လူၤကၣ် 14
14
ပွဲၤဆဲအၡီးထံတပွဲၤ
1တနံၤတသဲထဲၢ်ဘ့မူၤနံၤဆီးဒဲနဳၤ, ယ့ၣ်ရှူးလ့ၤနံၢ်ကဲၤ ဒဳဖၤ ရံၤရှဲအခဳးအန့ၤတပွဲၤ အရှံၣ် ပူၤမၱာ်စာ်ဘိထဲၢ်စကအၣ်ပီၢ်တဲၤအၣ်နဳၤ ဒဳၣ်, ပၠၤတစီာ် စာ်ဟူၣ်ကဲၤစဲာ်. 2ဒဳစလှီမီၢ်နဳၤအမံၤခဳအၡီးထံ အီၣ်ကဲၤတပွဲၤ. 3ကၱာ်ယ့ၣ်ရှူးဒဲကဲၤအဝှ့းစဲာ် ကၱာ်ဖၤရံၤၡဲဖဳးတစီာ်, ကၱာ်စဒီၣ်, “မူၤနံၤဆီးဒဲနဳၤ ကမဲၤလှဲမဲၢ်တဲၤဆဲအဇၤတပွဲးဧါ” စဒဲကဲၤလၢ် ဝၤ တစီာ်ဓဳၤ.
4ပရၤဆါစဲာ်တစီာ်တဘးဘးအီၣ်ဓဳၤလီၤ. ယ့ၣ်ရှူးမဲၤမှးက့ၤ ဝှါစဲာ်ဒဳၣ်စနှးက့ၤကဲၤလၢ်ဝၤ. 5မဲၤဝှါစဒီၣ်ကဲၤလၢ်ဝၤတစီာ်, “ဒဳသံ ကျဲနဳၤ ပၠၤတပွဲၤပွဲၤအဖဳးတပွဲၤမၱတမၱာ်နီးအဗဳၤတဒဳကလၤဓ့ၢ် နံၢ်မၤပီၤပူၤဘ့မူၤနံၤဆီးဒဲဒဳၣ်, အကတလ့ၤစွံးထာ် ဖျီးကဲက့ၤစဲာ်တပျာ်ခါလီၤနီးနဳၤအီၣ်ပီၢ်တပွဲၤပွဲၤဧါ” စဒဲကဲၤလၢ်ဝၤဓဳၤ.
6မၱာ်စဲာ်တစီာ်တဒီၣ်ၡံက့ၤဇၤကဲၤတဗွဲနီး.
တဲၤဆးလၤသးကၱာ်တဲၤမဲၤအံာ်တၱတမဲ
7ယ့ၣ်ရှူးဒီဆးဝ့ၤတဲၤကလဲၤတဓဲဗ့ ထဲၢ်အဘဲာ်ကၠးပၠၤအလ့ၤပွဲပူၤတစီာ်လ့ၤအါဝူၢ်လၢ်ဝၤ အလ့ၤအကျဲးအအူဆူးအခဳး အစဲနဳၤ ကၱာ်စဒီၣ်, 8“ဘ့နကဘဲာ်ယဳၤလ့ၤတဲၤဖၱးစူးအပွဲပူၤအခၠၱးနဳၤ, လ့ၤ အီၣ်မဲးဒဳအလ့ၤအလှီမီၢ်မဲး. ဘ့ာ်မ့ ပၠၤအဓဳၤချဳနဲၤ ကလ့ၤဓဳၤမၤဒဳၣ်, 9ရှံၣ်ဘၱာ်စဲာ်ကဒီၣ်နဲၤ, တသဳးဖျီးမံတကၱာ် ဝှါအံာ်ပီၢ်အံာ်ပီၢ်ပၠၤအယဳၤတပွဲၤ အလ့ၤတကၱာ်, ဒဳၣ်နကလ့ၤအီၣ်ဘဲာ်ကီ တဲၤလ့ၤအကဓူၤလါ ဒဳတဲၤသါဝၢ်အပူၤနဳၤ. 10မၱာ်နကလ့ၤအီၣ် ဒဳအလ့ၤအကဓူၤလါနဳၤ ဒဳၣ်, ရှံၣ်ဘၱာ်စဲာ်ကဒီၣ်နဲၤ, အသီၣ်, ထာ်ပီၢ်အလှီမီၢ်တကၱာ်နဳၤ, နကနံၤ ဘဲာ်ကီ နမူၢ်ကါဒဳအလ့ၤစာ်ပျဳာ်နဲၤပွဲတစီာ်အလှီမီၢ်နဳၤ. 11မၤနဲၢ်ကဒီၣ်ဓဳၤဒဳၣ်, ကယါအပဲၢ်ထာ်ထိအန့ၤတစီာ်နဳၤ ကဘဲာ်ပဲၢ်ဘိးလၤကီ, ကၱာ် ကယါပၠၤအပဲၢ်ဘိးလၤ အန့ၤတစီာ်နဳၤကဘဲာ်ပဲၢ် ထာ်ယၱၤကီ” စဒီၣ်ကဲၤ လၢ်ဝၤ ဓဳၤ.
12ယ့ၣ်ရှူးဒီၣ်ဝ့ၤ ရှံၣ်ဘၱာ်စဲာ်အယဳၤ စဲာ်ရှံၣ်တပွဲၤကယဳၤ, “ဘ့နယဳၤရှံၣ်ယဳၤဖါ, ဘဳာ်အၣ် ဘဳာ်အီပၠၤအခၠၱးနဳၤ, ယဳၤပီၢ်မဲးထ့နသီၣ်နး ဒ့ာ်, နသဲပူၤ သဲဝ့ၤ, နခွံနခီကၱာ်ပၠၤအအီၣ်ဘိးထၱးနဲၤတစီာ်လီၤမဲး. ဘ့ာ်မ့ စဲာ်တစီာ်ကယဳၤရှံၣ်ယဳၤဖါက့ၤနဲၤအလံၢ်ဒဳၣ်, နကနံၤဘဲာ်က့ၤတပွဲးနလံၢ် နခဲး. 13မၱာ်ဘ့နခးပွဲခးလၤအခၠၱးနဳၤ, ယဳၤကဲာ်ပီၢ်အဆဲးညဲဖဳး, အစူးထဲဓူၢ်ခၣ်တက့ၤ, အခ့းဒ့းခံးကၢ်ဓူခံးတစီာ်နဳၤ တခီ. 14နကဘဲာ်တဲၤဟိးဝၱၤ, မၤနဲၢ်ဒဳၣ်စဲာ် တစီာ်တအံာ်က့ၤစာ်က့ၤဇၤနဲၤတမံနီး. မၱာ် တဲၤကအံာ်က့ၤ ကီနဲၤအလံၢ်အခဲးဘ့အတၱၢ်အမှးတစီာ် အတဲၤထာ်ပဳၤ က့ၤအနံၤနဳၤ” စဒီၣ်ကဲၤလၢ်ဝၤတစီာ်ဓဳၤ.
လူၤမူၤဟဲးအတဲၤအၣ်ပွဲဓဳၤအကလဲၤ
(မး ၂၂:၁-၁၀)
15ဘ့နဳၤအအီၣ်ပျဳာ်စဲာ်ဒၱဝၢ်ထၱးတပွဲၤဒီၣ်, “အဘဲာ်ဟိးဝၱၤမၱာ် ပၠၤအခးပွဲခးလၤဒဳကဘၱာ်စဲာ် အထံအက့ၤအပူၤတပွဲၤနဳၤ” စဒီၣ်ကဲၤယ့ၣ် ရှူးဓဳၤ.
16ယ့ၣ်ရှူးဒီၣ်ၡံက့ၤစဲာ်, “ပၠၤတပွဲၤမဲၤကဲၤလူၤမူၤဟဲးအတဲၤ အၣ်ပွဲဓဳၤ ကၱာ်စယဳၤစကဲာ်ကဲၤပၠၤအီၣ် အဲးအီးအီးဓဳၤ. 17စသဓဳ လ့ၤကဲၤစဇိၤစပွဲၤအကလ့ၤဒီဆးပၠၤ အဘဲာ်ယဳၤဘဲာ်ကဲာ်တစီာ်နဳၤထဲၢ်တဲၤ အီၣ်အပြး တီၤလီၤထဳကိမံၤထံတၤနဳၤ. 18မၱာ်စဲာ်တစီာ် ထဳးလှိအန့ၤတပွဲၤဝှါတပွဲၤလီၤ. အအူဆူးတပွဲၤဒီၣ်, ‘ယပွၱၤကဲၤလၢ် ခဳး တကျးဝး ကၱာ်ယကလ့ၤစာ်ဟူၣ် ဘဲာ်စဲာ်, ခီးသးဒီပီၢ်ယဲၤတကၱာ်.’ 19ကၱာ်အလဝ့ၤတပွဲၤဒီၣ်, ‘ယပွၱၤကဲၤဗဳၤယဲၢ်တွဲၤကၱာ် ယကလ့ၤသဲာ်အံာ်ဟူဘဲာ်စဲာ်တစီာ်, ယတၤမီၤနဲၤ, ခီးသးဒီပီၢ်ယဲၤတကၱာ်.’ 20ကၱာ်အလဝ့ၤ တပွဲၤဒီၣ်, ‘ယဖၱးကဲၤယစူးခီး, မဲၤကနဳၤ ဒဳၣ်, ယတလ့ၤ ဇၤတပွဲးနပွဲပူၤနီး.’ 21ဇိၤပွဲၤက့ၤဒီဆးရှံၣ် ဘၱာ် စဲာ် တဲၤအဝၱၤအကဲတစီာ်ယဳၤနဳၤ. ရှံၣ်ဘၱာ်စဲာ်သဲးထဲးကၱာ်စဒီၣ်ကဲၤစဇိၤ စပွဲၤ, ‘လ့ၤပျာ်ပျါ ဒဳကျဲးဓဳၤကျဲးဖဳးတစီာ်အပူၤကၱာ်က့ၤ ယဳၤအံာ်အဆဲးညဲ ဖဳး, အစူးတက့ၢ်အခၣ်တကီး, အကၢ်ဓူခံကၱာ် အခၣ်ဒ့ာ်တစီာ်နဳၤ,’ စဒီၣ်ကဲၤလၢ်ဝၤတစီာ်ဓဳၤ. 22တအီၣ်ယၱၢ်နီး ဇိၤပွဲၤဓဳၤက့ၤဒီၣ်စဲာ်, ‘ဆရၣ်, ဝၤမဲၤကိာ်ထဳနတဲၤမှးလၤအကါဟဳ, ပရၤဆါအလ့ၤ အကျဲး အီၣ်ဝ့ၤတပွဲး,’ စဒီဆးလၢ်ဝၤဓဳၤ. 23မဲၤကနဳၤဒဳၣ်ရှံၣ်ဘၱာ်စဲာ်ဒီၣ် ကဲၤဇိၤပွဲၤ, ‘ဟဲးကိာ်ကျဲး ဓဳၤ, ကျဲးဖဳး, ကၱာ်ထါရၢ်ဝ့ၤ, သံကဲာ်ထၱးပၠၤအရါ နှးလ့ၤနံၢ်စဲာ်တစီာ်ပွဲပူၤစာ်ဘိ ထဲၢ်ယရှံၣ်ကပ့ထာ် ပီၢ်နဳၤ. 24ယဒီဆးသံကယါအဘဲာ်ယဳၤ ဘဲာ်ကဲာ်အူဆူးတစီာ်နဳၤ, ကတအၣ်ဘဲာ်ယလူၤမူၤဟဲး အတဲၤအၣ်နီး,’ စဒီၣ်ကဲၤလၢ်ဝၤဓဳၤ.”
တဲၤလိၤကိာ်ခရၱာ်အလ့ၤ
(မး ၁၀:၃၇-၃၈)
25တပျာ်ဘ့ပၠၤအပဳၤအဟီးလိၤကိာ်ကဲၤ ယ့ၣ်ရှူး အကါအခဲ နဳၤ, စစာ်ဘးလၢ်ဝၤကၱာ်တစီာ်ကၱာ် ဒီၣ်, 26“ပၠၤအလိၤကိာ်ယလ့ၤ တစီာ် ကတဘဲာ် လီၢ်ယဲၤဒဳၣ်လံကၱာ်စပာ်, စမဳၤ, ကၱာ်စမှဲ, စဖဳးစလံၤ, စသဲပူၤသဲဝ့ၤကၱာ် စန့ၤဘၱစဲာ်နှီနူၤနီးနဳၤ, စတဖၱ ထာ် ဇၤယပျဲၢ်ယဘီၣ်နီး. 27ကၱာ်ပၠၤအတယးဝှါ အသဳာ်ပျီၤထူၣ်စူညါနီးကၱာ်တလိၤကိၤ ယလ့ၤနီးတပွဲၤနဳၤ တဖၱထာ်ဇၤယပျဲၢ်ယဘီၣ်နီး. 28မၤနဲၢ်ဒဳၣ် ဒဳသံကျဲနဳၤ အသးအဲးပြးထာ်ရှံၣ်ထာ်ယၱၤတပွဲၤနဳၤ, တချူကၱာ်စပြးထာ်နှၱနီးနဳၤ, စတဆးနါကၱာ်ဒိးစာ်အူဆူး အလံၢ်အပွၱၤနီးနဳၤအီၣ်ပီၢ်တပွဲၤပွဲၤဧါ. 29တမၱာ်မၤနီၤဒဳၣ်, စကဳၤထာ်ဝှါအခၣ်ထၱး အကတဝှါ နံၤစလ့ၤနီးနဳၤပၠၤအစာ်ထၱးတစီာ်ကဒီၣ်ယဳၤ ဒီၣ်လဲၢ် စဲာ်ကၱာ်ဒီၣ်, 30‘ပၠၤအယဳၤတပွဲၤ ပြးထာ်ဝှါ အရှံၣ်အယဳၤတဝၤအတဝှါနံၤစလ့ၤနီး,’ စကဒီၣ်တပွဲး လၢ်ဝၤ ဓဳၤ. 31ဆးဖြးအသးအဲးထာ်ဒ့ဒီၣ် ကဲၤဆးဖြးအလဝ့ၤတပွဲၤနဳၤ ကတဆးနါကၱာ်ဒိးစာ် အူဆူးစကျံစပွဲၤအပွဲၤတသီ ကခးၡံ ကဲာ်ထာ်ပီၢ် စဒ့ဒီၣ်ကျံအပွဲၤကၠံၢ်သီနဳၤဧါ. 32အကတမၱာ်မၤ ကနဳၤနီးဒဳၣ်, ဘ့ ဆးဖြးအလဝ့ၤတပွဲၤအီၣ်ဝ့ၤဒဳအယၱၤ နဳၤစကနှးလ့ၤတပွဲးစပွဲၤဇဳၤတပွဲၤအကမဲၤသံဆဳးတဘဲာ်နီးဧါ. 33စာ်ဘိကနဳၤအခီ, ဒဳသံ ကျဲ နဳၤပၠၤ ထဲၢ်အတလဲၢ်လၤတၤကဲအတၱၢ်အတဲၤ နီးတပွဲၤနဳၤစတဖၱထာ်ဇၤကဲၤယပျဲၢ်ယဘီၣ်နီး.
ဒံာ်သဲာ်အကလဲၤ
(မး ၅:၁၃, မၢ် ၉:၅၀)
34“ဒၱာ်သဲာ်မၱာ်အအဲးဟဳ. ပရၤဆါ အကဖဳမၤဒဳၣ်ကမဲၤၡံအံာ် ဒီစဲာ်တၤနဲၢ်ပ့ၤ. 35အတဝၤနဲၤပ့ၤကမဲၤအံာ်လၢ်ခဳးအထဳးအစါနှီနူၤ ပ့ၤနီး. ကပၢ်ဖျီးမံဘဲာ်စဲာ်ပ့ၤလီၤ. ပၠၤအနံၤကူၤအီၣ်တပွဲၤ ကသၱာ်ဟဲဒီဧဲၤ” စဒီၣ်ကဲၤလၢ်ဝၤတစီာ်ဓဳၤ.
ទើបបានជ្រើសរើសហើយ៖
လူၤကၣ် 14: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
