ယိၤဟၣ် 19
19
1မဲၤကနဳၤဒဳၣ်, စီၤပံၤလးနှးပၠၤမူၢ်ထး ယ့ၣ်ရှူး. 2ကျံ ဖဳးတစီာ်ပါသကွ့ဝှါတၤဆူး အစာ်ဘိခဳးစီနဳၤဒဳၣ်, စဖျးလၤကဲၤလၢ်ဝၤအကဳာ်ခဳး. စသီးန့ၤကဲၤလၢ်ဝၤရှံာ်ဒဳအလၱၤရဲၤတဘဲာ်. 3ပၠၤလ့ၤစလှီ မီၢ်ကၱာ်ဒဲးစနဲၤထၱးကၱာ်ဆီးလူဆီယဲၢ်ကဲၤ စဲာ်, “ဘဲာ်မီၤ, ယူဒၤဖဳးအဆး ဖြး,” စဒီၣ်ကဲၤလၢ်ဝၤ ဓဳၤ.
4စီၤပံၤလးဟဲးထာ်အချဳတပျာ်ပ့ၤကၱာ် စဒီၣ်ကဲၤပၠၤတစီာ်, “စာ်ပီၢ်, ယကဒဲလၱၢ်ကီသံစဲာ် ထဲၢ်ယတပးထၱးတဲၤကမဲာ်အမီၤဘဲာ်စံးရး အီၣ်စလီၤ တမံနီးတပွဲၤနဳၤ.” 5ဘ့နဳၤယ့ၣ်ရှူးဟဲးထာ် အချဳ, တဲၤ ဆှူးအသကွါအီၣ်ဒဳစကဳာ်ခဳး, စရှံာ်ဒဳမၱာ် အလၱၤရဲၤ. စီၤပံၤလးဒီၣ်ကဲၤပၠၤ တစီာ်, “စာ်ပီၢ်, ပၠၤအယဳၤတပွဲၤယဳၤ.”
6ဘ့ပၠၤလှူၣ်တဲၤအဓဳၤတစီာ်ကၱာ် ပၠၤအစာ် တိၤအံာ်တဲၤလှူၣ် ရှံၣ်တစီာ်စာ်ထၱးစဲာ်နဳၤ, စကဲာ်ဧဳၤ ထာ်ဆိး, “ထးလၤကျဳၤသံစဲာ်, ထးလၤ ကျဳၤသံစဲာ်.”
စီၤပံၤလးဒီၣ်စဲာ်တစီာ်, “ဖၱးစဲာ်ကၱာ်ထးလၤကျဳၤ သံဓီဒီဧဲၤစဲာ်, မၱာ် ယဲၤနဳၤ, ယတပးထၱးတဲၤကမဲာ် ဒဳစလီၤတမံနီး.”
7ပၠၤအပဳၤအဟီးဒီၣ်ရှံက့ၤစဲာ်, “ဝၤတဲၤ မှဲးလၤအီၣ်ကၱာ်အယဳၤအစဲ, စကသံဘဲာ်, မၤနဲၢ် ကဒီၣ်ဓဳၤဒဳၣ်, စဒီၣ်လၤကဲၤစန့ၤကဘၱာ်စဲာ် အဖဳးနဳၤ.”
8စီၤပံၤလးသၱာ်ဟဲတဲၤအယဳၤဒဳၣ်, စရှံးဆါ ဆိးကဲၤ. 9စက့ၤနံၢ်က့ၤဒဳစနၤပူၤကၱာ်စဒဲကဲၤ ယ့ၣ်ရှူး, “နအီၣ်ဒီၣ်လဲၢ်နလ့ၤ.”
ပရၤဆါယ့ၣ်ရှူးတဒီၣ်ရှံကဲၤစဲာ်တမှိနီး. 10စီၤပံၤလးဒီၣ်စဲာ်, “နတဒီၣ်ရှံယဲၤနီးဧါ. နတသၱာ်ဟဲ ထဲၢ်ယအီၣ်အံာ်တဲၤစိသလဲထဲၢ်အကထးလၤကျဳၤနဲၤ သဳာ်ပျီၤထူၣ်စူညါလီၤမၱာ်ဝၱၤ, အကမဲၤလှိထာ်နဲၤမၱာ်ဝၱၤ နီးဧါ.”
11ယ့ၣ်ရှူးဒီၣ်ရှံက့ၤစဲာ်, “နအီၣ်အံာ်တဲၤစိ သလဲယခဳးမၱာ်တပွဲးကဘၱာ်စဲာ်အံာ်လၤနဲၤလီၤ. မၱာ် ပၠၤ ထဲၢ်အအံာ်လၤယဲၤနစူးခီးပူၤတပွဲၤ နဳၤ, စတဲၤခီၣ်ဝဲၤ ကဓဳၤလံကီအယဳၤ.”
12စီၤပံၤလးသၱာ်ဟဲဘဲာ်တဲၤအယဳၤဒဳၣ်, စဝၢ်လှဲးကဲၤကျဲးသအီဒဳအကမဲၤလှိထာ်စဲာ်အနံၤခံလီၤ. ပရၤဆါ, ပၠၤအပဳၤအဟီးကဲာ်ဧဳၤထာ်, “နကမဲၤလှိ ထာ်စဲာ်ဒဳၣ်, နတမၱာ်ရိမ့ၤအဆးဖြးဓဳၤအသီၣ်နီး. ပၠၤတပွဲၤ ကဒီၣ်လၤအန့ၤဆးဖြးဒဳၣ်, စမၱာ် အထာ်ဒ့ဒီၣ်ရိမ့ၤ အဆးဖြးဓဳၤလီၤ,” စဲာ် တစီာ်ဒီၣ်ကဲၤဓဳၤ.
13ဘ့စီၤပံၤလးသၱာ်ဟဲဘဲာ်တဲၤအယဳၤဒဳၣ်, စနှးဟဲးထာ်အံာ် ပၠၤယ့ၣ်ရှူးဒဳအချဳနဳၤ, ကၱာ်စဆးနါ လၤ အီၣ်ကဲၤတဲၤစံးရးအလ့ၤ, ထဲၢ်ပၠၤ ယဳၤအမံၤ, လဳၤသဘးဘၱး, ကၱာ်ဧ့ၤဘြံၤဖဳးတစီာ်ယဳၤအမံၤ, ကၤဘၤသး, တချဳးနဳၤ. 14ဘ့နဳၤအခၠၱး မၱာ်ကဲၤတဲၤပြးနှဲးပွဲးလ့ၤတလိးအနံၤလူၤမူၤ သးမီထံးထာ်ကဲၤနဳၤ. စီၤပံၤလးဒီၣ်ကဲၤပၠၤအပဳၤအဟီး တစီာ်, “စာ်ပီၢ်, သံဆးဖြးယဳၤနဳၤ.”
15ဘ့နဳၤပၠၤအပဳၤအဟီးတစီာ်ကဲာ်ဧဳၤထာ် ဆိး, “မဲၤသံစဲာ်. မဲၤသံစဲာ်. ထးလၤကျဳၤစဲာ်သဳာ်ပျီၤထူၣ်စူညါ အလီၤ.”
စီၤပံၤလးဒဲကဲၤစဲာ်တစီာ်, “သံသးအဲးနံၤယကထးလၤကျဳၤသံဆး ဖြးသဳာ်ပျီၤထူၣ်စူညါအလီၤဧါ.”
ပၠၤလှူၣ်တဲၤအဓဳၤတစီာ်ဒီၣ်ရှံက့ၤစဲာ်, “ဝၤ ဆးဖြးမၱာ်ရိမ့ၤအဆးဖြး ဓဳၤလီၤ, အလဝ့ၤတအီၣ် နီး,” စဒီၣ်လၢ်ဝၤဓဳၤ.
16မဲၤကနဳၤ, စီၤပံၤလးအံာ်လၤနံၤကဲၤစဲာ်ဒဳ ယူဒၤဖဳးတစီာ်အစူးခီးပူၤ, စာ်ဘိထဲၢ်စကထးလၤကျဳၤ သံပီၢ်လၢ်ဝၤနဳၤ.
ပၠၤထးလၤကျဳၤသံယ့ၣ်ရှူး
(မး ၂၇:၃၂-၄၄, မၢ် ၁၅:၂၁-၃၂, လူၤ ၂၃:၂၆-၄၃)
အလ့ၤကါစဲာ်တစီာ်ဟဲးအံာ်ကဲၤယ့ၣ်ရှူး. 17ယ့ၣ်ရှူးယးထာ် အသဳာ်ပျီၤထူၣ်စူညါ, ကၱာ်လ့ၤကဲၤဒဳတဲၤအလ့ၤ ပၠၤယဳၤအမံၤ, တဲၤကဳာ်ခွံး, ထဲၢ်ဧ့ၤ ဘြံၤဖဳးအလ့ၢ်, ကီၤလၤကီၤသါ, တချဳးနဳၤ. 18ဒဳနဳၤပၠၤထာ်လၤ ကျဳၤသံကဲၤစဲာ်, ပျဳာ်ပျဳာ်ကၱာ်ပၠၤအလဝ့ၤကၠံၢ်ပွဲၤ. တခီတပွဲၤပွဲၤ, ကၱာ်ယ့ၣ် ရှူးဒဳစဲာ်ကၠံၢ်ပွဲၤအမ့ၢ်ဇဳနဳၤ. 19စီၤပံၤလးဝှ့းလၤကဲၤ, စဲာ်ဒူအကဘဲာ် ဘဲဝဲၢ်ဒဳစကဳာ်ခဳးသဳာ်ပျီၤထူၣ်စူညါအလီၤနဳၤ, စဝှ့းလၤ, “ယ့ၣ်ရှူးနစၤရ့း ဖဳး, ယူဒၤ ဖဳးအဆးဖြး.” 20ယူဒၤဖဳးအီၣ်အဲး အီးအီးဖးဘဲာ်ကဲၤစဲာ်အယဳၤ, မၤနဲၢ်ဒဳၣ်တဲၤအလ့ၤ ထဲၢ်ယ့ၣ်ရှူးဘဲာ်ထးလၤကျဳၤတကျးဝးယဳၤတအီၣ် ယၱၤကၱာ်အူးနီး. အဝှ့းလၤဧ့ၤဘြံၤအလ့ၢ်, လးတ့ၣ်အလ့ၢ်ကၱာ် ကြံးခ်အလ့ၢ်. 21ပၠၤလှူၣ်တဲၤအဓဳၤ တစီာ်ဒီၣ်ကဲၤစီၤပံၤလး, “နတမီၤဝှ့း, ယူဒၤဖဳး အဆးဖြးနီး. အယဳၤတပွဲၤဒီၣ်လၤအန့ၤ, ယမၱာ် ယူဒၤဖဳး အဆး ဖြး, ဝှ့းပီၢ်ဓဳၤ,” စဲာ်တစီာ်ဒီၣ်ကဲၤဓဳၤ.
22စီၤပံၤလးဒီၣ်က့ၤစဲာ်, “တဲၤထဲၢ်ယဝှ့း လၤဝှါနဳၤ, အဝှါထဳ.”
23ဘ့ကျံဖဳးတစီာ်ထးလၤကျဳၤဝှါယ့ၣ်ရှူးဒဳ သဳာ်ပျီၤထူၣ်စူညါအလီၤနဳၤ, စဖၱးလၢ်ဝၤအကိအသီးကၱာ်စပ့ၢ် ဖးလွံၢ်ပူး, စဖၱးတပွဲၤတပူးပူး. စဖၱးကိာ် လၢ်ဝၤအရှံာ်ဒဳ ဓီၢ်ဓိၤအပူၤထဲၢ်ပၠၤဘဳာ်အတီၤတအီၣ်နီးသဒဲဘဲာ်တဘဲာ် နဳၤနဳၤ. 24ကျံဖဳးတစီာ်လၤဒီၣ်လှဲာ်လၢ်ဝၤ, ကတထဳးထဲးလဲးနီး. မၱာ် ဝှ့မဲကၱာ်ပီၢ်ပွဲၤကနံၤဘဲာ်ပွဲၤ ကသၱာ်ဟဲပီၢ်အနံၤခံနဳၤ. မဲၤကနဳၤအခဳးအစဲ, စဲာ်စါထံ အတဲၤယၱၢ်ဘဲာ်ပ့ထာ်ကဲၤထဲၢ်,
“စပ့ၤလၤနံၤလၢ်ဝၤယတဲၤကိတဲၤသီး,
စဝှ့ကဲၤမဲယရှံာ်ဒဳအနံၤခံ.”
ကျံဖဳးတစီာ်မဲၤနှဲးနှဲးကဲၤကနဳၤ.
25အဆီထဳးအီၣ်ယ့ၣ်ရှူးအသဳာ်ပျီၤထူၣ်စူညါအခၣ် ထၱးမၱာ်ကဲၤစမဳၤ ကၱာ်စမဳၤအသဲပူၤဝ့ၤမံၤမှူး, စီၤကျ့ အီးပၤအမှဲနီၢ်မၤရၱ ကၱာ်ပၠၤမၤကဒါ လၣ်မဳၤနီၢ်မၤရၱ နဳၤ. 26ယ့ၣ်ရှူးစာ်လၤထၱးစမဳၤကၱာ်အပျဲၢ်အဘီၣ် စဘဲာ်လီၢ်တပွဲၤဆီထဳးအီၣ်ဘိးထၱးလၢ်ဝၤဒဳၣ်, စဒီၣ် စမဳၤ, “အမံၤမှူး, အယဳၤမၱာ်နဖဳးခဳ.”
27ကၱာ်စဒီၣ်ကဲၤစပျဲၢ်စဘီၣ်တပွဲၤကယဳၤ, “အယဳၤမၱာ်နမဳၤ.” ကၱာ်ဘ့နဳၤဖျီအလှီမီၢ်, အပျဲၢ် အဘီၣ်တပွဲၤအီၣ်အံာ်ကဲၤစဲာ်ဒဳစရှံၣ်ပူၤနဳၤ.
ယ့ၣ်ရှူးအတဲၤသံ
(မး ၂၇:၄၅-၅၆, မၢ် ၁၅:၃၃-၄၁, လူၤ ၂၃:၄၄-၄၉)
28မဲၤဝှါဒဳၣ်, ယ့ၣ်ရှူးသၱာ်ဟဲကဲၤ တဲၤလဳ စါစဲးပ့ထာ်ဇီၤထာ် ထဳအခဳးအစဲ, စာ်ဘိထဲၢ်စဲာ်စါထံ ကပ့ထာ်ပီၢ်နဳၤ, စဒီၣ်ထာ်ကဲၤ, “အသး အီယဲၤ.”
29ဘ့နဳၤ, ကပဳၤပူၤပၠၤဘဲနံၢ်ပ့ထာ်တဲၤရှၱး ထံအီၣ်တကပဳၤ. ပၠၤသြူနံၢ်သအိးဒဳသဳာ်ပရှံးထံ အရှၱး အကျဲကၱာ်တဒၱးဝဲၢ်ဝှါသဳာ်အ့စိးအဖါ နှဲကျီး တဘီအလီၤ, ကၱာ်တီးဝဲၢ်ဒဳစလီၤမီၤအလီၤ. 30ယ့ၣ်ရှူး တၱၢ်စာ်ဝှါသဳာ်ပရှံးထံအရှၱးဒဳၣ်, စဒီၣ်ကဲၤ, “တဲၤဝှါလဳၢ်ထဳ.”
မဲၤဝှါ, စရွှံးလၤစကဳာ်ကၱာ်စသးဟဲးထာ်ကဲၤ.
ပၠၤဆ့းဖျီယ့ၣ်ရှူးအဧဳၢ်ဇ့ၤလဲၢ်
31အနဳၤတနံၤမၱာ်တဲၤပြးတီၤလီၤအမူၤနံၤ ဒဳၣ်, စာ်ဘိထဲၢ်စဲာ် တစီာ်အစဳး တအီၣ်တၤဘဲာ်ပီၢ် သဳာ်ပျီၤထူၣ်စူညါအလီၤဘ့မူၤနံၤဆီးဒဲအနံၤနီးနဳၤ, ယူဒၤဖဳး တစီာ်တၤကဲၤစီၤပံၤလးအခွဲး အကဓ့ၤထဲဓူၢ်ပၠၤ အနဳၤတစီာ် အခၣ်ခီးကၱာ်စဲာ်တစီာ်ကဟဲးအံာ်ဖျီးမံ ပီၢ်လၢ်ဝၤတစီာ်အစဳးနဳၤ. မၤနဲၢ်, မူၤ နံၤဆီးဒဲအနဳၤ တဆီးဒဲမၱာ်ပွဲဓဳၤဒဳၣ်ချဳတဆီးဒဲအစဲနဳၤ. 32မဲၤကနဳၤ ကျံဖဳးတစီာ်လ့ၤဓ့ၤထဲဓူၢ်ကဲၤပၠၤအဘဲာ်ထး လၤကျဳၤပျဳာ်စဲာ်အအူးဆူးတပွဲၤ ကၱာ်အလ့ၤကါ တပွဲၤအခၣ်ရီၤပီၢ်. 33စလ့ၤစာ်ယ့ၣ်ရှူးဒဳၣ်, စစာ်ထၱးကဲၤလၢ်ဝၤသံဝှါကဲၤ. မဲၤကနဳၤ, စတဓ့ၤ ထဲဓူၢ် ပ့ၤလၢ်ဝၤအခၣ် ရီၤပီၢ်နီး. 34မၱာ်ကျံဖဳး တပွဲၤဖျဳ ဖျီကဲၤစဧဳၢ်ဇ့ၤလဲၢ်ကၱာ်သဘါ, တပျာ် ခါလီၤဒဳၣ်စသွံၣ် ကၱာ်စထံစိလှိးလၤကဲၤ. 35(တဲၤအယဳၤ, ပၠၤ အစာ်ထၱးတပွဲၤ ခးလှၱထာ်ဖျီထာ်ကဲၤသဲသၱး. သဲသၱးအမီၤ ဘူၣ်ကၱာ်စသၱာ်ဟဲစဒီၣ် တဲၤအတၱၢ်အမှးလီၤ. ကၱာ်ဒီစခးသဲသၱးစာ်ဘိထဲၢ်သံကဘူၣ် ပီၢ်နဳၤ.) 36မၤနဲၢ်တဲၤအယဳၤလဳစါစဲး ဖၱထာ်ကဲၤ, စာ်ဘိစဲာ်စါထံ အတဲၤယၱၢ်ဘဲာ် ယဳၤတစီာ်ကပ့ထာ်ပီၢ်နဳၤ, ထဲၢ်အဒီၣ်, “စခွံးတထဲဓူၢ်ဘဲာ် တဘီနီး” နဳၤ. 37ကၱာ် စဲာ်စါထံအလဝ့ၤတချဳးဒီၣ်ဝ့ၤ, “ပၠၤကစာ် ထာ်အံာ်ကီဒဳ ပၠၤဖျဳဖျီ ကဲၤတပွဲၤနဳၤ.”
တဲၤဘူလါယ့ၣ်ရှူး
(မး ၂၇:၅၇-၆၁, မၢ် ၁၅:၄၂-၄၇, လူၤ ၂၃:၅၀-၅၆)
38အလ့ၤကါစီၤယိၤသး, အရံၤမၤသဲဖဳး ထဲၢ်အမၱာ်ယ့ၣ်ရှူးအပျဲၢ်အဘီၣ်တပွဲၤတၤကဲၤ စီၤပံၤလးအကဖၱးက့ၤယ့ၣ်ရှူးအစဳး. (စီၤယိၤ သး မၱာ်ကဲၤ အပျဲၢ်အဘီၣ်အဟူၣ်အဇီၤတပွဲၤထဲၢ် အရှံး ဆါနံၤယူဒၤဖဳး အခဳးအန့ၤတစီာ်အလ့ၤလီၤ.) စီၤပံၤလးအံာ်တပွဲးစဲာ်အခွဲး, မဲၤကနဳၤစလ့ၤ ဖၱး ကဲၤလၢ်ဝၤ. 39စီၤနံၤကဒ့မူး, ထဲၢ်လှ့အအဆူး အလ့ၤထၱးသါ ယ့ၣ်ရှူးတပွဲၤနဳၤ လ့ၤကိာ်ကဲၤစကါ, စလ့ၤအံာ်ကဲၤမူရၣ်ကၱာ်သဳာ်နှူဝံာ်စံး ကျဲအရှံး ကၠံၢ်ရှံယဲၢ်ဇွဲၤ (ပီၣ်တကယဲၤ). 40စဲာ်ကၠံၢ်ပွဲၤဖၱး ယ့ၣ်ရှူး အစဳးကၱာ်အစာ်ဘိယူဒၤဖဳးအနူၤအဒီအီၣ် အဓ့ နဳၤ, စဘီာ်ကျဳၤအံာ်လၢ်ဝၤ တဲၤနှူဝံာ်နှူသရီ ကၱာ်တကၱ ယၢ်လီၤ. 41ဘ့ပၠၤထးလၤကျဳၤသံစဲာ် အလ့ၤ နဳၤ, တဲၤလူၤတဲၤဒဳအီၣ်တကျးဝး, ကၱာ်ဘ့ တဲၤလူၤတဲၤ ဒဳအပူၤ နဳၤ, လူၢ်ပူၤအသဲထဲၢ်ပၠၤတဘဲာ်ဘူလါတပွဲ နှၱနီးအီၣ်ကဲၤတပူၤ. 42တဲၤပြး နှဲးပွဲဓဳၤအမူၤနံၤ ဘဲာ်ယူဒၤဖဳးတစီာ်အနံၤခံဒဳၣ်, ပၠၤ ဘူလါကဲၤ ယ့ၣ်ရှူး ဘ့လဳၤအပူၤအနဳၤတပူၤလီၤ.
ទើបបានជ្រើសរើសហើយ៖
ယိၤဟၣ် 19: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
