သဓဳဖဳး 13
13
စီၤဘၢ်နါဘၤကၱာ်စီၤစီလူးအတဲၤဘဲသဓဳ
1ဒဳအၣ်တံၤအီာ်အတဲၤအီၣ်ပျဳာ်နဳၤ, အအီၣ်မၱာ်ဝံကၱာ်ဆရၣ် အယီၤတစီာ်ယဳၤ, စီၤ ဘၢ်နါဘၤ, စီၤစူၤမ့ၤအိးထဲၢ်ပၠၤယဳၤနံကရိၤနဳၤ, ကၱာ်စီၤလူကံၤ, ပၠၤကူၤရ့ၤန့ဖဳး, စီၤမနၤအ့ၣ်, ထဲၢ်အဓဳၤထာ်ပျဳာ်ကဲၤ ပွဲၤ ဓဳၤစီၤဟ့ၣ်ရိာ် ကၱာ် စီၤစီလူးနဳၤ. 2တနံၤတသဲ ဘ့စဲာ်တစီာ် သဘဲထာ်ကၱာ်ဒူၣ်တဲၤအၣ်တဲၤအီအခၠၱးနဳၤ, သး စါထံဒီၣ်ကဲၤစဲာ်ကယဳၤ, “ယသးအဲးနံၤသံကထဳးပၢ်စီၤဘၢ်နါဘၤကၱာ်စီၤစီလူးအကမဲၤတဲၤမဲၤ ဒဳယယဳၤစဲာ်တစီာ်အပူၤနဳၤ,” အဒီၣ်ကဲၤဓဳၤ.
3မဲၤကနဳၤဒဳၣ်, စဲာ်တစီာ်သဘဲထာ် ကၱာ်ဒူၣ်တဲၤအၣ်တဲၤအီ, ဝှါစထဲးလၤကဲၤစစူးခီး ဒဳလၢ်ဝၤတစီာ်အခဳးကၱာ် သဓဳလ့ၤကဲၤစဲာ်တစီာ်.
ဒဳကူပြူးက့ၤ
4မဲၤကနဳၤဒဳၣ်, အယဳၤကၠံၢ်ပွဲၤမဲၤ ကဲၤအစာ် ဘိ သးစါထံသဓဳလ့ၤစဲာ်တစီာ်နဳၤ. စလၤကဲၤဒဳစ့းလူကံၤအူးကၱာ်ဒီၣ်လ့ၤကဲၤသဲပီၤ ဒဳကူ ပြူးနဳၤ. 5စခဲလၤဓ့ၢ်ဝှါဒဳစလၤမံအူး ကၱာ်ဒီၣ်အူဒီဆးကဲၤကဘၱာ် စဲာ်အလ့ၢ်အဝှဲးဒဳ ယူဒၤ ဖဳးတစီာ်အဘူၣ်ဘျီၣ်ပူၤ, စီၤယိၤဟၣ် မၢ်ကူး မဲၤကဲၤအစာ်ဘိ အမဲၤဇဳၤစဲာ်တစီာ်နဳၤ.
6စဲာ်တစီာ်ဟဲးကိာ်ခီဇၤဝၤကၱာ် ဒဳပါပူးအူးပူၤနဳၤ ကၱာ်ထဲးကျဲၢ် နံၤကဲၤယူဒၤဖဳ, အမဲၤတပ့ၤပၠၤကၢ်ဓူ, သံအပျဲာ်အမံၤမၱာ် စီၤဘၢ် ယ့ၣ်ရှူး တပွဲၤ. 7ဝံအပျဲာ်အယဳၤတပွဲၤမၱာ် မၢ်ဓဳၤစီၤစ့ၤကံ, စီၤပီလူးအခီကလဳၢ်အဇၤအပျၤ ဆိးဇၱၢ်တပွဲၤနဳၤ. မၢ်ဓဳၤယဳၤဝှါ စီၤဘၢ်နါဘၤ ကၱာ်စီၤပီလူးဒဳၣ်, စနှးကဲၤလၢ်ဝၤ အကဒီၣ်အူ ဆးအူကဘၱာ်စဲာ်အလ့ၢ်အဝှဲး. 8ပရၤဆါ စီၤဘၢ်ယ့ၣ်ရှူးထဲၢ်အမံၤမၱာ် စီၤအ့းလူမၤ (ဒဳကြံးခ်အလ့ၢ်) နဳၤ သးအဲးမဲၤဒၱာ်ဒါစဲာ်တစီာ် စာ်ဘိထဲၢ် စကမဲၤဒၱာ်ဒါပီၢ်မၢ်ဓဳၤကၱာ် ကနံၤဘဲာ် တဲၤဘူၣ်နဳၤ. 9မဲၤဝှါစီၤစီလူးထဲၢ်အမံၤ မၱာ်စီၤပီလူးနဳၤ အီၣ်ပ့ထာ်ကဲၤကၱာ်သးစါထံ, စစာ်တကြၱၤနၱၤဝှါလၢ်ဝၤအမူၢ်ကါဒဳၣ်, စဒီၣ်, 10“နဲၤ, ပွဲၤအလှီးလှၱလှီးပျဲာ်တဲၤ, အလၱးမး ကးကွဲ, မဳၤဒဲး လၱးအဖဳး, တဲၤတၱၢ်တဲၤမှးအဒ့ဒီၣ် ရီၢ်ခဲး, နဘးတကွ့ၤမၤကဘၱာ်စဲာ်အကျဲးနဲၢ်. 11ခဳနူၤယဳၤစာ်ပီၢ်, ကဘၱာ်စဲာ်အစူးခီး ကလှၱးကီနဲၤ, နကၢ်ဓူကခံးကီကၱာ်နကတစာ် ထၱးကီလူၤမူၤနီး တဒဳတဆး,” စဒီၣ်လၢ် ဝၤဓဳၤ.
ဘ့နဳၤလီၤ, စနံၤခံတဲၢ်တဘဳာ်လၤကၢ်ကၱာ် အခံးသရူကဲၤဓဳၤ, စဟဲး ပဳၢ်စာ်ကဲၤစာ်ဘိထဲၢ် ပၠၤကဖၱးစစူးခီးကၱာ်ဟဲးစွံးအံာ်စဲာ်နဳၤ. 12မၢ် ဓဳၤကဲာ်ထၱးတဲၤအယဳၤဒဳၣ်, စဘူၣ်ကဲၤ, မၤ နဲၢ်, စထဲတမိၢ်တမှါကဲၤဒဳ စသၱာ်ဟဲဘဲာ်ဘၱာ်စဲာ် အဝၱၤအကဲတစီာ်နဳၤ.
ပံၤစံၤဒံက့ၤ အၣ်တံၤအီာ်အူးအပူၤ
13စီၤပီလူးကၱာ်စခီတစီာ် လ့ၤကိာ် ထံကျဲးဓဳၤဒဳ ပါပူးအူး, ထိ ဓဳၤဒဳပ့ၢ်က့ၤအူး, ပၣ်ဖူၤလံက့ၤ ထဲၢ်ဒဳနဳၤ, စီၤယိၤဟၣ်ဟဲး ပၢ်စဲာ် ကၱာ် က့ၤဘးကဲၤဒဳ ယရူၤၡလ့ၣ်အူးနဳၤ. 14အလဝ့ၤတစီာ်အီၣ်ဒဳပ့ၢ်က့ၤ အူး ကၱာ်လ့ၤကဲၤအလှီ မီၢ်ထိဓဳၤဒဳ ပံၤစံၤဒံက့ၤ, အၣ်တံၤအီာ်အူး နဳၤ. ဒဳ နဳၤ ဘ့မူၤဆီးဒဲနဳၤ, စထာ်နံၢ်ဘူၣ်ဘျီၣ်အပူၤကၱာ်ဆးနါလၤကဲၤဘ့နဳၤ. 15ဘ့တဲၤဖး စီၤမိၤၡ့အတဲၤမှဲးလၤကၱာ် ဝံအစဲာ်တစီာ်ဝှါကဲၤ နဳၤ, ဘူၣ်ဘျီၣ်အခဳးအန့ၤတစီာ် သဲလ့ၤနံၢ်ကဲၤ စဲာ်တစီာ်တဲၤဒီၣ်သၱာ်ဟဲကယဳၤ, “သဲပူၤဝ့ၤတစီာ်, သံကသးအဲးအံာ်ခဳးအံာ်အါမၤပၠၤတစီာ်ဒဳၣ်, မဲၤဒီ ဧဲၤ,” စဒီၣ်လၢ်ဝၤဓဳၤ. 16စီၤပီလူး ဝဲၢ်ထဳး, တဒါထာ်ဝှါအစူခီး ပၠၤ ကအီၣ်ဇီၤလီၤ အနံၤခံဒဳၣ်, စယၱၢ်ဘဲာ်ထာ်ကဲၤကယဳၤ—
“အံၣ်စရ့လးဖဳး အရှံးဆါနံၤကဘၱာ်စဲာ် အလ့ၤတစီာ်, ဆီးခ့န့းပီၢ်. 17ဝၤအံၣ်စရ့ လးဖဳးအဘၱာ်စဲာ်တဲၤအဓဳၤ ရိၤလှဲးကဲၤဝၤဖံဝၤဖူ တစီာ်ကၱာ် စမဲၤဓဳၤထာ်မူၤထာ်ကဲၤဝၤပၠၤ ဘ့စအီၣ်ဝ့ၤအဲးကူပတူးက့ၤ အစာ်ဘိတၱတမဲတစီာ် အခဲနဳၤလီၤ. မဲၤဝှါဒဳဘၱာ်စဲာ်အတဲၤစိသလဲ အပူၤ, စဟဲးထာ်အံာ်ဟူကဲၤလၢ်ဝၤ, 18ကၱာ်စစာ်အံာ်ခွဲးအံာ်ကဲၤလၢ်ဝၤဒဳ လဳၤသံမံးဇ့ၤခဳး နဳၤ အဒ့ာ်လွံၢ်ရှံအဓၢ်ပူၤ. 19ဘ့တဲၤမဲၤ ကဲမဲၤလှဲ မဲၢ်ဝှါ ပၠၤခွံဖဳးသါသိးတခွံ, ဒဳကနၤဧၣ် က့ၤနဳၤဒဳၣ်, စအံာ်ကဲၤလၢ်ဝၤအလၢ်ခဳးဒဳ စဲာ်တစီာ်အစူးခီးပူၤ. 20တဲၤအယဳၤ လဳလဳၢ်မၱာ် ကဲၤ အဒ့ာ်လွံၢ်ကယဲၤကၱာ်ယဲၢ်ရှံအဓၢ်ပူၤ.
“မၤဝှါအလ့ၤကါစအံာ်လၤလၢ်ဝၤအစံးရး တဲၤတစီာ်ထိဓဳၤလၤ ဝံရှ မူၤအ့လးအလ့ၤသၱာ် ခဲနဳၤ. 21အလ့ၤကါစဲာ်တစီာ်တၤကဲၤ အဆး ဖြးတပွဲၤဒဳၣ်, ကဘၱာ်စဲာ်အံာ်လၤကဲၤစဲာ် စီၤစီလူး, စီၤကံၣ်အဖဳး, ထဲၢ်ဒဳစီၤ ဘံၣ်ယၤမံၣ် အခွံသလဲအကျဲတပွဲၤ, ကၱာ်စဖၱထာ်ဘဲာ်ဆးဖြး ဒဳ အဒ့ာ် လွံၢ်ရှံအဓၢ်ပူၤနဳၤ. 22စဘဲလါ တၤစီၤစီလူးကၱာ်လဲၢ်ထာ်ကဲၤစီၤဒၤ ဝံးဆဖြး ထဲၢ်စအီၣ်လၤကိာ်လၢ်ဝၤဒဳ တဲၤယၱၢ်ဘဲာ်အယဳၤ တစီာ်အပူၤ တပွဲၤနဳၤ. ‘ယရိၤထာ်ကဲၤစီၤယံးရှဲ အဖဳး စီၤဒၤဝံး, ပွဲၤအဘဲာ်သးယဲၤတပွဲၤနဳၤ, စဲာ်ထဲၢ်အကမဲၤကိာ်ယတဲၤသးအဲးနံၤအကါတပွဲၤနဳၤ,’ စဒီၣ်ဓဳၤ. 23ဒဳစီၤဒၤဝံးအခွံပူၤ ကဘၱာ်စဲာ်အံာ်အီၣ်ထာ်ကဲၤအံၣ်စရ့လးဖဳးအနံၤ ခံအမဲၤလှိထာ်က့ၤတဲၤတပွဲၤ, အစာ်ဘိစတဲၤ အၣ်မါခးအံာ်နဳၤ. စမၱာ် ယ့ၣ်ရှူးနဳၤ. 24စဲာ်ထဲၢ် အဓဳၤလ့ၤနဳၤ, ဘဲာ်ဒီဆးတီၤလီၤကဲၤဘ့ စီၤ ယိၤဟၣ်ဒီထိးလၤနံၤအံၣ်စရ့လးဖဳး သဒဲခွံ, အဘဲာ်ကၠးတဲၤခးလှိအတဲၤ ဖဳးစူထံအစဲနဳၤ. 25တချူကၱာ်စီၤယိၤဟၣ် အတဲၤမဲၤကူဓူၤနီး, စဒီၣ်ကဲၤကယဳၤ, ‘ယတမၱာ်စဲာ်ထဲၢ် သံကမဳၤ တပွဲၤနီး, အကလ့ၤယလ့ၤ ကါတပွဲၤနဳၤ, ယတတးမဲၤ အကဘါပျဲးစခၣ်တကီးအပံၤနီး,’ စဒီၣ် ကဲၤဓဳၤ.
26“ယသဲပူၤသဲဝ့ၤစီၤအၤဘြၤဟၣ် အဖဳးအလံၤတစီာ်, ကၱာ် လဳသံအရှံးဆါနံၤကဘၱာ်စဲာ်အလ့ၤတစီာ်, တဲၤလှိထာ်က့ၤအဝၱၤအကဲ အယဳၤမၱာ်သံနံၤခံ. 27မၤနဲၢ်ဒဳၣ်, ပၠၤ အအီၣ်ယရူၤၡလ့ၣ်အူးပူၤ ကၱာ် အအူအံာ်စာ်အံာ် တဲၤတစီာ် တသၱာ်ဟဲကဲၤ စမၱာ်အမဲၤလှိထာ်က့ၤ တဲၤနီး, ကၱာ်ကိမူၤနံၤဆီးဒဲနဳၤ, စဖးနီၣ်သီဝံအတဲၤဒီၣ်တီၤလီၤတစီာ်နှီနူၤ, စတသၱာ်ဟဲကဲၤ အထာ်ပဳၤထာ်ဘါနီး. မၱာ်စမဲၤပ့ထာ်ဇီၤထာ် အစာ် ဘိ တဲၤဒီၣ်တီၤလီၤအီၣ်အဓ့နဳၤကၱာ်စံးရးသံတပွဲး ယ့ၣ်ရှူး. 28စဲာ်တစီာ်တပာ်ထအးနီၣ်သီ စဘဲာ်သံအဝၱၤအကဲတမံနီးနှီနူၤ, စနှးကဲၤ စီၤပံၤ လးကစံးရးသံစဲာ်. 29ဘ့စဲာ်တစီာ် မဲၤကိာ်လဳဝှါ ထဲၢ်စဲာ်စါထံဒီၣ် တီၤလီၤစဝၱၤစကဲ တစီာ်နဳၤဒဳၣ်, စဖၱးလၤဓ့ၢ်ဝှါလၢ်ဝၤဒဳသဳာ်ပျီၤထူၣ်စူညါ အလီၤ, စဘူလါကဲၤလၢ်ဝၤဒဳလူၢ်အပူၤနဳၤ. 30ပရၤဆါကဘၱာ်စဲာ် ဘးဝၢ် ထဳးက့ၤကးစဲာ် ဒဳတဲၤသံကျဲနဳၤ. 31ကၱာ်မူၤနံၤမူၤသဲ ပွ့တမံၤအဓၢ် ပူၤ, စပီၤထာ်ထၱးကဲၤပၠၤအဟဲး ကိာ်စကါဘ့ကၤလံၤလဲ ထိဓဳၤယရူၤရှ လ့ၣ်အူး ပူၤနဳၤ. ပၠၤအယဳၤတစီာ်လီၤမၱာ်ကဲၤပၠၤအခး သဲသၱး စနံၤခံဒဳအံၣ် စရ့လးဖဳးတစီာ်အလှီမီၢ် နဳၤ. 32-33ဝ့ၤလ့ၤဘ့ယဳၤစာ်ဘိထဲၢ်အကဒီဆးသံတဲၤသးလဳၢ်သးလၤအံာ်အဝၱၤအကဲ, ထဲၢ် ကဘၱာ်စဲာ်မၤနံၤကဲၤဝၤ ဖံဝၤဖူတစီာ် တၤအၣ်မါ ခးအံာ်ကၱာ်ခဳနူၤယဳၤစမၤပ့ထာ်ဇီၤထာ်ထဳ စခွံသလဲထဲၢ်အမၱာ်ဝၤတစီာ်အနံၤခံ, ဒဳတဲၤဘးဝဲၢ်ထဳး က့ၤယ့ၣ်ရှူးတၤသံ အကျဲနဳၤ. အစာ်ဘိစဲာ်စါထံ ဒီၣ်ကဲၤဒဳ စဲာ်ထါထာ်အံာ်အကျၢ်ဓဳၤကၠံၢ်ကျၤတကျၤနဳၤ,
‘နမၱာ်ယဖဳးခဳ,
ခဳတနံၤယဖၱထာ်ကဲၤနပာ်,’ နဳၤ.
34ဘၱာ်စဲာ်ဘးထာ်ပဳၤက့ၤစဲာ် ဒဳတဲၤ သံကျဲမၱာ်, စကတသဳတအၱာ်ဘဲာ်ပ့ၤတပျါနီး, မဲၤစာ်ဘိစဒီၣ်ဖျီထာ်ကဲၤ,
‘ယကအံာ်လၤနံၤကီ နဲၤတဲၤအစါထံကၱာ် တဲၤဟိးဝၱၤအလၤတံၤ လၤ ဆ့း,
ထဲၢ်ယအၣ်မါခးအံာ်ကဲၤစီၤဒၤဝံးနဳၤ.’
35တဲၤအယဳၤအဒီၣ်လှၱထာ်ဖျီထာ် ကဲၤဒဳ စဲာ်ထါထာ်အံာ်အပူၤ အလဝ့ၤတကျၤ,
‘နကတအံာ်ကီနပၠၤစါထံတပွဲၤကသဳ ကအၱာ်နီး’ နဳၤ.
36မၤနၢ်, ဘ့စီၤဒၤဝံးအီၣ်သမိဝ့ၤ အခဲ, အစာ်ဘိကဘၱာ်စဲာ် သးအဲးနံၤစမဲၤတစီာ် နဳၤ, စမၤပ့ထာ်ဝှါ စသံကဲၤ, စဘဲာ်ဘူလါပျဳာ် ကၱာ် စဖံစဖူထဲၢ်အသဳအအၱာ်ဘဲာ်ကဲၤတစီာ်နဳၤ. 37ပရၤဆါဒဳကဘၱာ်စဲာ် ဘးဝဲၢ်ထဳးက့ၤ တပွဲၤနဳၤ, တသဳတအိကဲၤနီး. 38-39ယသဲပူၤဝ့ၤလဳ စါစဲးတစီာ်, ယသးအဲးနံၤသံကသၱာ်ဟဲထဲၢ်ဒဳယ့ၣ်ရှူးအီၣ်နဳၤသံနံၤဘဲာ် တဲၤခီၣ် ဝဲၤအတဲၤဘါပျဲး, ကၱာ်ပၠၤအဘူၣ်စဲာ်တစီာ်နဳၤ လှိထာ်ဘဲာ်ဒဳတဲၤ ခီၣ်ဝဲၤလဳစါစဲး ထဲၢ်စီၤမိၤၡ့အတဲၤမှဲးလၤတအံာ်ဇၤနီးတမဳၤနဳၤဘဲာ်အံာ် လၤ ကဲၤအဘူၣ်စဲာ်ကိအပွဲၤနဳၤ. 40မဲၤကနဳၤ ဒဳၣ်, ဝဳၤအံာ်ပီၢ်, စာ် ဘိထဲၢ်ဝံတစီာ်အတဲၤဒီၣ် တီၤလီၤကတဖၱထာ်နံၤပီၢ်သံနီးနဳၤ.
41‘စာ်မးလၱမးလိးပီၢ်, သံအကီၢ်ဆဲလဲၤဝဲၢ်တဲၤတစီာ်,
ထဲးတမူၢ်တအးကၱာ်သံပီၢ်,
မၤနဲၢ်ဒဳသံမူၤနံၤတစီာ်အပူၤနဳၤ ယမဲၤကဲၤတဲၤတမံၤ.
ထဲၢ်ပၠၤကဒီဆးသံဒဳၣ်, သံတဘူၣ်နီးနဳၤ.’”
42ဘ့စာ်တစီာ်က့ၤနဳၤ, ပၠၤတစီာ် တၤစဲာ်အကဒီထိးတဲၤအဝၱၤ အကဲအယဳၤလီၤ ဘ့အလီမီၢ်မူၤနံၤဆီၤဒဲအနံၤနဳၤ. 43ဘ့ တဲၤလၤ တ့ၢ်ပျဳာ်ဝှါနဳၤ, ယူဒဓဖဳအီၣ်အဲးအီးအီး ကၱာ်အဘူၣ်တဲၤအအီၣ်အံာ်ယူ ဒၤ ဖဳး အတဲၤသဘဲတစီာ်လ့ၤနံၢ်ကိာ်ကဲၤစီၤပီလူးကၱာ်စီၤဘၤနါဘၤ အကါ ကၱာ်ဒဳစတဲၤတီၤတီၢ်မၤယၤအကျဲ စီၤပီလူး ကၱာ်စီၤဘၢ်နါဘၤအံာ်ခဳးအံာ် အါစာ်တစီာ် အကအီၣ်, မှ့းမှ့းစ့းစ့း ဒဳတဲၤဒီၣ်ကတီၤအံာ်အန့ၤ ကဘၱာ် စဲာ်အလှူၣ်အတါအပူၤအနံၤခံနဳၤ.
44အလၤကါမူၤနံၤဆီၤဒဲ, အူးပူၤဖဳး လဳစါစဲးတစီာ် လၤဓ့ၢ်ပျဳာ် လၢ်ဝၤအကဆီးခ့န့း ကဘၱာ်စဲာ်အလ့ၢ်အဝှဲး. 45ဘ့စဲာ်တစီာ် စာ် ထၱးပၠၤအပဳၤအဟီးနဳၤ, ယူဒၤဖဳးအသးကျး တဲၤတစီာ်ထာ်ဒ့ဒီၣ်ကၱာ်ဒီၣ်ကဲ ဒီၣ်အိးကဲၤစီၤပီလူး ဒီၣ်တဲၤတစီာ်နဳၤ. 46ဘ့နဳၤစီၤပီလူးကၱာ် စီၤ ဘၢ်နါဘၤယၱၢ်ဘဲာ်ထာ်ခူသကျးကဲၤ, “ဝၤဒီ ဆးဘဲာ်အူဆူးကဲၤသံကဘၱာ် စဲာ်အလ့ၢ်အဝှဲး, ပရၤဆါ သံပၢ်ဖျီးမံကဲၤစဲာ်. သံကမဳၤမၱာ်သံ တတးနံၤ တဲၤအီၣ်သမိ အလၤထူလၤပျဳၤနီးအစဲ, ဝၤကလ့ၤထၱးဘဲာ်ကဲၤပွဲၤသူကူာ် ဖဳးတစီာ်နဳၤ. 47တဲၤအယဳၤအစဲ, ကဘၱာ်စဲာ်မှဲးလၤ ကဲၤဝၤဘ့စဒီၣ်,
‘ယမဲၤဖၱထာ်ထဳသံ ပွဲၤသူကူာ်ဖဳးတစီာ်အတဲၤလှၱ,
စာ်ဘိထဲၢ်ယတဲၤမဲၤလှိထာ်က့ၤကဓဳၤ ပီၢ်ထိလၢ်ခဳးအကဓူၤ နဳၤ.’ ”
48ပွဲၤသူကူာ်ဖဳးတစီာ်သၱာ်ဟဲဘဲာ် တဲၤအယဳၤဒဳၣ်, စသးကနၢ် အံာ်ဆိကၱာ် သၱာ်ဟဲ ထာ်က့ၤကဘၱာ်စဲာ်ဒဳစလ့ၢ်စဝှဲးအယဳၤအခဳးအစဲ, ကၱာ်ပၠၤအဘဲာ်ဒာ်ဟီအံာ်တဲၤသမိလၤထူလၤပျဳၤ အနံၤခံတစီာ်ဖၱထာ်ကဲၤ အဘူၣ်တဲၤတစီာ်နဳၤ.
49ဘၱာ်စဲာ်အလ့ၢ်အဝှဲးဒဲးလီၢ်ဒဲးခီ ကဲၤသဒဲထံသဒဲက့ၤ. 50ပရၤဆါယူဒၤ ဖဳး တစီာ်သကါထာ်ဝှါအန့ၤဓဳၤသးပွ့ၤအဖဳးအမှဲ ကၱာ် ပၠၤအခဳးအန့ၤအအီၣ်ဒဳအူးပူၤတစီာ် ကထာ် ခဳးကါစီၤပီလူးကၱာ်စီၤဘၢ်နါ ဘၤကၱာ်အကနှးဟဲး ထာ်ကဲစဲာ်တစီာ်ဒဳ စထံစက့ၤပူၤနဳၤ. 51မဲၤ ကနဳၤ, စဲာ်တစီာ်ပျၤဘါဝှါဟးဖၱမူးဒဳ စခၣ်ခီး လီၤဒဳၣ်, စက့ၤဘးကဲၤဒဳ အံၤကနံၤအူးနဳၤ. 52အပျဲၢ်အဘီၣ်အအီၣ်အၣ်တံၤအီာ်တစီာ် အီၣ် ပ့ထာ်ကဲတဲၤသးလဳၢ်သးလၤအံာ်ကၱာ်သးစါထံ.
ទើបបានជ្រើសរើសហើយ៖
သဓဳဖဳး 13: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
