မတဲ 24
24
ဗွေႏယေသျုဒေါ့ꩻဗိမာန်ႏတောႏကျောင်ꩻအီႏပြင်ꩻလင်ꩻ
(မာကု ၁၃:၁–၂။ လုကာ ၂၁: ၅-၆)
1ဗွေႏယေသျု ထန်ႏလွေꩻတဲင် အဝ်ႏဗိမာန်ႏတောႏကျောင်ꩻ ကအဝ်ႏလွေꩻညာꩻချိန်ႏ ဝွေꩻဗွေႏ တပဲ့တောႏဖုံႏ လွဉ်ထေ့ ဝွေꩻဗွေႏထျꩻ၊ ဟဲ့ꩻဝွေꩻဗွေႏ ဖေႏကအွဉ်ႏသတိꩻ ကအဝ်ႏတယ်ႏခါꩻဒါႏ ဗိမာန်ႏတောႏကျောင်ꩻ နဝ်ꩻသွူ။ 2ဝွေꩻဗွေႏဒေါ့ꩻ၊ “မွေးလဲဉ်းသွူ၊ သီထွားဟဝ်ဟဝ်ခါꩻ ထာꩻယိုဖုံႏ ကားကအဝ်ႏဟုဲင်း။ ခွေဒေါ့ꩻဖေႏသီ နုဲင်းယို။ လုံးတူႏတန် ကအဝ်ႏယိုကိုနဝ်ꩻ တဖြုံႏငါ အီႏတအဝ်ႏကုဲင် သော့ꩻတဝ်း အခင်ႏလမ်းသွူ။ လုံးတူႏဖုံႏ စွုမ်ႏဖြုံႏနဝ်ꩻ အီႏထဲ့လင်ꩻထိုꩻဗာႏ” နုဲင်းနဝ်ꩻသွူ။
ထာꩻဒုက္ခစွဉ်ႏထာꩻနစ်စက်ဖုံႏ
(မာကု ၁၃:၃–၁၃။ လုကာ ၂၁:၇–၁၉)
3နုဲင်းဗွေႏယေသျု ကအဝ်ႏအုံလင်ꩻ ကောင်သံလွေင်လောင်းနဝ်ꩻ၊ တပဲ့တောႏဖုံႏ လွဉ်ထေ့တေ့ꩻ ဝွေꩻဗွေႏထျꩻသွူ။ ဝွေꩻသီးရီ၊ “ထာꩻယိုဖုံႏ ကားကအဝ်ႏ ကအီႏထွာလွဉ်ချိန်ႏ တွမ်ႏနုဲင်းနီဗွေႏ ကအီႏကျွꩻလွဉ်ချိန်ႏစွဉ်ႏ အဆုဲင်ꩻသွတ်ꩻ ချိန်ႏကာႏလ ကအီႏထွာလွဉ် နုဲင်းမုဲင်ꩻနဝ်ꩻ ဒေါ့ꩻနယ်ဖေႏဗဲင်း နီမွိုင်” နုဲင်းနဝ်ꩻသွူ။
4ဗွေႏယေသျု လဝ်းချာ၊ “အွဉ်ႏသတိတဲင် ဖေႏနေး ပါꩻတဖြာꩻဖြာꩻတဲ့ ကလဲဉ် လꩻထိုꩻမွိုန်းသီဟုဲင်း။ 5ကဒေါ့ꩻကေႏညာႏဖေႏ ခွေတာႏသား လိုꩻအာဖုံႏနဝ်ꩻ၊ အီႏလွဉ်တဲင် ရိုꩻဖေႏသီ၊ ‘ခွေနဝ်ꩻထွာ ခရစ်တောႏဒျာႏ၊’ နုဲင်းနဝ်ꩻတဲင် ဝွေꩻသီး အီႏမာꩻဗား လိုꩻအာဖုံႏနဝ်ꩻသွူ။ 6သီအီႏဟွိုန် စဲ့ꩻတွိုက်ꩻပွယ်ꩻသတင်ꩻ အုံသေင်ငဝ်း အဗော့ꩻစွဉ်ႏ အညာꩻဖုံႏသွူ။ ကွဲႏတွော့ꩻ သꩻတွမ်ႏကုဲင်မွိုန်း။ ထာꩻစားယိုဖုံႏနဝ်ꩻ အီႏထွာလွဉ် ဗာႏဒျာႏရင်ꩻ၊ ကွဲႏတွော့ꩻ ထွာအဆုဲင်ꩻသွတ်ꩻ ချိန်ႏကာႏလ တမွေးတဝ်းဒွိုန်းသွူ။ 7ခမ်းထီဟံႏနယ်ႏဖုံႏနဝ်ꩻ တနယ်ႏတွမ်ႏတနယ်ႏ အီႏတွိုက်ꩻလို့ဝင်ꩻတဲင် ခမ်းနဲင်ႏငံႏဖုံႏနဝ်ꩻ တခမ်းထီစွဉ်ႏ တခမ်းထီ အီႏတွိုက်ꩻလို့ဝင်ꩻသွူ။ နဝ်ꩻကို ထာꩻအံႏမအံႏအဝ် အီႏထွာလွဉ်တဲင် ဟံႏအီႏတသွိုး ခင်ႏလမ်ႏ စွုမ်ႏထွောင်းနဝ်ꩻသွူ။ 8ထာꩻယိုဖုံႏ ကားကအဝ်ႏ ကထွာလွဉ်နဝ်ꩻ ဗွိုန်နုဲင်း လိုꩻပေႏအီႏလွူးလွဉ် ဟို့ꩻခြေ့ဆာထာꩻ အရီးသွတ်ꩻ တလဲင်ႏနဝ်ꩻသွူ။
9 #
မ ၁၀:၂၂။ “နဝ်ꩻထွူ သီအီႏခံႏဗာႏ ဝင်ꩻဆွမ်ꩻတွော့ꩻ အီႏအပ်ထိုꩻ ကအီႏဖေႏဒါႏ အပဲစ်တံႏသား စူကိုတွော့ꩻ အီႏမာꩻသီထိုꩻနဝ်ꩻသွူ။ ကွပ်ပွိုး ခွေအတွက် လိုꩻစွုမ်ႏဖြာꩻ အီႏလွꩻထီႏ သီသွူ။ 10ထွိုင်ႏတွိုႏအချိန်ႏနဝ်ꩻ ဝွေꩻသီး ထာꩻယွုမ်းဖုံႏ အီႏကုဲင်ထိုꩻနဝ်ꩻ အာငါႏသွူ။ ဝွေꩻသီးနဝ်ꩻ တဖြာꩻတွမ်ႏတဖြာꩻ သစ္စာႏအီႏဖေါက် လို့ဝင်ꩻတဲင် တဖြာꩻတွမ်ႏတဖြာꩻ အီႏလွꩻထီႏလို့ ဝင်ꩻဖုံႏသွူ။ 11တွိုႏနဝ်ꩻ ပရောဖဲစ်လိန်ႏလဲဉ်ဖုံႏ ပေါႏလွဉ်အာငါႏတဲင် လဲဉ်ဗားထိုꩻ လိုꩻဖုံႏအာငါႏသွူ။ 12ထာꩻကုဲင်စားနဝ်ꩻ အီႏစွစ်ꩻလီတဲင် လိုꩻအာဖုံႏနဝ်ꩻ ထာꩻရက်မေတ္တာႏ အီႏဆေ့ꩻလွဉ်နဝ်ꩻသွူ။ 13#မ ၁၀:၂၂။ ကွဲႏတွော့ꩻ ပါꩻမုဲင်ꩻသစ္စာႏအဝ်ႏ ဗꩻတွိုႏအသွတ်ꩻသားနဝ်ꩻ အီႏလꩻထာꩻကယ်ႏတင်ႏသွူ။ 14နဝ်ꩻမꩻ ပွိုင်းဝွို့စွဉ်ႏ ခမ်းထီနဲင်ႏငံႏခရာႏ သတင်ꩻဟဝ်ယိုနဝ်ꩻ အီႏဟော်ꩻစွစ်ꩻစဲစ်ꩻ တဟံႏတန်လွုမ်း၊ ခံႏနယ်ဖေႏလိုꩻဖုံႏ ကားကအဝ်ႏ သက်သေႏ ထွူမꩻ အဆုဲင်ꩻသွတ်ꩻ ကာႏလနဝ်ꩻ အီႏတွိုႏလွဉ်နဝ်ꩻသွူ။
ဟဝ်ငမ်းသꩻပသို့ꩻခရာႏ
(မာကု ၁၃:၁၄–၂၃။ လုကာ ၂၁:၂၀–၂၄)
15 #
ဒံ ၉:၂၇၊ ၁၁:၃၁၊ ၁၂:၁၁။ “ပရောဖဲစ် ဒံယေလ ကဒေါ့ꩻလဲဉ်းဒါႏ၊ ‘ဟဝ်ငမ်းသꩻ ပသို့ꩻခရာႏ၊’နဝ်ꩻ သီအီႏထီႏဗာႏနဝ်ꩻသွူ။ ဟဝ်ငမ်းသꩻ ပသို့ꩻခရာႏနဝ်ꩻ အီႏအုံထွိုင်ႏသော့ꩻ ကြောင်းစင် ခင်ႏလမ်း” နုဲင်းနဝ်ꩻသွူ။ (ကဖတ်ဒါႏ လိတ်ကျမ်ꩻသားနဝ်ꩻ သေနာႏသွော့ ထာꩻယိုအဓိပ္ပါယ်ႏဟုဲင်း။) 16“တွိုႏနဝ်ꩻ လိုꩻကအဝ်ႏသော့ꩻဒါႏ ယုဒခမ်းကိုသားနဝ်ꩻ ဖင်းညာꩻလွေꩻထိုꩻသွော့ ကောင်ပူႏပေႏဖုံႏလောင်းဟုဲင်း။ 17#လု ၁၇:၃၁။ ပါꩻတဖြာꩻဖြာꩻ ကအဝ်ႏဒါႏ လမ်းသꩻလောင်းကီ ကအီႏလင်ꩻလꩻနဝ်ꩻ ထူႏကပဲင်ႏဒါႏ ထာꩻခြိုꩻတစွိုးစွိုး လမ်းကိုနဝ်ꩻ တွမ်ႏထူႏမွိုန်း အချိန်ႏဟုဲင်း။ 18ပါꩻတဖြာꩻဖြာꩻ ကအဝ်ႏသော့ꩻဒါႏ ခြံကိုနဝ်ꩻ ဆဲင်ꩻတန်တဖွူꩻငါတဲ့ တွမ်ႏသဲင်ꩻထူႏချာမွိုန်း။ 19အနီꩻနဝ်ꩻဖုံႏယံꩻတွင်ꩻ လိုꩻမူႏ ဟို့ꩻတန်သားဖုံႏတွမ်ႏ မွိုးဖုံႏ ပိုပေႏဆာႏသားဖုံႏတာႏ ဟဝ်ငမ်းသꩻငါႏ ခွိုင်းကားမုဲင်ꩻ။ 20ဖေႏသီကဖင်းညာꩻ ဗာႏမွိုန်း ထာꩻခွꩻလာ မဉ်ႏတမွေးတဝ်း ဥပုသ်မွူးနီꩻကိုနဝ်ꩻ ဆုတောင်ꩻ ထေ့သွော့ ဗွေႏဘုရာꩻထျꩻဟုဲင်း။ 21#ဒံ ၁၂:၁၊ ဗျာ ၇:၁၄။ ပွိုးထာꩻဒုက္ခ ကထွာအချိန်ႏနဝ်ꩻ တယ်ႏစွဉ်ႏ ဟံႏတန်အစ ဗꩻတွိုႏဟန်ႏနီꩻ ဟဝ်ငမ်းသꩻခရာႏ လွိုလဲဉ်းကနဝ်ꩻနဝ်ꩻ တအဝ်ႏဖိုတဝ်းနဝ်ꩻသွူ။ ထာꩻကဗွိုန် နုဲင်းနဝ်ꩻနဝ်ꩻ မုဲင်ꩻခါတဲ့ အီႏတထွာထဲင်း ဗာႏတဝ်းဒွုမ် တစိꩻစိꩻနဝ်ꩻသွူ။ 22ကွဲႏတွော့ꩻ ဗွေႏဘုရာꩻနဝ်ꩻ အဝ်ႏဖျင်ရဲဉ်ꩻ ဒွေါင်ႏသေꩻဒျာႏ မွူးနီꩻနဝ်ꩻဖုံႏသွူ။ ဝွေꩻဗွေႏ မဉ်ႏတဖျင်ရဲဉ်ꩻ ဒွေါင်ႏသေꩻတဝ်းနဝ်ꩻ ပါꩻမုဲင်ꩻတဖြာꩻတဲ့ သက် တအဝ်ႏမွန်ကုဲင် နွောင်ꩻတဝ်းသွူ။ ကွဲႏတွော့ꩻ ဝွေꩻဗွေႏ ကလွိုက်သေꩻခါꩻလဲဉ်း လိုꩻဖုံႏတာႏနဝ်ꩻ ဗွေႏဘုရာꩻ အီႏဖျင်ဒွေါင်ႏဖေႏဒျာႏ မွူးနီꩻဖုံႏသွူ။
23“နဝ်ꩻထွူ ပါꩻတဖြာꩻဖြာꩻ မဉ်ႏရိုꩻဖေႏသီ၊ ‘ထွားဟုဲင်း၊ ယိုနဝ်ꩻထွာ မေသျိယ၊’ မဉ်ႏမွေးတဝ်း ‘ဝွေꩻအဝ်ႏနဝ်ꩻကို၊’ နုဲင်းနဝ်ꩻနဝ်ꩻ တွမ်ႏယွုမ်းမွိုန်း။ 24ပွိုးမေသျိယ လဲဉ်ဖုံႏတွမ်ႏ ပရောဖဲစ်လဲဉ်ဖုံႏ အီႏပေါႏလွဉ်နဝ်ꩻသွူ။ ဝွေꩻသီးအီႏမာꩻနယ် နိမိတ်လက္ခဏာႏတွမ်ႏ ထာꩻအံႏဖြာႏခရာႏဖုံႏ တန်ငါႏတဲင် မဉ်ႏထွာနွောင်ꩻနဝ်ꩻ လဲင်ꩻအီႏလဲဉ်စွဉ်ႏ ဗွေႏဘုရာꩻ ကလွိုက်ခါꩻဒါႏ လိုꩻဖုံႏနဝ်ꩻသွူ။ 25ခွေဒေါ့ꩻနယ် ရီးလဲဉ်းသွူသီ အချိန်ႏယိုနဝ်ꩻ နာႏရောင်လွသွော့။
26 #
လု ၁၇:၂၃၊ ၂၄။ မဉ်ႏတမွေးတဝ်း၊ လိုꩻဖုံႏအီႏဒေါ့ꩻနယ်ဖေႏသီ၊ ‘ထွားဟုဲင်း၊ ဝွေꩻဗွေႏနဝ်ꩻ အဝ်ႏဒျာႏ ကန္တာရထာꩻခြာကို၊’ နုဲင်းနဝ်ꩻနဝ်ꩻ တွမ်ႏလွေꩻမွိုန်း နဝ်ꩻကိုဟုဲင်း၊ မဥ်ႏမွေးတဝ်း၊ ဝွေꩻသီးမဉ်ႏရိုꩻ၊ ‘ထွားဟုဲင်း၊ ဝွေꩻဗွေႏ အဝ်ႏဗဉ်ႏဗꩻတေ့ꩻဒျာႏ ယိုကို၊’ နုဲင်းနဝ်ꩻနဝ်ꩻ တွမ်ႏယွုမ်းမွိုန်း။ 27ဗွိုန်နုဲင်း တနံပြာႏ တျာႏလိက်ꩻ အဝ်ႏဆꩻကွဉ်ႏ ဗꩻလွေꩻ ဆꩻတွို့ꩻဖဲ့ꩻနဝ်ꩻ ဖျတ်ကာႏလွေꩻ မို့ꩻတဖြုံႏလွုမ်းအတွိုင်ꩻ လိုꩻပိုခို အီႏကျွꩻလွဉ်နဝ်ꩻသွူ။
28 #
လု ၁၇:၃၇။ “ထာꩻသီနမ်း အဝ်ႏခင်ႏလမ်း မုဲင်ꩻကိုတဲ့ လင်ႏတဖုံႏ အီႏစုဗူႏနဝ်ꩻသွူ။
လိုꩻပိုခိုအီႏကျွꩻလွဉ်
(မာကု ၁၃:၂၄–၂၇။ လုကာ ၂၁:၂၅–၂၈)
29 # ဟေသျာ ၁၃:၁၀၊ ယောလ ၂:၁၀၊၃၁၊ ၃:၁၅၊ ဗျာ ၆:၁၂၊ ဟေသျာ ၁၃:၁၀၊ ဧသ ၃၂:၇၊ ယောလ ၂:၁၀၊ ၃:၁၅၊ ဟေသျာ ၃၄:၄၊ ဗျာ ၆:၁၃။ “ထာꩻဒုက္ခမွူးနီꩻ နဝ်ꩻဖုံႏထွူ တညတဝ်း မွူးနဝ်ꩻ အရောင်ႏအီႏခေ့ꩻထိုꩻ၊ လာနဝ်ꩻ အရောင်ႏ အီႏတတောင်ႏတဝ်း၊ ဆာႏဖုံႏ အဝ်ႏခမ်းထီမို့ꩻလောင်း အီႏထဲ့လင်ꩻတဲင် တန်ꩻခိုꩻဖုံႏ ကအဝ်ႏသော့ꩻဒါႏ စကြာဝဠာႏကို ကအဝ်ႏလွေꩻသော့ꩻဒါႏ ဝွေꩻသီး အခင်ႏလမ်းဖုံႏနဝ်ꩻ အီႏခံႏဗာႏ ဝါးထိုꩻနဝ်ꩻသွူ။ 30#ဒံ ၇:၁၃၊ ဇာ ၁၂:၁၀–၁၄၊ ဗျာ ၁:၇။ နဝ်ꩻထွူ လိုꩻပိုခိုလက္ခဏာႏနဝ်ꩻ အီႏပေါႏလွဉ်သော့ꩻ မို့ꩻလောင်းတဲင် စွဉ်ႏတန်ꩻခိုꩻ ကတန်မျတ်ငါႏ ဘွုန်ꩻသရေႏတောႏအတွိုင်ꩻ လိုꩻပိုခို အဝ်ႏကျွꩻလွဉ် မို့ꩻအေႏလောင်း၊ ဟံႏတန်လောင်း လိုꩻဖုံႏကားကအဝ်ႏ ဝွေꩻသီး ထွိုင်ႏထီႏနဝ်ꩻ အီႏငွိုးထာꩻဖုံႏနဝ်ꩻသွူ။ 31နဲꩻခယာတန်ငဝ်း အီႏသင်ႏသန်မွေးထာꩻတဲင် ဝွေꩻဗွေႏ အီႏအွဉ်ႏစွꩻထန်ႏ ဝွေꩻဗွေႏ မို့ꩻလောင်းတမန်ႏ ဟံႏတန် လစ်ꩻဖဲ့ꩻလစ်ꩻနားတွော့ꩻ ကအဝ်ႏဟံႏတန် အသွတ်ꩻတဖဲ့ꩻ ဗꩻလွေꩻခတဖဲ့ꩻ ဝွေꩻဗွေႏကလွိုက် သေꩻခါꩻဒါႏ လိုꩻဖုံႏနဝ်ꩻ ဝွေꩻသီး အီႏစုဗူႏနဝ်ꩻသွူ။
သွဉ်ထူႏအီဖက်ꩻဒွိုႏဆမွူး
(မာကု ၁၃:၂၈–၃၁။ လုကာ ၂၁:၂၉–၃၃)
32“သီသွဉ်ထူႏသွော့ ဖက်ꩻဒွိုႏဆꩻမွူးထျꩻ သွဉ်တန်တစွိုးဟုဲင်း။ ဖက်ꩻဒွိုႏဆꩻပင်ဖုံႏ သွမ်ႏလွဉ်တဲင် တတဲက်ꩻလွဉ်တွော့ꩻ အလာႏဖုံႏ မဉ်ႏထန်ႏလွဉ်စချိန်ႏ ခမ်းသဲင်ခါ အီႏဗော့ꩻတွိုႏလွဉ်သွူနဝ်ꩻ သီအဝ်ႏသေသွူ။ 33ဗွိုန်နုဲင်းနဝ်ꩻနေနေ သီထွိုင်ႏထီႏ ထာꩻစားယိုဖုံႏ ကားကအဝ်ႏချိန်ႏ၊ အချိန်ႏဗော့ꩻလဲဉ်း၊ အဝ်ႏစလွဉ်လဲဉ်းနဝ်ꩻ သီအီႏသေဗာႏနဝ်ꩻသွူ။ 34လိုꩻဖုံႏ သက်ကအဝ်ႏမွန်ဒါႏ ယိုခါ ခလားကသီထိုꩻလို့နဝ်ꩻ ထာꩻစားယိုဖုံႏ ကားကအဝ်ႏ အီႏထွာလွဉ်နဝ်ꩻ ယူႏလꩻသွော့။ 35မို့ꩻတွမ်ႏ ဟံႏတန်နဝ်ꩻ အီႏကုဲင်ထိုꩻစွဉ်ႏတဲ့ ခွေငဝ်းဖုံႏနဝ်ꩻ မုဲင်ꩻခါတဲ့ အီႏတကုဲင်ထိုꩻတဝ်းသွူ။
အနီꩻစွဉ်ႏအချိန်ႏနားရီႏနဝ်ꩻပါꩻမုဲင်ꩻတဖြာꩻတဲ့တသေတဝ်း
(မာကု ၁၃:၃၂–၃၇။ လုကာ ၁၇:၂၆–၃၀၊ ၃၄–၃၆)
36ကအီႏလွဉ်ဒါႏ အနီꩻစွဉ်ႏ အချိန်ႏနားရီႏနဝ်ꩻ ပါꩻမုဲင်ꩻတဖြာꩻတဲ့ တသေတဝ်း၊ မို့ꩻလောင်းတမန်ႏဖုံႏ တဲ့နဝ်ꩻ ပိုခိုတောႏ တဲ့နဝ်ꩻ တသေတဝ်း၊ သေဒျာႏဖါတောႏ တပါꩻလွုမ်ꩻသွူ။ 37လိုꩻပိုခို ကအီႏကျွꩻလွဉ်နဝ်ꩻ ဗွိုန်နုဲင်း ကထွာလဲဉ်းဒါႏ နောဧစိုးနဝ်ꩻသွူ။ 38ခလားထီကလုမ်ႏ အနီꩻကိုနဝ်ꩻ လိုꩻဖုံႏ အဝ်ႏအံႏအွꩻဒျာႏတဲင်၊ လိုꩻခိုဖုံႏတွမ်ႏ လိုꩻမူႏဖုံႏနဝ်ꩻ အဝ်ႏတောႏလမ်း မင်္ဂလာႏဒျာႏ၊ ဗꩻတွိုႏစွဉ်ႏ နောဧသီး ကနွို့လွေꩻသော့ꩻ သင်္ဘောꩻကိုနဝ်ꩻသွူ။ 39#ကမ္ဘာႏ ၇:၆–၂၄။ လဲင်ꩻဗတွိုႏနေးစွဉ်ႏ ထီလုမ်ႏလွဉ်တဲင် အီခြွဉ်ႏထိုꩻလို့ ဝွေꩻသီး ကားကအဝ်ႏနဝ်ꩻ ဝွေꩻသီး တသေနမ်းတဝ်း နဝ်ꩻသွူ။ လိုꩻပိုခို ကအီႏကျွꩻလွဉ်ချိန်ႏနဝ်ꩻ အီႏထွာဗွိုန် နုဲင်းနဝ်ꩻသွူ။ 40အချိန်ႏနဝ်ꩻ လိုꩻခိုဝင်ꩻနီ အဝ်ႏမာꩻသော့ꩻထာꩻမာꩻ ခြံတဟိုႏကိုနဝ်ꩻ အီႏထူႏဟဲ့ꩻ လွေꩻညာꩻထိုꩻ တဖြာꩻတဲင် တဖြာꩻနဝ်ꩻ အီႏအဝ်ႏကုဲင်ချာနဝ်ꩻသွူ။ 41လိုꩻမူႏဝင်ꩻနီ အဝ်ႏခြွုတ်ဗွူနဝ်ꩻ အီႏထူႏဟဲ့ꩻလွေꩻညာꩻထိုꩻ တဖြာꩻတဲင် အလင်တဖြာꩻနဝ်ꩻ အီႏအဝ်ႏကုဲင်ချာနဝ်ꩻသွူ။ 42နဝ်ꩻမꩻ ကွပ်ပွိုး သီဗွေႏထာဝရဘုရာꩻ အီႏကျွꩻလွဉ်ဒါႏ အနီꩻနဝ်ꩻ သီတသေတဝ်းအတွက် အုံပွေါးထွားဆွုမ်ႏသွော့။ 43#လု ၁၂:၃၉၊၄၀။ လမ်းဗွေႏသား တဖြာꩻ မဉ်ႏအဝ်ႏသေ တခွန်ꩻ အီႏလွဉ်ချိန်ႏနဝ်ꩻ ဝွေꩻအီႏအွဉ်ႏ သတိနွောင်ꩻတဲင် တခွန်ꩻ ဖေႏကဖေါက်လꩻထိုꩻမွိုန်း ဝွေꩻလမ်းနဝ်ꩻ ဝွေꩻအီႏ တဗေင်ႏတဝ်း ထာꩻနဝ်ꩻသွူ။ 44ပွိုးနုဲင်းနဝ်ꩻမꩻ သီတဲ့ ဖျင်ရဲဉ်ꩻသေꩻမꩻ သေႏသေႏသွော့၊ ပွိုးတွော့ꩻ သီတအဝ်ႏမောင်ꩻတဝ်း အချိန်ႏနဝ်ꩻ လိုꩻပိုခို အီႏကျွꩻလွဉ်နဝ်ꩻသွူ။
သွဉ်းသစ္စာႏအဝ်ႏစွဉ်ႏသစ္စာႏအဲဉ်ထဝ်း
(လုကာ ၁၂:၄၁–၄၈)
45“နဝ်ꩻထွူ သစ္စာႏအဝ်ႏတွော့ꩻ ဉာဏ်ႏကအဝ်ႏသွဉ်းနဝ်ꩻ ထွာအဖြာꩻမုဲင်ꩻဟောင်း။ နဝ်ꩻနဝ်ꩻထွာဒျာႏ သွဉ်းအဖြာꩻ ဝွေꩻဗွေႏ ကအွဉ်ႏထိန်ꩻထွားဒါႏ သွဉ်းအလင်ဖုံႏတွော့ꩻ အချိန်ႏမဉ်ႏတွိုႏ ကဖေႏဒါႏ ဝွေꩻသီး ထာꩻအံႏနဝ်ꩻသွူ။ 46သွဉ်းနဝ်ꩻ အဗွေႏထွိုင်ႏသဲင်ꩻလွဉ် လမ်းချိန်ႏ ထွိုင်ႏထီႏ ဝွေꩻအသွဉ်း အဝ်ႏမာꩻထာꩻ နုဲင်းယိုနဝ်ꩻ မင်္ဂလာႏအဝ်ႏငါႏ ခွိုင်းကားမုဲင်ꩻ။ 47ခွေဒေါ့ꩻဖေႏသီ အမွေးအမဲဉ်ႏ၊ သွဉ်းနဝ်ꩻနဝ်ꩻ အဗွေႏ အီႏအွဉ်ႏထိန်ꩻထွားလို့ ဝွေꩻဥစ္စာႏပစ္စေꩻ ကားကအဝ်ႏနဝ်ꩻသွူ။ 48ကွဲႏတွော့ꩻ ဝွေꩻမဉ်ႏထွာဒျာႏ သွဉ်းကုဲင်တဖြာꩻနဝ်ꩻ ဝွေꩻအီႏရိုꩻချာအနမ်း၊ ဝွေꩻအဗွေႏနဝ်ꩻ အီႏတသဲင်ꩻလွဉ်မွိုင် ချာတဝ်းဒွိုန်း၊ အီႏညနေကဒွိုန်း နုဲင်းနဝ်ꩻတွော့ꩻ 49ဝွေꩻအီႏတွဲႏစစွဉ်ႏ ဝွေꩻသွꩻသွဉ်းချင်ꩻ အလင်ဖုံႏတဲင် အီႏအံႏ၊ အွꩻတွော့ꩻ မွန်ꩻဒျာႏ ဒဝ်ဖုံႏနဝ်ꩻသွူ။ 50နဝ်ꩻထွူ ဝွေꩻတအဝ်ႏမောင်ꩻတဝ်း အနီꩻတွော့ꩻ၊ ဝွေꩻတသေတဝ်း အချိန်ႏနဝ်ꩻ သွဉ်းအဗွေႏ အီႏသဲင်ꩻလွဉ်နဝ်ꩻသွူ။ 51တွိုႏနဝ်ꩻ ဝွေꩻအဗွေႏ အီႏဓွေါ့ꩻဝွေꩻ ပဉ်ကွို့ꩻကွို့ꩻတွော့ꩻ အီႏအွဉ်ႏဝွေꩻခံႏစာꩻငီꩻ သူႏတောႏလဲဉ် ကံႏကျမ္မာႏနဝ်ꩻသွူ။ နဝ်ꩻကို ဝွေꩻအီႏငွိုးဗာႏထာꩻတဲင် စုဲင်ဗာႏ အတငါနဝ်ꩻသွူ။
ទើបបានជ្រើសរើសហើយ៖
မတဲ 24: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
