SAHRUOTHUNA 37
37
Josef Ta Lesyina Muo A Sa
1Josef ca a paa a za awnapa Kanaan ruo lie kha khy a sa. 2Jakob ingchungkhue ama chuobie ca hing haa hing tana a cuo.
Josef ca kung hraa hlyisariy a tapa khata a paa napuvnung Bilhah hne Zilpah sacapaa zaw a cuopa a uvta zaw hne khata tuv hne mie kha khie taw yi te, a uvta zaw hmang pha lipa ama tuepa kaw kha a paa a chang taw. 3Josef ca a macuo tlipa ta a sapa a cuo nakawta a saata hrangpa zaw laa khata a due vie. Caacuonakawta buohryi pasiypa a buo syipa kha a tuepa.#37.3 Hebru lie a ri khingna sie vyi 4Cuorasala a uvnu hrangpa zaw ta a paa ta iema laata a due viepa kha ama hmung tiyta ama kha hue yi te biephaa ta chaw khing va yi.
5Luo kha ca Josef ta muo suokha sa te a uvta zaw kha a chang yi ca ama hue hryly. 6Ama ta, “Muo i sapa hing naathlie tie ung. 7Lu chunglie sa-uv ma cataw nguoluo pata kama sa-uv kha sungkha ta aa dangta tah a kya daa te, niema sa-uv tie khata cadung yi te kama sa-uv kha amaa bie,” a ta. 8A uvta zaw ta, “Nama ma ma cunglie siepahruo a cuo'a ciy? Nama ma malie a uv'a ciy?” ama ta. Caacuonakawta a muo hne a bie kawlie khata ama hue hryly.
9Muo hrangpa suokha sa pakhaa te a uvta zaw kyihuo khata, “Muo hrangpa suokha sa pakhaa angte, capa i muo lie ca ning hne thlaapa hne aasiy suo hraa hlyikha ta inaa bie yi,” a ta. 10Cuorasala capa a muo ca a paa hne a uvta zaw a chang tiy yi ta a paa ta chuo te, “Tuokhaapa muo ma na sa? Kama hne na nung hne na uvta zaw hing a vaw'a pate ma na hmiekunglie ca maa vya bung aa?” a ta. 11#Lct 7.9 Caacuonakawta a uvta zaw ta ama kha i-aw hnyi yi te, cuorasala a paa ta ca a palungruv lie a pari.
Josef Ca A Uvta Zaw Ta Ama Zaa
12Josef uvta zaw ca ama paa sahring khie riypata Shekhem luo kha ama si. 13Israel ta Josef kha, “Na uvta zaw ca Shekhem liena sahring ama khie cuo va ma? A vaw tie, iema'a luo na ica pathlie aa,” a ta. Josef ta, “Aw, i pachie tli,” a ta. 14Caacuonakawta a paa ta, “Si la, na uvta zaw ama tluo ma, sahring zaw aa bangsusa pata ama aw ma tapa kha va mang tie, cakhutaata kama'a luo kha bie ina vya chang'a ciy,” a ta. Cahaacata a paa ta Josef ca Hebron bawphie luo kha a pathlie.
Shekhem luo ca va chiy te, 15ruo chunglie aa khie nguoluopa kha cawsaa pakha ta hmung te, “Khaapama na huv?,” a ta. 16Ama ta, “I uvta zaw na i huv yi, khaapaliema sahring ama khie tapa kha na chang thi tie,” a ta. 17Cawsaapa ca ta, “Hingpa hmang taa hingta ca ama pya tli, ‘Dothan luo si'a ung puv,’ amaa tapa ca i thyi,” a ta. Caacuonakawta Josef ca Dothan luo kha si te a uvta zaw ca a va hmung yi. 18Luohlaa taata a vya silepa kha a uvta zaw ta va hmung yi te, iema'a luo a vya chiy hluo khata ama thie riypa kha khue ama khuo pacie. 19Iema pakha hne pakha kha, “Muo a sapa paa aa vaw tli hue. 20A vaw tie ung, ama kha thie'a ung pate khue chung luo thaw'a ung puv; saa na a sie ta'a ung pate a muo ca khaapama a vya lu tapa kha mang'a ung puv,” amaa ta. 21Cuorasala Reuben ta a thyi tiyta, “A thie ca thie khah ung siy,” ta te, a hringna kha iema kuv chung taa cata a khuo. 22Reuben ta iema kha, “Kuv pathlie pata thiyse ca palang khah ung, hingpa ruocaapa lieta khue chung luo hing thaw tie ung,” a ta yi. Cahaacata a tapa yi ca, Josef kha iema kuv chung taa khata khuo pata a paa'a luo paphya pakhaa naase ang tapa a khing nakaw tana a cuo. 23Caacuonakawta Josef ca iema'a luo a vya chiy pahne khata a buohryi pasiypa a buo syipa kha hlepa yi te, 24khuetlungpa chung luo ca ama thaw. Khuetlungpa ca a hripa ta cuo te, tiy aw vyi.
25Cakhutaata sa ning riypata amaa tupa khata hmiehmie ama pase ca, Gilead taata a vya silepa khy a tlawpa Ishmael ming kha ama hmung. Ama kala-uv khata raabaa, thing cathliy rang pa-uepa, hne cariy zaw kha Izipt ruo luo ama phya. 26Judah ta a uvnu zaw kha, “Ma nuta kha thie'a pate maa sie zawta khaapama a thlahne aa? 27A vaw tie ung, Ishmael ming'a luo hing zaa'a ung puv, a cunglie ma kuv pathlie khah ung siy, ma nuta, ma thiysaa tana a cuo,” a ta. A uvnu zaw ca ama palung a tling. 28#Lct 7.9 Midian ming sungpalituv tie ama vya chiy tiyta, Josef ca khuetlungpa chung taa cata thue yi te, Ishmael ming'a luo ca ngu tuokaa phie kiy ta ama za. Iema ca ta Josef ca Izipt luo amaa chiyle.
29Reuben ca khuetlungpa luo kha vaa te Josef kha a hmung li tiyta a caw kha thlaa te, 30a uvnu zaw'a luo kha vaa te, “Satliepa kha aw va tli; tuokhaatama i tue aa?” a ta. 31Cakhutaa cata mie sakha thie yi te Josef buohryi pasiypa kha mie thiy lie ca ama naw. 32Josef buohryi pasiypa a buo syipa ca a paa'a luo kha cyile yi te, “Hingpa hingna ma hmung; mang tie, na sacapaa buohryi ta a cuo ma cuo va ma?” ama ta. 33A paa ca ta pachang paluo te, “I sacapaa buohryi tana a cuo! Saa muo a sie ta; ama caphi patlaa diy hing haw!” a ta. 34Cakhutaa cata Jakob ca a pang kha thlaa te, buri caw kha a se lie a paze te, ning pasiypuv chung caa te a sacapaa muochie kha a sa. 35A sacapaa bangkhuo hne a sacanung bangkhuo ta hnaa panguo amaa zue raalaa pata, khing li pata, “Cuo vyi, a muochie i sa cang hing tana Sheol luo, i sacapaa'a luo ca i si aa,” a ta. Cahaacata a paa ca ngiechisa pata aa ngiy byalya. 36Capa cuo lie ca Midian ming khata Josef ca Izipt ruo lie siepahruo ing a huopa tie a uvtuvpa riebyi Potifar'a luo kha ama va zaa.
ទើបបានជ្រើសរើសហើយ៖
SAHRUOTHUNA 37: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.