သဓဳဖဳး 10
10
စီၤပ့းတရူးကၱာ်စီၤကန့လံး
1လှ့နဳၤဒဳကဲၤစါရံၤအူးနဳၤ, ပၠၤအမံၤ မၱာ်စီၤကန့လံးအီၣ်ကဲၤ တပွဲၤ. စမၱာ်ရိမ့ၤဖဳး အကျံဖဳးတကယဲၤအခဳး, ထဲၢ်ကျံအမံၤမၱာ်, “အံၤတလံအကျံဓဳၤ” နဳၤ. 2စဲာ်ကၱာ်စရှံၣ် ဖဳးဖါဖဳးမၱာ် အအီၣ်အံာ်တဲၤသဘူၣ်သဘဲကၱာ် အရှံးဆါနံၤကဘၱာ်စဲာ်အလ့ၤ. စအံာ်က့ၤစာ်က့ၤ ယူဒၤဖဳး အဆဲးညဲတစီာ် ပွ့တမံၤကၱာ် သဘဲသဲာ် ယိလီၤ. 3ဘ့လူၤမူၤထံး ချဲးဘးသဳနၣ်ရၱၣ် အခၠၱးနဳၤ, စစာ်ထၱးကဘၱာ်စဲာ်အပွဲၤဇဳၤတပွဲၤလ့ၤထၱးစဲာ် ကၱာ် စယဳၤလၢ်ဝၤ, “စီၤကန့လံး.”
4စစာ်ဝဲၢ်တကြၱၤနၱၤဝှါလၢ်ဝၤဒဳတဲၤ သးကနၢ်အပူၤဒဳၣ်, စဒီၣ်, “မၱာ်တၤနဲၢ်, အဳဘၱာ်စဲာ်,” စဒဲလၢ်ဝၤဓဳၤ.
မၱာ်ကဘၱာ်စဲာ်အပွဲၤဇဳၤဒီဆးစဲာ်, “နတဲၤ သဘဲတစီာ်ကၱာ်တဲၤအံာ် လှူၣ်အံာ်တါတစီာ် ဘးထာ်ကဲၤဒဳမီၢ်ခဳးကၱာ် အဘဲာ်မှါအံာ်ဒဳဘၱာ်စဲာ် အလှီ မီၢ်နဳၤ. 5ခဳနူၤယဳၤ သဓဳလ့ၤပီၢ် ပၠၤဒဳယၤဖိၤအူးကၱာ် ယဳၤလ့ၤပီၢ်စီၤ ရှံမိၣ်, ထဲၢ် အမံၤမၱာ်စီၤပ့းတရူးနဳၤ. 6စမၱာ်အအီၣ် ကိာ်စီၤၡံမိၣ်, အဆးတဲၤဖ့း, ထဲၢ်အရှံၣ်အီၣ်ဘိး ထၱးပဲာ်လဲာ်ဝ့ၤနဳၤ,” စဒီၣ်လၢ်ဝၤဓဳၤ. 7ဘ့ကဘၱစဲာ်အပွဲၤဇဳၤအယၱၢ်ဘဲာ်ထၱးစဲာ်တပွဲၤ ဟဲးထာ်ဝှါနဳၤ, စယဳၤကဲၤစဇိၤဖပးကၠံၢ်ပွဲၤ, ထဲၢ် ဒဳ စကျံဖဳးအကျဲအရှံးဆါနံၤကဘၱာ်စဲာ် အလ့ၤတပွဲၤနဳၤ. 8စဒီဆးလဳဝှါလၢ်ဝၤတဲၤဝၱၤ တဲၤကဲတစီာ်နဳၤ ဒဳၣ်, စသဓဳလ့ၤကဲၤလၢ်ဝၤဒဳ ယိၤဖၤအူးနဳၤ.
9အလ့ၤကါတနံၤဗ့ စဲာ်တစီာ်ဟဲး ကိာ်ကျဲးမၱာ် အဓဳၤဘိးထၱး ထဳယိၤဖၤအူးနဳၤ, ဘ့ လူၤမူၤထံးထာ်အခၠၱး, စီၤပ့းတရူးထာ်သဘဲကဲၤ ဒဳ ရှံၣ်ခဳးတစီာ်နဳၤ. 10စသးဝံစသးအီ ကၱာ်စသးအၣ်ကဲၤတၤတမံၤ မံၤ. ဘ့ပၠၤတစီာ် ပြးတီၤလီၤကဲၤတဲၤအၣ်အခၠၱးနဳၤ, စီၤပ့းတရူးနံၤ ဘဲာ် ကဲၤတဲၤစာ်ထၱးအစီးကျၱး. 11စစာ် ထၱးမီၢ်ခဳးအီၣ်အတဘါ, ကၱာ် တကၱယၢ်အဓဳၤ အခီ တကီလၢ်, အန့ၤပူၤအီၣ်လွံၢ်န့ၤ, အီၣ်အဇဲၤလၤဒဳ မီၢ်ခဳးဓဳၤဒဳလၢ်ခဳးနဳၤ. 12ကၱာ် တဲၤဖဳးတဲၤဝ့ၤအခၣ်ခီးအီၣ်လွံၢ်ခီကၱာ် အဟဲး ဝ့ၢ်တစီာ်အီၣ်ပ့ထာ်ကဲၤအပူၤကၱာ်ထဳဖဳးယဳၢ်လံၤ တစီာ်ပာ်ပာ်. 13တဲၤလ့ၢ်သဲာ်ထာ်ကဲၤ တဓဲ, အဒီၣ်စဲာ်, “ဝဲၢ်ထဳး, စီၤပ့းတရူး, မဲၤသံ ဝှါအၣ်ပီၢ်” အဒီၣ်စဲာ်ဓဳၤ.
14ပရၤဆါ စီၤပ့းတရူးဒီၣ်ရှံက့ၤ, “အတပီၤကၱာ်ယဲၤ, အဳဘၱာ် စဲာ်. မၤနဲၢ်ယတအၣ်ကဲၤတဲၤအတရူနီး ကၱာ်အသူသမဲတခး နီး,” စဒီၣ် ဓဳၤ.
15တဲၤလ့ၢ်သဲာ်ထာ်တပျာ်ပ့ၤကၱာ် အဒီၣ်စဲာ်, “တဲၤထဲၢ်ကဘၱာ်စဲာ်မဲၤပျၱမဲၤစါဝှါနဳၤ, ဒီၣ်ပီၢ်မဲးအတရူနီးမဲး,” အဒီၣ်စဲာ်ဓဳၤ. 16တဲၤမဲၤကဲၤအန့ၤကနဳၤသဳပျာ်, ဝှါဒဳၣ်တကၱယၢ် ဘဲာ်စွံးထာ်က့ၤကဲၤဒဳမီၢ်ခဳး နဳၤ.
17ဘ့စီၤပ့းတရူးထဲးတမိၢ် တမှါ ကၱာ် ကမဳၤစာ်စတဲၤစာ်ထၱး အထာ်ပဳၤထာ်ဘါ အခၠၱးနဳၤ, စီၤကန့လံးသဓဳလါပၠၤတစီာ် ဝၢ်လှဲး စီၤၡံမိၣ် အရှံၣ်ကၱာ်ဆီထဳးအီၣ်ဒဳခးကျဲၢ်ထၱး, 18ဒဲစာ်ကဲၤပၠၤထဲၢ်, “စီၤရှံ မိၣ်, ပၠၤယဳၤ အမံၤစီၤပ့းတရူး အီၣ်ကဲၤဘ့နဳၤဧါ,” နဳၤ.
19ဘ့စီၤပ့းတရူးကမဳၤလှဲးသဗ့ စတဲၤစာ်ထၱးအခၠၱးနဳၤ, သးစါ ထံဒီၣ်ကဲၤစဲာ်, “စာ်ပီၢ်, ပၠၤဝၢ်လှဲးနဲၤသဳပွဲၤ. 20ဝဲၢ်ထဳး ကၱာ်လ့ၤ ထၱးပျာ်ပျါပီၢ်စဲာ်. ဝဲၤဇဲၤမဲးနန့ၤမဲး, မၤနဲၢ်, ယသဲလ့ၤကဲၤစဲာ်တစီာ်,” အဒီၣ်စဲာ်ဓဳၤ. 21မဲၤကနဳၤစီၤပ့းတရူးက့ၤ လၤထၱးကဲၤ ပၠၤတစီာ်ကၱာ် စဒီၣ်, “စာ်ပီၢ်, ယမၱာ်ပၠၤထဲၢ် သံ ဝၢ်လှဲးတပွဲၤနဳၤ. သံတဲၤဓဳၤလ့ၤမၱာ်တၤ အစဲနဲၢ်,” စဒဲလၢ်ဝၤတစီာ်ဓဳၤ.
22ကၱာ် စဲာ်တစီာ်ဒီၣ်, “ကျံဖဳးတကယဲၤအခဳးစီၤကန့လံး သဲ လ့ၤဝၤဒဳနအီၣ်လီၤ. စမၱာ်ပၠၤအတၱၢ်အမှး, အရှံးဆါနံၤကဘၱာ်စဲာ် အလ့ၤ ကၱာ် ယူဒၤဖဳးသဒဲခွံဒဳဘဲာ်ယာ်ဘဲာ် တပွဲၤ နဳၤ. မမီၢ်ခဳးပွဲၤဇဳၤစါထံတပွဲၤ အတဲၤဒီဆးအစဲ, ယဳၤနဲၤအကလ့ၤဒဳစရှံၣ်နဳၤကၱာ် အကဆီး ခ့န့း နတဲၤ ယၱၢ်ဘဲာ်နဳၤ,” စဒီဆးလၢ်ဝၤဓဳၤ. 23စီၤပ့းတရူးယဳၤနံၢ်ဝှါစဲာ်တစီာ် ရှံၣ်ပူၤ, စအံာ် လၢ်ဝၤဆီးမံအနဳၤတနဲၤဘ့နဳၤ.
အလ့ၤကါတနံၤ စီၤပ့းတရူးဝဲၢ်ထဳးကၱာ် လ့ၤကိာ်ကဲၤလၢ်ဝၤတစီာ် အကါ, ကၱာ်သဲပူၤသဲ ဝ့ၤ အဘူၣ်တဲၤအအီၣ် ယိၤဖၤအူးတစီာ်မၱာ်မၱာ် လ့ၤကိာ်ကဲၤစကါ. 24အသဲတနံၤပ့ၤ စဲာ်တစီာ်ဓဳၤလ့ၤကဲၤဒဳကဲၤစါ ရံၤအူးနဳၤ. စီၤကန့လံး ယဳၤလၤတ့ၢ်ပျဳာ်ဝှါအခွံအခီ, အသီၣ် အဒ့ာ်တစီာ် ဒဳၣ်, စအီၣ်ဆိဧိၢ်တိၤအံာ် ကဲၤလၢ်ဝၤ. 25ဘ့စီၤပ့းတရူးဓဳၤ လ့ၤ နဳၤ, စီၤကန့လံးလ့ၤရှံစကျဲး, ဓဳၢ်နှဳလါဝှါဒဳ စလှီမီၢ်ဒဳၣ်, ဒဳဘဲာ်ယးဘဲာ် ကဲၤစဲာ်. 26စီၤပ့းတရူးစွံးဝဲၢ်ထဳးဝှါစဲာ်, စဒီၣ်လၢ်ဝၤ, “ဝဲၢ်ထဳးပီၢ်, ယဲၤမၱာ်တပွဲးပၠၤတပွဲၤလီၤ,” စဒီၣ် လၢ်ဝၤဓဳၤ. 27စတီၤတီၢ်မၤယၤ ထၱးလၢ် ဝၤကၱာ်လ့ၤနံၢ်ရှံၣ်ပူၤဒဳၣ်, စစာ်ထအးကဲၤပၠၤ အီၣ်အဲးအီၣ်အီး လၤတ့ၢ်ပျဳၤလၢ်ဝၤ. 28ကၱာ်စီၤပ့းတရူးဒီၣ်စဲာ်တစီာ်, “သံသၱာ်ဟဲ တပွဲး ထဲၢ်ယူဒၤဖဳးတပွဲၤနဳၤ, စအီၣ်ပျဳာ်ဆီယံၢ်ကၱာ် လ့ၤထၱးက့ၤထၱးထံ က့ၤဖဳးအလဝ့ၤအခွဲး တအီၣ် နီးနဳၤ, ပရၤဆါကဘၱာ်စဲာ်ဒဲလၱၢ်ထဳယဲၤထဲၢ် ယကတယဳၤဘဲာ် ပၠၤအတရူနီးကၱာ်အတစါထံ နီးတဗွဲနီးနဳၤ. 29မဲၤကနဳၤအခဳးအစဲ, ယဘဲာ်ယဳၤလ့ၤနဳၤ ယလ့ၤပျာ်ပျါတပွဲး. ယဒဲသံ, သံ မှဲးလ့ၤမၤယဲၤနဲၢ်,” စဒီၣ်ကဲၤလၢ်ဝၤတစီာ်ဓဳၤ.
30စီၤကန့လံးဒီဆးစဲာ်, “လှ့အအူ ဆူးသဳသဲ, ကယဳၤအခၠၱး နဳၤ, ယသဘဲထာ် ကဲၤ ဘ့ယရှံၣ်ပူၤ, ဘ့လူၤမူးထံးချဲးဘး သဳနၣ်ရၱၣ် အခၠၱး နဳၤ. ပၠၤအတဲၤကိတဲၤသီးကလှဲတဒၱး တပွဲၤ ဆီထဳးအီးကဲၤယလှီ မီၢ်, 31ကၱာ်စဒီၣ်ကဲၤယဲၤ, ‘စီၤကန့လံး, နတဲၤသဘဲ တစီာ်ကၱာ် တဲၤအံာ်လှူၣ်အံာ်တါတစီာ် ဘးထာ် ကဲၤဒဳမီၢ်ခဳးကၱာ် အဘဲာ်မှါအံာ်ဒဳ ဘၱာ် စဲာ်အလှီ မီၢ်နဳၤ. 32ခဳနူၤယဳၤ သဒဳလ့ၤပီၢ်ပၠၤဒဳ ယိၤဖၤအူးကၱာ်ယဳၤ လ့ၤပီၢ်စီၤၡံမိၣ်, ထဲၢ်အမံၤ မၱာ် စီၤပ့းတရူးနဳၤ. ခဳနူၤယဳၤ စအီၣ်ဆီဓူၢ်ဆီး ဒဲဒဳ အဆးတဲၤဖ့းစီၤၡံမိၣ်, ထဲၢ်အရှံၣ်အီၣ်ဘိး ထၱးပဲာ်လဲာ်ဝ့ၤနဳၤ,’ စဒီၣ်ယဲၤဓဳၤ. 33တပျာ်ခါလီၤ, ယမှဲးလ့ၤနဲၤကၱာ် နလ့ၤထၱးတပွဲၤယဲၤဒဳ တဲၤသဳးဝၱၤ သးမီၤအပူၤတခီ. ခဳနူၤယဳၤ ဝၤလၤဓ့ၢ်ပျဳာ် လဳလၢ်ဝၤဒဳနလှီမီၢ် အကဆီး ခ့န့းတဲၤထဲၢ် ကဘၱာ်စဲာ်မှဲးလၤကဲၤနဲၤတစီာ်နဳၤ,” စဒီၣ်ကဲၤလၢ်ဝၤဓဳၤ.
စီၤပ့းတရူးအတဲၤဒီထိး
34စီၤပ့းတရူးဒီၣ်ကဲၤကယဳၤ, “ခဳနူၤယဳၤ ယသၱာ်ဟဲထဳကဘၱာ် စဲာ်တစာ်ပၠၤ အမူၢ်ကါနီး. 35မၱာ်စစာ်ကယါပၠၤခွံဖဳး ထဲၢ်အရှံးဆါ နံၤစလ့ၤကၱာ် အမဲၤတဲၤတၱၢ်တဲၤမှး လဳစါစဲးတစီာ် အမူၢ်ကါလီၤနဳၤ. 36စတဲၤယၱၢ်ဘဲာ်လၤဒဳအံၣ်စရ့လးဖဳးတစီာ်အီၣ်, စသိၣ်အံာ်သီအံာ် တဲၤစဳးတဲၤချံးဒဳယ့ၣ်ရှူးခရၱာ်, ထဲၢ် အမၱာ်ပၠၤလဳစါစဲးအဘၱာ်စဲာ်တပွဲၤ အလီၤ မီၤပူၤနဳၤ. 37သံသၱာ်ဟဲတပွဲးတဲၤဖၱထာ်အန့ၤဒဳအံၣ် စရ့လးသဒဲ က့ၤအပူၤနဳၤ. မၤနဲၢ်, စကဳၤထာ်စတဲၤမဲၤဘ့အဖဳးစူထံစီၤယိၤဟၣ်ဒီထိး လၤဝှါ တဲၤ ဖဳးစူထံအဝၱၤအကဲ, စာ်ထာ်ဒဳကၤလံၤလဲ အက့ၤနဳၤ. 38ကဘၱာ်စဲာ်စထိးရိးကဲၤပၠၤ နစၤရ့းဖဳးယ့ၣ်ရှူးကၱာ်သးစါထံအတဲၤခဳးတဲၤ အါ စာ်တဲၢ်နဳၤကၱာ်စဟဲးတလၢ်ဘဲာ်တလၢ်, မဲၤမှးက့ၤပၠၤအလၤဓ့ၢ်နံၢ်မဳၤ ဒဲး လၱးအစူးခီးပူၤတစီာ်ပူၤစာ်တဲၢ်နဳၤ. မၤနဲၢ်, ကဘၱာ်စဲာ်အီၣ်ကိာ်ကဲၤစကါ. 39ဝၤမၱာ်အခးသဲ သၱး ဒဳစတဲၤဖၱးတဲၤမဲၤ စမဲၤကဲၤ စာ်ထာ် ဘ့ယရူၤၡလ့ၣ်အူးကၱာ်ယူဒၤက့ၤတစီာ်နဳၤ. ပၠၤတစီာ်လှၱးထာ်သံစဲာ် ဒဳသဳာ် ပျီၤထူၣ်စူညါအလီၤနဳၤ. 40ပရၤဆါသဳနံၤတနံၤ ကဘၱာ်စဲာ်ဘးဝဲၢ် ထဳး စဲာ် ကၱာ်ဒဲလၱၢ်ကဲၤစဲာ်, 41တဘဲာ်ပၠၤကိအပွဲၤနီၤ, မၱာ်ထ့ဘၱာ် စဲာ်ယွၤ ရိၤ လှဲးကဲၤပၠၤထဲၢ်အခးသဲသၱးတစီာ် မၱာ်ကဲၤဝၤ, အအၣ်ပျဳာ်အီ ပျဳာ်ဘဲာ် စဲာ် ဘ့စထာ်ပဳၤက့ၤဝှါ တဲၤသံအကျဲနဳၤ. 42ကၱာ်စနှးကဲၤ ဝၤအကဒီၣ်အူဒီဆးပၠၤကၱာ်အကခးသဲသၱးဒဳစမၱာ် ကဘၱာ်စဲာ် အံာ်လၤ အဖျူအသရ့ာ် အကစံးရး ပၠၤအအီၣ်သမိကၱာ်အသံတပွဲၤနဳၤ. 43ဝံလဳစါစဲးခး ထဳစနံၤခံသဲသၱး စာ်ဘိထဲၢ်ပၠၤအဘူၣ်စဲာ်တစီာ်ကနံၤဘဲာ်ပီၢ် တဲၤခီၣ်ဝဲၤအတဲၤဘါပျဲးဒဳစမံၤအဖျူအသရ့ာ် အပူၤနဳၤ,” စဒီဆးကဲၤလၢ် ဝၤတစီာ်ဓဳၤ.
ပွဲၤသူကူာ်ဖဳးတစီာ်နံၤဘဲာ်သးစါထံ
44ဘ့စီၤပ့းတရူးဒီဝသဗ့တဲၤယၱၢ် ဘဲာ်အယဳၤတစီာ်နဳၤ, သးစါထံလ့ၤလၤကဲၤ ပၠၤအဆီးခ့န့းစတဲၤသိၣ်တဲၤသီတစီာ်အခဳး. 45ပွဲၤသူကူာ်ဖဳးတစီာ်နဳၤမၱာ်မၱာ် သးစါထံဘဲာ် လှီးလၤကဲၤစခဳးတစီာ်အခဳးအစဲ, ယူဒၤဖဳးအဘူၣ်တဲၤ ထဲၢ်အအီၣ်ဒဳယိၤဖၤအလ့ၤကိာ် စီၤပ့းတရူးအကါတစီာ် ထဲးတမိၢ်တမှါလဳၢ် ကဲၤ. 46မၤနဲၢ်ကဒီၣ်ဓဳၤဒဳၣ်, စသၱာ် ဟဲ ဘဲာ်ပွဲၤသူကူာ်ဖဳးတစီာ်ယၱၢ်ဘဲာ်တဲၤလ့ၢ် တဲၤဝှဲး အမဳမဳၤကၱာ်ပဲၢ်တီၤ ပဲၢ်သ့းကဲၤကဘၱာ်စဲာ်အခဳး အစဲနဳၤ. စီၤပ့တရးဒီၣ်ရှံက့ၤစဲာ်တစီာ်, 47“ပၠၤအယဳၤတစီာ်နံၤဘဲာ်သးစါထံ အစာ်ဘိဝၤ နံၤဘဲာ်ကဲၤအခီနဳၤ. မဲၤကနဳၤဒဳၣ်, ပၠၤမဲၤဒၱာ်ဒါ ကဲာ်ထာ်ပီၢ် အကဖဳးစူစဲာ်တစီာ်ထံတပွဲၤပွဲၤဧါ,” စဒဲပၠၤဓဳၤ. 48မဲၤဝှါ, စမှဲးလၤပၠၤအကဖဳး စူစဲာ်ထံဒဳယ့ၣ်ရှူးခရၱာ်အမံၤအပူၤနဳၤ, ဝှါဒဳၣ်, စဲာ် တစီာ်ပီၤအံာ်စဲာ် အကအီၣ်ကိာ်စကါမူၤနံၤ မူၤ သဲ တစီာ်အဓၢ်ပူၤ.
ទើបបានជ្រើសរើសហើយ៖
သဓဳဖဳး 10: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
