SAHRUOTHUNA 18
18
Sacapaa Hnyi Riypa Biekuo
(Heb 13.2)
1 Abyipa ca Mamre mathliy diy kielie a awpa Abraham'a lie kha aa luo. 2#Heb 13.2 Abraham ca ningchung ning ling liyciy ta a thluodaa chiypakaa lie kha a tu te hmiehmie a kya pase ca aa thaalieta cawsaa pathung amaa daapa kha a hmung. A kya hmung pahne yi ta a thluodaa chiypakaa taa khata iema a taw riypa yi cata a ruo te ama hmiekunglie kha alyi lie a bu te, 3“I byipaa zaw, nama hmiekunglie hmiephaa i hmung kieca nama changtaapa hing na lawse thi khah ung. 4Tiy a cawta vya cyi'a angte, nama phyi hing a siy ung la thingkungpa rawlie hing a pahy caw tie ung. 5Nama changtaapa'a luo namaa vawpaa pawlaw tlipa ca, viechuo a cawta vya cyi'a angte ning ung la nama nangbuo namaa pape khutaata si lavuo ung ciy,” a ta yi. Caacuonakawta iema ta, “Na ripa haata tue tie,” ama ta. 6Abraham ca thluodaa chunglie a awpa Sarah'a luo kha a catlisa pata a ngie te, “Jungsacuo viedie a pha cepa libang zung thung la la viechuo rue pahraa tie,” a ta. 7Cue hraw luo kha a ruo te a saa pahuo liyciy riypa cue a thukalypa sakha kha patuv te a catli pata pasu riypata a changtaapa pakha kha a pi. 8Cakhutaa cata thawpat hne cuehnung hneta a changpa saa ca iema hmiekunglie kha pachie te, ama ning chung bangkhuo khata amaa thaalie thingkung ningdiy lie kha aa tupuo yi.
9Iema ta, “Na napuvnung Sarah khaapaliema a aw?” ama ta. Abraham ta, “Thluodaa chunglie hue na a aw,” a ta. 10#Rom 9.9 Cakhutaata pakha ta, “A cuo aa de ningta#18.10 Ata taa hingta thla caky a ta pata acuolikie huokung ata tiy hingta. niema'a luo hing a vaw pakhaa hrahring'a angte, na napuvnung Sarah ta sacapaa a sa aa,” a ta. Sarah ta ama khychepa paa hnangkaa thluodaa chiypakaa taa khata naa a thlie. 11Abraham hne Sarah ca ama kung hluvsa tli te ama macuo nungpuv tli nakawta Sarah ca canung phung hmuo pachang va tli. 12#1Pit 3.6 Caacuonakawta Sarah ca amata tah pahnyi te, “I nungpuvsa mangtli, i navaapa zaw a macuosa mangtli, i nuopaa khu hmisi'a ma?” a ta. 13Abyipa ta Abraham kyihuo khata, “Khaapanakawma Sarah ca pahnyi te, “I nungpuvsa tlipa hingta saata i sa'a ma? a ta,” a ta. 14#Luk 1.37 Abyipa ta a tue khu lipa hmang suokha chuo a aw ma? Thliciepa cuo, a cuo aa de ningta niema'a luo hing a vaw pakhaa'a angte Sarah ta sacapaa a sa aa,” a ta. 15Cuorasala Sarah ca a thlaa a zang nakawta a sie te, “Pahnyi va ang,” a ta. Ama ta, “Na pahnyi thluo kha,” a ta.
Sodom Cunglie Biechina
16Cawsaa zaw ca capa hmang taa cata a thu yi te Sodom luo kha ama si. Abraham ca iema pathlie riypata iema'a lie ca a si ra. 17Abyipa ta, “I tue riypa hmang hing Abraham chang li pata i aw'a ma? 18Abraham ca a lepa hne a cahrapa mingphang ta cuo'a te, alyicung mingphang bangkhuo ca ama thue hingta thluechiy pi pata ama cuo aa. 19Tahematapakieca ama kha a tlaw tli angte, aa dangpa hne biedangpa tuena ta Abyipa luopuv ziy riypa kha ama hnang taata a vawpa a saata zaw hne a chungkhue kha a pasu'a yi; cahaacata Abyipa ta ama'a lie bie a kuopa kha a cunglie a patling sa aa,” a ta. 20Cakhutaata Abyipa ta, “Sodom hne Gomorrah suebena ueryi ca a suo hringhruo te ama suena ca a le suesaa! 21Kama'a luo a kya chiypa suebena ueryi haa hingta ama tue sasaw ma, tue va yi ma tapa kha pachang riypa tana cung'a angte i za mang aa,” a ta.
22Caacuonakawta cawsaa zaw ca capa taa cata a pali yi te Sodom luo kha ama si. Abraham ca Abyipa hmiekunglie kha aa daa thluo. 23Abraham ta Abyipa kha a vya ngie te, “Aa dangpa tie kha cawsaa pha lipa tie hneta na para pakhaw hmisi'a yi ma? 24Sodom khypuv chunglie aa dangpa sawngaa aw biephung yi sala, capa aa dangpa sawngaa tie thue cata a ngiethena hnyi li pata na para ngiethie'a ma? 25Cahaapa hmang tue riypa ca nama hneta a hla thi se, aa dangpa tie hne cawsaa pha lipa tie kha aa lu pata thie hnepa ca! Alyicung bangkhuo Bieripatuv ta hmangdangpa kha tue'a va ca ma?” a ta. 26Abyipa ta, “Sodom khypuv chunglie aa dangpa sawngaa i hmung kie yi ca iema thue cata khypuv yalya khata i ngiethe aa,” a ta. 27Abraham ta palie te, “Kama ca buvcing hne buvcuo i cuo raalaa pata i rie a papha angte Abyipa'a luo kha bie i ri aa. 28Aa dangpa sawngaa laata papangaa caw vie yi sala haw? Papangaa ama caw vie nakawta khypuv yalya ta na para'a ma?” a ta. Abyipa ta, “Sawliy papangaa i hmung kieca para'a va ang,” a ta. 29Abraham ta ri pakhaa te, “Sawliy dyi aw yi sala haw?” a ta. Abyipa ta, “Sawliy tie thueta para'a va ang,” a ta. 30Cakhutaata ama ta, “VyaAbyipa, ri pakhaa'a angte na hi haa thi khah se. Sawthung aw yi sala haw?” a ta. Abyipa ta, “Sawthung i hmung kie yi ca para'a va ang,” a ta. 31Abraham ta, “I hmie a pasu'a angte Abyipa'a luo ca ri'a ang. Pakiy aw yi sala haw?” a ta. Abyipa ta, “Pakiy tie thueta para'a va ang,” a ta. 32Cakhutaata Abraham ta, “Vya Abyipa, yi khata dyi ri kalie'a angte na hi haa thi khah se. Pahraa aw yi sala haw?” a ta. Abyipa ta, “Pahraa tie thueta para'a va ang,” a ta. 33Abraham hne bie ama ri khutaa cata Abyipa ca cakuo te Abraham zaw ing luo aa diy.
ទើបបានជ្រើសរើសហើយ៖
SAHRUOTHUNA 18: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.