မာကု 11
11
မာꩻအောင်ႏပွယ်ꩻနွို့သော့ꩻဝေင်ꩻယေရုသလမ်ႏ
(မတဲ ၂၁:၁–၁၁။ လုကာ ၁၉:၂၈–၄၀။ ယောဟန် ၁၂:၁၂–၁၉)
1နုဲင်းဝွေꩻသီးအဝ်ႏ ဝေင်ꩻယေရုသလမ်ႏ ထွိုင်ႏဗော့ꩻလွဉ် ဝေင်ꩻဗဲက်ဖါဂေ တွမ်ႏဗေတနိနဝ်ꩻ ဝွေꩻသီး တွိုႏလွဉ်စွဉ်ႏ ကောင်သံလွေင်နဝ်ꩻသွူ။ ဗွေႏယေသျု အွဉ်ႏစွꩻလွေꩻရီး ဝွေꩻဗွေႏ တပဲ့တောႏဝင်ꩻနီ၊ 2စွဉ်ႏငဝ်းထွန်ႏ နုဲင်းယို၊ “လွေꩻသွော့ဒုံ ကအဝ်ႏသီဆꩻငါနဝ်ꩻဟုဲင်း။ သီမဉ်ႏဖျော် နဝ်ꩻကိုနဝ်ꩻ တလဲင်ႏချင်ꩻ သီအီႏထီႏ လာꩻပေႏ ဝင်ꩻတလꩻထုမ်း ဗာႏဖိုတဝ်းဒွိုန်းတဗာႏ အဝ်ႏစွိုင်သေꩻခါꩻနဝ်ꩻသွူ။ စေအဖြွီꩻတွော့ꩻ အီလွဉ်သွော့ ယိုကိုဟုဲင်း။ 3ပါꩻတဖြာꩻဖြာꩻ မဉ်ႏရီသီ ပွိုးတမုဲင်ꩻ သီမာꩻဗာႏတွိုႏ နုဲင်းနဝ်ꩻနဝ်ꩻ၊ ရိုꩻဖေႏသွော့ ဗွေႏဆရာႏ အဝ်ႏလိုႏ နုဲင်းနဝ်ꩻတွော့ꩻ အီႏပသာသဲင်ꩻချာယင်းဒျာႏ တလဲင်ႏချင်ꩻ နုဲင်းနဝ်ꩻဟုဲင်း။”
4နဝ်ꩻမꩻ ဝွေꩻသီးလွေꩻတဲင် ထီႏလာꩻပေႏတဗာႏ ထန်ႏလွဉ်သော့ꩻ တဖူꩻလောင်း၊ အဝ်ႏစွိုင်ခါꩻ လမ်းတခါꩻထျꩻသွူ။ နုဲင်းဝွေꩻသီး ကအဝ်ႏစေ လာꩻပေႏဖြွီꩻနဝ်ꩻ၊ 5ပါꩻတဖြာꩻ အဝ်ႏအုံထွိုင်ႏ နဝ်ꩻကိုနဝ်ꩻ ရီဝွေꩻသီး။ “သီမာꩻတမုဲင်ꩻဟောင်း၊ မွော့ꩻစေဗာႏတွိုႏ လာꩻပေႏဖြွီꩻနဝ်ꩻဟောင်း” နုဲင်းနဝ်ꩻသွူ။
6နုဲင်းဗွေႏယေသျု ကဒေါ့ꩻဖေႏဒါႏ ဝွေꩻသီးနဝ်ꩻ ဝွေꩻသီးလဝ်းချာတဲင် လိုꩻစွိုꩻဖုံႏ အွဉ်ႏစွꩻလွေꩻစွဉ်ႏ ဝွေꩻသီးနဝ်ꩻသွူ။ 7လာꩻပေႏနဝ်ꩻ ဝွေꩻသီးအီလွဉ် ဗွေႏယေသျုထျꩻတဲင် ဝွေꩻသီး ဆဲင်ꩻယွုံးတန်ဖုံႏနဝ်ꩻ အွဉ်ႏဒင်ႏလူးစွဉ်ႏ လာꩻပေႏငင်းလောင်းတဲင် ဗွေႏယေသျုထုမ်းစွဉ်ႏသွူ။ 8လိုꩻအာဖုံႏနဝ်ꩻ အွဉ်ႏဒါ ဝွေꩻသီးဆဲင်ꩻတန်ဖုံႏ တဖူꩻတန်လောင်းတွော့ꩻ အလင်ဖုံႏနဝ်ꩻ ဗျင်ႏသေင်ႏပင် အခြံကိုတဲင် သေင်ႏပင်ဖုံႏနဝ်ꩻ အွဉ်ႏဒါဖေႏစွဉ်ႏ တဖူꩻတန်လောင်းသွူ။ 9#သာ ၁၁၈:၂၅၊ ၂၆။ လိုꩻကအဝ်ႏ ဆꩻငါသားဖုံႏတွမ်ႏ လိုꩻကအဝ်ႏထောင်လွဉ်ꩻ ဆꩻချာဖဲ့ꩻသားဖုံႏနဝ်ꩻ ခြောဝ်စ အငဝ်းဖုံႏ၊ “အုပ်ꩻထင်ႏသွော့ ဗွေႏဘုရာꩻ။ ဗွေႏအကကျွꩻလွဉ်ဒါႏစွဉ်ႏ ထာဝရဘုရာꩻ အမဉ်ꩻနာႏမနဝ်ꩻ ဗွေႏဘုရာꩻ ယံကဖေႏသွော့ ဝွေꩻဗွေႏမင်္ဂလာႏ။ 10ကအီႏလွဉ်ဒါႏ နီဖါ ဒါဝိဒ်ခမ်းထီနဝ်ꩻ ဗွေႏဘုရာꩻ ယံကဖေႏသွော့ မင်္ဂလာႏ၊ အုပ်ꩻထင်ႏသွော့ ဗွေႏဘုရာꩻ” နုဲင်းနဝ်ꩻသွူ။
11ဗွေႏယေသျုနွို့သော့ꩻ ဝေင်ꩻယေရုသလမ်ႏ လွေꩻသော့ꩻ ဗိမာန်ႏတောႏ ကျောင်ꩻကိုတဲင် ထွားခူစွဉ်ႏထာꩻ ကားကအဝ်ႏနဝ်ꩻသွူ။ ကွဲႏတွော့ꩻ မွူးဟာလင်ꩻငါႏလဲဉ်း နဝ်ꩻမꩻ ဝွေꩻဗွေႏစွဉ်ႏ တပဲ့တောႏ တဆီနီဖြာꩻနဝ်ꩻ ထန်ႏလွေꩻစွဉ်ႏ ဗေတနိနဝ်ꩻသွူ။
ဗွေႏယေသျုသမုတ်ဖက်ꩻဒွိုႏဆꩻမွူး
(မတဲ ၂၁:၁၈၊၁၉)
12ဆုဲင်ꩻတနီꩻ နုဲင်းဝွေꩻသီးကအဝ်ႏ ဗေတနိ သဲင်ꩻလွဉ်ချာနဝ်ꩻ ဗွေႏယေသျု အဝ်ႏဟို့ꩻခိုး ထာꩻအံႏနဝ်ꩻသွူ။ 13ဝွေꩻဗွေႏ အဝ်ႏထီႏညာꩻလွေꩻ ဖက်ꩻဒွိုႏဆꩻတမွူး အဝ်ႏဗွေစွဉ်ႏ အလာႏနဝ်ꩻသွူ၊ နဝ်ꩻမꩻ ကုဲင်းမော့ꩻနွောင်ꩻဒါႏ အရာႏဖုံႏ နုဲင်းနဝ်ꩻတဲင် ဝွေꩻဗွေႏ လွေꩻထွားစွဉ်ႏ အမွူးလောင်းနဝ်ꩻသွူ။ ကွဲႏတွော့ꩻ ဝွေꩻဗွေႏထွိုင်ႏ ဖျော်လွဉ် အမွူးထျꩻနဝ်ꩻ ကွပ်ပွိုး ဖက်ꩻဒွိုႏ အရာႏချိန်ႏ တမွေးတဝ်း အတွက် ဝွေꩻဗွေႏထီႏဒျာႏ အလာႏဖုံႏလွုမ်ꩻသွူ။ 14ဗွေႏယေသျုမိန်းဖေႏ ဖက်ꩻဒွိုႏဆꩻမွူး၊ “တယ်ႏယိုခါ ပါꩻမုဲင်ꩻတဖြာꩻတဲ့ တွမ်ႏအံႏဗာႏဖျင် မွိုန်းဒွုမ် နာꩻအရာႏ” နုဲင်းနဝ်ꩻသွူ။
ဝွေꩻဗွေႏ ကဒေါ့ꩻနဝ်ꩻ ဝွေꩻဗွေႏ တပဲ့တောႏဖုံႏ အဝ်ႏဟွိုန်နဝ်ꩻသွူ။
ဗွေႏယေသျုလွေꩻဗိမာန်ႏတောႏကျောင်ꩻ
(မတဲ ၂၁:၁၂–၁၇။ လုကာ ၁၉:၄၅–၄၈။ ယောဟန် ၂:၁၃–၂၂)
15ဝွေꩻသီး ထွိုင်ႏဖျော်လွဉ်သော့ꩻ ဝေင်ꩻယေရုသလမ်ႏကိုချိန်ႏ ဗွေႏယေသျုလွေꩻ ဗိမာန်ႏတောႏ ကျောင်ꩻတဲင် ဝါးထန်ႏစ ထိုꩻလို့စွဉ်ႏ လိုꩻကအဝ်ႏဖြေꩻစာ ထာꩻသားဖုံႏနဝ်ꩻသွူ။ ဝွေꩻဗွေႏ နွန်ႏဝန်ထိုꩻ ရွဉ်လုဲင်ႏခွုံႏဖုံႏတွမ်ႏ ဝါးကွူစာသား ကအဝ်ႏအုံလင်ꩻလူး ခွုံႏဖုံႏသွူ။ 16ဗိမာန်ႏတောႏကျောင်ꩻ တလင်ꩻကိုနဝ်ꩻ ပါꩻမုဲင်ꩻတဖြာꩻတဲ့ ဝွေꩻဗွေႏ တဖေႏဖျတ်ကာႏသော့ꩻ တဝ်းဒွုမ် ထာꩻခြိုꩻတစွိုးစွိုးသွူ။ 17#ဟေသျာ ၅၆:၇၊ ယေ ၇:၁၁။ နဝ်ꩻထွူ ဝွေꩻဗွေႏ သွဉ်သင်ဖေႏ လိုꩻဖုံႏ၊ “နုဲင်းကအဝ်ႏတဲမ်းသော့ꩻဒါႏ လိတ်ကျမ်ꩻဖုံႏကိုနဝ်ꩻ ဗွေႏဘုရာꩻမိန်း၊ ‘ခွေဗိမာန်ႏတောႏ ကျောင်ꩻနဝ်ꩻ အီႏဟဲ့ꩻဗာႏဒျာႏ လိုꩻအမျိုꩻမျိုꩻဖုံႏ ကားကအဝ်ႏတာႏ ဆုတောင်ꩻလမ်း၊’ ကွဲႏတွော့ꩻ လမ်းနဝ်ꩻနဝ်ꩻ သီအဝ်ႏမာꩻခွိုန်ꩻ ထိုꩻတောဒျာႏ တခွန်ꩻဖုံႏ အုံငိပ်ꩻတေ့ꩻသော့ꩻတာႏ ခင်ႏလမ်းနုဲင်းမုဲင်ꩻ” နုဲင်းနဝ်ꩻသွူ။
18ယဇ်ပရောဟိတ် တန်ဖုံႏတွမ်ႏ ကျမ်ꩻဒါႏဆရာႏဖုံႏ ဟွိုန်စွဉ်ႏနုဲင်းယို နဝ်ꩻမꩻ ဖေႏကမာꩻသီထိုꩻဗာႏ ဗွေႏယေသျုနဝ်ꩻ ဝွေꩻသီးစတဲင် ထုမ်ႏထွားစွဉ်ႏ အနယ်ꩻနဝ်ꩻသွူ။ ကွပ်ပွိုး လိုꩻစွိုꩻဖုံႏ ကားကအဝ်ႏနဝ်ꩻ အဝ်ႏအံႏဖြာႏဒျာႏ ဝွေꩻဗွေႏ ထာꩻသွဉ်သင်အတွက် ဝွေꩻသီး အဝ်ႏငမ်းသꩻ ဝွေꩻဗွေႏနဝ်ꩻသွူ။
19မွူးထွိုင်ႏဟာလွဉ်နဝ်ꩻ ဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏ အဝ်ႏဝေင်ꩻနဝ်ꩻ ထန်ႏထိုꩻစွဉ်ႏသွူ။
အဝ်ႏဖက်ꩻဒွိုႏဆꩻမွူးထျꩻလꩻအီထာꩻသွဉ်သင်
(မတဲ ၂၁:၂၀–၂၂)
20ဆုဲင်ꩻတရဝ်ꩻ စဝ်းစဝ်း ဝွေꩻသီး အဝ်ႏထောင်လွေꩻ တဖူꩻတန်လောင်း ဝွေꩻသီးထီႏ ဖက်ꩻဒွိုႏဆꩻမွူးသွူ။ ဖက်ꩻဒွိုႏဆꩻမွူးနဝ်ꩻ သီလို့ ဗꩻလင်ꩻလစွဉ်ႏ အရွီးဖုံႏနဝ်ꩻသွူ။ 21နုဲင်းထာꩻကထွာလွဉ်လဲဉ်းနဝ်ꩻ ပေတရု ယူႏလꩻချာတဲင် ဒေါ့ꩻဖေႏ ဗွေႏယေသျု၊ “ဆရာႏ၊ ထွားမွိုင် ဖက်ꩻဒွိုႏဆꩻမွူး နီဗွေႏ ကအဝ်ႏသမုတ်ခါꩻနဝ်ꩻ အသီထိုꩻလဲဉ်း” နုဲင်းနဝ်ꩻသွူ။
22ဗွေႏယေသျု လဝ်းချာ ဝွေꩻသီး၊ “ယွုမ်းသွော့ ဗွေႏဘုရာꩻဟုဲင်း။ 23#မ ၁၇:၂၀၊ ၂ကော ၁၃:၂။ ခွေဒေါ့ꩻဖေႏသီ အမွေး၊ ပါꩻမုဲင်ꩻတယဝ်း ဝွေꩻအသꩻကို သင်ႏသရကင်ꩻတွော့ꩻ ထာꩻယွုမ်းမဉ်ႏအဝ်ႏနဝ်ꩻ ဒေါ့ꩻဖေႏကောင်ပူႏယို ထွိုင်ႏတဲင် လွဉ်းသော့ꩻချာ နာꩻနမ်း ပင်ႏလယ်ႏကိုဟုဲင်း နုဲင်းနာꩻကရိုꩻနဝ်ꩻ အီႏထွာလွဉ်တွော့ꩻ ဝွေꩻတာႏနဝ်ꩻ အီႏမာꩻဖေႏနဝ်ꩻသွူ။ 24ပွိုးအကျောင်ꩻခရာႏ နုဲင်းယိုအတွက်တဲင် ခွေအွဉ်ႏဒေါ့ꩻဖေႏသီ၊ သီကဆုတောင်ꩻ ထာꩻတစွိုးစွိုးချိန်ႏ နာꩻအီႏလꩻမွေးနဝ်ꩻ ယွုမ်းတဲင် နာꩻဆုတောင်ꩻစွဉ်ႏ အစွိုးမုဲင်ꩻတဲ့ နာꩻအီႏလꩻနဝ်ꩻသွူ။ 25#မ ၆:၁၄၊ ၁၅။ သီအုံထွိုင်ႏ ဆုတောင်ꩻချိန်ႏနဝ်ꩻ ဖေႏနေး သီဖါကအဝ်ႏ ခမ်းထီမို့ꩻလောင်းကီကို ဖေႏကအွဉ်ႏစွꩻလွစ်ဖေႏ သီကအဝ်ႏမာꩻမာႏ ထာꩻဖုံႏနဝ်ꩻ အွဉ်ႏစွꩻလွစ်ဖေႏသွော့ ဝင်ꩻအပဲစ်ဖုံႏ ကားကအဝ်ႏဟုဲင်း။ 26သီမဉ်ႏအွဉ်ႏစွꩻလွစ်ဖေႏတဝ်း ဝင်ꩻအပဲစ်ဖုံႏနဝ်ꩻ သီဖါကအဝ်ႏ ခမ်းထီမို့ꩻလောင်းကီကိုနဝ်ꩻ အီႏတအွဉ်ႏစွꩻလွစ် ဖေႏတဝ်း သီအပဲစ်ဖုံႏ” နုဲင်းနဝ်ꩻသွူ။
ရီပွိုင်းဝွို့တွမ်ႏဗွေႏယေသျုအခွင်ꩻအာႏဏာႏခရာႏ
(မတဲ ၂၁:၂၃–၂၇။ လုကာ ၂၀ : ၁-၈)
27ဝွေꩻသီးဖျော်လွဉ်ဖျင် ဝေင်ꩻယေရုသလမ်ႏ တလဲင်ႏသွူ။ နုဲင်းဗွေႏယေသျု အဝ်ႏထောင်လွေꩻသော့ꩻ ဗိမာန်ႏတောႏ ကျောင်ꩻကို ယဇ်ပရောဟိတ်တန်ဖုံႏစွဉ်ႏ ကျမ်ꩻဒါႏဆရာႏဖုံႏတွမ်ႏ လိုꩻတန်ဖုံႏနဝ်ꩻ လွဉ်ထေ့ ဗွေႏယေသျုထျꩻတဲင်၊ 28ရီဝွေꩻဗွေႏ၊ “နာꩻကအဝ်ႏမာꩻဒါႏ ထာꩻယိုဖုံႏနဝ်ꩻ လꩻအခွင်ꩻ မုဲင်ꩻကိုဟောင်း။ ပါꩻမုဲင်ꩻဖေႏနာꩻ အခွင်ꩻစားယိုဟောင်း။
29ဗွေႏယေသျု လဝ်းချာ ဝွေꩻသီး၊ “ခွေအီႏရီကသီ ငဝ်းရီတစွိုးတဲင် သီမဉ်ႏလဝ်းဖြေႏချာဖေႏ ခွေနဝ်ꩻ နုဲင်းခွေကအဝ်ႏမာꩻ ထာꩻယိုဖုံႏ လꩻအအခွင်ꩻ မုဲင်ꩻကိုနဝ်ꩻ ခွေအီႏဒေါ့ꩻနယ်ဖေႏသီ” နုဲင်းနဝ်ꩻသွူ။ 30ယောဟန်ကဖေႏဒါႏ ဗတ္တိဇံႏ ထီမင်္ဂလာႏနဝ်ꩻ လꩻလွဉ်အခွင်ꩻ မုဲင်ꩻကိုဟောင်း၊ လꩻလွဉ် ဗွေႏဘုရာꩻထျꩻနဲ့ မဉ်ႏမွေးတဝ်း လꩻလွဉ်လိုꩻထျꩻနဲ့နဝ်ꩻ ဒေါ့ꩻနယ်သွော့ခွေ” နုဲင်းနဝ်ꩻသွူ။
31ဝွေꩻသီးစတဲင် ထေင်ငဝ်းအာချာလို့ဝင်ꩻ၊ “နီအီႏရိုꩻဖေႏဗာႏ နုဲင်းမုဲင်ꩻဟောင်း။ နီမဉ်ႏလဝ်းဖြေႏချာ၊ ‘အဝ်ႏဗွေႏဘုရာꩻထျꩻလွဉ်’ နုဲင်းနဝ်ꩻနဝ်ꩻ ဝွေꩻအီႏရိုꩻဒျာႏ၊ ‘ပေါ့ꩻနုဲင်းနဝ်ꩻနဝ်ꩻ ပွိုးတမုဲင်ꩻ သီတယွုမ်းတဝ်းတွိုႏ ယောဟန် နုဲင်းမုဲင်ꩻဟောင်း။’ 32ကွဲႏတွော့ꩻ နီမဉ်ႏရိုꩻ၊ ‘အဝ်ႏလိုꩻထျꩻလွဉ် နုဲင်းနဝ်ꩻနဝ်၊’ ”(ဝွေꩻသီး အဝ်ႏငမ်းသꩻဗာႏ လိုꩻဖုံႏအတွက် နဝ်ꩻသွူ၊ ပွိုးတွော့ꩻ လိုꩻစွုမ်ႏဖြာꩻနဝ်ꩻ အဝ်ႏလက္ခံႏ ယောဟန်နဝ်ꩻ ထွာပရောဖဲစ်တပါꩻ အတွက်သွူ။) 33နဝ်ꩻမꩻ ဝွေꩻသီးလဝ်းချာ ဗွေႏယေသျု၊ “နီတသေတဝ်း” နုဲင်းနဝ်ꩻသွူ။
ဗွေႏယေသျု ဒေါ့ꩻဖေႏဝွေꩻသီး၊ “ပေါ့ꩻနုဲင်းနဝ်ꩻနဝ်ꩻ ခွေကအဝ်ႏမာꩻဒါႏ ထာꩻယိုဖုံႏနဝ်ꩻတဲ့ လꩻအခွင်ꩻ မုဲင်ꩻကိုနဝ်ꩻ ခွေအီႏတဒေါ့ꩻနယ်တဝ်းသီ” နုဲင်းနဝ်ꩻသွူ။
ទើបបានជ្រើសរើសហើយ៖
မာကု 11: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.