအပဳၤအဟီးကဲာ်ဧဳၤထာ်ဆိး, “မဲၤသံ နံၤဝၤအယဳၤတပွဲၤယဳၤကၱာ်ဘးလှိထာ်က့ၤပီၢ် စီၤဘၤ ရးဘါလီၤ” စဒီၣ်တစီာ်ဓဳၤ 19စီၤဘၤရးဘါ မၱာ်ကဲၤပၠၤအလၤတ့ၢ်တဲၤကၱတၱၢ်ပူၤ, အမဲၤကသီကရီၤ တဲၤကၱာ် အမဲၤသံပၠၤတပွဲၤနဳၤ.
20စီၤပံၤလးသးအဲးမဲၤလှိထာ်က့ၤ ယ့ၣ်ရှူး အစဲ, စဒီၣ်ကဲၤ လၢ်ဝၤတပျာ်ဗ့, 21မၱာ်စဲာ်တစီာ်ကဲာ်ဧဳၤထာ်ဆိး, “ထးလၤကျဳၤ စဲာ်, ထးလၤကျဳၤစဲာ်” စဒီၣ်ကဲၤဓဳၤ.
22စီၤပံၤလးဒဲစာ်ပၠၤအပဳၤအဟီးသဳပျာ် တပျာ်, “ပၠၤအယဳၤ တပွဲၤအတဲၤကမဲာ်မၱာ်တၤနဲၢ်. ယတစာ်ထၱးစတဲၤကမဲာ်အမီၤတးနံၤတဲၤသံ တမံနီး. မဲၤကနဳၤ, ယမူၢ်ထးဝှါစဲာ်ဒဳၣ်, ယကဘါပျဲးစဲာ်လီၤ” စဒီၣ်ဓဳၤ.
23ပရၤဆါပၠၤတစီာ်ကဲာ်ဧဳၤပဳၤကလၢ်ကၱာ် ဒီၣ်ဆိးကဲၤစဲာ်ကဘဲာ်ထးလၤကျဳၤသံလီၤအစဲ, အကဓူၤလါ စဲာ်တစီာ်တၤအဓ့အနံၤတပွဲး ကဲၤ. 24စီၤပံၤလးစံးရးကဲၤတဲၤ အစာ်ဘိပၠၤအပဳၤအဟီး အတဲၤ သးအဲးနံၤနဳၤ. 25စဘးလှိထာ်က့ၤကဲၤပၠၤ အမဲၤသီကရီတဲၤကၱာ် အမဲၤသံပၠၤအစဲ အလၤတ့ၢ်နံၢ် တဲၤကၱတၱၢ်အပူၤ တပွဲၤ နဳၤကၱာ်စအါလၤ နံၤကဲၤလၢ်ဝၤ တစီာ်ယ့ၣ်ရှူး, အစာ်ဘိ စဲာ်တစီာ်အတဲၤသးအဲးနံၤ အီၣ် အဓ့နဳၤ.
တဲၤထးလၤကျဳၤယ့ၣ်ရှူး
(မး ၂၇:၃၂-၄၄, မၢ် ၁၅:၂၁-၃၂, ယိၤ ၁၉:၁၇-၂၇)
26ဘ့စဲာ်တစီာ်ဟဲးထာ်အံာ်ယ့ၣ်ရှူးအခဲနဳၤ, စပးနံၤကဲၤစီၤၡံ မိၣ်, ကူၤရ့ၤန့ဖဳးတပွဲၤအီၣ်ဒဳဒဳပူၤ, စက့ၤနံၢ်အူးပူၤအခၠၱးနဳၤ. ပၠၤဖီးစဲာ်ကၱာ် ဘဲလါကဲၤသဳာ်ပျီၤထူၣ်စူညါ ကဲာ်ကါဒဳစပျ့ဘးခဳးအကယးနံၤခံယ့ၣ်ရှူးနဳၤ.
27ပၠၤအပဳၤအဟီးတစီာ်လ့ၤကိာ်ကဲၤစလ့ၤ. အမံၤမှူးတစီာ် လ့ၤကိာ်ကၱာ်ဒဲးလၤအသးမီၢ်, ယဳၤဟး ကၱာ်အဳးသဳးအဳးသနံၤခံကဲၤယ့ၣ် ရှူး. 28ယ့ၣ်ရှူး စာ်ထာ်စဲာ်တစီာ်ကၱာ်ဒီၣ်ကဲၤလၢ်ဝၤ, “အဳယရူၤ ၡလ့ၣ် အဖဳးမူၤတစီာ်, ဟးအံာ်ပီၢ်မဲးယဲၤမဲး. မၱာ်ဟးလၤက့ၤ အံာ်ပီၢ် သံ န့ၤကၱာ်သံဖဳးသံလံၤတခီ” စဒီၣ်ကဲၤလၢ်ဝၤ ဓဳၤ. 29“မၤနဲၢ်ဒဳၣ်, မူၤ နံၤမူၤသဲကအီၣ်ကီထဲၢ် ပၠၤတစီာ်ကဒီၣ်, ‘အဘဲာ်ဟိးဝၱၤမၱာ် အမံၤမှူးအဆီ တဖဳး, အတမူၤသဲာ်ဒဳတခါနီးကၱာ်အတဘဳာ်အီဘဲာ် အပံၤစဖဳးနူၤတခါနီး တစီာ်နဳၤ.’ 30အနဳၤတပျာ် စဲာ်တစီာ်ကဒီၣ်ကီ, ‘ခီမူၤခီလီတစီာ် လၤတ့ၢ်ဖးပီၢ်ဝၤ ခဳး,’ ကၱာ် ‘ဘီဘံာ်ပီၢ်ဝၤ.’ 31တဲၤအယဳၤတစီာ် ကဖၱထာ်မၤဘ့သဳာ်သံသမူဝ့ၤအခဲဒဳၣ်, သဳာ်ကဝှ့ကဲၤ တပျာ်အကဖၱထာ် စာ်တဲၢ်.”
32ပၠၤလ့ၤအံာ်ပျဳာ်ကဲၤယ့ၣ်ရှူးတ့ၤဝှ့ဖဳး ကၠံၢ်ပွဲၤစာ်ဘိထဲၢ်စကထးလၤကျဳၤသံလၢ်ဝၤနဳၤ. 33ဘ့စဲာ်တစီာ်ဓဳၤလ့ၤဒဳ “တဲၤကဳာ်ခွံးအလ့ၤ” ပၠၤယဳၤ အမံၤတချဳးနဳၤ, ပၠၤထးလၤကျဳၤကဲၤယ့ၣ်ရှူးသဳာ်ပျဳၤ အလီၤ ပျဳာ်ပျဳာ်ကၱာ်တ့ၤဝှ့ဖဳးကၠံၢ်ပွဲၤဒဳ စစူးခီးတခီ တပွဲၤပွဲၤ. 34ယ့ၣ်ရှူး ဒီၣ်ကဲၤ, “အဳအပာ်, ဘါပျဲး ပီၢ်စဲာ်တစီာ်, မၤနဲၢ်, စမဲၤကဲၤတၤနဲၢ်နဳၤ စတသၱာ်ဟဲ စအဲနီး” စဒီၣ်ဓဳၤ. စဲာ်တစီာ်ပ့ၢ်ဖးကဲၤစၡံာ်ဒဳကၱာ် ဘဳာ် ကဲၤမဲ.
35ပၠၤတစီာ်ဆီထဳးကၱာ် စာ်အံာ်ကဲၤစဲာ်ဘ့ နဳၤကၱာ်အခဳးအန့ၤ တစီာ်ကီၢ်ဆဲလဲဝဲၢ်စဲာ်ကၱာ်ဒီၣ်ကဲၤ, “စမဲၤလှိထာ်က့ၤသဲပၠၤနၱၢ်. စကမၱာ် ဘ့ာ်မ့ကဘၱာ်စဲာ် အခရၱာ်, အဘဲာ်ရိၤထာ်တပွဲၤနဳၤဒဳၣ်, စမဲၤလှိထာ် က့ၤ ဒီဧဲၤစန့ၤ” စဲာ်တစီာ်ဒီၣ်ကဲၤဓဳၤ.
36ကျံဖဳးတစီာ်မၱာ်မၱာ်ဒီၣ်ယဳၤဒီၣ်နှါကဲၤစဲာ်. စအံာ်ထာ်ဝှါလၢ် ဝၤသဳာ်ပၡံးထံအၡၱးဒဳၣ်, 37စဒီၣ်ကဲၤလၢ်ဝၤ, “နကမၱာ်ဘ့ာ်မ့ယူဒၤ အဆးဖြးဒဳၣ်, မဲၤလှိထာ်က့ၤပီၢ်နန့ၤတခး” စဒီၣ်လၢ်ဝၤဓဳၤ.
38ကၱာ်ဒီဒဳစကဳာ်ခဳးနဳၤ, တဲၤဝှ့းလၤအီၣ်ကဲၤ ကယဳၤ, “အယဳၤ မၱာ်ယူဒၤဖဳးအဆးဖြး.”
39တ့ၤဝှ့ဖဳးအကျဲတပွဲၤ ဒီၣ်ယူၢ်လၤကါ ကဲးစဲာ်, “နတမၱာ်ခရၱာ်နီးဧါ. မဲၤလှိထာ်က့ၤပီၢ်နန့ၤကၱာ် ဝၤပာ်ပာ်နၢ်.”
40မၱာ်အလဝ့ၤတပွဲၤတြးဘးကဲၤစဲာ်, “နတၡံးဆါနံၤကဘၱာ် စဲာ်အလ့ၤနီးဧါ. ကဘဲာ်စံးရးယၢ် သိးသိးလီၤ. 41ကဲာ်နဳၤကခး ဘဲာ်တဲၤစံးရး အစာ်ဘိကတဲၤမဲၤကမဲာ်အီၣ်အဓ့လီၤ. မၱမၱာ်စဲာ်နဳၤ, စတဲၤ ကမဲးတအီၣ်ကဲၤတမံနီး.” 42ဝှါဒဳၣ် စဒီၣ်ကဲၤယ့ၣ်ရှူး, “ဘၱာ်စဲာ်, ကမဳၤထာ်နံၤပီၢ်ယဲၤ ဘ့နဓဳၤက့ၤဒဳနထံနက့ၤနဳၤ” စဒီၣ်လၢ်ဝၤဓဳၤ.
43ယ့ၣ်ရှူးဒီၣ်က့ၤစဲာ်, “ယဒီၣ်နဲၤအတၱၢ် အမှး, ခဳတနံၤ လီၤ နကအီၣ်ကိာ်ဘဲာ်ယကါ ဒဳပၤရဒံစူးအပူၤနဳၤ” စဒီၣ် က့ၤကဲၤလၢ်ဝၤဓဳၤ.
ယ့ၣ်ရှူးအတဲၤသံ
(မး ၂၇:၄၅-၅၆, မၢ် ၁၅:၃၃-၄၁, ယိၤ ၁၉:၂၈-၃၀)
44-45ဘ့လူၤမူၤထံးထာ်အခၠၱးနဳၤ, လူၤမူၤ အတဲၤလှၱလၤပၱၢ် ကၱာ်တဲၤခံးသရူကဲၤ ဒဳက့ၤသဒဲ ဘဲာ်အပူၤထိဓဳၤလူၤမူၤထံးချဲးဘး သဳနၣ် ရၱၣ်နဳၤ, ကၱာ် တဲၤလှူၣ်ၡံၣ် အတဲၤသဲာ်ဒဳးဒၱာ်ဒါအအီၣ်စဳး လၤအန့ၤ တဘဲာ်ထဲးလဲးကဲၤကၠံၢ်ကီလၢ်. 46ယ့ၣ်ရှူး ကဲာ်ဧဳၤထာ်ဆိးကၱာ် စဒီၣ် ကဲၤ, “အဳအပာ်, ယလဲၢ်လၤ ဖျီးမံယသးဒဳနစူးခီးပူၤလီၤ” စဒီၣ်ဝှါကနဳၤ ဒဳၣ်စသး ဟဲးထာ်ကဲၤ.
47ဘ့နဳၤကျံပဳၤ, အစာ်အံာ်ကျံဖဳးတကယဲၤ တပွဲၤစာ်ထၱးဘဲာ် တဲၤဖၱထာ်ကနဳၤဒဳၣ် စပဲၢ်တီၤပဲၢ်သ့း ကဲၤ ဘၱာ်စဲာ်ဒဳတဲၤဒီၣ်ဖျီထာ်အပူၤ, “ပၠၤအယဳၤတပွဲၤ မၱာ်မှးမှးကဲၤအတဲၤကမဲာ်တအီၣ်နီးတပွဲၤ” စဒီၣ်ဓဳၤ.
48ပၠၤအပဳၤအဟီးတစီာ်ထဲၢ်အလၤ တ့ၢ် ယံၢ်ပျဳာ်လၢ်ဝၤဘ့ နဳၤတစီာ် စာ်ထၱးတဲၤဖၱထာ်အယဳၤ တစီာ်အစဲ, စခးကဲၤသဲသၱးကၱာ်ဒီ စက့ၤကဲၤဒဳတဲၤအဳး သဳးအဳးသး, တဲၤပျၤလၤက့ၤအသးအၱနဲၢ်ပီၢ်ပူၤနဳၤ. 49စခီစသီၣ် တစီာ်ကၱာ် အမံၤမှူးအအီၣ်ကိာ်စကါဒဳ ကၤလံၤ လဲက့ၤ ပူၤတစီာ်, ဆီထဳးအီးကဲၤဒဳအတပီၤ ကၱာ် အီၣ်ဆိဧိၢ်စာ်အံာ်ကဲၤ တဲၤဖၱ ထာ်ကိမံၤမံၤတစီာ် နဳၤ.
တဲၤဘူလါယ့ၣ်ရှူး
(မး ၂၇:၅၇-၆၁, မၢ် ၁၅:၄၂-၄၇, ယိၤ ၁၉:၃၈-၄၂)
50-51ပၠၤအအီၣ်ဒဳယူဒၤက့ၤ, အရံၤမၤသဲ အူး, ထဲၢ်အပာ်နံၢ် ကိာ်ဒဳယူခဳးဓဳၤအပူၤ, အမံၤမၱာ် စီၤယိၤသးအီၣ်ကဲၤတပွဲၤ. စမၱာ်ပၠၤအသဳး တနၢ် အသး တနၢ်ကၱာ်အတၱၢ်အမှး. စအီၣ်ဆိဧိၢ်တိၤအံာ်တပွဲး ကဘၱာ် စဲာ်အထံအက့ၤကဓဳၤနဳၤ. စသးတလၤယံၢ်ပျဳာ် တပွဲးတဲၤသဘဲအခဳးန့ၤ အလဝ့ၤတစီာ်အကါ ဒဳလၢ်ဝၤ တစီာ်အတဲၤကဳထာ်ကၠးလၤကၱာ်အတဲၤဖၱး တဲၤမဲၤ အပူၤနီး. 52စလ့ၤထၱးစီၤပံၤလးကၱာ် တၤကဲၤ စဲာ်ယ့ၣ်ရှူး အစဳး. 53ဝှါဒဳၣ် စဇၢ်လၤတ့ၢ် ယ့ၣ်ရှူးအစဳး, စဘီဘံာ်အံာ်ကဲၤ တကၱယၢ် တဘဲာ်, ကၱာ်ဘဲနံၢ်က့ၤလၢ်ဝၤဒဳလူၢ်ခဳးလဳၤပူၤထဲၢ်ပၠၤတဘဲာ် ဘူလါနံၢ်အပူၤတပွဲနှၱနီးအပူၤနဳၤ. 54အနဳၤတနံၤမၱာ်ကဲၤတဲၤပြး တီၤလီၤအနံၤ ကၱာ်မူၤနံၤဆီးဒဲ သးမီ စးထာ်ကဲၤ.
55အမံၤမှူးအအီၣ်ဒဳကၤလံၤလဲအလ့ၤကိာ် စီၤယိၤသးအကါ တစီာ် စာ်ထၱးဘဲာ်ကဲၤလူၢ်ခဳးလဳၤပူၤ ကၱာ် ယ့ၣ်ရှူးအစဳးအီၣ်ဘဲလါကဲၤ စာ်တဲၢ်စာ်တဲၢ်နဳၤ. 56ဝှါဒဳၣ်စဲာ်တစီာ်က့ၤဘးကဲၤဒဳစရှံၣ် စာ်ဘိ ထဲၢ် စပြးတီၤလီၤပီၢ်တဲၤနှူဝံာ်နှူသရီနဳၤ.
စမဲၤပ့ထာ်ကဲၤမူၤနံၤဆီးဒဲအနံၤနဳၤ စဆီးဒဲကဲၤအစာ်ဘိတဲၤမှဲးလၤ အီၣ်အဓ့နဳၤ.
ទើបបានជ្រើសរើសហើយ៖
လူၤကၣ် 23: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
