လူၤကၣ် 13
13
တဲၤပၤယၤလၤက့ၤအန့ၤ
1ဘ့နဳၤပၠၤတစီာ်ဒီဆးကဲၤယ့ၣ်ရှူး ကၤလံၤလဲဖဳးတစီာ်အဝၱၤ ကဲ, ထဲၢ်စီၤပံၤလး ထဲလါကဲၤစသွံၣ်ကၱာ်စလှူၣ်ထာ်အံာ်ကဲၤစဘၱာ်စဲာ်နဳၤ. 2ကၱာ်ယ့ၣ်ရှူးဒီၣ်ၡံက့ၤ ကဲၤစဲာ်တစီာ်ကယဳၤ, “သံကမဳၤမၱာ်ကၤ လံၤလဲဖဳးတစီာ် ခးဘဲာ်တဲၤအယဳၤမၱာ် စကၱကဲာ်ဒဳၣ်လံကၱာ် ကၤလံၤလဲဖဳး အလဝ့ၤတစီာ် အစဲဧါ. 3ယဒီဆးသံ, နီး, မၱာ်သံကတပၤယၤ လၤက့ၤသံန့ၤနီးနဳၤ, သံကသံကလှဲမဲၢ်ဘဲာ်ကနဳၤလီၤ လီၤ. 4အီၣ် ဝ့ၤဒီပၠၤၡံးအပွဲၤလွံၢ်သိးပ့ၤထဲၢ် ၡံလိၣ်အတဲၤတိၤအံာ်အလ့ၤလၤတ့ၢ်ဖးအခဳး ကၱာ် အသံတစီာ်နဳၤပ့ၤ, သံကမဳၤမၱာ်စတဲၤကမဲာ် အီၣ်အဲး ဒဳၣ်လံပၠၤ အလဝ့ၤအအီၣ်ဒဳယရူၤၡလ့ၣ်အူး အပူၤ တစီာ်နဳၤဧါ. 5ယဒီဆး သံ, တဘဲာ်နီး. ပရၤဆါသံတပၤယၤလၤက့ၤသံန့ၤနီးနဳၤ, သံကသံ ကလှဲ မဲၢ်ဘဲာ်ကနဳၤလီၤလီၤ” စဒီၣ် ကဲၤလၢ်ဝၤ တစီာ်ဓဳၤ.
သဳာ်ဓဳၤထံမူၤအဆီတသဲာ်
6မဲၤဝှါ ယ့ၣ်ရှူးဒီဆးကဲၤပၠၤ တဲၤကလဲၤ တဓဲ, “ပၠၤတပွဲၤအသဳာ်ဓဳၤထံမူၤအီၣ်ကဲၤဒဳသဳာ်ပရှံးက့ၤအပူၤ တဘီ, ကၱာ်စလ့ၤဝၢ်လှဲးကဲၤ အသဲာ်ဒဳအမူၤလီၤနဳၤ. မၱာ်စတပးထၱးကဲာ်အသဲာ်တမဲနီး. 7မဲၤကနဳၤ ဒဳၣ်စဒီၣ်ကဲၤအခွဲးအံာ်က့ၤ သဳာ်ပရှံးမူၤတပွဲၤကယဳၤ, ‘စာ်ပီၢ်, ယလ့ၤ ဝၢ်လှဲးသဳာ်ဓဳၤထံသဲာ်ဒဳအမူၤလီၤနဳၤ အီၣ်ထဳသဳဒ့ာ်ထဳ, မၱာ်ယတပးနံၤအသဲာ်မဲနီး. မဲၤ ကနဳၤဒဳၣ်ကိၢ်ကဲပီၢ်အမူၤ. အီၣ်နှးနှါ အကဇၤပၢ်လၤ ကျဳၤ မၤလၢ်ခဳးနဲၢ်,’ စဒီၣ်လၢ်ဝၤဓဳၤ. 8ပရၤ ဆါ တဲၤမဲၤဖဳးဒီၣ်က့ၤစဲာ်, ‘ဆရၣ်, ခီးသးဒီမီၢ်ကိာ်တဒ့ာ် ပ့ၤ. ယကခူးကသီးလၢ်ခဳးခွဲဘးအမူၤလီၤ, ဘဲလါ လၢ်ခဳးအထဳးအစါ. 9အကသဲာ်ပီၢ်ဒီလီၤမီၢ်. ဘ့ာ်မ့ အကတသဲာ်စိးစိနီးဒဳၣ်, ပ့ၢ်ကဲဒီဧဲၤအမူၤ’ စဒီၣ်က့ၤကဲၤလၢ်ဝၤဓဳၤ.”
အမံၤမှူးအယၤဓ့ၢ်စီးခူတပွဲၤ
10ဘ့မူၤနံၤဆီးဒဲတနံၤနဳၤယ့ၣ်ရှူးသိၣ်အံာ် သီအံာ်ကဲၤ ဒဳဘူၣ် ဘျီၣ်အပူၤနဳၤ. 11အမံၤမှူး ထဲၢ်တဲၤနှဲးမဲၤယဳၤအံာ်ကဲၤၡံးအဒ့ာ်လွံၢ် သိး အီၣ်ကဲၤတပွဲၤ, ထဲၢ်စယၤဓ့ၢ်စီးခူထိစတယ့ၤထာ်နံၤ သၣ်ကီ စကဳာ်နီးနဳၤ. 12ဘ့ယ့ၣ်ရှူးစာ်ထၱးစဲာ်နဳၤ, စယဳၤလၢ်ဝၤဓဳစအီၣ်နဳၤ ကၱာ်စဒီၣ်, “အဳအမံၤမှူး, နလှိ ထာ်ဖျီထာ်ဘဲာ်ထဳနတဲၤရွှံးတဲၤဆဲအကျဲ” စဒီၣ်လၢ်ဝၤ ဓဳၤ. 13ကၱာ်ထဲးလၤကဲၤစစူးခီးလၢ်ဝးအခဳး ကၱာ်စယၤဓ့ၢ်တနၢ်က့ၤတပျာ်ခါလီၤဒဳၣ် စကီၢ်အံာ်ထါ အံာ်ကဲၤကဘၱာ်စဲာ်.
14မၱာ်ယ့ၣ်ရှူးမဲၤမှးက့ၤပၠၤဒဳမူၤနံၤဆီးဒဲ နဳၤဒဳၣ်ဘူၣ်ဘျီၣ်အခဳး အန့ၤတပွဲၤသဲးထဲးဒဳၣ်, စဒီၣ်ကဲၤပၠၤ အပဳၤအဟီးကယဳၤ, “ပၠၤမီၤမဲၤ တဲၤ ဒဳ မူၤနံၤသါသိးအပူၤနဳၤ, မဲၤကနဳၤဒဳၣ် လ့ၤပြးသံန့ၤဒဳ မူၤနံၤတစီာ်အပူၤ နဳၤ, လ့ၤပီၢ်မဲးမူၤနံၤဆီးဒဲမဲး” စဒီၣ်ကဲၤဓဳၤ.
15ယ့ၣ်ရှူးဒီၣ်က့ၤစဲာ်, “အဳပၠၤအပရၤဆး တစီာ်, ဒဳသံကျဲနဳၤ ပၠၤအဗဳၤ, မၱတမၱာ်နီးအသရၱာ်ဒဳ ကအီၣ်စဳကျဳၤဒဳအကပီၤပူၤဒဳၣ် စတဘါပျဲးကဲကၱာ် စတစွံးလ့ၤဒဳ ထံအီၣ်အလ့ၤဘ့မူၤနံၤဆီးဒဲနဳၤနီးဧါ. 16စာ်ပီၢ်မဳၤဒဲးလၱး စဳကျဳၤကၠၱၢ်ကျဳၤကဲၤ စီၤအၤဘြၤ ဟၣ်အဖဳးမူၤတပွဲၤယဳၤ ၡံးအဒ့ာ်လွံၢ်သိး အဓၢ်ပူၤကဲၤ, ကတမီၤဘါပျဲး စဲာ်ဘ့မူၤနံၤဆီးဒဲနဳၤ နီးဧါ.” 17ယ့ၣ်ရှူးဒီၣ်ကဲၤတဲၤယၱၢ်ဘဲာ်အယဳၤ တစီာ်အခဳးအစဲ အထာ်ဒ့ဒီၣ်စဲာ်တစီာ်သါဝၢ်လဳၢ်ကဲၤ. မၱာ်ပၠၤအပဳၤအဟီး သဳးလဳၢ်သးလၤအံာ် ကဲၤဒဳစမဲၤကဲၤ တဲၤအစီးကျၱးစီးၡဲတစီာ်အခဳးအစဲနဳၤ.
သပျဲးဖျဳးအကလဲၤ
(မး ၁၃:၃၁-၃၂, မၢ် ၄:၃၀-၃၂)
18ယ့ၣ်ရှူးဒီၣ်ကဲၤကယဳၤ, “ယကဒိးသီတြီၤအံာ် ကဘၱာ်စဲာ် အထံအက့ၤကၱာ်တၤ နဲၢ်. 19စမၱာ်အစာ်ဘိသပျဲာ်အဖျဳးထဲၢ်ပၠၤတပွဲၤ ဖၱးဝှါစပၢ် လၤကဲၤဒဳစတဲၤလူၤတဲၤဒဳအက့ၤပူၤနဳၤ, အဓဳၤထာ်ကၱာ်အမဲၤကဲၤ အစာ်ဘိတဲၤမူၤ ဓဳၤတမူၤ နဳၤကၱာ် ထဳၣ်ဖဳးအဝှံးဒဳမီၢ်ခဳးလဲၢ်တစီာ် ဆီလါ ကဲာ်ထာ်တပွဲးအမ့ၢ်အဖါအခဳးနဳၤ” စဒီၣ်ကဲၤဓဳၤ.
ကမံၤအကလဲၤ
(မး ၁၃:၃၃)
20ကၱာ်စဒီၣ်ဝ့ၤ, “ယကဒိးသီတြီၤအံာ် ကဘၱာ်စဲာ်အထံအက့ၤကၱာ်တၤနဲၢ်. 21စမၱာ်အစာ်ဘိကမံၤ ထဲၢ်အမံၤမှူးတပွဲၤရူၢ် နံၢ်ဒဳတကဳာ် မှူးသဳတးအကျဲ, အဖဲးထာ်ကၱာ် အဖၱထာ်ကဲၤတကဳာ် နဳၤ” စဒီၣ်ဓဳၤ.
ခးကျဲၢ်အၱးနှဲဖဳး
(မး ၇:၁၃,၁၄,၂၁-၂၃)
22ယ့ၣ်ရှူးဟဲးကိာ်ကျဲးဒဳအူးတစီာ် ကၱာ်ဒဳတစီာ်အပူၤနဳၤ, စသိၣ်အံာ်သီအံာ်ကဲၤပၠၤ ဒဳစလ့ၤကိာ်ကျဲးဒဳယရူၤၡလ့ၣ်အူးနဳၤ. 23ပၠၤတပွဲၤဒီၣ်ကဲၤစဲာ်, “အဳဘၱာ်စဲာ်, အနံၤဘဲာ် တဲၤယဳၤ က့ၤစာ်က့ၤအီၣ်တကၱာ်ဖဳးလီၤဧါ” စဒဲလၢ်ဝၤဓဳၤ.
24စဒီၣ်လၢ်ဝၤတစီာ်, “ထူးခဳးထူးအါပီၢ်အကလ့ၤနံၢ်ခးကျဲၢ် အအၱးနှဲဖဳး အပူၤ, မၤနဲၢ်, ယဒီဆးသံ, ပၠၤအီၣ်အဲပွဲၤကဝၢ်လှဲးကီ အကလ့ၤနံၢ်မီၢ်ခဳး ကၱာ်စတကဲာ်ထာ်ကီနီး. 25မၱာ်ရှံၣ်ဘၱာ်စဲာ်ကလ့ၤနံၢ် ဝှါရှံၣ်ပူၤကၱာ်စကကျဲၢ်ဘံာ်ဝှါ ခးကျဲၢ်တပျာ်, သံကဆီထဳးအီၣ်ဝှါဒဳအချဳ, တကျီးခး ကျဲၢ်ကၱာ်ဒီၣ်, ‘အဳဘၱာ်စဲာ်, ဘါထာ်နံၤပီၢ်ဝၤခးကျဲၢ်.’ ကၱာ်စကဒီၣ်ၡံက့ၤကီသံ, ‘သံအီၣ်ဒီၣ်လဲၢ်ယတသၱာ်ဟဲမဲၤနီး.’ 26ဘ့နဳၤ သံ ကဒီၣ်ထာ်ကီ, ‘ဝၤအၣ်အီပျဳာ်သဲနဲၤနၱၢ်, ကၱာ်နသိၣ် အံာ်သီအံာ်သဲဝၤ ဒဳ ဝၤအူးပူၤနဳၤနၱၢ်,’ သံကဒီၣ်ကီဓဳၤ. 27ကၱာ်စကဒီၣ်ကီသံ, ‘သံအီၣ် ဒီၣ်လဲၢ်သံလ့ၤနဳၤ ယတသၱာ်ဟဲသံနီး. ဆဲးတပီၤယဲၤ, သံအမဲၤတဲၤ ကၱ ကဲာ်မဲၤလှီတစီာ်နဳၤ,’ စကဒီၣ်ကီဓဳၤ. 28ဘ့သံစာ်ထၱး စီၤအၣ် ဘြၤဟၣ် ကၱာ်စီၤအံၤစဲးကၱာ်စီၤယၤကိာ် ကၱာ်ဝံလဳစါစဲးဒဳ ကဘၱာ်စဲာ်အထံအက့ၤအပူၤနဳၤ, မၱာ်သံနဳၤသံကဘဲာ် ထၱးဖျီမံကီဒဳအချဳနဳၤအခဲ, တဲၤ ယဳၤတဲၤဟး ကၱာ်တဲၤအ့းတံၤသိအ့းတံၤသဲ ကအီၣ်ကီ. 29ပၠၤတစီာ်ထဲၢ်အအီၣ်ဒဳလူၤမူၤ ထာ်, လူၤမူၤလၤကၱာ်လီၢ်ခံ, လီၢ်ထဲးကဆးနါလါ အီၣ် ကီဒဳကဘၱာ်စဲာ်အထံအက့ၤအပူၤနဳၤ. 30ကၱာ်စာ်ပီၢ်, ပၠၤထဲၢ် အအီၣ်အကူဓူၤလါတစီာ် ကမၱာ်ကီအအူဆူးကၱာ် အအူဆူးတစီာ် ကမၱာ် ကီ အကူဓူၤလါ,” စဒီၣ်ကဲၤလၢ်ဝၤတစီာ်ဓဳၤ.
ယ့ၣ်ရှူးအတဲၤဘဲာ်လီၢ်ယရူၤၡလ့ၣ်အူး
(မး ၂၃:၃၇-၃၉)
31ဘ့အနဳၤတနံၤနဳၤ ဖၤရံၤၡဲဖဳး တစီာ် လ့ၤထၱးယ့ၣ်ရှူးကၱာ် စဒီၣ်, “ဆဲးဖျီမံပီၢ်, မၤနဲၢ်ဒဳၣ် စီၤဟ့ၤရိာ် သးအဲးမဲၤသံနဲၤ” စဒီဆးလၢ်ဝၤ ဓဳၤ.
32မၱာ်စဒီၣ်လၢ်ဝၤတစီာ်, “လ့ၤဒီဆးပီၢ် ထွံၣ်မံၤအနဳၤတဒဳကယဳၤ, ‘စာ်ပီၢ်ခိတနံၤကၱာ်မီၤဗ့တနံၤ ယကနှးဟဲထာ်တဲၤၡံးတဲၤနှဲးကၱာ် မဲၤ မှးက့ၤပၠၤ, ကၱာ်သဳနံၤတနံၤနဳၤယကျဲးကကူဓူၤတပွဲး.’ 33မၱာ်နီၣ်သီ ဓဳၤနှီနူၤ, ယကလ့ၤဘဲာ်ယကျဲးခိတနံၤ, မီၤဗ့တနံၤကၱာ်အလ့ၤကါတနံၤဗ့ၤ. မၤနဲၢ်ဝံတပွဲၤ နဳၤစတသံတလှဲမဲၢ်ဘဲာ်ဒဳယရူၤၡလ့ၣ်အူးအချဳနီး” စဒီၣ်ၡံ က့ၤကဲၤလၢ်ဝၤတစီာ်ဓဳၤ.
34“ယရူၤၡလ့ၣ်, ယရူၤၡလ့ၣ်, နဲၤထဲၢ်အမဲၤသံဝံ, ကၱာ်အဝှ့ သံကၱာ်လဳၤထဲၢ်အဘဲာ်သဓဳလ့ၤနအီၣ်တစီာ်နဳၤ. အစာ်ဘိၡၱမူၤပွ့ၤ ဟူးလၤ ကျဳၤအံာ်အဖဳးဒဳအဒ့းလဲၢ်အခီနဳၤ, ယသး အဲးလဲၢ်ပျဳာ်တပွဲးနဖဳးနလံၤတစီာ်နဳၤပွံၢ်ပျာ်ကဲၤ, မၱာ်နဲၤနဳၤနတဲၤသးအဲးနံၤတအီၣ်ကဲၤကနဳၤနီး. 35စာ်ပီၢ်, နရှံၣ်နဖါကအီၣ်ထံအီၣ်တၤကီ. ယဒီဆးနဲၤ, နကတစာ်ထၱး ဘဲာ်ကီယဲၤနီးထိအခၠၱးကဘဲာ်ထဲၢ် နကဒီၣ်, ကဘၱာ်စဲာ်ဟိးဝၱၤ မၱာ်စဲာ်ထဲၢ် အလ့ၤဒဳ ဘၱာ်စဲာ်အမံၤအပူၤတပွဲၤနဳၤ” စဒီၣ်ကဲၤလၢ်ဝၤ တစီာ်ဓဳၤ.
ទើបបានជ្រើសរើសហើយ៖
လူၤကၣ် 13: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
