မတဲ 25
25
မူႏနမ်ꩻယွဲအဖြာꩻတဆီပွုံႏဥပမာႏ
1 #
လု ၁၂:၃၅။ “အချိန်ႏနဝ်ꩻနဝ်ꩻ ခမ်းထီမို့ꩻလောင်း အီႏဗွိုန်နုဲင်းယိုသွူ။ တလဲင်ႏသား နဝ်ꩻကို မူႏနမ်ꩻယွဲ အဖြာꩻတဆီနဝ်ꩻ ထူႏဝွေꩻသီး မေႏတေန်ꩻဖုံႏတွော့ꩻ ထန်ႏလွေꩻ အီႏမော့ꩻခွဲစွဉ်ႏ ခွန်မောင်ႏနဝ်ꩻသွူ။ 2ဝွေꩻသီးကို ဝင်ꩻငတ်ꩻနဝ်ꩻ ဉာဏ်ႏအဲဉ်ထဝ်းတဲင် အလင်ဝင်ꩻငတ်ꩻနဝ်ꩻ ဉာဏ်ႏအဝ်ႏဖုံႏသွူ။ 3ဉာဏ်ႏတအဲဉ်ထဝ်း သားဖုံႏနဝ်ꩻ ထူႏဒျာႏဝွေꩻသီး မေႏတေန်ꩻဖုံႏလွုမ်ꩻတဲင် တထူႏလွဉ်လွိုတဝ်း နမ်းမန်ꩻ တစိꩻစိꩻသွူ။ 4အကျာꩻနဝ်ꩻ ဉာဏ်ႏအဝ်ႏသားဖုံႏနဝ်ꩻ ထူႏနမ်းမန်ꩻ သော့ꩻဗွေစွဉ်ႏ ဝွေꩻသီး မေႏတေန်ꩻဖုံႏကိုနဝ်ꩻသွူ။ 5ခွန်မောင်ႏ နန်ꩻလွဉ်ငါႏနဝ်ꩻမꩻ ဝွေꩻသီး မဲ့ခေင်တဲင် ဗေင်ႏအွီႏ ထိုꩻလို့စွဉ်ႏထာꩻနဝ်ꩻသွူ။
6မွူးထွိုင်ႏအီႏကွို့ꩻနာꩻနဝ်ꩻ လိုꩻခြောဝ်ထန်ႏအငဝ်း၊ ‘ယိုဟာခွန်မောင်ႏ၊ လွဉ်တဲင် မော့ꩻခွဲခန်းဝွေꩻဟုဲင်း၊’ နုဲင်းနဝ်ꩻချိန်ႏ၊ 7မူႏနမ်ꩻယွဲ အဖြာꩻတဆီနဝ်ꩻ ထွိုင်ႏတဲင် ဖျင်ဟဝ်စွဉ်ႏ ဝွေꩻသီး မေႏတေန်ꩻဖုံႏသွူ။ 8တွိုႏနဝ်ꩻ ဉာဏ်ႏဆေ့ꩻ သားဖုံႏနဝ်ꩻ ဒေါ့ꩻဖေႏ ဉာဏ်ႏအဝ်ႏသားဖုံႏ၊ ‘သီနမ်းမန်ꩻနဝ်ꩻ ဖေႏဗဲင်းနီ ယင်ဟန်ႏမွိုင်၊ ပွိုးတွော့ꩻ နီမေႏတေန်ꩻဖုံႏ အီႏဖေ့ထိုꩻသွူ’ နုဲင်းနဝ်ꩻသွူ။ 9ဉာဏ်ႏအဝ်ႏသားနဝ်ꩻ လဝ်းချာ၊ ‘တလꩻတဝ်း၊ နမ်းမန်ꩻနဝ်ꩻ သီတာႏစွဉ်ႏနီတာႏ တလုမ်းတဝ်းသွူ။ လွေꩻဆဲင်ႏသူꩻတွော့ꩻ ဖြေꩻချာသွော့ သီနမ်းတာႏဟုဲင်း’ နုဲင်းနဝ်ꩻသွူ။ 10နဝ်ꩻမꩻ ပါꩻမူႏ ဉာဏ်ႏအဲဉ်ထဝ်း သားဖုံႏနဝ်ꩻ ထန်ႏလွေꩻ အီႏဖြေꩻနမ်းမန်ꩻ ယင်ဟန်ႏသွူ။ နဝ်ꩻမꩻ ဝွေꩻသီးအဝ်ႏထန်ႏ လွေꩻကျာꩻနဝ်ꩻ ခွန်မောင်ႏ ဖျော်လွဉ်စွဉ်ႏ နဝ်ꩻသွူ။ ကအဝ်ႏဖျင်ရဲဉ်ꩻသေꩻမꩻ ထွူသားဖုံႏ ဝင်ꩻငတ်ꩻနဝ်ꩻ နွို့ငီꩻလွေꩻ ခွန်မောင်ႏ မင်္ဂလာႏပွယ်ꩻကိုတွော့ꩻ အွဉ်ႏထွိုင်ꩻခါꩻစွဉ်ႏ တခါꩻနဝ်ꩻသွူ။
11 #
လု ၁၃:၂၅။ “ဆုဲင်ꩻလိုꩻမူႏအလင်ဖုံႏ ဖျော်လွဉ်တွော့ꩻ ဝွေꩻသီး အဝ်ႏကောင်းထန်ႏဖဲ့ꩻ ခြောဝ်၊ ‘ဗွေႏ၊ ဗွေႏ၊ ဖေႏနွို့သော့ꩻနီဟုဲင်း’ နုဲင်းနဝ်ꩻသွူ။ 12ခွန်မောင်ႏလဝ်းချာ၊ ‘တဗွောင်ဖေႏတဝ်း၊ သီနဝ်ꩻ ခွေတသေငါꩻတဝ်း၊’ နုဲင်းနဝ်ꩻသွူ။
13တဲင်ဗွေႏယေသျု အွဉ်ႏသွတ်ꩻအီအငဝ်း၊ “အနီꩻစွဉ်ႏ အချိန်ႏနားရီႏနဝ်ꩻ ကွပ်ပွိုး သီတသေတဝ်း နဝ်ꩻမꩻ အုံပွေါးလွသွော့” နုဲင်းနဝ်ꩻသွူ။
သွဉ်းဝင်ꩻသွံဥပမာႏ
(လုကာ ၁၉:၁၁–၂၇)
14 #
လု ၁၉:၁၁–၂၇။ “အချိန်ႏနဝ်ꩻ ခမ်းထီမို့ꩻလောင်းနဝ်ꩻ အီႏဗွိုန်နုဲင်းယိုသွူ။ တလဲင်ႏသား ပါꩻခိုတဖြာꩻ အဝ်ႏအလမ်း အီႏထန်ႏလွေꩻ တဖူꩻညာꩻသွူ။ ဝွေꩻဟဲ့ꩻ ဝွေꩻသွဉ်းဖုံႏတဲင် အွဉ်ႏဝွေꩻသီး ထိန်ꩻထွားဖေႏ ဝွေꩻဥစ္စာႏပစ္စေꩻဖုံႏနဝ်ꩻသွူ။ 15နုဲင်းဝွေꩻအစွန်ꩻထာꩻဒါႏ ကအဝ်ႏ အတွိုင်ꩻနဝ်ꩻ ဝွေꩻဖေႏသေꩻခါꩻ တဖြာꩻစီႏသွူ။ တဖြာꩻနဝ်ꩻ ဝွေꩻဖေႏခံꩻဒင်္ဂါꩻ ၅၀ဝဝဗီႏ၊ အလင်တဖြာꩻနဝ်ꩻ ဝွေꩻဖေႏ၂၀ဝဝသွူ။ တဲင်အလင် တဖြာꩻနဝ်ꩻ ဝွေꩻဖေႏ ၁၀၀၀နဝ်ꩻသွူ။ နဝ်ꩻထွူ ဝွေꩻထန်ႏလွေꩻစွဉ်ႏ ဝွေꩻတဖူꩻနဝ်ꩻသွူ။ 16သွဉ်းကလꩻလဲဉ်းဒါႏ ဒင်္ဂါꩻ၅၀ဝဝနဝ်ꩻ တလဲင်ႏချင်ႏ ဝွေꩻထန်ႏလွေꩻတဲင် ဝွေꩻရွဉ်နဝ်ꩻ မာꩻအနီꩻအရင်ꩻတွော့ꩻ လꩻလွဉ်ထဲင်းယင်းစွဉ်ႏ ၅၀ဝဝနဝ်ꩻသွူ။ 17ဗွိုန်နုဲင်းနဝ်ꩻနေနေ သွဉ်းကလꩻဒါႏ ဒင်္ဂါꩻ ၂၀ဝဝသား နဝ်ꩻတဲ့ လꩻလွဉ်ထဲင်းယင်း ၂၀ဝဝနဝ်ꩻသွူ။ 18ကွဲႏတွော့ꩻ သွဉ်းကလꩻဒါႏ ဒင်္ဂါꩻ၁၀၀၀သားနဝ်ꩻ ထန်ႏလွေꩻခူႏဟံႏ တအိုတွော့ꩻ အွဉ်ႏပလို့ꩻခါꩻစွဉ်ႏ ဝွေꩻဗွေႏ ရွဉ်နဝ်ꩻသွူ။
19“အချိန်ႏထွိုင်ႏညလွဉ် သွဉ်းနဝ်ꩻဖုံႏနဝ်ꩻ အဗွေႏ သဲင်ꩻလွဉ်ချာတဲင် ထူႏရွဉ်စရင်ꩻ ဝွေꩻသီးထျꩻ နဝ်ꩻသွူ။ 20သွဉ်းကလꩻဒါႏ ဒင်္ဂါꩻ၅၀ဝဝသားနဝ်ꩻ နွို့လွဉ်တဲင် အပ်ဖေႏထဲင်းယင်း အလင်၅၀ဝဝနဝ်ꩻသွူ။ ဝွေꩻဒေါ့ꩻ၊ ‘ဗွေႏ၊ နီဗွေႏ ကဖေႏခွေသွဉ်းနဝ်ꩻ ၅၀ဝဝသွူ။ ‘ထွားဟုဲင်း၊ ယိုနဝ်ꩻ ခွေလꩻထဲင်းယင်း အလင်၅၀ဝဝ’ နုဲင်းနဝ်ꩻသွူ။ 21ဝွေꩻအဗွေႏဒေါ့ꩻဖေႏ၊ ‘မွေးလဲဉ်းသွူ။ နာꩻနဝ်ꩻ ဟဝ်ငါႏတဲင် သွဉ်းသစ္စာႏအဝ်ႏ။ ‘ထာꩻအပေႏ အဆေ့ꩻဖုံႏနဝ်ꩻ နာꩻအဝ်ႏတွမ်ႏ သစ္စာႏတဲင် ထိန်ꩻထွားသွူ၊ နဝ်ꩻမꩻ ထာꩻမာꩻတန်ကိုနဝ်ꩻ ခွေအီႏအွဥ်ႏနာꩻ ထိန်ꩻထွား။ လွဉ်သော့ꩻ ကောင်းကိုတွော့ꩻ ပျောႏငီꩻ တွမ်ႏခွေဟုဲင်း’ နုဲင်းနဝ်ꩻသွူ။
22နဝ်ꩻထွူ သွဉ်း ကဖေႏသေꩻခါꩻလဲဉ်းဒါႏ ဒင်္ဂါꩻ၂၀ဝဝသားနဝ်ꩻ နွို့လွဉ်တဲင်ဒေါ့ꩻ၊ ‘နီဗွေႏကဖေႏ ခွေသွဉ်းနဝ်ꩻ ဒင်္ဂါꩻ၂၀ဝဝသွူ၊ ဗွေႏ၊ ထွားဟုဲင်း၊ ယိုနဝ်ꩻ ခွေလꩻထဲင်းယင်း အလင်၂၀ဝဝ’ နုဲင်းနဝ်ꩻသွူ။ 23‘ဝွေꩻအဗွေႏဒေါ့ꩻဖေႏ၊ ‘မွေးလဲဉ်းသွူ။ နာꩻနဝ်ꩻဟဝ်တဲင် သွဉ်းသစ္စာႏအဝ်ႏသွူ။ ထာꩻအပေႏအဆေ့ꩻကိုနဝ်ꩻ နာꩻအဝ်ႏလဲဉ်း စွဉ်ႏသစ္စာႏသွူ။ နဝ်ꩻမꩻ ထာꩻမာꩻတန်ကိုနဝ်ꩻ ခွေအီႏအွဉ်ႏနာꩻထိန်ꩻထွားသွူ။ နွို့လွဉ်တဲင် ပျောႏငီꩻ တွမ်ႏခွေဟုဲင်း’ နုဲင်းနဝ်ꩻသွူ။
24နဝ်ꩻထွူ သွဉ်းကလꩻဒါႏ ဒင်္ဂါꩻ၁၀၀၀သားနဝ်ꩻ နွို့လွဉ်သော့ꩻတဲင်ဒေါ့ꩻ၊ ‘ဗွေႏ၊ ခွေသွဉ်းအဝ်ႏသေ နီဗွေႏနဝ်ꩻထွာ လိုꩻယပ်ꩻတဖြာꩻသွူ။ နီဗွေႏ တဆို့ꩻတဝ်း ခင်ႏလမ်းကိုနဝ်ꩻ နီဗွေႏရဲ့ဒျာႏတဲင် နီဗွေႏ တရုဲင်သော့ꩻတဝ်း ခင်ႏလမ်းကိုနဝ်ꩻ နီဗွေႏစုသိမ်ꩻဒျာႏ အရောင်ꩻအရာႏ နဝ်ꩻသွူ။ 25ခွေအဝ်ႏငမ်းသꩻ နဝ်ꩻမꩻ ခွေလွေꩻတဲင် နီဗွေႏရွဉ်နဝ်ꩻ အွဉ်ႏပလို့ꩻခါꩻဒျာႏ ဟံႏကိုသွူ။ ထွားဟုဲင်း၊ ယိုနဝ်ꩻထွာဒျာႏ နီဗွေႏထာꩻခြိုꩻ’ နုဲင်းနဝ်ꩻသွူ။
26ဝွေꩻအဗွေႏဒေါ့ꩻဖေႏ၊ ‘နာꩻနဝ်ꩻလိုꩻညံးတဲင် ထွာသွဉ်းလွꩻ၊ နာꩻအဝ်ႏသေ ခွေတဆို့ꩻတဝ်း ခင်ႏလမ်းနဝ်ꩻ ခွေရဲ့သိမ်ꩻဒါႏတဲင် ခွေတရုဲင်တဝ်း အခြွီခင်ႏလမ်းနဝ်ꩻ စုဗူႏဒါႏ အရာႏအကဝ်ႏနဝ်ꩻ နာꩻတသေတဝ်းဟောင်း။ 27မွေးသွူ၊ ခွေရွဉ်နဝ်ꩻ နာꩻဟဝ်သော့ꩻဒျာႏ ရွဉ်တွိုက်ကိုတဲင် ခွေမဉ်ႏသဲင်ꩻလွဉ်ချာ ချိန်ႏနဝ်ꩻ ခွေအီႏလꩻချာ ရွဉ် ကားကအဝ်ႏစွဉ်ႏ ရွဉ်အေႏသွူ။ 28ယိုခါ၊ ထူႏထိုꩻရွဉ် ဝွေꩻထျꩻတွော့ꩻ ရွဉ်နဝ်ꩻ ဖေႏထိုꩻခန်း ပါꩻအဖြာꩻ ကလꩻလဲဉ်းဒါႏ ဒင်္ဂါꩻ ၁၀ဝဝဝသားနဝ်ꩻဟုဲင်း။ 29#မ ၁၃:၁၂၊ မာ ၄:၂၅၊ လု ၈:၁၈။ ပွိုးလိုꩻစွုမ်ႏဖြာꩻ ကအဝ်ႏလဲဉ်းဒါႏ သားဖုံႏနဝ်ꩻ အီႏဖေႏလွို ထဲင်းယင်းတဲင် ဝွေꩻအီႏအဝ်ႏတွမ်ႏ အလွန်းအလွိုနဝ်ꩻသွူ။ ကွဲႏတွော့ꩻ လိုꩻတအဲဉ်ထဝ်းသားနဝ်ꩻ ဝွေꩻထျꩻ ကအဝ်ႏဒါႏ တစိꩻနဝ်ꩻ အီႏထူႏညာꩻ ထိုꩻထဲင်းနဝ်ꩻသွူ။ 30#မ ၈:၁၂၊ ၂၂:၁၃၊ လု ၁၃:၂၈။ နုဲင်းအသွုံꩻတကျတဝ်း သွဉ်းယို တွက်တာႏ အီႏနုဲင်ႏထန်ႏထိုꩻဝွေꩻ ထာꩻခေ့ꩻကရစ်ꩻကိုသွူ။ နဝ်ꩻကို ဝွေꩻအီႏငွိုးဗာႏထာꩻတဲင် စုဲင်ချာဗာႏ အတငါနဝ်ꩻသွူ။
ထာꩻစီႏရင်ႏချက်အဆုဲင်ꩻသွတ်ꩻ
31 #
မ ၁၆:၂၇၊
မ ၁၉:၂၈။ “လိုꩻပိုခိုနဝ်ꩻ တွမ်ႏဝွေꩻဗွေႏ မို့ꩻလောင်းတမန်ႏဖုံႏ အီႏကျွꩻလွဉ်နုဲင်း ခွန်တန်တဲင် ဝွေꩻဗွေႏ အီႏအုံလင်ꩻလူး ဝွေꩻဗွေႏခွန်တန် ပလ္လင်ႏ လောင်းသွူ။ 32နဝ်ꩻမꩻ လိုꩻအမျိုꩻမျိုꩻဖုံႏ ကားကအဝ်ႏနဝ်ꩻ အီႏစုဗူႏဗာႏ ဝွေꩻဗွေႏဆꩻငါနဝ်ꩻသွူ။ နဝ်ꩻထွူ ဝွေꩻဗွေႏ အီႏဖခေါ်ထိုꩻ ဝွေꩻသီးနီစွိုꩻ ဗွိုန်နုဲင်း သွိုꩻတီသားတဖြာꩻ အဝ်ႏဗဲဖုံႏကို ကဖခေါ်ထိုꩻ သွိုꩻနဝ်ꩻသွူ။ 33လိုꩻစွို့ꩻစွဉ်ႏဖုံႏနဝ်ꩻ ဝွေꩻဗွေႏအီႏ အွဉ်ႏဝွေꩻဗွေႏ စူထွေဖဲ့ꩻတွော့ꩻ အလင်ဖုံႏနဝ်ꩻ အီႏအွဉ်ႏ ဝွေꩻဗွေႏ စူစေႏဖဲ့ꩻနဝ်ꩻသွူ။ 34နဝ်ꩻထွူ လိုꩻကအဝ်ႏ ဝွေꩻဗွေႏ စူထွေဖဲ့ꩻသားနဝ်ꩻ ခွန်တန် အီႏမိန်းဖေႏ၊ ‘ စွဉ်ႏခွေဖါတောႏတွော့ꩻ ကလꩻဒါႏ မင်္ဂလာႏသားဖုံႏ၊ တယ်ႏစွဉ်ႏ ကဖန်ဆင်ꩻ မာꩻထွာလွဉ် ဟံႏတန်ခါကာႏ သီတာႏ ကအဝ်ႏဖျင်ရဲဉ်ꩻ သေꩻမꩻဒါႏ ခမ်းထီနဝ်ꩻ သီလွဉ်တဲင် ပဲင်ႏသွော့၊၊ 35ခွေအဝ်ႏဟို့ꩻခိုး ထာꩻအံႏနဝ်ꩻ သီဖေႏအံႏခွေ၊ ဟို့ꩻခိုးထီနဝ်ꩻ သီဖေႏအွꩻခွေထီသွူ။ ခွေအဝ်ႏထွာထဉ်ႏနဝ်ꩻ သီလက်ခံႏဆွုမ်ႏခွေ သီလမ်းကို။ 36ခွေအဝ်ႏလီꩻ အဝ်ႏကြွဉ်ချိန်ႏနဝ်ꩻ သီဖေႏခွေ ခွမ်ꩻလာꩻသွူ။ ခွေအဝ်ႏဆော့ဆာ ချိန်ႏနဝ်ꩻ သီထွားဟဝ်ခွေ၊ ခွေအဝ်ႏသော့ꩻ ထောင်ႏကိုနဝ်ꩻ သီလွဉ်လယ်ႏထွားခွေ၊’ နုဲင်းနဝ်ꩻသွူ။
37နဝ်ꩻထွူ လိုꩻစွို့ꩻစွဉ်ႏဖုံႏ အီႏလဝ်းချာ ဝွေꩻဗွေႏ၊ ‘ဗွေႏ၊ နီထီႏနီဗွေႏ ဟို့ꩻခိုးထာꩻချိန်ႏနဝ်ꩻ နီဖေႏအံႏဗာႏဖို နီဗွေႏ မုဲင်ꩻခါဟောင်း၊ မဉ်ႏမွေးတဝ်း၊ နီဗွေႏ ဟို့ꩻခိုးထီချိန်ႏနဝ်ꩻ နီဖေႏအွꩻဗာႏဖို နီဗွေႏ မုဲင်ꩻခါဟောင်း။ 38နီဗွေႏထွာ ထဉ်ႏတဖြာꩻချိန်ႏနဝ်ꩻ နီထီႏတွော့ꩻ နီကျိုႏဆွုမ်ႏဗာႏဖို နီဗွေႏ မုဲင်ꩻခါဟောင်း၊ မဉ်ႏတမွေးတဝ်း အဝ်ႏလီꩻ အဝ်ႏကြွဉ်ချိန်ႏတဲ့ နီဖေႏကွဉ်ကဗာႏဖို နီဗွေႏခွမ်ꩻလာꩻ မုဲင်ꩻခါဟောင်း။ 39နီဗွေႏ ဆော့ဆာထာꩻချိန်ႏ မဉ်ႏမွေးတဝ်း အဝ်ႏခံသော့ꩻ ထောင်ႏကိုချိန်ႏ နီထီႏတွော့ꩻ နီလွဉ်လယ်ႏ ဗာႏဖိုနီဗွေႏထျꩻ မုဲင်ꩻခါဟောင်း’ နုဲင်းနဝ်ꩻသွူ။ 40ခွန်တန် အီႏလဝ်းချာ၊ ‘ခွေဒေါ့ꩻဖေႏသီ၊ လိုꩻကအဝ်ႏလွေꩻလွဉ်ꩻဒါႏ ခွေဆꩻချာသားဖုံႏယို အကေန်ꩻခြောသွတ်ꩻသား တဖြာꩻတာႏ အချိန်ႏမုဲင်ꩻတယဝ်း သီကမာꩻဖေႏလဲဉ်းဖုံႏနဝ်ꩻ သီမာꩻဖေႏလဲဉ်း ခွေတာႏ’ နုဲင်းနဝ်ꩻသွူ။
41“နဝ်ꩻထွူ ဝွေꩻဗွေႏ အီႏရိုꩻဖေႏ လိုꩻဖုံႏကအဝ်ႏ ဝွေꩻဗွေႏစူစေႏဖဲ့ꩻ၊ ‘သီလိုꩻကခံႏဗာႏ ဗွေႏဘုရာꩻ စိန်ႏတရေႏသားဖုံႏ၊ အဝ်ႏခွေထျꩻ လွေꩻညာꩻထိုꩻခန်းဟုဲင်း။ လွေꩻညာꩻထိုꩻခန်း မာရ်ႏနတ်တွမ်ႏ ဝွေꩻမို့ꩻလောင်းတမန်ႏဖုံႏတာႏ ကဖျင်ရဲဉ်ꩻ သေမꩻလဲဉ်းဒါႏ ထာဝရ မေႏငါးရုဲင်ꩻကိုဟုဲင်း။ 42ခွေအဝ်ႏဟို့ꩻခိုး ထာꩻအံႏစွဉ်ႏတဲ့ သီတဖေႏအံႏတဝ်းခွေ၊ ခွေဟို့ꩻခိုးထီစွဉ်ႏတဲ့ သီတဖေႏအွꩻတဝ်းခွေ ထီသွူ။ 43ခွေအဝ်ႏထွာ ထဉ်ႏချိန်ႏနဝ်ꩻ သီတကျိုႏဆွုမ်ႏသော့ꩻတဝ်းခွေ သီလမ်းကို၊ အဝ်ႏလီꩻ အဝ်ႏကြွဉ် စွဉ်ႏတဲ့ သီတဖေႏတဝ်း ခွေခွမ်ꩻလာꩻသွူ။ ခွေအဝ်ႏဆော့ဆာတဲင် အဝ်ႏခံသော့ꩻ ထောင်ႏကိုစွဉ်ႏတဲ့ သီတထွားတဝ်းခွေ၊’ နုဲင်းနဝ်ꩻသွူ။
44တွိုႏနဝ်ꩻ ဝွေꩻသီး အီႏလဝ်းချာ ဝွေꩻဗွေႏ၊ ‘ဗွေႏ၊ နီထီႏဗာႏဖို နီဗွေႏဟို့ꩻခိုး ထာꩻအံႏတဲ့နဝ်ꩻ၊ ဟို့ꩻခိုးထီတဲ့နဝ်ꩻ၊ အဝ်ႏထွာထဉ်ႏ တဖြာꩻတဲ့နဝ်ꩻ၊ အဝ်ႏလီꩻ အဝ်ႏကြွဉ် တဲ့နဝ်ꩻ၊ အဝ်ႏဆော့ဆာထာꩻ တဲ့နဝ်ꩻ၊ အဝ်ႏခံသော့ꩻ ထောင်ႏကိုတဲ့နဝ်ꩻ၊ စွဲကိုဗာႏတဝ်း နီဗွေႏ မုဲင်ꩻခါဟောင်း၊’ နုဲင်းနဝ်ꩻသွူ။ 45ခွန်တန် အီႏလဝ်းချာ၊ ‘ခွေဒေါ့ꩻဖေႏသီ၊ သီတစွဲကိုတဝ်း လိုꩻကေန်ꩻခြောသွတ်ꩻ တဖြာꩻချိန်ႏနဝ်ꩻ သီတစွဲကိုတဝ်းခွေ၊’ နုဲင်းနဝ်ꩻသွူ။ 46#ဒံ ၁၂:၂။ နဝ်ꩻထွူ ဝွေꩻသီးယိုဖုံႏနဝ်ꩻ အီႏပသာသော့ꩻ ထာဝရအပဲစ်တံႏ ထာꩻစီႏရင်ႏခင်ႏလမ်း၊ ကွဲႏတွော့ꩻ လိုꩻစွို့ꩻစွဉ်ႏဖုံႏနဝ်ꩻ အီႏနွို့စံႏစာꩻလွေꩻဗာႏ ထာဝရ အသက်မွန် ခင်ႏလမ်း” နုဲင်းနဝ်ꩻသွူ။
ទើបបានជ្រើសរើសហើយ៖
မတဲ 25: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
