SAHRUOTHUNA 38
38
Judah Hne Tamar
1Capa cuo ning ca Judah kha a uvnu zaw'a taa khata si te Adullam khy ming Hirah athaalie kha a za aw. 2Judah ta Shua ama tapa Kanaan ming sacanung pakha kha hmung te aa hlaw. 3Nu phya te, sacapaa kha sa te Er ta pata ming a paphya. 4Nu phya pakhaa te sacapaa sa te Onan ta pata ming a paphya. 5Sacapaa sa pakhaa te Shelah ta pata ming a sa. Shelah a sa ning kha Khezib lie a aw ningta a cuo. 6Judah ta a sacapaa uvthyi Er cuo khata napuv chiy te a ming ca Tamar ta a cuo. 7Cuorasala Judah sacapaa uvthyi Er ca Abyipa hmiekunglie kha a zya a pha li nakawta Abyipa ta a thie. 8Cakhutaa cata Judah ta Onan kha, “Na uvta napuvnung kha vaa ziehne la, aa vaapa nuta na cuonapa hrievu kha va patling sa la na uvta kha ciyhruo hnyi naase,” a ta. 9Cuorasala Onan ta a sapa saata kha ama ciyhruo a cuo li riypa a pachang tiyta, a uvta cuota ciyhruo aw li riypata a uvta napuvnung hne amaa ziehne kyry ta a ciy kha ale luo a papya lawmaw. 10A tuepa hmang kha Abyipa a palung a tluo li nakawta ama zaw kha a thie. 11Cakhutaata Judah ta a munung Tamar kyihuo khata, “I sacapaa Shelah a kya lena te ta na paa ing lie kha va nunghlyi caw tie,” a ta. Tahematapakieca Shelah zaw kha a uvta zaw haata thiy ra'a kie tapa a ciy nakawta a cuo. Caacuonakawta Tamar ca a paa ing luo kha a va aw.
12Cuo a vya ru vie tiyta Judah napuvnung, Shua sacanung kha a thiy. A muochie sana cuo a patlung khutaata a tuv hming a ngupa tie'a luo, Timnah luo kha Adullam khypa a viesaapa Hirah hne khata ama si. 13“Naa vaapa a paa na a tuv hming ngu riypata Timnah luo a si,” ta pata Tamar kha ama chang tiyta, 14a nunghlyi caw kha thlie te, a hmiepakhuv kha a khuv te, pang ta a pahlaw te, Timnah luo sinapa luopuv lie a awpa Enaim khy hukaa lie kha aa tu. Shelah kha a uvthyi tli raalaa pata ama pahlaw khing lipa kha a pachang. 15Judah ta ama kha a hmung tiyta, a hmie aa pahruv nakaw khata siyhrawnung ta a ri. 16Luo kielie ama'a luo kha vaa te, “A vaw la caa ziehne'a ang,” a ta. Tahematapakieca a munung a cuopa kha pachang vyi. Cawsaanung ca ta, “Inaa ziehne'a nakaw ca ta khaapama ina pi'a ciy,” a ta. 17Ama ta i sahring zaw chungtaata mietaata sakha na ica vya paphya aa,” a ta. Cakhutaata cawsaanung ta, “Mietaata ina vya paphya hluo cata biekuona chechiy suokha na chi siy caw kiena a pha aa,” a ta. 18Ama ta, “Khaapa biekuona chechiy ma i chi siy caw aa?” a ta. Cawsaanung ca ta, “Na caakhena hne a riy, hne na kuv lie naa hriepa khuecahryi,” a ta. Caacuonakawta pi te, a ziehne te cawsaanung ca nu a phya. 19Cakhutaa cata cawsaanung ca thu te a cakuo, a hmiepakhuv kha hle te a nunghlyi caw kha aa tue.
20Cawsaanung'a taata a chi siypa biekuona chechiy kha la pakhaa riypata a viesaapa Adullam khypa kha mietaata ca a va pa pi sa, cuorasala cawsaanung kha hmung khu vyi. 21Khy ming kyihuo khata, “Enaim khy luopuv kielie a tupa siyhrawnung kha khaapaliema a aw? ta pata a hiehriy yi. Iema ta, “Capa hmang lie ca siyhrawnung aw buo vyi,” a ma ta. 22Caacuonakawta Judah'a luo kha kaa te, “Cawsaanung kha hmung khu va ang; ca hlyitaw taata khy ming ta, “Hingpa lie hing siyhrawnung aw buo vyi, ina ta yi,” ta pata a chang. 23Judah ta, “Chechiy zaw kha a la lavuo; cata a cuo li kieca cawsaa na malie a pahnyisue'a yi, mietaata paphya angte na hmung khu li taa ca,” a ta.
24Thla thung khutaata Judah kha, “Na munung Tamar ca siyhrawle tena nu a phya,” ama ta. Cakhutaata Judah ta, “Ale luo kha papya ung la myi ta rue tie ung,” a ta. 25Tamar ca ale luo ama pyakhyi tiyta, a vaapa a paa kha bie taa te, “Hingpa chechiy zaw a hnyituv hingna nu naa paphya; mang la, hingpa caakhena hne a riy, hne khuecahryi hing ahung huopa tama a cuo,” a pata sa yi. 26Capa chechiy zaw ca Judah ta a pachang nakawta, “Ama ca kama laata aa dang vie, ama kha i sacapaa Shelah hneta i za pahlaw riypa tana a cuo raalaa,” a ta. Cakhutaata ca ama kha a ziehne va tli.
27Nu puv tiy aa de tiyta a riy chunglie nuta ca mingphie ta a cuo. 28A riy a pasapa khata nuta pakha ca a kuv suokha kha a za papya; nu a pa-awnung khata a kuv lie kha lariy sepa ta cakhiy te, “Ama hingna a zaa puv taa aa,” a ta. 29Cuorasala a kuv a zaa da pahne pakhapa kha a za puv taa. Nu a pa-awnung ta, “Nama pali hing ma zaa puv taa ciy!” a ta. Caacuonakawta ama ca Perez ta pata ming ama sa. 30Cakhutaa cata a nuta ca a kuv lie lariy sepa aa cakhiy pata za puv te, Zerah ta pata ming ama sa.
ទើបបានជ្រើសរើសហើយ៖
SAHRUOTHUNA 38: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.