SAHRUOTHUNA 17
17
Biekuona Pamangsana
(Pya 12.43—13.2)
1Abram kung sawcaky kung caky a ta ningta Abyipa kha ama'a luo zaa luo te, “Kama ca Lesyice Khazing tana i cuo, i hmiekunglie hing risie riy aw li pata hring tie. 2Kama hne nama alalalieta i biekuona kha tue'a angte, khuopuv ta ica papungzaa sa aa,” a ta. 3Abram ca a bu te, Khazing ta, 4“Kama ta nama hne biekuona i tuepa ca: Nama ca mingphang hluvpuv ciypathlatuv ta na cuo aa. 5#Rom 4.17 Na ming ca Abram ta cuo'a va tli, cuorasala Abraham tana a cuo'a tli; tahematapakieca nama ca mingphang hluvpuv ciypathlatuv tana ica tue tli. 6Khuopuv ta ica papungzaa sa aa; mingphang hluvpuv ta ca tue'a angte, nama chung taa hingta siepahruo zaw ama cuo aa. 7#Luk 1.55 I biekuona ca nama hne nama hnang taata a vaw riypa na samingsahlaa zaw chuo bangkhuo alalalieta chuozaa biekuona cuo riypata pahmang sa'a angte, nama hne nama hnang taata a vaw riypa na samingsahlaa zaw chuo bangkhuo cuo te ta nama Khazing ta i cuo aa. 8#Lct 7.5 Cakhutaata nama hne nama hnang taata a vaw riypa na samingsahlaa zaw kha ata lieta khyche ta nama cuonapa, Kanaan ruo bangkhuo hing chuozaa ta ca pi'a yi angte, kama ca nama Khazing ta i cuo aa,” a ta.
9Khazing ta Abraham kha, “Nama zaw ta i biekuona hing na ziy hrahring aa, nama hne nama hnang taata a vaw riypa na samingsahlaa chuo lie zaw ama ziy hrahring aa. 10#Lct 7.8; Rom 4.11 Kama hne nama, hne nama hnang taata a vaw riypa na samingsahlaa zaw ta nama ziy hrahring riypa i biekuona ca: Niema chungtaata capaa a cuopa bangkhuo ca nama vangdaw namaa te aa. 11Nama vangdaw kha a te'a ung cate, capa ca kama hne niema alalalieta biekuona pachangsana ta a cuo aa. 12Nama chuo chung bangkhuo niema chungtaata capaa a cuopa bangkhuo ca ning cari a ta pata vangdaw nama te aa, nama'a chungkhue lie a puvpa sii hne tuokaa ta nama calyipa ruohrang ming, nama samingsahlaa a cuo lipa tie zaw te nama te diy aa. 13Nama'a chungkhue lie a puvpa sii hne tuokaa ta nama calyipa ruohrang ming kha vangdaw amaa te aa. Cahaacata kama biekuona ca nama saa lieta chuozaa biekuona a cuo aa. 14Vangdaw a te lipa capaa bangkhuo ca a mingphang taata thaw pata a cuo aa; ama ca kama biekuona a parapa tana a cuo,” a ta.
15Khazing ta Abraham ca, “Na napuvnung Sarai zaw kha Sarai ta pata ku'a va tli ciy, a ming ca Sarah tana a cuo'a tli. 16Ama ca thluechiy i pi aa, ca hlyitaw taata ama'a taa hingta sacapaa pakha ica pi aa. Ama ca thluechiy pi'a angte mingphang zaw nung ta a cuo aa; ama'a taa hingta mingphang tie siepahruo zaw ama pya aa,” a ta. 17Abraham ca alyi lie kha a bu te, “Kung zakha a ta tlipa paa ta sacapaa a hnyi khu'a ma? Kung sawcaky a ta tlipa Sarah ta saa a sa khu'a ma? ta te a pahnyi. 18Cakhutaata Abraham ta Khazing kha, “Ishmael ca na hmiekunglieta hring thi se,” a ta. 19Khazing ta, “Cuo vyi, na napuvnung Sarah ta sacapaa pakha sa'a te, a ming ca Isak ta pata na sa aa. I biekuona kha ama hne pacu sa'a angte ama hnang taata a vawpa a samingsahlaa cuota chuozaa biekuona ta i pacuo sa aa. 20Ishmael kawlieta na bie kha naa ica thlie; Ama kha thluechiy pi'a angte khuopuv ta i papungzaa sa aa. Ama ca siepahruo pahraa hlyihning tie paa ta cuo'a te, mingphang lepuv ta i pacuo sa aa. 21Cuorasala i biekuona ca huokung ata tiy hingta Sarah ta aca sapa riypa Isak hneta i pacu sa aa,” a ta. 22Ama hne bie ama ri khutaata Khazing ca Abraham'a taa cata cung luo a kie.
23Cakhutaata Abraham ta a sacapaa Ishmael hne a ing lie a awpa capaasaata bangkhuo, a ing lie a puvpa sii bangkhuo hne tuokaa ta a calyipa tie bangkhuo kha capa ning cata Khazing a ripa haata ama vangdaw a te yi. 24Abraham ca vangdaw aa te ningta kung 99 ta te, 25a sacapaa Ishmael ca kung hraa hlyithung a ta. 26Capa ning caci cata Abraham hne a sacapaa Ishmael ca vangdaw amaa te. 27A ing lieta capaa bangkhuo, a chungkhue lie a puvpa sii zaw hne tuokaa ta a calyipa ruohrang ming zaw kha ama hne cata vangdaw te pakhawpa ama cuo.
ទើបបានជ្រើសរើសហើយ៖
SAHRUOTHUNA 17: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.