ယိၤဟၣ် 20
20
လဳၤပူၤအအီၣ်လှီးသိ
(မး ၂၈:၁-၈, မၢ် ၁၆:၁-၈, လူၤ ၂၄:၁-၁၂)
1ဘ့တဆီးဒဲအနံၤအအူဆူးတနံၤ, လူၤမူၤ ဂီၤသးဘံဝ့ၤအခၠၱး နဳၤ, မၤကဒါလၣ်မဳၤနီၢ်မၤရၱလ့ၤ ကဲၤဒဳလူၢ်ခဳးကၱာ် စစာ်ထၱးကဲၤလဳၤထဲၢ် ပၠၤကျဲၢ်ဘံာ် အံာ်လူၢ်အပူၤခဳးတမဲဘးတကျဳဖျီးမံကဲၤ. 2စစွဲးလ့ၤ ကဲၤဒဳ စီၤၡံမိၣ်ပ့းတရူးအီၣ်, ကၱာ်အပျဲၢ်အဘီၣ်အလဝ့ၤတပွဲၤထဲၢ် ယ့ၣ် ရှူးဘဲာ်လီၢ်ကဲၤ တပွဲၤအီၣ် နဳၤကၱာ်စဒီဆးကဲၤလၢ်ဝၤ, “ပၠၤဟဲးအံာ် ကဲ ဖျီးမံကဲၤ ယ့ၣ်ရှူးအစဳးဒဳလူၢ်ခဳးအပူၤနဳၤ. ပၠၤဘဲ လါကဲၤစဲာ်ဒီၣ် လဲၢ်နဳၤဝၤ တသၱာ်ဟဲနီး,” စဒီဆးကဲၤလၢ်ဝၤဓဳၤ.
3မဲၤကနဳၤစီၤပ့းတရူးကၱာ်အပျဲၢ်အဘီၣ် အလဝ့ၤတပွဲၤစွဲးလ့ၤ ကဲၤဒဳလူၢ်ခဳးနဳၤ. 4စဲာ်ကၠံၢ် ပွဲၤလဳၢ်စွဲးလ့ၤသီတြီၤနီၣ်သီလၢ်ဝၤနှီနူၤ, အပျဲၢ်အဘီၣ်အလဝ့ၤတပွဲၤစွဲးပျါကၱာ်ဓဳၤလ့ၤအူဆူးစီၤပ့းတရူး ဒဳလူၢ်ခဳး နဳၤ. 5ပရၤဆါစတလ့ၤနံၢ်အပူၤနီး, မၱာ်စအိးအိနံၢ်ကဲၤအပူၤကၱာ်စစာ်ထၱးကဲၤ တကၱယၢ် တစီာ်အီၣ်တၤလၢ်ခဳး. 6အစွဲးလ့ၤ ကိာ်စလ့ၤ စီၤၡံမိၣ်ပ့းတရူးဓဳၤလ့ၤကဲၤကၱာ်စလ့ၤနံၢ်တနၢ်ကဲၤ လူၢ်ခဳးအပူၤ. ဘ့နဳၤစစာ်ထၱးကဲၤတကၱယၢ်အီၣ်ကဲၤလၢ်ခဳးတစီာ်, 7ကၱာ်တကၱယၢ်ထဲၢ် အဘီဘံာ် စကဳာ်နဳၤအတအီၣ်ပျဳာ်ပျဳာ်နီး, မၱာ်အအီၣ်ထူတကျူ ထာ်ဓီအန့ၤကၱာ်အီၣ်လၤဓူၢ်အဲလီၤ. 8ဘ့နဳၤအပျဲၢ်အဘီၣ် အဓဳၤလ့ၤအူဆူးကဲၤလူၢ်ခဳးတပွဲၤလ့ၤနံၢ် လဳၤပူၤ. စစာ်ထၱး ကဲၤကၱာ်စဘူၣ်ကဲၤ. 9(မၱာ်စဲာ်တစီာ်တသၱာ်ဟဲစဲာ်စါထံအတဲၤယၱၢ် ဘဲာ် ထဲၢ်စကထာ်ပဳၤက့ၤတဲၤသံအကျဲနဳၤနှၱနီး.) 10မဲၤကနဳၤအပျဲၢ် အဘီၣ်တစီာ်က့ၤကဲၤအရှံၣ်အဖါ.
ယ့ၣ်ရှူးဒဲလၱၢ်အန့ၤမၤကဒါလၣ်မဳၤနီၢ်မၤရၱ
(မး ၂၈:၉-၁၀, မၢ် ၁၆:၉-၁၁)
11နီၢ်မၤရၱဆီထဳးအီၣ်လူၢ်ပူၤအချဳကၱာ်စဟးကဲၤ. ဘ့စဟးဖါ သးနဳၤ, စစာ်နံၢ်ကဲၤဒဳလူၢ်အပူၤနဳၤ, 12ကၱာ်စစာ်ထၱးမီၢ်ခဳးပွဲၤဇဳၤ ကၠံၢ်ပွဲၤ, ကိ သီးအဘိာ်သါ, ဆးနါလၤအီၣ်ဒဳပၠၤဘဲလါယ့ၣ်ရှူး အစဳး အကဳာ်ခဳးတခီတပွဲၤကၱာ်ဒဳအခၣ်ထၱးတခီတပွဲၤ. 13မီၢ်ခဳးပွဲၤဇဳၤတစီာ် ဒီၣ်စဲာ်, “အမံၤမှူး, နဟးမၤနဲၢ်,” စဒဲလၢ်ဝၤဓဳၤ.
စဒီၣ်က့ၤလၢ်ဝၤတစီာ်, “ပၠၤဟဲးအံာ်ကဲၤယဘၱာ် စဲာ်ကၱာ်စဘဲလါလၢ် ဝၤဒီၣ်လဲၢ်နဳၤယတသၱာ်ဟဲနီး.”
14စဒီၣ်ဝှါကနဳၤကၱာ်စဘးတရၱၤစန့ၤ, စစာ် ထၱးကဲၤယ့ၣ်ရှူး ဆီထဳအီၣ်, ပရၤဆါစတသၱာ် ဟဲကဲၤ လၢ်ဝၤမၱာ်ယ့ၣ်ရှူးနီး. 15ယ့ၣ်ရှူးဒီၣ်စဲာ်, “အမံၤ မှူး, နဟးမၤနဲၢ်. နဝၢ်လှဲးပီၢ်ပွဲၤ.” စဒဲကဲၤလၢ်ဝၤ ဓဳၤ.
စကမဳၤလၢ်ဝၤမၱာ်ပၠၤအခွဲးအံာ်တဲၤလူၤတဲၤဒဳဒဳၣ်, စဒဲကဲၤလၢ်ဝၤ, “ဆရၣ်, ဘ့ာ်မ့နလ့ၤဘဲလါစဲာ် အလဝ့ၤတလၢ်လၢ်ဒဳၣ်, ဒီဆးပီၢ်ယဲၤနလ့ၤဘဲ လါစဲာ်အလ့ၤ, ကၱာ်ယကလ့ၤဖၱးက့ၤစဲာ်,” စဒီၣ် လၢ်ဝၤဓဳၤ.
16ယ့ၣ်ရှူးဒီၣ်စဲာ်, “နီၢ်မၤရၱ.”
စဘးတရၱၤဝှါစန့ၤ, စဒီၣ်ဧ့ၤဘြံၤအလ့ၢ်, “ရၤဘူနံၤ” (အထာ်ပဳၤ ထာ်ဘါမၱာ်, “ဆရၣ်.”)
17ယ့ၣ်ရှူးဒီၣ်စဲာ်, “ပဳၢ်ဝဲၢ်ပီၢ်မဲးယလီၤမဲး. မၤနဲၢ်, ယတက့ၤ ထာ်ထၱးဘဲာ်ယပာ်နှၱနီး. မၱာ်လ့ၤ ထၱး ပီၢ်ယသဲပူၤဝ့ၤတစီာ်ကၱာ်ဒီဆးပီၢ်စဲာ်, ယက့ၤ ထာ်ဒဳ ယပာ်အီၣ်ကၱာ်သံပာ်အီၣ်နဳၤ, ဒဳယဘၱာ်စဲာ် အီၣ်ကၱာ် သံ ဘၱာ်စဲာ်အီၣ်နဳၤ,” စဒီၣ်လၢ်ဝၤဓဳၤ.
18မဲၤကနဳၤဒဳၣ်, မၤကဒါလၣ်မဳၤနီၢ်မၤရၱ လ့ၤကၱာ်ဒီဆးကဲၤ အပျဲၢ်အဘီၣ်တစီာ်, ထဲၢ်စစာ် ထၱး ထဳဘၱာ်စဲာ်ထဳ, ကၱာ်ဒီဆးကဲၤလၢ်ဝၤ တစီာ် ဘၱာ်စဲာ်ဒီၣ် ကဲၤစာ်တဲၢ်နဳၤ.
ယ့ၣ်ရှူးဒဲလၱၢ်အန့ၤစပျဲၢ်စဘီၣ်တစီာ်
(မး ၂၈:၁၆-၂၀, မၢ် ၁၆:၁၄-၁၈, လူၤ ၂၄:၃၆-၄၉)
19ဘ့တဆီးဒဲအအူဆူးတနံၤ လူၤမူၤဟဲး လၤနဳၤ, အပျဲၢ်အဘီၣ်တစီာ်လၤဓ့ၢ်ပျဳၤလှဲးလၢ်ဝၤ ဒဳရှံၣ်တဝၤအပူၤကၱာ်ဘီဘံာ်ကဲၤခးကျဲၢ် ဓဳၤ. မဲၤနဲၢ် ဒဳၣ်, စဲာ်တစီာ်ရှံးဆါနံၤယူဒၤဖဳးအခဳးအန့ၤတစီာ် အလ့ၤအခဳး အစဲနဳၤ. ယ့ၣ်ရှူးလ့ၤကၱာ် ဆီထဳးအီၣ် အီၣ်ကဲၤဒဳ စဲာ်တစီာ်အသကျါ မဲ ဗူနဳၤ, ကၱာ်စဒီၣ် လၢ်ဝၤ, “တဲၤစဳးတဲၤမီၤကဘဲာ်ဒီဧဲၤသံ.” 20စဒီၣ်လၢ်ဝၤကနဳၤကၱာ်စဒဲလၱၢ်လၢ်ဝၤစစူးအၱသးကၱာ် စဧဳၢ်ဇ့ၤလဲၢ်. စစာ်ထၱးဘဲာ်ဘၱာ်စဲာ်ကနဳၤဒဳၣ်, စပျဲၢ်စဘီၣ်တစီာ်သကနၢ်အံာ်ကဲၤ. 21မဲၤကနဳၤဒဳၣ်, ယ့ၣ်ရှူးဒီၣ် စဲာ်တစီာ်တပျာ်ပ့ၤ, “တဲၤစဳးတဲၤမီၤကဘဲာ်ဒီဧဲၤ သံ.” အစာ်ဘိ အပာ်သဲလ့ၤထဳယဲၤအခီနဳၤ, ယဲၤမၱာ်မၱာ် ယသဲလ့ၤသံလီၤ. 22စဒီၣ်ဝှါလၢ်ဝၤကနဳၤဒဳၣ်, စသဲးလၤလၢ်ဝၤတစီာ်အခဳးကၱာ်စဒီၣ်, “ဖၱးနံၤပီၢ် သးစါထံ, 23သံကဘါပျဲးပၠၤတပွဲၤပွဲၤအတဲၤ ခီၣ်ဝဲၤ ဒဳၣ်, အကဘဲာ်ဘးလှိကီ, ကၱာ်သံတဘါပျဲးမၤ စဲာ်တစီာ်နီးဒဳၣ်, စကတဘဲာ်ဘါပျဲးကီနီး,” စဒီၣ်လၢ်ဝၤတစီာ်ဓဳၤ.
ယ့ၣ်ရှူးကၱာ်စီၤသိၤမါ
24ဘ့ယ့ၣ်ရှူးလ့ၤအခၠၱးနဳၤ ရှံးကၠံၢ်ပွဲၤအကျဲ တပွဲၤ, ထဲၢ်စီၤ သိၤမါ (ပၠၤယဳၤအမံၤအအီၣ်သကဳ) နဳၤ တအီၣ်ကိာ်ကဲၤပၠၤအကါနီး. 25မဲၤကနဳၤဒဳၣ်, အပျဲၢ်အဘီၣ်အလဝ့ၤတစီာ်ဒီဆးစဲာ်, “ဝၤစာ်ထၱးထဳ ဘၱာ်စဲာ်,” နဳၤ.
စီၤသိၤမါဒီၣ်က့ၤစဲာ်တစီာ်, “ယတစာ်ထၱးဘဲာ် ထးလးဆ့းဖျီအလ့ၤ ဒဳစစူးအၱသးအပူၤနီး, ကၱာ်တစဝၱ နံၢ်ဘဲာ်အပူၤလ့ၤနီး, တဘဳာ်နံၢ်ဘဲာ်ဒဳ စဧဳၢ်ဇ့ၤလဲၢ်နီး ဒဳၣ်, ယတဘူၣ်နီး,” စဒီၣ်လၢ်ဝၤတစီာ်ဓဳၤ.
26ဒဳအလ့ၤကါတဆီးဒဲနဳၤ, အပျဲၢ်အဘီၣ် တစီာ် အီၣ်ပျဳာ်ဒီ လၢ်ဝၤဘ့ရှံၣ်ပူၤတပျာ်ပ့ၤ, ကၱာ် စီၤသိၤမါအီၣ်ကိာ်ကဲၤပၠၤအကါကါ. ခး ကျဲၢ်အီၣ် အဖြီးဘံာ်. ပရၤဆါယ့ၣ်ရှူးလ့ၤဆီထဳးအီၣ်ဝှါဒဳ အသကျါမဲ ပူၤ, စဒီၣ်, “တဲၤစဳးတဲၤမီၤကဘဲာ်ဒီဧဲၤသံ.” 27မဲၤဝှါစဒီၣ်ကဲၤစီၤ သိၤမါ, “စာ်ပီၢ်ယစူးခီးယဳၤ ကၱာ်စဝၱနံၢ်ပီၢ်တခး, ဘဳာ်နံၢ်ပီၢ်ဒဳယဧဳၢ်ဇ့ၤ လဲၢ်တခး. ထဲးနံၤဝံနံၤဝၤပီၢ်မဲး. ဘူၣ်ပီၢ်ခး.” စဒီၣ်လၢ်ဝၤဓဳၤ.
28စီၤသိၤမါဒီၣ်ရှံက့ၤစဲာ်, “ယဘၱာ်စဲာ်ကၱာ် ယဘၱာ်စဲာ်.”
29ယ့ၣ်ရှူးဒီၣ်စဲာ်, “နစာ်ထၱးထဳယဲၤဒဳၣ်, နဘူၣ်ကီယဲၤဧါ. အဘဲာ်ဟိးဝၱၤမၱာ်အတစာ်ထၱးယဲၤနီး ကၱာ်အဘူၣ်ယဲၤတစီာ်နဳၤ.”
စဲာ်အယဳၤအတဲၤသးအဲးနံၤ
30ယ့ၣ်ရှူးမဲၤတဲၤပီၤတဲၤပၤဒဳစပျဲၢ်စဘီၣ် တစီာ်အလှီမီၢ်နဳၤ အီၣ်ဝ့ၤပွ့တမံၤထဲၢ်အတအီၣ် ဝှ့းလၤဒဳစဲာ်အယဳၤတဘဲာ်အပူၤနီးနဳၤ. 31တဲၤ အအီၣ်ဝှ့းလၤယဳၤတစီာ်မၱာ်စာ်ဘိထဲၢ်သံကဘူၣ် ပီၢ်ထဲၢ်ယ့ၣ်ရှူး မၱာ်ခရၱာ်, ကဘၱာ်စဲာ်အဖဳးဒဳၣ်သံကနံၤဘဲာ်တဲၤသမိဒဳစမံၤအပူၤနဳၤ.
ទើបបានជ្រើសរើសហើយ៖
ယိၤဟၣ် 20: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
