သဓဳဖဳး 12
12
တဲၤလိၤမဲၤဆဲးညဲအီၣ်အဲးထာ်
1လှ့နဳၤဆးဖြးဟ့ၤရိာ်လိၤမဲၤဆဲးညဲ ကဲၤတဲၤအီၣ်ပျဳာ်တစီာ်. 2စနှးကဲၤပၠၤပ့ၢ် သံစီၤယိၤဟၣ်အမဲၢ်စီၤယၤကိာ်ကၱာ်ဒာ်. 3ဘ့စစာ်ထၱးကဲၤ အဘဲာ်သးပၠၤယူဒၤဖဳးတစီာ် နဳၤဒဳၣ်, စဖီၣ်ကဲၤစီၤပ့းတရူး ပာ်ပာ် ဘ့တကိာ် ကမံၤတပာ် နီးအပွဲနံၤနဳၤ. 4စဖီၣ်ဝှါလၢ် ဝၤ, စထၱးနံၢ်လၢ်ဝၤဒဳတဲၤကၱတၱၢ်ပူၤနဳၤ, ကၱာ်စနှးကဲၤကျံဖဳးတစီာ်တိၤအံာ်စဲာ် လွံၢ်ပွဲၤတဖဳး, လွံၢ် ပွဲၤတဖဳး, ကၱာ်ဘ့ပွဲးလ့ၤတလိးကဝှါနဳၤ, စထိးဒဲ ကၱာ် စံးရးကီလၢ်ဝၤဒဳ ယူဒၤဖဳးတစီာ်အလှီမီၢ် နဳၤ. 5ဘ့စီၤပ့းတရူးအီၣ် ဝ့ၤတဲၤကၱတၱၢ် အပူၤနဳၤ, တဲၤအီၣ်ပျဳာ်တစီာ်သဘဲထာ်တကြၱၤ နၱၤတပွဲးစနံၤခံဒဳဘၱာ်စဲာ်အီၣ်နဳၤ.
စီၤပ့းတရူးအတဲၤလှိထာ်ဖျီးထာ်
6ဘ့စီၤဟ့ၤရိာ်သးမီစွံးဖျီးထာ်စဲာ်အနဳၤတနဲၤနဳၤ, စီၤပ့းတရူး ဆီးမံကဲၤဒဳ ကျံဖဳးကၠံၢ် ပွဲၤအပျဲာ်နဳၤ. ပၠၤစဳကျဳၤကၠၱၢ်ကျဳၤစဲာ်ကၱာ် ထးလး ပံၤကၠံၢ်ဘီ, ကၱာ်ဒဳအချဳနဳၤ ကျံဖဳးတစီာ်တိၤအံာ် တဲၤကၱတၱၢ်အခးကျဲၢ်. 7ကၱာ်စာ်ပီၢ်, ကဘၱာ်စဲာ်အပွဲၤဇဳၤတပွဲၤဆီထဳးအီၣ်စဧဳၢ်လီၤကၱာ် အလှၱဆ့းကတြီၤကဲၤဒဳရှံၣ်အီပူၤနဳၤ. စဇီၤခွဲးဘဲာ် ဝှါလၢ်ဝၤအပျ့ဘးခဳး, ထဳးဝဲၢ်ကဲၤလၢ်ဝၤ, စဒီၣ်, “ဝဲၢ်ထဳးပျာ်ပျါပီၢ်,” စဒီၣ်လၢ်ဝၤဓဳၤ. ထးလးပံၤ တစီာ်လၤဓ့ၢ်ပျဳာ်ကဲၤစီၤပ့းတရူးအစူးခီးလီၤ. 8“စဳကျဳၤဝှါ နနှၱယၢ် ပံၤ, ကီးထာ်နခၣ်တကီး,” မီၢ်ခဳးပွဲၤဇဳၤဒီၣ်စဲာ်ဓဳၤ. စီၤပ့းတရူးမဲၤကဲၤ ကနဳၤ. ကၱာ်စဒီၣ်ဝ့ၤလၢ်ဝၤ, “ကၢ်ဘံာ်နရှံာ်ဒဳဓဳၤ ကၱာ်လိၤကိာ်ယလ့ၤ” စဒီၣ် လၢ်ဝၤဓဳၤ. 9စဟဲးထာ်ကိာ်ကဲၤလၢ်ဝၤအကါအချဳ, မၱာ်တၤ မဲၤ ကဲၤနဲၢ်နဳၤ စတသၱာ်ဟဲကဲၤနီး, ကၱာ်မီၢ်ခဳး အပွဲၤဇဳၤမၱာ် အသ့ပွ့ၤဧါ, မၱာ်စတသၱာ်ဟဲကဲၤနီးနီး. စကမဳၤမၱာ် စစာ်ထၱးတဲၤစာ်ထၱးလီၤ. 10စဟဲး တလိးဝှါကျံဖဳးအအူဆူးတဖဳးကၱာ် ကၠံၢ်ဖဳး တဖဳးဒဳၣ်, စဓဳၤလ့ၤကဲၤဒဳ ခး ကျဲၢ်ထးလးအဖျီ နံၢ်ဒဳအူးပူၤတဘဲာ်နဳၤ, ကၱာ်အအီၣ်တဘါကဲၤအလဳၤအလၤ. စဟဲးထာ်ကိာ်ဝှါကျဲးတဘီအလီၤ, မီၢ်ခဳးအပွဲၤဇဳၤ လဲၢ်လၤဓီကဲၤစဲာ် တပွဲၤလီၤ.
11စီၤပ့းတရူးသၱာ်ဟဲလၤက့ၤစန့ၤ, စဒီၣ်, “ခဳနူၤယဳၤ ယသၱာ် ဟဲလၤတံၤလၤဆ့းထဳ ကဘၱာ်စဲာ်သဓဳလ့ၤကဲၤစမီၢ်ခဳးပွဲၤဇဳၤအကမဲၤလှိ ထာ်ယဲၤဒဳစီၤဟ့ၤရိာ်အစူးခီးပူၤကၱာ်ယူဒၤဖဳးတစီာ် အတဲၤသးအဲးနံၤနဳၤ,” စဒီၣ်ကဲၤဓဳၤ.
12ဘ့စသၱာ်ဟဲလၤက့ၤစန့ၤနဳၤ, စဓဳၤကဲၤဒဳစီၤယိၤဟၣ်မၢ် ကူးစမဳၤ နီၢ်မၤရၱအရှံၣ် နဳၤ. ဒဳနဳၤပၠၤအီၣ်အဲးအီးအီးလၤဓ့ၢ်ပျဳာ်လၢ်ဝၤ ကၱာ်သဘဲထာ်ကဲၤ. 13စီၤပ့းတရူးတကျီးရှံၣ်လှီမီၢ်အခးကျဲၢ်, ကၱာ်ဇိၤမဳၤအမံၤမၱာ် နီၢ်ရိဒ့ၤတပွဲၤလ့ၤဒဳ အကဘါထာ်နံၤစဲာ်ခးကျဲၢ်. 14ပရၤဆါ ဘ့စသၱာ်ဟဲကၱာ်မှါအံာ်ကဲၤ မၱာ် စီၤပ့းတရူးအလ့ၢ်နဳၤ, စစွဲးဘးက့ၤရှံၣ်ပူၤ ကၱာ် ဒီဆးကဲၤပၠၤ, ထဲၢ်စီၤပ့းတရူးဆီထဳးအီၣ် ကဲၤဒဳခးကျဲၢ်ထၱးနဳၤ. 15မၱာ်ပၠၤဒီၣ်စဲာ်, “နပျူၤထဳ” ပရၤဆါစဒီၣ် တခၱနၤကဲၤကနဳၤ လီၤ. မဲၤကနဳၤဒဳၣ်, ပၠၤတစီာ်ဒီၣ်, “အမၱာ်စမီၢ်ခဳး ပွဲၤ ဇဳၤ.”
16စီၤပ့းတရူးတကျီးတလဲၤလဲၤဒီ ခးကျဲၢ်ဓဳၤ, စဲာ်တစီာ်လ့ၤ ဘါထာ်ကဲၤကၱာ် စာ် ထၱးကဲၤလၢ်ဝၤဒဳၣ်, စထဲးတမိၢ်တမှါလဳၢ်ကဲၤ. 17စီၤပ့းတရူးနှးအီၣ်ဇီၤလီၤဝှါစဲာ်တစီာ် ဒဳၣ်, စဒီဆးကဲၤလၢ်ဝၤ ဘၱာ်စဲာ် ဟဲးထာ်အံာ်ဟူ ကဲၤစဲာ်ဒဳ တဲၤကၱတၱၢ်အပူၤစာ်တဲၢ်နဳၤ. မဲၤဝှါ စဒီၣ်, “ဒီ ဆးပီၢ်စီၤယၤကိာ်ကၱာ်သဲပူၤဝ့ၤ တစီာ် နဳၤ,” စဒီၣ်လၢ်ဝၤတစီာ်ဓဳၤ. ကၱာ်ဒီ စဟဲးထာ်ကၱာ် လ့ၤကဲၤဒဳအလဝ့ၤတချဳးနဳၤ.
18ဘ့လူၤမူၤဆ့းထာ်ကဲၤနဳၤ, ဒဳကျံ ဖဳးတစီာ်အကျဲ, တဲၤပဳၤ ကလၢ်အီၣ်ထာ်ကဲၤ အဘဲာ်ကၠးစီၤပ့းတရူး ဆဲးဖျီးထာ်ကဲၤအစဲနဳၤ. 19စီၤဟ့ၤရိာ်နှးပၠၤဝၢ်လှဲးစီၤပ့းတရူး, စတကဲာ်ထၱးလၢ်ဝၤနီးဒဳၣ်, စထိး စာ်ဒဲစာ်ဝှါပၠၤ အစာ်အံာ်စဲာ်တစီာ်ဒဳၣ်, စနှးကဲၤပၠၤပၠၤမဲၤသံလၢ်ဝၤ တစီာ်.
အလ့ၤကါစီၤဟ့ၤရိာ်လၤကဲၤဒဳ ယူဒၤက့ၤ ကၱာ် လၤအီၣ်ကဲၤဒဳ ကဲၤ စါရံၤအူးပူၤနဳၤ.
စီၤဟ့ၤရိာ်အတဲၤသံ
20စီၤဟ့ၤရိာ်သဲးထဲးဘဲာ်ကဲၤ ပၠၤစိၢ် ဖဳးကၱာ်ပၠၤစံဒိၣ်ဖဳးတစီာ် နဳၤအဇၱၢ်အဇိၢ်, ဒဳၣ်စဲာ် တစီာ်လ့ၤပျဳာ်ပျဳာ်ကဲၤဒဳလၢ်ဝၤတစီာ်အီၣ်နဳၤ. အအူ ဆူးနဳၤစယဳၤနံၤဝှါ စီၤဘျၤစတူး, ဆးဖြး အမၢ်ဓဳၤတပွဲၤဒဳၣ်, စတၤကဲၤ တဲၤချံး. မၤနဲၢ်, စဲာ်တစီာ် အီၣ်သမိအံာ် တဲၤအၣ်တဲၤအီ ဒဳစီၤဟ့ၤရိာ်အထံအက့ၤအီၣ်အခဳးအစဲလီၤနဳၤ.
21မၤကနဳၤ စဲာ်တစီာ်အီၣ်ပြးတီၤ လီၤဘ့မူၤနံၤတနံၤနဳၤ ဘ့ စီၤဟ့ၤရိာ်ကကြဳၢ်ထာ် ဘူထာ်ဆးဖြး အတဲၤကြဳၢ်တဲၤဘူကၱာ် ကဆးနါ လၤဝှါဒဳအနၤပူၤ, အကစံးရးဖၤမၤတဲၤနဳၤ. 22ကၱာ်ပၠၤတစီာ်ထဳထာ် အလ့ၢ်ကၱာ် စဒီၣ်, “အယဳၤမၱာ် ဘၱာ်စဲာ်အလ့ၢ်, တဘဲာ်ပၠၤအလ့ၢ် နီး,” စဒီၣ်ဓဳၤ. 23စတပဲၢ်တီၤပဲၢ်သ့း ကဘၱာ်စဲာ်နီး, မၱာ်စဖၱးဓဳၤဖၱးမူၤစန့ၤ အခဳးအစဲ, မီၢ်ခဳးပွဲၤဇဳၤပျဲစဲာ်ဒဳၣ်, စလှဳးဝ့ၢ်ထာ်ဝှါစသံကဲၤ.
24ကဘၱာ်စဲာ်အလ့ၢ်အဝှဲးဓဳၤထာ် ခီထာ်ကၱာ်ဒဲးလီၢ်ဒဲးခီကဲၤ.
25စီၤဘၢ်နါဘၤကၱာ်စီၤစီလူးမဲၤ ပ့ ထာ်ဝှါအတဲၤမဲၤဒဳၣ်, စက့ၤဘးကဲၤဒဳ ယရူး ရှလ့ၣ်အူးနဳၤကၱာ်စက့ၤယဳၤအံာ်ကဲၤ စီၤယိၤဟၣ် မၢ် ကူးတပွဲၤနဳၤ.
ទើបបានជ្រើសរើសហើយ៖
သဓဳဖဳး 12: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
