SAHRUOTHUNA 20
20
Gerar Lie Abraham Hne Sarah
1Capa taa cata Abraham ca Negeb ruo luo kha si te Kadesh hne Shur alalalie kha a aw. 2#Sah 12.13; 26.7 Gerar lie mingpe ta a aw nguoluo ning kha Abraham ta a napuvnung Sarah kha, “I sietanung tana a cuo,” a tapa kha a cuo. Caacuonakawta Gerar siepahruo Abimelek ta a cawsaa kha pathlie yi te Sarah kha a pala sa yi. 3Cuorasala capa zuo cata Abimelek muo lie kha Khazing zaa luo te, “Na lapa cawsaanung nakaw hingta na thiy aa, tahematapakieca ama ca navaa a hnyipa tana a cuo,” a ta. 4Caacuonakawta Abimelek ca cawsaanung kha cadi vyi. Khazing kyihuo khata, “Abyipa, a sue lipa cawsaa ca na thie'a ma? 5Ama ta, ‘I sietanung tana a cuo,’ na ta va ma? Cawsaanung hrahring zaw ta, ‘I caapaapa tana a cuo,’ ina ta. Palung pathesa pata hne a pathepa kuv tana hingpa hmang hing i tue,” a ta. 6A muo lie ca ta Khazing ta, “A cuo, hingpa hmang hing palung pathesa pata na tuepa kha i pachang; caacuonakaw ca ta muo i cunglie na sue li riypata a hrie hmuo ica pahrie sa va ta. 7Ata hingta cawsaapa napuvnung hing va pi pakhaa tie; tahematapakieca ama ca profet ta cuo te ama ta thlaa ca chuopa'a te na hring aa. Cuorasala hingpa nung hing na va pi pakhaa li kieca nama hne na chungkhue cawsaa bangkhuo nama thiy diy aa,” a ta.
8Caacuonakawta Abimelek ca mawdiy ta thu te a sii zaw kha ku yi te capa kaw ca a chang yi ca ama ciy hringhruo. 9Cakhutaa cata Abimelek ta Abraham kha ku te, “Ma cunglie hing khaapa hmang ma na tue? Na cunglie khaapa suena i tue nakawta ma hing haapa pha lina lepuv hing kama hne i pena cung luo na vya chiykhyi? Tue li riypa hmang na i cunglie na tue tli,” a ta. 10Abimelek ta Abraham kha, “Khaapa za rue cate ma hingpa hmang hing na tue,” a ta. 11Abraham ta, “Hingpa khy hne ruo lie hing Khazing ciyzaana aw vyi tapa kha i hmung, caacuonakawta i napuvnung kawlie hingta kama hing na thie'a kie yi i ta nakaw tana hingpa hmang hing i tue. 12Capa hlyitaw taata ama ca i sietanung zaw a cuo hmisi, i paa sacanung ta cuo te, i nung sacanung ca cuo vyi, caacuonakawta napuv ta i la. 13Caacuonakaw tana Khazing ta i paa ing taata ruo hrang luo khy ina patlaw sa tiyta, ama kyihuo hingta i changpa ca, i cunglie kawpacuona hne na tue riypa ca ma chiynapa hmangting lie kha, ‘Ama ca i caapaapa tana a cuo,’ ina ta'a ciy, tapa hingta a cuo,” a ta. 14Cakhutaata Abimelek ta Abraham kha tuv, cue, siicanung hne siicapaa zaw kha pi te, a napuvnung Sarah kha a pi pakhaa. 15Abimelek ca ta, “I ruo ca na hmiekunglie a aw thluo hing, na khingnapa hmang lie hing khysa tie,” a ta. 16Sarah kyihuo kha ta, “Mang tie, na caapaapa ca ngu tuokaa thawkha i pi hing; hingpa hing nama'a lie a awpa zaw bangkhuo hmiekunglieta suebena taa tana lawnapa paluo sana tana a cuo; nama ca suena tue bangby li pata na pathe,” a ta. 17Cakhutaa cata Abraham ta Khazing'a luo kha thlaachuo te Khazing ta Abimelek hne a napuvnung hne a siicanung zaw kha saata ama sa khu riypata a patluo sa yi. 18Tahematapakieca Sarah kawlie khata Abyipa ta Abimelek chungkhue lie canung tie bangkhuo saata sa khu li riypata ama chiy kha a za paping diy yi.
ទើបបានជ្រើសរើសហើយ៖
SAHRUOTHUNA 20: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.