သဓဳဖဳး 11
11
တဲၤဒီၣ်လှၱထာ်ဒဳယရူၤၡလ့ၣ်အူးပူၤနဳၤ
1အပျဲၢ်အဘီၣ်တစီာ်ကၱာ် သဲပူၤသဲဝ့ၤအအီၣ်ဒဳယူဒၤက့ၤတစီာ် သၱာ်ဟဲဘဲာ်ကဲၤ ထဲၢ်ပွဲၤ သူကူးဖဳးတစီာ်မၱာ်မၱာ် ဖၱးနံၤထဳကဘၱာ်စဲာ်အလ့ၢ် အဝှဲးနဳၤ. 2ပရၤဆါ စီၤပ့းတရူးထာ်ဒဳ ယရူၤၡလ့ၣ်အူးနဳၤ, အပျဲၢ်အဘီၣ်ထဲၢ်အအီၣ် အံာ်ဝ့ၤတဲၤဝှိရကၱတစီာ် ခွဲးထာ်ကဲၤ စတဲၤကမဲးကၱာ်စဒီၣ်, 3“နလ့ၤထၱးဝှါပွဲၤအတဘဲာ်ဝှိရကၱနီးတစီာ်ကၱာ်အၣ် အီကိာ်မၤစကါနဲၢ်,” စဒီၣ်လၢ်ဝၤဓဳၤ. 4ကနဳၤအစဲ စီၤပ့းတရူးဒီၣ် လှၱထာ်နံၤကဲၤတဲၤဝၱၤတဲၤကဲ ထဲၢ်အဖၱ ထာ်နံၤကဲၤစဲာ်တစီာ် စးထာ်လှ့အကါထၱး ထဳဓဳၤအကဓူၤနဳၤ, 5စဒီၣ်, “ဘ့ယသဘဲ ထာ်ဒဳယိၤဖၤ အူးအပူၤနဳၤ, ယနံၤဘဲာ်တဲၤ စာ်ထၱး. ဒဳယတဲၤစာ်ထၱးအပူၤ, ယစာ်ထၱး ကဲၤတကၱယၢ်အဓဳၤအခီတဘဲာ်, အန့ၤပူၤအီၣ်လွံၢ် ခီဘဲာ်, အီၣ်အဇဲၤ လၤဒဳမီၢ်ခဳးကၱာ် အလၤ ဆီးဒဲ ကတီၤဘ့ယအီၣ်နဳၤ. 6ယစာ်နံၢ် လၤတံၤလၤဆ့းဒဳအပူၤနဳၤဒဳၣ်, ယစာ်ထၱးတဲၤဖဳး တဲၤဝ့ၤအခၣ်ခီးအီၣ်လွံၢ် ခီကၱာ်အဟဲးဝ့ၢ်တစီာ်, ကၱာ်ထဳဖဳးယဳၢ်လံၤအအီၣ်ဒဳမီၢ်ခဳးလဲၢ်တစီာ် အီၣ် ပ့ထာ်ကဲၤအပူၤ. 7ယသၱာ်ဟဲတဲၤလ့ၢ် တဲၤဝှဲးတဓဲ, အဒီၣ်, ‘ဝၢ် ထဳး, စီၤပ့းတရူး, မဲၤသံဝှါအၣ်ပီၢ်,’ အဒီၣ်ယဲၤဓဳၤ. 8ပရၤဆါ, ယဒီၣ်ရှံက့ၤ, ‘နီး, အဳဘၱာ်စဲာ်, မၤနဲၢ်, ယတအၣ်ကဲၤတဲၤအတစါထံနီး ကၱာ်တဲၤအတရူနီး တခးနီး’ ယဒီၣ်ကဲၤဓဳၤ. 9ပရၤဆါ တဲၤ လ့ၢ် ဒီၣ်ရှံက့ၤဒီယဲၤတပျာ်ပ့ၤ, ‘တဲၤထဲၢ်ကဘၱာ် စဲာ် မဲၤပျၱမဲၤစါဝှါနဳၤ, ဒီၣ်ပီၢ်မဲး အတစါထံနီးမဲး,’ အဒီၣ်ယဲၤဓဳၤ. 10တဲၤဖၱထာ်ဝှါကနဳၤ သဳပျာ်ဝှါ ဒဳၣ်, တဲၤလဳစါစဲး ဘဲာ်စွံးထာ်က့ၤကဲၤ ဒဳမီၢ်ခဳးလဲၢ်နဳၤ. 11အလ့ၤ ကါ စာ်ပီၢ်, ပၠၤအအီၣ်ဒဳကဲၤစါရံၤအူး, အဘဲာ်သဓဳလ့ၤသဳပွဲၤ လ့ၤထၱးကဲၤ ယဲၤဒဳ ပၠၤအရှံၣ် ယအီၣ်အံာ်တဝၤ နဳၤ. 12သးစါထံနှးယလ့ၤ ကိာ်ပျာ်ပျါကဲၤ စဲာ်တစီာ်အကါ. သဲပူၤသဲဝ့ၤအဘူၣ်တဲၤထဲၢ်အအီၣ်ယိၤ ဖၤအူး အပွဲၤသါသိးလ့ၤကိာ်ကဲၤယကါ ဒဳကဲၤစါရံၤအူးနဳၤ, ကၱာ်ဝၤလ့ၤနံၢ် လဳကဲၤဒဳ စီၤကန့လံးအရှံၣ်ပူၤနဳၤ. 13စဒီဆးကဲၤ ဝၤထဲၢ် မီၢ်ခဳး ပွဲၤဇဳၤတပွဲၤ ဆီထဳးအီၣ်ဒဳ စရှံၣ် ပူၤကၱာ်စဒီၣ်လၢ်ဝၤ, ‘သဓဳလ့ၤပၠၤဒဳ ယိၤဖၤအူး နဳၤကၱာ်ယဳၤလ့ၤပီၢ်စီၤၡံမိၣ်, ထဲၢ်ပၠၤယဳၤအမံၤ စီၤပ့းတရူးတပွဲၤနဳၤ. 14စကယၱၢ်ဘဲာ် ထၱးကီနဲၤတဲၤယၱၢ်ဘဲာ်ဒဳ နဲၤကၱာ်နဖဳးနမှဲ သဒဲကမူၤကနံၤဘဲာ်ကီတဲၤလှိထာ်က့ၤအပူၤနဳၤ,’ စဒီၣ်လၢ်ဝၤဓဳၤ. 15ကၱာ်ဘ့ယကကဳၤ ထာ်တဲၤယၱၢ်ဘဲာ်တတီၤလီၤနဳၤ, သးစါထံလ့ၤ လၤကဲၤစဲာ်တစီာ်အခဳး, အစာ်ဘိအလ့ၤလၤကဲၤ 16ကၱာ်ယကမဳၤ ထာ်နံၤဘၱာ်စဲာ်အတဲၤ ယၱၢ်ဘဲာ်, ထဲၢ်စဒီၣ်, ‘စီၤယိၤဟၣ်ဖဳးစူပၠၤ ကၱာ် ထံ, ပရၤဆါ သံကဘဲာ်ဖဳးစူအံာ်ကီသးစါထံ,’ နဳၤ. 17အလၱၢ်ထာ် ကဲၤဒဳ ကဘၱာ်စဲာ်အံာ် လၤပွဲၤသူကူာ်ဖဳးတစီာ်တဲၤအံာ်လၤအစာ်ဘိ စအံာ် လၤကဲၤဝၤအဘူၣ်ဘၱာ်စဲာ်ယ့ၣ်ရှူးခရၱာ် တစီာ်နဳၤ. မဲၤကနဳၤဒဳၣ်, ယမၱာ်ဒီ ပီၢ်ပွဲၤ, ထဲၢ်အကမဲၤဒၱာ်ဒါကဲၤထာ်ကဘၱာ်စဲာ်အကျဲးနဳၤပွဲၤ,” စဒီ ဆး ကဲၤလၢ်ဝၤတစီာ်ဓဳၤ.
18ပၠၤတစီာ် သၱာ်ဟဲဘဲာ်တဲၤ ယၱၢ် ဘဲာ်အယဳၤဒဳၣ်, စသးလၤ ဇ့ၤက့ၤကဲၤကၱာ် ပဲၢ် တီၤပဲၢ်သ့းကဘၱာ်စဲာ်, စဒီၣ်, “ကဘၱာ်စဲာ် အံာ် လၤနံၤတပွဲၤ ပွဲၤသူကူာ်ဖဳးတစီာ်အကဆး လၤ သးကၱာ် အကနံၤဘဲာ် တဲၤ အီၣ်နဳၤ,” စဲာ်တစီာ် ဒီၣ်ကဲၤဓဳၤ.
တဲၤအီၣ်ပျဳာ်ဒဳအၣ်တံအီၤ
19ဒဳတဲၤလိၤမဲၤဆဲညဲ အဘူၣ်တဲၤ တစီာ် ဘ့စီၤစတ့ဖၤဘဲာ် မဲၤသံဝှါအခဳးအစဲ, ပၠၤ တစီာ်ဆဲးဖြူးလၤဖြၱထာ်ကဲၤဒဳ ဖိၣ်နံရှၣ်, ကူပြူး ကၱာ်အၣ်တံအီၤအူးနဳၤ, ကၱာ်စဲာ်တစီာ်ဒီထိးလၤ နံၤထ့ပၠၤယူဒၤဖဳးတစီာ် လီၤ. 20မဲၤနီၣ်သီ နှီနူၤ, ပၠၤအဘူၣ်တဲၤအလဝ့ၤ, ထဲၢ်ကူပြူးဖဳး ကၱာ်ကူရ့းန့ဖဳးတစီာ် လ့ၤဒဳအၣ်တံအီၤအူးကၱာ် ဒီၣ်အူဒီဆးပွဲၤသူကူာ်ဖဳး ဘၱာ်စဲာ်ယ့ၣ်ရှူးအတဲၤ သးလဳၢ်သးလၤအဝၱၤအကဲလီၤ. 21ကဘၱာ်စဲာ်အတီၤအသ့း အီၣ်ကိာ်စကါအစဲဒဳၣ်, ပၠၤအီၣ်အဲးအီးအီးဘူၣ်ကၱာ် က့ၤဘးထၱးတပွဲး ကဘၱာ်စဲာ်.
22စဲာ်တစီာ်အဝၱၤအကဲဟဳနံၢ်ကဲၤဒဳ တဲၤအီၣ်ပျဳာ်အအီၣ်ယရူၤ ရှလ့ၣ်အူး အနံၤကူၤ ပူၤကၱာ် စဲတစီာ် သဓဳလ့ၤကဲၤစီၤဘၤနါဘၢ်ဒဳ အၣ် တံအီၤနဳၤ. 23ဘ့စလ့ၤကၱာ် စာ်ထၱး ဘဲာ်ကဲၤကဘၱာ်စဲာ်အတဲၤဟိး ဝၱၤ လၤဘဲာ်စဲာ်တစီာ်နဳၤ, စသးကနၢ်အံာ်ဆိးတပွဲးကဲၤကၱာ် အံာ် ခဳးအံာ် အါကဲၤလၢ်ဝၤတစီာ် အကအီၣ်အံာ်ပီၢ် တဲၤဘူၣ်မှ့း ဒဳဘၱာ်စဲာ်အပူၤနဳၤ. 24စီၤဘၤနါဘၢ်မၱာ်ပၠၤအအဲးအအီ, ပ့ထာ်ကၱာ်သး စါထံကၱာ်တဲၤ ဘူၣ်တပွဲၤအခဳးအစဲ, ပၠၤအပဳၤ အဟီးအီၣ်အဲးအီးအီးဘဲာ်ယဳၤလ့ၤကဲၤဒဳ ဘၱာ်စဲာ် အီၣ်.
25အလ့ၤကါ စီၤဘၤနါဘၢ်လ့ၤ ဝၢ်လှဲးကဲၤစီၤစီလူးဒဳတၤရှူး အူးပူၤနဳၤ. 26ဘ့စပာ်ထၱးလၢ်ဝၤနဳၤ, စက့ၤယဳၤအံာ်ကဲၤလၢ်ဝၤ ဒဳ အၣ်တံအီၤအူးနဳၤ. သဒဲဒ့ာ်အဓၢ်ပူၤ, စဲာ်ကၠံၢ်ပွဲၤမဲၤကိာ် ပၠၤအကါတဲၤအီၣ်ပျဳာ်အတဲၤလၤဓ့ၢ်ပျဳာ်ကၱာ်သိၣ်အံာ် သီအံၤကဲၤပၠၤအပဳၤအဟီး, အပျဲၢ်အဘီၣ်တစီာ်ဘဲာ် ယဳၤလၤပူၢ်ခရၱာ်ဖဳးမၱာ်ကဲၤဒဳအၣ်တံအီၤအူးပူၤနဳၤ.
27ဘ့နဳၤဝံတစီာ်ထဲၢ်အအီၣ်ဒဳ ယရူၤၡလ့ၣ်အူးပူၤနဳၤ လၤ ကဲၤဒဳအၣ်တံအီၤအူး တစီာ်. 28ကၱာ်ဒီ, စကျဲနဳၤအမံၤမၱာ် စီၤအကါဘူးဝဲၢ်ထဳးကၱာ်ဒီဆးတီၤလီၤကဲၤဒဳ သးစါထံအပူၤနဳၤ, ထဲၢ်တဲၤဝံၢ်သိ ကအီၣ် ထာ်ကီ ဒဳလၢ်ခဳးသဒဲဘဲာ်နဳၤ. (တဲၤဝံၢ်သိ အီၣ်ထာ်ကဲၤဘ့ ကျီၢ် ဒံအလဲၤသၱာ်ခဲနဳၤ.) 29မဲၤကနဳၤ အပျဲၢ်အဘီၣ်တစီာ် ပဲၢ်လၤကဲၤ အသး အကသဲလ့ၤတဲၤမဲၤဇဳၤဒဳ စသဲပူၤသဲဝ့ၤ အအီၣ်ယူဒၤက့ၤတစီာ် ပွ့ စကဲာ်ထာ်အသရ့နဳၤ. 30အလ့ၤကါ စအံာ်လ့ၤတဲၤမဲၤဇဳၤဒဳ တဲၤ အီၣ်ပျဳာ်အန့ၤဓဳၤသးပွ့ၤတစီာ်အီၣ်ဒဳ စီၤဘၤနါဘၢ်ကၱာ်စီၤစီလူးအစူးခီး ပူၤ နဳၤ.
ទើបបានជ្រើសរើសហើយ៖
သဓဳဖဳး 11: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
