SAHRUOTHUNA 19
19
Sodom Khy Ming Suenazya
1Zuoluocaw ta avuoming pahning Sodom khy luo amaa vaw ning kha Lot ca hukaa lie a zaa tu. Iema kha a hmung pahne yi ta vaa ruodaw yi te ama hmiekunglie kha aa bu. 2Ama ta, “I byipaa zaw, i ing luo hing a vya ngie ung la, nama phyi a siy ung la, zuo kha chuo a vya ripaa tie ung, mawluo mawdiy ta thu'a ung cate nama si khingna luo ca si lavuo ung ciy,” a ta yi. Iema ta, Cuo vyi, khypuv ahmyana hmang lie hingna maa ri aa,” ama ta. 3Cuorasala khuopuv ta a thlu nakaw yi ta a ing luo ca amaa ngie. Thiynung phuv lipa viechuo kha tuepa yi te, sa pahuosapa duo yi te ama ning. 4Cuorasala amaa zie hluo khata Sodom khypuv lie a awpa capaa mingnu hne uvthyi yalya ta ing kha ama vya cadung. 5#Brp 19.22-24 Lot kha u yi te, “Ata zuo na ing lie a ripa capaa zaw kha khaapaliema ama aw? Kya papya tie yi, ma suehne khing yi,” ama ta. 6Lot ta cawsaa tie'a luo kha pya te ingchiy a khaa khutaata, 7“Vya uvnu zaw, paa na ica kie yi, hmang pha li hringhruopa hing tue khah ung. 8Mang tie ung, capaa a pachang buo li liepa sacanung pahning i hnyi yi hing; iema hing kya pyakhyi'a yi angte, nama khingna haata tue tie ung; hingpa cawsaa tie cunglie hing ca khaapahmuo tue thi khah ung, ing naa tlungpa i mangchiy riypa i khyche tana ama cuo,” a ta yi. 9Iema ta, palie yi te, “A phe! Nama mingpepa hing ma bie malie a chipa'a ciy? Iema laata nama hing a pasa vie ta ca tue'a kie puv,” ama ta. Lot ca khuosa ta nuopuo yi te chiypakaa kha phawpahaw amaa nang. 10Cuorasala ing chunglie a awpa cawsaa tie ca ta Lot kha kya paza yi te ing chung luo amaa da khutaata ingchiypakaa kha ama khaa. 11#2Sie 6.18 Cakhutaata ingchiypakaa athaalie a awpa cawsaa a le a caw ta li pata ama ming pacue diy yi te ingchiypakaa kha hmung the va tli yi.
Sodom Hne Gomorrah Ama Para
12Cakhutaata cawsaa tie ca ta Lot kyihuo khata, “Hingpa lie hing cawsaa hrangpa na hnyi yi ma? Sacapaa, sacanung, na piepa, khy chunglie nama hne a awpa na cawsaa bangkhuo pakiy yi la hingpa taa hingta pyakhyi tie yi. 13Tahematapakieca, hingpa khy hingna ma para'a tli, hingpa cawsaa tie suebena ueryi hing Abyipa hmiekunglie a paring laalaw tli nakawta kiema hing para riypata malie a pathliepa tana ma cuo,” ama ta. 14Caacuonakawta Lot ca pya te, a piepa zaw kyihuo khata, “Thu ung la hingpa hmang taa hingta pya tie ung, tahematapakieca Abyipa na hingpa khypuv hing a para'a nang tli,” a ta yi. Cuorasala a piepa zaw ta se na a sung ta pata ama rue.
15Khy a kya dyi tiyta, avuoming ta Lot kha, “Thu pahraa la hingpa lie a awpa na napuvnung hne na sacanung pahning hing pyakhyi tie yi, caacuolikieca hingpa khypuv duotena lie hingna aca kuopuo'a yi,” ama ta. 16Cuorasala Lot ta a sawdung a vadung ta a aw ca, Abyipa ta ngie a chi nakawta cawsaa tie ca ta ama hne a napuvnung hne a sacanung zaw kha ama buo ta a dale yi te khy le luo ama pyakhyi khutaata capa lie ca ama thuse siy. 17Khy le luo ama pyakhyi khutaata iema ta, “Nama hring riypata a ruo tie ung, hnangluo a pali khah ung, ase lie kha a daa khah ung; tluocung luo khiy a ruo tie ung, caacuolikieca aca kuopuo'a yi,” a ma ta. 18Ca tiyta Lot ta iema kyihuo khata, “Cuo vyi, vya i byipaa zaw; 19na changtaapa hing hmiephaa ina pi tli ciy, i hringna kha na khuo cate kaw ina pacuo tli ciy; tluocung luo ca a ruo khu'a va ang, rana a taw'a angte i thiy aa tapa na i ciy. 20Mang tie, huepa khy hue a ngie te a ruo hmuona riypata a cuo, khyta zaw ta a cuo. Huepa luo hue a ruo thi'a ang, khytaata cuo va ma? I hringna zaw aa bang aa,” a ta. 21Ama ta, “A phasa, capa na hiepa zaw ca pipa cuo cate, na ripa khy hue para pata cuo'a vyi. 22A ruo pahraa tie, huepa luo hue na chiy hluo li khaapahmuo tue the'a va ang,” a ta. Caacuonakawta capa khypuv ca Zoar ama ta. 23Ning a kya chiypa khiyta Lot ca Zoar luo a vya chiy.
24Cakhutaa cata Abyipa ta Sodom hne Gomorrah cung luo ca kemyi kha khy haata a za pasaa sa. 25Capa khypuv tie ca cuose, ase ruo bangkhuo kha cuose, khypuv chunglie a awpa hne alyi lie a pupa bangkhuo kha a para diy. 26#Luk 17.32 Cuorasala Lot napuvnung ca hnangluo a pali te a mang nakawta paciy tung ta aa li.
27Abraham ca Abyipa hmiekunglie aa tu tawnapa luo kha mawdiy ta a cakuo. 28Sodom hne Gomorrah hne ase ruo luo kha a suo ca susana myikhuv haata myikhuv a kya thupa kha a hmung.
29Cuorasala Khazing ta ase ruo khypuv tie a para ning kha Abraham ca a thyi te, Lot a awnapa khypuv a para ning kha, a parapa khypuv chung taa cata Lot kha aa bangta tah a palaw sa.
Moab Ming Hne Ammon Ming Nangzaa Aa Chiypa Thukina
30Lot ca Zoar lie aw riypa kha a ciy nakawta pya te, a sacanung pahning hne khata tluocung luo kie yi te lungkaraw lie kha ama aw. 31A uvthyinung ta a syinung kyihuo khata, “Ma paa hing a macuo tli, chuelyi phung haata kiema hne a hlaw riypa capaa pakha hmuo aw va yi. 32A vaw tie, ma paa hing mingsuvtiy padang'a pate a ziekhyi'a puv, a ciyhruo a vie li riypata,” a ta. 33Caacuonakawta capa zuo cata a paa ca mingsuvtiy padang yi te, a sacanung uvthyi ta aa ziekhyi; a paa ta a sacanung a vaa ziepa hne a thupa kha pachang vyi. 34A mawluopa ta a uvthyinung ca ta, “Mang tie, azuohnie kha kama ta i paa i ziekhyi; ata zuo zaw hing mingsuvtiy padang'a pate nama ta a ziekhyi tie, a ciyhruo a vie li riypata,” a ta. 35Caacuonakawta ama paa kha mingsuvtiy padang pakhaa yi te a sacanung a syinung ta aa ziekhyi; a paa ta a sacanung a vaa ziepa hne a thupa kha pachang vyi. 36Cahaacata Lot sacanung zaw ca ama pahning ta ama paa saata ca ama phya. 37A uvthyinung ta sacapaa sa te Moab ta pata ming a sa; ama ca ata lie Moab ming ciypathlatuv ta a cuo. 38A syinung zaw ta sacapaa sa te Ben-ammi ta pata ming a sa; ama ca ata lie Ammon ming ciypathlatuv ta a cuo.
ទើបបានជ្រើសរើសហើយ៖
SAHRUOTHUNA 19: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.