မာကု 7
7
မွိုးဖြားဖါဖြားသီးဖုံႏထာꩻသွဉ်သင်
(မတဲ ၁၅:၁–၉)
1ဖါရိသဲဖုံႏ ယင်ဟန်ႏတွမ်ႏ အဝ်ႏဝေင်ꩻယေရုသလမ်ႏ ကဖျော်လွဉ်ဒါႏ ကျမ်ꩻဒါႏဆရာႏဖုံႏ ယင်ဟန်ႏ စုဗူႏခူစွဉ်ႏ ဗွေႏယေသျုနဝ်ꩻသွူ။ 2ဝွေꩻဗွေႏ တပဲ့တောႏဖုံႏ ယင်ဟန်ႏ စွဉ်ႏဝွေꩻသီးစူ တဗော့ꩻလဲ့ꩻ ကအဝ်ႏအံႏဒါႏ ထာꩻအံႏနဝ်ꩻ ဝွေꩻသီး အွဉ်ႏသတိ ရိက်ခေႏလꩻနဝ်ꩻသွူ။ နဝ်ꩻနဝ်ꩻ နုဲင်းဖါရိသဲဖုံႏ ကအဝ်ႏဒေါ့ꩻဖေႏဒါႏ လိုꩻဖုံႏနဝ် ဟဝ်ဟွာႏစူ အနယ်ꩻနဝ်ꩻ ဝွေꩻသီး တဟွာႏတဝ်း ဝွေꩻသီးစူသွူ၊၊
3(ပွိုးဖါရိသဲဖုံႏ ကအဝ်ႏကုဲင်ဒါႏ ဂျူးလိုꩻမျိုꩻဖုံႏနဝ်ꩻ လက်ခံႏ အဝ်ႏထောင်လွဉ်ꩻဒျာႏ ဝွေꩻသီး မွိုးဖြားဖါဖြားသီး အထွုံꩻစံႏ ထာꩻသွဉ်သင်နဝ်ꩻသွူ။ ဝွေꩻသီး အထွုံꩻနယ်ꩻကို ပေါႏဝွေꩻသီး တဟွာႏတဝ်း စူနဝ်ꩻ တအံႏတဝ်း ထာꩻအံႏဖုံႏသွူ။ 4အဝ်ႏဆေꩻကို ကဖြေꩻသဲင်ꩻလွဉ်ဒါႏ ထာꩻအမျိုꩻမုဲင်ꩻ တယဝ်း ပေါႏဝွေꩻသီး တပသေရီးတဝ်းနဝ်ꩻ ဝွေꩻသီး တအံႏတဝ်းနဝ်ꩻသွူ။ နဝ်ꩻမꩻ ဝွေꩻသီး ကအဝ်ႏထောင်လွဉ်ꩻ၊ ဝွေꩻသီး ကလက္ခံႏဒါႏ အထွုံꩻနယ်ꩻ အလင်ဖုံႏနဝ်ꩻ အာငါႏ။ အထွုံꩻနယ်ꩻ အစားနုဲင်း ကပသေဗာႏဒါႏ တကောက်ꩻဖုံႏ၊ ဖွိုင်ꩻဖုံႏ၊ ဝန်ႏတောင်ꩻဖုံႏတွမ်ႏ ခင်ႏလမ်းဗေင်ႏဖုံႏနဝ်ꩻသွူ။ )
5နဝ်ꩻမꩻ ဖါရိသဲဖုံႏတွမ်ႏ ကျမ်ꩻဒါႏဆရာႏဖုံႏနဝ်ꩻ ရီဗွေႏယေသျု။ “ပွိုးတမုဲင်ꩻ နီမွိုးဖြားဖါဖြားသီး ကအဝ်ႏသွဉ်သင် လင်ꩻသွုပ်ဖေႏဒါႏ ထွုံꩻနယ်ꩻနဝ်ꩻ နာꩻတပဲ့တောႏဖုံႏ တထောင်လွဉ်ꩻတဝ်းတွိုႏဟောင်း။ ကွပ်စွဉ်ႏ ထောင်ꩻလွဉ်ꩻနဝ်ꩻ အံႏအီစွဉ်ႏ စူတဗော့ꩻလဲ့ꩻဖုံႏ နုဲင်းမုဲင်ꩻဟောင်း” နုဲင်းနဝ်ꩻသွူ
6 # ဟေသျာ ၂၉:၁၃ (LXX)။ ဗွေႏယေသျု လဝ်းချာ ဝွေꩻသီး၊ “ဟေသျာယ ကဟော်ꩻရီး ဖေႏဒါႏ သီခရာႏချိန်ႏနဝ်ꩻ မွော့ꩻမဲဉ်ႏငါႏနုဲင်းမုဲင်ꩻ။ သီနဝ်ꩻထွာ သူႏတောႏလဲဉ်။ ဗွိုန်နုဲင်း ဝွေꩻကတဲမ်းခါꩻလဲဉ်းဒါႏ၊
‘ဗွေႏဘုရာꩻမိန်း၊ လိုꩻစားယိုဖုံႏနဝ်ꩻ ရိုႏသေႏခွေ စွဉ်ႏဝွေꩻသီး ငဝ်းဖုံႏလွုမ်ꩻ၊
ကွဲႏတွော့ꩻ ဝွေꩻသီး အသꩻဖုံႏနဝ်ꩻ အဝ်ႏညာꩻမွေးနေးစွဉ်ႏ ခွေနဝ်ꩻသွူ။
7ကွပ်ပွိုး ဝွေꩻသီး သွဉ်သင်ဖေႏဒျာႏ လိုꩻအထွုံꩻနယ်ꩻဖုံႏ၊
အထွုံꩻနယ်ꩻ နဝ်ꩻဖုံႏနဝ်ꩻ မာꩻစွဉ်ႏ နုဲင်းခွေပညတ်ကျမ်ꩻဖုံႏ
ဝွေꩻသီးကဝုဲင်ႏ ကိုꩻကွယ်ႏဒါႏခွေနဝ်ꩻ အသွုံꩻတကျတဝ်း၊” နုဲင်းနဝ်ꩻသွူ။
8“ဗွေႏဘုရာꩻ ထာꩻသွဉ်သင်နဝ်ꩻ သီပုဲင်းအွဉ်ႏညာꩻထိုꩻတွော့ꩻ လွောက်ꩻနာႏလွဉ်ꩻဒျာႏ လိုꩻအထာꩻသွဉ်သင်ဖုံႏ” နုဲင်းနဝ်ꩻသွူ။
9နဝ်ꩻမꩻ ဗွေႏယေသျုဒေါ့ꩻသွုပ်၊ “ဖေႏနေး ကကံကျင်ꩻ မာꩻလွဉ်ꩻဒျာႏ သီနမ်း ထာꩻသွဉ်သင်ဖုံႏတွော့ꩻ ပယ်ႏထိုꩻ ဗွေႏဘုရာꩻ အထာꩻသွဉ်သင်ဖုံႏနဝ်ꩻ လျင်ႏငါႏသွူ။ 10#ထလ ၂၀:၁၂၊ ဟော်ꩻ ၅:၁၆၊ ထလ ၂၁:၁၇၊ ဝိ ၂၀:၉။ မောသျေ ကပညတ်ဒါႏ၊ ‘ရိုႏသေႏသွော့ သီမွိုးဖါတဲင် သီမဉ်ႏခွန်းဒိုႏချာ မွိုးဖါနဝ်ꩻ သီအီႏခံႏဗာႏ ထာꩻသီတံႏ’ နုဲင်းနဝ်ꩻသွူ။ 11ကွဲႏတွော့ꩻ သီသွဉ်သင်ဖေႏဒျာႏ လိုꩻတဖြာꩻ အထာꩻခြိုꩻ မဉ်ႏအဝ်ႏ တစွိုးတမျိုꩻ အအီႏသွုံꩻစွဲꩻ အီႏစွဲကို အီဖေႏဝွေꩻသီး မွိုးဖါတာႏ၊ ကွဲႏတွော့ꩻ သီရိုꩻဒျာႏ နဝ်ꩻနဝ်ꩻ ‘ကောဗန်၊’ (အဓိပ္ပါယ်ႏနဝ်ꩻ ထာꩻခြိုꩻနဝ်ꩻနဝ်ꩻ ဆဲင်ႏဒျာႏ ဗွေႏဘုရာꩻ)နဝ်ꩻသွူ။ 12ကအီႏစွဲကိုဒါႏ ဝွေꩻသီးမွိုးဖါဖုံႏနဝ်ꩻ ဝွေꩻသီး ယွိုန်းသယ်ꩻခံႏ ထိုꩻဗာႏတောဒျာႏသွူ။ 13တွမ်ႏသီ ကအဝ်ႏသွဉ်သင်ဖေႏဒါႏ အနယ်ꩻနုဲင်းယိုနဝ်ꩻ ပယ်ႏထန်ႏထိုꩻ ဗွေႏဘုရာꩻ အငဝ်းဖုံႏသွူ။ သီကမာꩻဒါႏ အထွုံꩻနယ်ꩻ ဗွိုန်နုဲင်းယိုနဝ်ꩻ ထာꩻအလင်ဖုံႏတဲ့ အဝ်ႏအာငါႏ” နုဲင်းနဝ်ꩻသွူ။
ထာဖုံႏကမာꩻတဗော့ꩻလဲ့ꩻဒါႏလိုꩻပုဂ္ဂိုလ်ႏတဖြာꩻ
(မတဲ ၁၅:၁၀–၂၀)
14နဝ်ꩻထွူ လိုꩻစွိုꩻဖုံႏနဝ်ꩻ ဗွေႏယေသျု ဟဲ့ꩻလွဉ်ထေ့ဖျင် ဝွေꩻဗွေႏထျꩻ တလဲင်ႏတဲင် ဒေါ့ꩻဖေႏ ဝွေꩻသီး၊ သီကားကအဝ်ႏနဝ်ꩻ နာႏခွေငဝ်းတွော့ꩻ သေနာႏသွော့။ 15အဝ်ႏအထန်ႏ ကနွို့လွဉ်သော့ꩻဒါႏ သီအကိုနဝ် တမာꩻဗော့ꩻလဲ့ꩻ နွောင်ꩻတဝ်းသီသွူ။ နုဲင်းထာꩻကအဝ်ႏဒါႏ သီအကို ကထန်ႏလွဉ်နဝ်ꩻ ကယိန်းမာꩻ တဗော့ꩻလဲ့ꩻထိုꩻသီ။ 16သီနားဖုံႏမဉ်ႏအဝ်ႏနဝ်ꩻ ဟွိုန်သွော့” နုဲင်းနဝ်ꩻသွူ။
17ဝွေꩻဗွေႏ အဝ်ႏလိုꩻစွိုꩻကို ထန်ႏတဲင် နွို့သော့ꩻလမ်းကိုချိန်ႏနဝ်ꩻ ဝွေꩻဗွေႏ တပဲ့တောႏဖုံႏ ရီဝွေꩻဗွေႏ ဖေႏကသျင်ꩻနယ် ကအဝ်ႏဒေါ့ꩻဒါႏ ငဝ်းယို အဓိပ္ပါယ်ႏနဝ်ꩻသွူ။ 18ဗွေႏယေသျု ဒေါ့ꩻဖေႏဝွေꩻသီး၊ “သီနဝ်ꩻ ဉာဏ်ႏတဖုဲင်လွို ကယ်ꩻတဝ်းက လိုꩻအလင်ဖုံႏ၊ သီတသေနာႏ တဝ်းဒွိုန်းဟောင်း။ အဝ်ႏအထန်ႏ ကနွို့သော့ꩻဒါႏ သီအကိုနဝ်ꩻ တမာꩻတဗော့ꩻလဲ့ꩻ နွောင်ꩻတဝ်းသီ။ 19ထာꩻနဝ်ꩻနဝ်ꩻ ကွပ်ပွိုး တနွို့သော့ꩻနွောင်ꩻတဝ်း သီသꩻကို၊ နွို့သော့ꩻဒျာႏ သီဖြေ့ကိုထွူတဲင် အဝ်ႏနမ်းခန္ဓာႏကို ထန်ႏထိုꩻယင်းဒျာႏ” နုဲင်းနဝ်ꩻသွူ။ ကအဝ်ႏရိုꩻဒါႏ နုဲင်းယိုနဝ်ꩻ ဗွေႏယေသျု ဖေါႏနယ်ဖေႏဒျာႏ ထာꩻအံႏဖုံႏ ကာအဝ်ႏနဝ်ꩻ အံႏလꩻလို့ဒျာႏနဝ်ꩻသွူ။
20နဝ်ꩻထွူ ဝွေꩻဗွေႏ ဒေါ့ꩻသွုပ်ယင်း၊ “နုဲင်းထာꩻကအဝ်ႏဒါႏ သီအကို ကထန်ႏလွဉ်နဝ်ꩻ မာꩻတဗော့ꩻလဲ့ꩻအီသီ နဝ်ꩻသွူ။ 21ပွိုးသီသꩻဖုံႏကို ကထန်ႏလွဉ် အကျံႏကုဲင်ဖုံႏနဝ်ꩻ အွဉ်မာꩻဒျာႏ ပဲစ်မာႏဝင်ꩻပိုမာဖုံႏ၊ စွန်ရိမ်ထာꩻဖုံႏ၊ မာꩻသီဝင်ꩻဖုံႏ၊ 22လွူꩻလောႏဝင်ꩻပိုမာဖုံႏ၊ လောဖတန်တဲင် မာꩻထာꩻကုဲင်ဖုံႏ ကားကအဝ်ႏ၊ လိန်ႏလဲဉ်၊ မာꩻထာꩻပသို့ꩻခရာႏ၊ တကေးဝင်ꩻ၊ မာꩻခွိုက်ဆာဝင်ꩻ၊ မာန်ႏမာႏနတန်တဲင် မွိုက်ထာꩻ စဉ်ꩻစာꩻဉာဏ်ႏအဲဉ်ထဝ်း၊ 23ထာꩻကုဲင်ယိုဖုံႏ ကားကအဝ်ႏနဝ်ꩻ အဝ်ႏဒျာႏသီအကို ထန်ႏလွဉ်တဲင် မာꩻတဗော့ꩻလဲ့ဒျာႏသီ” နုဲင်းနဝ်ꩻသွူ။
လိုꩻမူႏတဖြာꩻအထာꩻယွုမ်း
(မတဲ ၁၅:၂၁–၂၈)
24နဝ်ꩻထွူ ဗွေႏယေသျုထန်ႏထိုꩻတဲင် လွေꩻညာꩻထိုꩻစွဉ်ႏ ဟံႏနယ်ႏ ကအဝ်ႏဗော့ꩻဒါႏ ဝေင်ꩻတုရုနဝ်ꩻသွူ။ ဝွေꩻဗွေႏနွို့သော့ꩻ လမ်းတဖြုံႏကိုတဲင် ဝွေꩻဗွေႏ အဝ်ႏနဝ်ꩻကိုနဝ်ꩻ တမဉ်ဖေႏသေတဝ်း ပါꩻတဖြာꩻဖြာꩻ စွဉ်ႏတဲ့ ဝွေꩻဗွေႏ အုံဗဉ်ႏတေ့ꩻ တလꩻတဝ်းသွူ။ 25ပါꩻမူႏတဖြာꩻနဝ်ꩻ လူꩻကုဲင်စောင်ꩻ ဝွေꩻအပိုမူႏတွော့ꩻ ထွိုင်ႏဟွိုန် ဗွေႏယေသျုခရာႏနဝ်ꩻ လွဉ်ထေ့ ဝွေꩻဗွေႏထျꩻတဲင် တလဲင်ႏချင်ꩻ အွပ်ꩻလင်ꩻစွဉ်ႏ ဝွေꩻဗွေႏခင်ႏထျꩻသွူ။ 26ပါꩻမူႏနဝ်ꩻ ထွာဒျာႏ လိုꩻမျိုꩻလင်တဖြာꩻ၊ လွူးလွဉ်သော့ꩻဒျာႏ သီးရီးယားခမ်း ဖိုနီးသျားနယ်ႏကိုသွူ။ ဖေႏကဝါးထန်ႏထိုꩻဖေႏ လူꩻကုဲင် ဝွေꩻအပိုမူႏကိုနဝ်ꩻ ဝွေꩻမူႏတောင်ꩻပြန်ႏ ဗွေႏယေသျုသွူ။ 27ကွဲႏတွော့ꩻ ဗွေႏယေသျု လဝ်းချာ၊ “နီအွဉ်ႏအံႏရီးဗာႏဒျာႏ နီပိုဖုံႏသွူ။ ထူႏပိုဖုံႏ ထာꩻအံႏတွော့ꩻ နုဲင်ႏထိုꩻဖေႏထွီႏဖုံႏနဝ်ꩻ အနယ်ꩻတမဲဉ်ႏတဝ်း” နုဲင်းနဝ်ꩻသွူ။
28ပါꩻမူႏလဝ်းချာ၊ “ဗွေႏ၊ ပိုဖုံႏထာꩻအံႏလွို ကထဲ့လင်ꩻ ထာꩻအံႏခွုံႏဆꩻလနဝ်ꩻ ထွီႏဖုံႏ အံႏထွိုက်ဒျာႏ” နုဲင်းနဝ်ꩻသွူ။
29နဝ်ꩻမꩻ ဗွေႏယေသျု ဒေါ့ꩻဖေႏပါꩻမူႏ၊ “ကွပ်ပွိုး ငဝ်းလဝ်းဖြေႏချာ နဝ်ꩻအတွက် သဲင်ꩻချာခန်း လမ်းသူꩻဟုဲင်း၊ နာꩻပိုမူႏကို လူꩻကုဲင် ထန်ႏထိုꩻလဲဥ်းနဝ်ꩻ နာꩻအီႏထီႏဗာႏ” နုဲင်းနဝ်ꩻသွူ။
30ပါꩻမူႏနဝ်ꩻ သဲင်ꩻချာလမ်းတဲင် ထီႏဗာႏစွဉ်ႏ ဝွေꩻအပိုမူႏပေႏ အဝ်ႏဗေင်ႏလင်ꩻထာꩻ ခင်ႏလမ်းဗေင်ႏလောင်းတဲင် လူꩻကုဲင် ထန်ႏထိုꩻမွေးလဲဉ်း နဝ်ꩻသွူ။
ဗွေႏယေသျုလုမ်ꩻလာꩻဟဝ်ဖေႏလိုꩻတအွိုင်တအာႏတဖြာꩻ
31နဝ်ꩻထွူ ဗွေႏယေသျု အဝ်ႏဝေင်ꩻတုရု အသောင်အထျꩻနဝ်ꩻ ထန်ႏထိုꩻတဲင် ဖျတ်ကာႏ ဝေင်ꩻသိဒုန် လွေꩻဒျာႏ တဖူꩻဝေင်ꩻနယ်ႏ အဖြုံႏတဆီဖဲ့ꩻတဲင် အီႏလွေꩻ ကာလိလဲ ထီနောင်နဝ်ꩻသွူ။ 32လိုꩻယင်ဟန်ႏနဝ်ꩻ အီလွဉ်လိုꩻနာႏအွိုင် ဒေါ့ꩻထာꩻတလꩻတဝ်း တဖြာꩻ ဝွေꩻဗွေႏထျꩻတဲင် ဖေႏနေးဝွေꩻဗွေႏ ကအွဉ်ႏဒင်ႏဖေႏစူ ဝွေꩻအလောင်းနဝ်ꩻ တောင်ꩻပြန်ႏ ဗွေႏယေသျုနဝ်ꩻသွူ။ 33နဝ်ꩻမꩻ အဝ်ႏလိုꩻစွိုꩻကိုဖုံႏနဝ်ꩻ ဗွေႏယေသျု ဟဲ့ꩻထန်ႏခေါ် ဝွေꩻတဖြာꩻတွော့ꩻ စွဉ်ႏဝွေꩻဗွေႏ စူနုန်ဖုံႏနဝ်ꩻ စီꩻသော့ꩻ ပါꩻခိုနားဖုံႏကို၊ ပထိုယုဲင်ꩻထီတဲင် တွမ်ႏစူနဝ်ꩻ ခွေါင်းပါꩻခိုဖြေꩻနဝ်ꩻသွူ။ 34နဝ်ꩻထွူ ဗွေႏယေသျု ထွားကီထင်ႏမို့ꩻလောင်း ဒေါ့ꩻသင်ႏသန် အငဝ်းတဲင် ရိုꩻဖေႏပါꩻခို၊ “ဧဖတ” အဓိပ္ပါယ်ႏနဝ်ꩻ “ဗွောင်ဟုဲင်း” နုဲင်းနဝ်ꩻသွူ။
35တလဲင်ႏချင်ꩻ ပါꩻခိုနဝ်ꩻ နားဟွိုန်လွဉ် ဝွေꩻဖြေꩻနဝ်ꩻ မွန်လွဉ်တဲင် ဝွေꩻဒေါ့ꩻထာꩻငဝ်းဖြောင်ႏ ဟဝ်လွဉ်စွဉ်ႏနဝ်ꩻသွူ။ 36နဝ်ꩻထွူ ဖေႏကဒေါ့ꩻနယ်တောမွိုန်း ပါꩻလင်တဖြာꩻဖြာꩻနဝ်ꩻ ဗွေႏယေသျု မိန်းဖေႏ လိုꩻဖုံႏနဝ်ꩻသွူ။ ကွဲႏတွော့ꩻ ဖေႏကဒေါ့ꩻနယ်မွိုန်း ကယိန်းဖေႏ အမိန်းနဝ်ꩻ ဝွေꩻသီး ကယိန်းဒေါ့ꩻနယ် စွဉ်ႏဝင်ꩻနဝ်ꩻသွူ။ 37နဝ်ꩻမꩻ လိုꩻကဟွိုန်လဲဉ်းသားဖုံႏ ကားကအဝ်ႏနဝ်ꩻ အံႏဖြာႏ မွေးနေးစွဉ်ႏနဝ်ꩻသွူ။ ဝွေꩻသီးခြောဝ်၊ “ဝွေꩻဗွေႏ ကမာꩻလဲဉ်းဒါႏဖုံႏ ကားကအဝ်ႏနဝ်ꩻ ဟဝ်ငါႏ ခွိုင်းကားမုဲင်ꩻ၊ လိုꩻနားအွိုင်ဖုံႏ လဲင်ꩻဟွိုန်လွဉ်တဲင် လိုꩻတအာႏဖုံႏ လဲင်ꩻဒေါ့ꩻလꩻစွဉ်ႏနဝ်ꩻ ဝွေꩻဗွေႏ မာꩻနွောင်ꩻစွဉ်ႏ နုဲင်းမုဲင်ꩻ” နုဲင်းနဝ်ꩻသွူ။
ទើបបានជ្រើសរើសហើយ៖
မာကု 7: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.