လူၤကၣ် 1
1
တဲၤဒီဆးအူဆူးပွဲၤဓဳၤသီးဖံၤလူး
1အစာ်ဘိပၠၤအီၣ်အဲပွဲၤဒီဆးဝၤတဲၤဝၱၤ တဲၤကဲအဖၱထာ်ထဳဒဳ ဝၤခဳးဝၤကျဲတစီာ်နဳၤ, 2အစာ်ထၱးသဲန့ၤလှ့မဳၤစဲခဳးနဳၤအီၣ်ကဲၤတစီာ် ဒဳၣ်, ဒဳတဲၤယၱၢ်ဘဲာ်တတီၤအကျဲနဳၤ, စဖၱးလၤအံာ်လၤ တပွဲးဝၤ, 3မဲၤကနဳၤဒဳၣ်, ယဲၤမၱာ်မၱာ်, ယပဲၢ်လၤ ကဲၤယသးအကလိၤဝၢ်လှဲးတဲၤအဝၱၤ အကဲအယဳၤလဳစါစဲး, ကၱာ်အကဝှ့းဒီဆးနဲၤ, ပွဲၤဓဳၤသီးဖံၤလူး, 4စာ်ဘိထဲၢ် နကသၱာ်ဟဲပီၢ်တဲၤယၱၢ်ဘဲာ် ထဲၢ်အဘဲာ်အံၤလၤနဲၤတစီာ် မၱာ် တဲၤအလၤ တံၤလၤဆ့းလီၤနဳၤ.
တဲၤဒီဆးတီၤလီၤ အဖဳးစူထံစီၤယိၣ်ဟၣ်အတဲၤအီၣ်လၤ
5လှ့ယူဒၤက့ၤအဆးဖြး, စီၤဟ့ၤရိာ် အလ့ၤသၱာ်ခဲနဳၤ, ပၠၤလှူၣ်တဲၤအဓဳၤ အမံၤမၱာ်စီၤစဃၤရံ အီၣ်ကဲၤတပွဲၤ, ထဲၢ်စီၤအဘံယၤ အစိးကျဲပူၤနဳၤ, ကၱာ် စမှဲအမံၤမၱာ်နီၢ်အ့းလံၤစါဘ့းလီၤ. စမှဲနီၢ်အ့းလံၤစါဘ့း နဳၤ မၱာ်ကဲၤပၠၤလှူၣ်တဲၤအဓဳၤအခွံသလဲအကျဲလီၤ. 6ဒဳကဘၱာ်စဲာ် အလှီမီၢ်နဳၤ, စဲာ်ကၠံၢ်ပွဲၤ လဳၢ်လဳၢ်မၱာ် ပၠၤအတၱၢ်အမှး, အအီၣ်အံာ် သအဳ သအဲးကဘၱာ်စဲာ် အတဲၤမှဲးလၤ, ကၱာ်အမဲၤကိာ်ပ့ထာ် ဇီၤထာ်အကါ. 7ပရၤဆါစဖဳးတအီၣ်နီး. မၤနဲၢ်ဒဳၣ်, နီၢ်အ့လံၤစါဘ့း မၱာ်အဆီတဖဳး, ကၱာ်စဲာ်တစီာ်အသဳးပွ့ၤသးပွ့ၤဆိးကဲၤ.
8-9ခဳနူၤယဳၤတဲၤဖၱထာ်ကဲၤကယဳၤ, အစာ်ဘိ အနူၤအဒီအီၣ်အဓ့နဳၤ, တဲၤမဲၤလၤတ့ၢ်ကဲၤစီၤစဃၤရံ အခဳး, ထဲၢ်စကမဲၤဘဲာ် ပၠၤလှူၣ်တဲၤအဓဳၤအတဲၤမဲၤ ဒဳၣ်, စလ့ၤနံၢ်ဘဲာ်ကဲၤတဲၤလှူၣ်ၡံၣ်ပူၤကၱာ် ရွှံး ကဲၤတဲၤနှူဝံာ် ဒဳဘၱာ်စဲာ်အလှီမီၢ်နဳၤ. 10ကၱာ်ပၠၤအပဳၤအဟီးသဘဲ ထာ်ကဲၤဒဳအချဳဘ့ တဲၤလှူၣ်ထာ်တဲၤနှူဝံာ်အခၠၱးနဳၤ.
11ကဘၱာ်စဲာ်အမီၢ်ခဳးပွဲၤဇဳၤ ပီၤထာ်ထၱး ကဲၤစဲာ်, ကၱာ်ဆီထဳး အီၣ်ကဲၤဒဳ တဲၤရွှံးကဲၢ်ဟီးအံာ် တဲၤနှူဝံာ် အတဲၤသဘဲခဳးအတထွဲးတခီ နဳၤ. 12စီၤစဃၤရံ စာ်ထၱးစဲာ်ဒဳၣ်, စဘဲာ်ၡဳဘဲာ်မၤ ကၱာ်သးဖူး သး ကနၢ်ကဲၤ. 13ပရၤဆါ မီၢ်ခဳးပွဲၤဇဳၤဒီၣ်ကဲၤ စဲာ်, “ၡံးဆါပီၢ်မဲး, စီၤ စဃၤရံ, မၤနဲၢ်, ကဘၱာ်စဲာ်ဆီးခ့န့းထဳနတဲၤတၤထာ် ကၱာ်နမှဲ နီၢ်အ့းလံၤ စါဘ့းနဳၤကဖဳးဇ့းလၤအံာ်ကီစဖဳးခဳတပွဲၤ. ကၱာ်နကထါဘဲာ်ကီ စမံၤစီၤယိၤ ဟၣ်. 14နကနံၤဘဲာ်ကီတဲၤသးလဳၢ်သးလၤ, တဲၤသးကနၢ် အံာ် ကၱာ်ပၠၤအီၣ်အဲဗွဲၤကသဳးလဳၢ်သးလၤအံာ်ကီ ဒဳစတဲၤအီၣ်လၤအစဲနဳၤ. 15စကမၱာ်ကီ ပၠၤအဓဳၤအမူၤဒဳဘၱာ်စဲာ်အလှီမီၢ်နဳၤ. စကတအီကီ သဳာ် ပၡံးထံ နီကၱာ်တဲၤမှူးပီးနီးနီး, ကၱာ်စကအီၣ်အံာ် ပ့ထာ်ကီသးစါထံ ဘ့စအီၣ်ဝ့ၤစမဳၤအဖူပူၤလီၤနဳၤ. 16စကသဲက့ၤအံာ်ဟူကီအံၣ်စရ့လး ဖဳး အီၣ်အဲပွဲၤဒဳ ကဘၱာ်စဲာ်တဲၤအဓဳၤအီၣ်နဳၤ. 17ကၱာ်စဲာ်သဲန့ၤစကလ့ၤအူဆူးကီ ဒဳဘၱာ်စဲာ်အလှီမီၢ်ကၱာ် ဒဳစီၤအ့ၤလံယၤအသးကၱာ်အတဲၤခဳး တဲၤအါနဳၤ, စကဒးဘးကီအပာ်တစီာ်အသးအသးဒဳအဖဳးတစီာ်အီၣ်, ကၱာ်စကဒးဘးက့ၤကီပၠၤ ထဲၢ်အတဘူၣ်ကဲၤပၠၤအတၱၢ် အမှးတစီာ်အတဲၤ ထၱနံၤကိၢ်နံၤနီးနဳၤ. စကလ့ၤလၢ်ဝၤ တစီာ်အလှီမီၢ်ကၱာ် ပြးတီၤလီၤကဘၱာ် စဲာ်အနံၤခံ ပၠၤအပ့ထာ်ဇီၤထာ်တခွံ.”
18ကၱာ်စီၤစဃၤရံဒီၣ်ကဲၤမီၢ်ခဳးပွဲၤဇဳၤ ကယဳၤ, “ယကသၱာ်ဟဲ ပီၢ်တဲၤအယဳၤစာ်တဲၢ်. မၤနဲၢ်ယမၱာ်ပၠၤအဖူပွ့ၤတပွဲၤကၱာ်ယမှဲမၱာ်ပၠၤ အသး ပွ့ၤကဲၤ ကဲၤ.”
19မီၢ်ခဳးပွဲၤဇဳၤဒီၣ်ၡံစဲာ်ကၱာ်စဒီၣ်လၢ်ဝၤ. “ယမၱာ်ကၤဘြံၤအ့ လး, ထဲၢ် အဆီထဳးအီၣ်ဒဳ ကဘၱာ်စဲာ် အလှီမီၢ် တပွဲၤနဳၤကၱာ်ယဘဲာ်သဓဳ လ့ၤကဲၤ အကယၱၢ်ဘဲာ်ထၱးနဲၤကၱာ်အကဒီထိးလၤနံၤနဲၤ တဲၤသး လဳၢ်သး လၤအံာ်အဝၱၤအကဲယဳၤနဳၤ. 20ကၱာ်စာ် ပီၢ်, နပျၱၤကကျဳၤကၱာ်နတယၱၢ်ဘဲာ်ဇၤကီနီး ထိဓဳၤ မူၤနံၤတနံၤထဲၢ်တဲၤအယဳၤတစီာ်ကဖၱထာ် ဝှါ နဳၤ, ဒဳနတဘူၣ်ယတဲၤယၱၢ်ဘဲာ်နီး ထဲၢ်အကပ့ထာ်ဇီၤထာ်ဘဲာ်ဒဳ အခၠၱးအကျၤပူၤတစီာ်နီးအခဳးအစဲနဳၤ.”
21ပၠၤတစီာ်အီၣ်ဆိဧိၢ်စီၤစဃၤရံကၱာ် ထဲးနံၤဝံနံၤဝၤကဲၤဒဳစအီၣ်သကျိးသဗ့မၤတဲၤလှူၣ်ၡံၣ် ပူၤကနဳၤအစဲနဳၤ. 22ဘ့စဟဲးထာ် တပျာ်နဳၤ, စတယၱၢ်ဘဲာ်ထၱးဇၤပ့ၤလၢ်ဝၤတစီာ်နီး. ကၱာ်စဲာ်တစီာ် သၱာ်ဟဲ ကဲၤစစာ်ထၱးထဳ တဲၤဒဲလၱၢ်ထာ်ဒဳတဲၤလှူၣ်ၡံၣ် ပူၤနဳၤ. စယိၢ်စူးယိၢ်ခးဝှါ လီၤဒဳၣ်, စအီၣ်ကဲၤအပျၱၤ ကျဳၤကနဳၤပ့ၤလီၤ.
23စီၤစဃၤရံအတဲၤဖၱးတဲၤမဲၤဒဳ တဲၤလှူၣ်ၡံၣ်အပူၤဝှါဒဳၣ်, စက့ၤကဲၤဒဳစၡံၣ်နဳၤ. 24မူၤနံၤမူၤသဲတစီာ်ယဳၤဖျီးတလိးဝှါ စမှဲနီၢ် အ့းလံၤစါဘ့း မူၤသဲာ်ဒဳကၱာ် အီၣ်ဟူၣ်ဇီၤလီၤကဲၤဒဳၡံၣ်ပူၤနဳၤ ယဲၢ်လှဲအဓၢ် ပူၤ, 25စဒီၣ်, “ကဘၱာ်စဲာ်သး အဲးဖၱးကဲပၠၤအတဲၤဒီၣ်ပယၱၢ်လၤဒဳ ယခဳးနဳၤဒဳၣ်, စမဲၤနံၤထဳယဲၤတဲၤအယဳၤဒဳမူၤနံၤမူၤသဲတစီာ် အပူၤနဳၤ.”
တဲၤဒီဆးတီၤလီၤယ့ၣ်ရှူးအတဲၤအီၣ်လၤ
26အီၣ်ဝှါအလှဲသါသိးဒဳၣ်, မီၢ်ခဳးပွဲၤဇဳၤ ကၤဘြံၤအ့လးနဳၤ ကဘၱာ်စဲာ် သဓဳလ့ၤစဲာ်ဒဳ ကၤလံၤလဲက့ၤ, နစၤရ့းအူး, 27ဒဳအဖိး သဲာ် ထဲၢ်အဘဲာ်ဒဲနံၤကဲၤအကဖၱးစူးအမံၤခဳအမံၤမၱာ် စီၤယိၤသးတပွဲၤ အီၣ်နဳၤ. စမၱာ်စီၤဒၤဝံးအခွံအသလဲ ကၱာ်အဖိးသဲာ်အမံၤမၱာ်နီၢ်မၤရၱ. 28ဘ့မီၢ်ခဳး ပွဲၤဇဳၤဓဳၤထၱးစဲာ်နဳၤ, စဒီၣ်, “ဘဲာ်မီၤ, အအီၣ်ပ့ထာ်ကၱာ် တဲၤဝၱၤတဲၤမီၤတပွဲၤ, ကဘၱာ်စဲာ်အီၣ်ကိာ်နကါ. အမံၤမှူးအကျဲအဘဲာ်တဲၤ ဟိးဝၱၤမၱာ်နဲၤ.”
29ဘ့စသၱာ်ဟဲလၢ်ဝၤအတဲၤယၱၢ်ဘဲာ်နဳၤ, စထဲးနံၤဝံနံၤဝၤ ကဲၤ, ကၱာ်ကမဳၤစာ်လှဲးကဲၤတဲၤနှူဆဲး အယဳၤတဓဲမၱာ်ကဲၤတၤနဲၢ်နဳၤ. 30ကၱာ်မီၢ်ခဳးပွဲၤ ဇဳၤဒီၣ်ကဲၤစဲာ်, “ၡံးဆါမဲး, နီၢ်မၤရၱ. မၤနဲၢ် နနံၤဘဲာ် ကဲၤကဘၱာ်စဲာ်အတဲၤဝၱၤတဲၤမီၤ. 31စာ်ပီၢ်, နကမူၤသဲာ်ဒဳထာ်အံာ် ကီ ဒဳနဖူပူၤကၱာ်ဖဳးဇ့ၤလၤအံာ် ကီနဖဳးခဳတပွဲၤကၱာ်နကထါဘဲာ်ကီစမံၤ ယ့ၣ်ရှူး. 32စကဓဳၤကမူၤကီ, ကၱာ်စကဘဲာ်ယဳၤ ကီအထာ် ယၱၤ ကဓူၤအဖဳးခဳ ကၱာ်ဘၱာ်စဲာ်တဲၤအဓဳၤ ကအံာ်လၤ ကီစဲာ်စပာ်စီၤဒၤဝံးအနၤ, 33ကၱာ်စကမၱာ်ကီ စီၤယၤကိာ်အခွံအဆးဖြးသဲာ်ယိလၤထူလၤပျဳၤ ကၱာ်စထံစက့ၤကတကူဓူၤဇၤကီနီး.”
34ကၱာ်ဒီနီၢ်မၤရၱဒီၣ်က့ၤမီၢ်ခဳးပွဲၤဇဳၤ, “ယတသၱာ်ဟဲကဲၤအမံၤ ခဳနီးဒဳၣ်, တဲၤအယဳၤကဖၱထာ် ဇၤစာ်တဲၢ်.”
35ကၱာ်မီၢ်ခဳးပွဲၤဇဳၤဒီၣ်ၡံစဲာ်ကၱာ်ဒီၣ်, “သး စါထံကလ့ၤလၤကီ နခဳးကၱာ် အထာ်ယၱၤကဓူၤအစိ သလဲကလၤကၢ်ဘံာ်ကီနဲၤ, ကၱာ်အစါ ထံအကအီၣ် လၤ ဘဲာ်တပွဲၤကဘဲာ်ယဳၤကီကဘၱာ်စဲာ်အဖဳး. 36ကၱာ်စာ်ပီၢ်, နခွံနခီထဲၢ်နီၢ်အ့းလံၤစါဘ့းနဳၤ, မူၤပွ့ၤ နီၣ်သီကဲၤနှီနူၤအဖဳးကအီၣ်လၤတပွဲၤ, စဲာ်ထဲၢ်ပၠၤဒီၣ် မၱာ်မဳၤဘၱာ်တပွဲၤနဳၤ, မူၤသဲာ်ဒဳဘးထဳအလှဲ သါသိးထဳ. 37မၤနဲၢ်, ကဘၱာ်စဲာ် အနံၤခံနဳၤ, တဲၤတဖၱထာ် ဇၤနီး တအီၣ်ကဲၤတမံနီး.”
38မဲၤကနဳၤ, နီၢ်မၤရၱဒီၣ်, “ယဲၤမၱာ် ကဘၱာ် စဲာ်အဇိၤမဳၤ. တဲၤ ကဖၱးထာ်နံၤဒီဧဲၤယဲၤ အစာ်ဘိနဒီၣ် ကဲၤနဳၤ.” ကၱာ်ဒီမီၢ်ခဳးပွဲၤဇဳၤ ဟဲးထာ် ပၢ်မံတပွဲးကဲၤ ဒဳစအီၣ်နဳၤ.
နီၢ်မၤရၱလ့ၤထၱးနီၢ်အ့းလံၤစါဘ့း
39အနဳၤဝှါဒဳၣ်, နီၢ်မၤရၱဝဲၢ်ထဳးကၱာ်လ့ၤ ပျာ်ပျါကဲၤဒဳယူဒၤက့ၤ အူးတအူးထဲၢ်အအီၣ်ဒဳခီမူၤ ခီးလီလီၤနဳၤ. 40စလ့ၤနံၢ်ကဲၤစီၤစဃၤရံ အၡံၣ်ပူၤ ကၱာ်နှူဆဲးကဲၤနီၢ်အ့လံၤစါဘ့း. 41ဘ့နီၢ်အ့းလံၤ စါဘ့းသၱာ်ဟဲဘဲာ်နီၢ်မၤရၱအတဲၤ နှူဆဲး အလ့ၢ်နဳၤ, အပံၤစဖဳးအီၣ်ဒဳစဖူပူၤ ပ့ၤထာ်ကဲၤအကါ, ကၱနီၢ်အ့းလံၤစါဘ့းအီၣ်ပ့ထာ်ကၱာ်သးစါထံလီၤ. 42စဒီၣ်ထာ်ဆိးတကျဲးကဲၤစလ့ၢ်, ကၱာ်ဒီၣ်ကဲၤ, “အမံၤမှူးအကျဲနဳၤ အဘဲာ်ဟိးဝၱၤမၱာ်နဲၤ, ကၱာ်ဒီ အဘဲာ်တဲၤဟိးဝၱၤမၱာ် အပံၤစဖဳးထဲၢ် နမူၤသဲာ်ဒဳ ထာ် အံာ်တပွဲၤနဳၤ. 43ယတးနံၤဒီဘၱာ်စဲာ်အမူၤ ဖၱထာ်နံၤယဲၤ, ထဲၢ်ယဘၱာ်စဲာ်အမဳၤလ့ၤထၱးယဲၤစာ်တဲၢ်. 44မၤနဲၢ်ဒဳၣ်, စာ်ပီၢ်, ဘ့ နတဲၤနှူဆဲးအလ့ၢ် သဲးနံၢ်ယနံၤကူၤပူၤလီၤ, အပံၤစဖဳးအီၣ်ဒဳယဖူပူၤ ပ့ၤ ထာ်တပွဲးအကါဒဳတဲၤသးလဳၢ်သးလၤအံာ်အပူၤနဳၤ. 45ကၱာ်ဒီအဘဲာ်ဟိးဝၱၤမၱာ်စဲာ်ထဲၢ် အဘူၣ်ထဳ တပွဲၤနဳၤ, မၤနဲၢ်ဒဳၣ်ကဘၱာ်စဲာ်ကမဲၤပ့ ထာ်ဇီၤ ထာ်ကီ တဲၤထဲၢ်စအဳလၤဖျးလၤလၢ်ဝၤတစီာ်နဳၤ.”
နီၢ်မၤရၱအတဲၤထါထာ်အံာ်အတဲၤသါပိၢ်
46ကၱာ်နီၢ်မၤရၱဒီၣ်ကဲၤ,
“ယသးတမဲပဲၢ်ဓဳၤပဲၢ်မူၤယဘၱာ်စဲာ်,
47ကၱာ်သးလဳၢ်သးလၤအံာ် ကဲၤ အမဲၤလှိထာ်က့ၤယဲၤ ကဘၱာ်စဲာ်အခဳးအစဲ,
48မၤနဲၢ်စစာ်လၤမှီးဘဲာ်ကဲၤစဇိၤမဳၤ အတဲၤဖၱတဲၤယာ်,
မၤနဲၢ်ခဳနူၤယဳၤဖျီအလှီမီၢ်, ပၠၤတဇိၤဝှါတဇိၤကယဳၤကီယဲၤ အဘဲာ် ဟိးဝၱၤ.
49မၤနဲၢ်ကဒီၣ်ဓဳၤဒဳၣ်, အမဲၤဇၤတဲၤလဳစါစဲးတပွဲၤ မဲၤနံၤ ကဲၤယနံၤခံဘၱာ်စဲာ်အမူၤ,
ကၱာ်ဒီစမံၤမၱာ်အစါထံ.
50စတဲၤခီၣ်ဝဲၤမှီးဘဲာ်ကလၤဘဲာ်ကီ ပၠၤအၡံးဆါနံၤစလ့ၤတစီာ်အခဳး,
တစိၤဝှါတစိၤ.
51စဒဲလၱၢ်ထာ်ထဳစတဲၤစိသလဲ ဒဳစဝ့ၤထာ်စစူးခီးအပူၤနဳၤ,
စမဲၤဖြူးလၤဖြၱထာ်ထဳ ပၠၤပဲၢ်ထာ်ထိအန့ၤတစီာ် ဒဳစတဲၤလၱးမး ကးကွဲအပူၤနဳၤ
52စထၱးလၤတ့ၢ်ကီပၠၤအခဳးဘါအါဓဳၤ တစီာ်ဒဳစနၤအပူၤ,
ကၱာ်စပဲၢ်ထာ်ထိကီအပဲၢ်ဘိးလၤ အန့ၤတစီာ်နဳၤ.
53စဘဳာ်အၣ်ကဳးကဲၤအသးဝံာ်သးအီ တစီာ်တဲၤဝံာ်တဲၤၡံ,
ကၱာ်နှးက့ၤလှီးသိကဲၤအနံၤအီယီၤအၣ်တစီာ်နဳၤ.
54စအံာ်လၤထဳတဲၤမဲၤဇဳၤဒဳအံာ်စရ့လး, ထဲၢ်စဇိၤဖဳးအခဳး နဳၤ.
စကမဳၤထာ်နံၤကဲၤစတဲၤခီၣ်ဝဲၤမှီးဘဲာ်,
55စယၱၢ်ဘဲာ်ထၱးကဲၤဝၤပာ်တစီာ်,
ထဲၢ်စီၤအၤဘြၤဟၣ်ကၱာ်စဖဳးစလံၤတစီာ် သဲာ်ယိလၤထူလၤ ပျဳၤ.”
56ကၱာ်နီၢ်မၤရၱအီၣ်ကိာ်ဝှါစကါသဳလှဲ အဓၢ်ပူၤဒဳၣ်, စက့ၤကဲၤ ဒဳစရှံၣ်စဖါနဳၤ.
အဖဳးစူထံစီၤယိၤဟၣ်အတဲၤအီၣ်လၤ
57နီၢ်အ့းလံၤစါဘ့းအနံၤခံအခၠၱးအကျၤ ဘဲာ်ကဲၤဒဳၣ်, စဖဳးဇ့ၤ လၤအံာ်ကဲၤစဖဳးခဳတပွဲၤ. 58ပၠၤအအီၣ်ဘိးထၱးဘိးဝၤစဲာ်ကၱာ်စခွံ စခီတစီာ်သၱာ်ဟဲ ဘဲာ်ကဘၱာ်စဲာ်အတဲၤခီၣ်ဝဲၤမှီးဘဲာ် ဓဳၤထာ်ဒဳစလီၤနဳၤ ဒဳၣ်, သးကနၢ်အံာ်ကိာ်ကဲၤစကါ.
59ဘ့စဖဳးအီၣ်လၤဝှါအသဲလွံၢ်သိးနဳၤ, စဲာ် တစီာ်လ့ၤကဲၤဒဳ တဲၤဟိရကၱအပံၤစဖဳး အပွဲပူၤနဳၤ, ကၱာ်စကမီထါလၢ်ဝၤအမံၤစီၤစဃၤရံ, အစာ်ဘိစပာ်အမံၤနဳၤ. 60ပရၤဆါစမဳၤဒီၣ်ၡံ က့ၤစဲာ်တစီာ်, “တဘဲာ်ကနဳၤနီး, ကထါဘဲာ်စမံၤ စီၤယိၤဟၣ်.”
61မၱာ်စဲာ်တစီာ်ဒီၣ်လၢ်ဝၤ, “ဒဳနခွံနသလဲ အကျဲ, အမံၤဘဲာ် ထါကနဳၤတအီၣ်တဗွဲနီး.” 62စဲာ်တစီာ်ယိၢ်စူးယိၢ်ခၣ် ဝှါ ဒဲကဲၤစပာ်ထဲၢ်စသးအဲး ထါကဲၤအပံၤစဖဳးအမံၤတၤနဲၢ်နဳၤ.
63စတၤဝှါပၠၤလဳၤဘ့ာ်ဒဳၣ်, စဝှ့းကဲးကယဳၤ, “စမံၤမၱာ်စီၤယိၤ ဟၣ်.” စဲာ် တစီာ်ထဲးတမိၢ်တမှါလဳၢ်ကဲၤ. 64ဘ့နဳၤလီၤစလီၤမီၤ တဘါကၱာ်စပျၱၤဘါပျဲးဒဳၣ်, စယၱၢ်ဘဲာ်ဇၤကဲၤကၱာ်ထါထာ်အံာ်ကဲၤဘၱာ်စဲာ်. 65အခွံအခီလဳစါစဲးၡံးဆါကဲၤ, ကၱာ်ပၠၤဟဲးဒီၣ်အံာ်ကဲၤ တဲၤဝၱၤ တဲၤကဲအယဳၤဒဳယူဒၤက့ၤကၱာ်ခီမူၤခီး လီတစီာ် အခဳးနဳၤ. 66ကၱာ် ကယါပၠၤအသၱာ်ဟဲဘဲာ် တဲၤ အယဳၤတစီာ်အီၣ်အံာ်ကဲၤ ဒဳအသးပူၤကၱာ် စဒီၣ်, “အပံၤ စဖဳးအယဳၤတပွဲၤကဖၱထာ်ကဲၤပၠၤတၤနဲၢ်.” မၤနဲၢ်, ကဘၱာ် စဲာ်အစိသလဲအီၣ်ကိာ်ကဲၤစကါ.
စီၤစဃၤရံအတဲၤဒီၣ်တီၤလီၤ
67စပာ်စီၤစဃၤရံနဳၤအီၣ်ပ့ထာ်ကၱာ် သးစါထံ, ကၱာ်ဒီၣ်တီၤ လီၤကဲၤတဲၤ, စဒီၣ်,
68“အံၣ်စရ့လးအဘၱာ်စဲာ်တဲၤအဓဳၤ ကဘဲာ်ဒီပီၢ်ဧဲၤတဲၤ ဟိးဝၱၤ,
မၤနဲၢ်ကဒီၣ်ဓဳၤဒဳၣ်, စလ့ၤထၱးကဲၤစပၠၤကၱာ် မဲၤနံၤကဲၤလၢ်ဝၤတစီာ် တဲၤလှိထာ်က့ၤ.
69စမဲၤနံၤကဲၤဝၤတဲၤလှိထာ်က့ၤ အခဳးဘါအါဓဳၤ
ဒဳစဇိၤဖဳးစီၤဒၤဝံးအခွံအသလဲအပူၤနဳၤ.
70စအဳလါဖျးလၤထဳဝံအစါထံလှ့းမဳၤ တစီာ်အလီၤမီၤပူၤ,
71တဲၤလှိထာ်ဒ့ဒီၣ်ရီၢ်ခဲးတစီာ်အစူးခီးပူၤ,
ကၱာ်ကယါပၠၤအတဝဲၢ်တဆဲဝၤနီးတစီာ် အစိသလဲအပူၤနဳၤ.
72စကဒဲလၱၢ်ပီၢ်ဝၤဖံဝၤဖူတစီာ် စတဲၤခီၣ်ဝဲၤမှီးဘဲာ်
ဒဳတဲၤကမဳၤထာ်နံၤတဲၤအဳလါဖျးလၤစါထံတစီာ်နဳၤ.
73-74တဲၤဝှိးဒါထဲၢ်စဝှိးဒါနံၤ ကဲၤဝၤပာ်စီၤအၤဘြၤဟၣ်
ထဲၢ်စကမဲၤလှိထာ်က့ၤကီဝၤဒဳဒ့ဒီၣ်ရီၢ်ခဲးတစီာ် အစူးခီးပူၤနဳၤအခဳးအစဲ,
ဝၤကခးဇိၤကီစဲာ် ဒဳတဲၤတၡံးဆါသးပဳၤဘဲာ်နီးအပူၤ,
75ဒဳတဲၤဝၱၤတဲၤဝၱၤတဲၤစါ ကၱာ်တဲၤတၱၢ်တဲၤမှးအပူၤ
ဒဳဝၤမူၤနံၤမူၤသဲအီၣ်အသရ့နဳၤ.
76နဲၤ, ပံၤစဖဳးနဳၤ, နကဘဲာ်ယဳၤကီအထာ်ယၱၤကဓူၤအဝံ,
မၤနဲၢ်, နကလ့ၤကီဒဳဘၱာ်စဲာ်အလှီမီၢ်
စာ်ဘိထဲၢ်နကပြးတီၤလီၤစကျဲးနဳၤ.
77နကအံာ်ကီယပၠၤခွံဖဳးတစီာ် တဲၤလှိထာ်က့ၤအတဲၤသၱာ် ဟဲ
ဒဳတဲၤဘးလှိတဲၤခီၣ်ဝဲၤအပူၤနဳၤ.
78ဒဳကဘၱာ်စဲာ်အတဲၤခီၣ်ဝဲၤမှီးဘဲာ် အတဲၤဘဲာ်လီၢ်အခဳးအစဲ,
အအီၣ်ဒဳလူၤမူၤထာ်တပွဲၤလ့ၤထၱးကဲၤဝၤ,
79စလှၱလၤဘဲာ်ကဲၤပၠၤအအီၣ်ဒဳ တဲၤခံးကျဲကၱာ်တဲၤသံ အတဲၤအဳး လၤဘဲာ်တစီာ်အခဳး,
အကလ့ၤအံာ်ဟူစဲာ်တစီာ်ဒဳတဲၤစဳးတဲၤချံး အကျဲးပူၤနဳၤ.”
80အပံၤစဖဳးဓဳၤထာ်ကၱာ်ဖ့းဟၱးကၱာ် သဳးသး, ကၱာ်စအီၣ်ကဲၤဒဳ လဳၤသံမံးဇ့ၤခဳးထိ စဒဲလၱၢ်စန့ၤဒဳအံၣ်စရ့လးဖဳတစီာ်အလှီမီၢ်နဳၤ.
ទើបបានជ្រើសរើសហើយ៖
လူၤကၣ် 1: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
