ကမ္ဘာႏစ 43
43
ယောသပ်အဝေးခိုဖုံႏလွေꩻချာယင်းအီဂျစ်ခမ်း
1ခါနန်ခမ်းကိုနဝ်ꩻ ထာꩻအံႏအွꩻ ခြောကပ် ကွဲဟုဲင်းဟုဲင်း လွဉ်တဲင် 2ယာကုပ်တမွိုးဖါပိုစွိုꩻဖုံႏ ကဖြေꩻလွဉ်ဒါႏဗွူ အီဂျစ်ခမ်းနဝ်ꩻ ထွိုင်ႏလို့ထိုꩻနဝ်ꩻ၊ ယာကုပ်ဒေါ့ꩻဖေႏ ဝွေꩻပိုခိုဖုံႏ “သီလွေꩻဖြေꩻယင်း နီတာႏ ဗွူအံႏတာႏရင်း တစိꩻဟုဲင်း” နုဲင်းနဝ်ꩻသွူ။
3ယုဒဒေါ့ꩻဖေႏအဖါ “အီဂျစ်ခွန်နဝ်ꩻ ဖေႏသတိခြေင်း မွေးစွဉ်ႏနီ၊ နီဖူးပေႏ မဉ်ႏတပါတဝ်းနဝ်ꩻ နီနွို့လွေꩻဝွေꩻဆꩻငါ တလꩻတဝ်း၊ 4နီဖူးပေႏယို နီဖါမဉ်ႏအွဉ်ႏစွꩻလွဉ်ꩻ တွမ်ႏနီမꩻ နီအီႏလွေꩻဖြေꩻဖေႏ နီဖါဗွူ။ 5နီဖါမဉ်ႏတအွဉ်ႏစွꩻ လွဉ်ꩻတဝ်းနဝ်ꩻ နီတလွေꩻတဝ်း၊ ကွပ်ပွိုး ခွန်နဝ်ꩻ ဒေါ့ꩻဖေႏလဲဉ်းနီ ပေါႏနီဖူးပေႏ တပါလွဉ်ꩻတဝ်း တွမ်ႏနီနဝ်ꩻ နီနွို့လွေꩻ ဝွေꩻဆꩻငါ တလꩻတဝ်း” ရိုꩻဖေႏအဖါ နုဲင်းနဝ်ꩻသွူ။
6ယာကုပ်ဒေါ့ꩻ “သီမွော့ꩻ မာꩻယပ်ꩻသꩻ ဒုက္ခမွေးစွဉ်ႏခွေ သီဖူးအဝ်ႏနေဒွိုန်းကနဝ်ꩻ ပွိုးတမုဲင်ꩻ သီမွော့ꩻဒေါ့ꩻနယ်ဗာႏတွိုႏ ပါꩻခိုနဝ်ꩻဟောင်း” နုဲင်းနဝ်ꩻသွူ။
7ဝွေꩻသီးလဝ်းချာ “ခွန်နဝ်ꩻနဝ်ꩻ ရီစဲစ်မွေးနေးစွဉ်ႏ နီခရာႏတွမ်ႏ နီတမွိုးဖါပိုစွိုꩻဖုံႏ ခရာႏသွူ၊ သီဖါနဝ်ꩻ သက်အဝ်ႏမွန်ဒွိုန်းကနဲ့ဟောင်း၊ သီဖူးဝေးအလင် အဝ်ႏဒွိုန်းကနဲ့ဟောင်း၊ ရီနီနုဲင်းနဝ်ꩻတဲင် ခွိုင်းကား ဝွေꩻကရီနဝ်ꩻ နီလဝ်းဖြေႏချာဗာႏသွူ။ ဝွေꩻအီႏထွဉ်ႏဟဲ့ꩻလွဉ် နီဖူးနဝ်ꩻ စောင်းမꩻ နီသေနဲ့ဟောင်း” နုဲင်းနဝ်ꩻသွူ။
8ယုဒ ဒေါ့ꩻဖေႏအဖါ “ဖူးပေႏနဝ်ꩻ အွဉ်ႏလွေꩻလွဉ်ꩻခွေတဲင် တလဲင်ႏချင်ꩻ နီအီႏထန်ႏလွေꩻသွူ ယိုခါနဝ်ꩻမꩻ နီလွစ်အံႏမသီထာꩻ။ 9ဝွေꩻနဝ်ꩻ စွဉ်ꩻနေးခွေသက်တဲင် ခွေအာမခံႏဒျာႏ၊ ဝွေꩻတာႏနဝ်ꩻ ခွေထူႏဒျာႏတာႏဝွန်ႏ၊ ဝွေꩻယို ဘေꩻကင်ꩻရန်ႏသျင်ꩻ ခွေမဉ်ႏတဟဲ့ꩻသဲင်ꩻချာ နွောင်ꩻတဝ်းနဝ်ꩻ အွဉ်ႏဒင်ႏသွော့အပဲစ် ခွေလောင်း တသက်လွုမ်း၊ 10နီမဉ်ႏတပွေါး ညဗာႏတဝ်းနဝ်ꩻ ယိုခါ နီလွေꩻသဲင်ꩻနဝ်ꩻကို လဲင်ꩻလꩻလဲဉ်းဒျာႏ နီလဲင်ႏ” နုဲင်းနဝ်ꩻသွူ။
11အဖါဒေါ့ꩻဖေႏဝွေꩻသီး “ပေါႏနဝ်ꩻတဲ့ꩻ မာꩻနုဲင်းယိုဟုဲင်း၊ ခါနန်ခမ်းကို ကထန်ႏဒါႏ ထာꩻခြိုꩻအဟဝ်သွတ်ꩻ ဗာရုဲင်စံစီႏနဝ်ꩻတစိꩻ၊ တမူထီနဝ်ꩻတစိꩻ၊ နံꩻသာႏဟွမ်၊ မုရန်စီႏနဝ်ꩻတစိꩻ၊ တဝီးခူꩻတွမ်ႏ ဗာတံရာႏဖုံႏနဝ်ꩻ လွမ်တရေꩻရေꩻတွော့ꩻ ထူႏလွေꩻဖေႏ ခွန်နဝ်ꩻတာႏ မေတ္တာႏ လက်ဆောင်ႏဟုဲင်း၊ 12ရွဉ်ကပါသဲင်ꩻချာဒါႏ ဗွူပုန်ႏကိုနဝ်ꩻ ရော့ꩻတဝ်းမဲ့ꩻ အသော့ꩻမာႏဒျာႏ၊ သီအီႏဖေႏချာဗာႏယင်းတဲင် သီရွဉ်နဝ်ꩻ ထူႏလွေꩻစွဉ်ႏ နီပွန်းဟုဲင်း။ 13ဟဲ့ꩻသီဖူးတဲင် လွေꩻချာစွဉ်ႏ တလဲင်ႏချင်ꩻဟုဲင်း။ 14ဖေႏနေးခွန် ကသꩻညင်ꩻ သီဖူး ဗေင်ယာမိန်တွမ်ႏ သိမောင်နဝ်ꩻ အနန္တတန်ꩻခိုꩻ ဗွေႏဘုရာꩻ ယံဖေႏ ကမွဉ်းဖျင်ဖေႏသွော့ ခွန်နဝ်ꩻ အသနော၊ မဉ်ႏနုဲင်းခွေတာႏ ခွေပိုပေႏဖုံႏ မဉ်ႏသွုမ်ꩻထိုꩻခန်းတဲ့ အီႏခံႏသွုမ်ꩻဗာႏ ဒျာႏရင်ꩻ” ရိုꩻဖေႏနုဲင်းနဝ်ꩻသွူ။
15နဝ်ꩻမꩻ တဖူးဝေးစွိုꩻနဝ်ꩻ ထူႏမေတ္တာႏ လက်ဆောင်ႏတွမ်ႏ ရွဉ်နီပွန်းတဲင် ထန်ႏလွေꩻစွဉ်ႏ အီဂျစ်ခမ်းသွူ၊ ဗေင်ယာမိန်နဝ်ꩻတဲ့ ပါလွေꩻလွဉ်ꩻနဝ်ꩻသွူ။ ထွိုင်ႏဖျော် ခမ်းနဝ်ꩻတဲင် ဝွေꩻသီးနွို့လွေꩻသော့ꩻ ယောသပ်ဆꩻငါသွူ။ 16ယောသပ်ထွိုင်ႏထီႏ ဗေင်ယာမိန် ပါလွဉ်ꩻ တွမ်ႏဝွေꩻသီးနဝ်ꩻ ဝွေꩻမိန်းအသွဉ်း ကထိန်ꩻထွားဒါႏ ဝွေꩻလမ်း “ဝွေꩻသီးနဝ်ꩻ ဟဲ့ꩻသဲင်ꩻသွော့ အွိုးခွေလမ်းဟုဲင်း၊ မာꩻသီထာꩻသား တဗာႏတွော့ꩻ ဖျင်ရဲဉ်ꩻသွော့ ထာꩻအံႏဖုံႏဟုဲင်း၊ မွူးယာ ခွေအီႏအံႏအွꩻငီꩻ တွမ်ႏဝွေꩻသီး” နုဲင်းနဝ်ꩻသွူ။ 17အလမ်းသွဉ်းနဝ်ꩻတဲ့ နုဲင်းကမိန်းအတွိုင်ꩻ ဟဲ့ꩻသဲင်ꩻစွဉ်ႏ ဝွေꩻသီး တဖူးဝေးစွိုꩻ ယောသပ်လမ်းသွူ။
18ဝွေꩻသီးတဖူးဝေး အဝ်ႏသဲင်ꩻလွဉ် လမ်းနဝ်ꩻကျာꩻ “နီကသဲင်ꩻလွဉ်ဗာႏ ယိုကိုနဝ်ꩻ ကွပ်စွဉ်ႏ အရီးတလဲင်ႏ ရွဉ်ပါသဲင်ꩻချာဒါႏ နီဗွူပုန်ႏကိုနဝ်ꩻအတွက် ဝွေꩻသီးအီႏဆွမ်ꩻနီ၊ ထူႏသေꩻနီ သေလာꩻဖုံႏတွော့ꩻ အီႏအွဉ်ႏမာꩻနီ အသွဉ်း”ယူႏနုဲင်းနဝ်ꩻတဲင် ငမ်းသꩻစွဉ်ႏသွူ။ 19ကွပ်နဝ်ꩻမꩻ ထွိုင်ႏဖျော် လမ်းတခါꩻတန်ထျꩻ၊ ဝွေꩻသီးဒေါ့ꩻ သွဉ်းကောထိန်ꩻထွား လမ်းနဝ်ꩻတဲင်ရိုꩻ၊ 20“မာꩻကေꩻဇူꩻတဲင် နာႏဗဲင်းနီငဝ်းမွိုင်ဗွေႏ၊ အွိုးရီးခါ နီလွဉ်ဖြေꩻဖိုလဲဉ်း ဗွူအံႏတလဲင်ႏ၊ 21နီထွိုင်ႏသဲင်ꩻချာ လမ်းတွင်ꩻ ချꩻဒါႏပင် တဖူꩻလောင်းချိန်ႏ နီဗွေါင် နီဗွူပုန်ႏတဲင် တဖြာꩻစီႏ ဗွူပုန်ႏငွါနဝ်ꩻ ထီႏချာယင်း နီရွဉ် တယွမ်ꩻတဝ်းတဲင် ပါသဲင်ꩻချာယင်းဒျာႏ ပငါပရာꩻသွူ။ ယိုခါ ရွဉ်နဝ်ꩻ နီထူႏလွဉ်ဖေႏချာယင်း နီဗွေႏသွူ။ 22နီအီႏဖြေꩻထဲင်းယင်း ဗွူအံႏတာႏနဝ်ꩻ ရွဉ်လွိုတဲ့ နီအဝ်ႏထူႏလွဉ်ပါဒျာႏ၊ နီရွဉ်နဝ်ꩻပါမုဲင်ꩻ သော့ꩻဖေႏယင်း နီဗွူပုန်ႏကိုတဲ့ နီတသေတဝ်း” နုဲင်းနဝ်ꩻသွူ။
23သွဥ်းနဝ်ꩻဒေါ့ꩻ “သီတွမ်ႏနန်းခီမွိုန်း၊ တွမ်ႏငမ်းသမွိုန်း၊ သီဗွေႏဘုရာꩻ သီဖါဗွေႏဘုရာꩻနဝ်ꩻ သီတာႏသော့ꩻဖေႏရွဉ် သီဗွူပုန်ႏကို၊ ရွဉ်သီကဖေႏဒါႏ ဗွူငိုꩻနဝ်ꩻ ခွေလꩻလဲဉ်းဒျာႏ” နုဲင်းနဝ်ꩻသွူ။ နဝ်ꩻထွူ သိမောင်နဝ်ꩻ ဝွေꩻဟဲ့ꩻလွဉ် ဝွေꩻသီးထျꩻသွူ။
24ဝွေꩻသီး တဖူးဝေးစွိုꩻဖုံႏနဝ်ꩻ သွဉ်းဟဲ့ꩻနွို့သော့ꩻ လမ်းကိုနဝ်ꩻသွူ၊ ဝွေꩻဖေႏဝွေꩻသီး အီႏဟွာႏခင်ႏတာႏ ထီနဝ်ꩻမꩻ ဝွေꩻသီး ဟွာႏအခင်ႏဖုံႏသွူ။ တဲင်သွဉ်းနဝ်ꩻ ဗွူႏပါ ဝွေꩻသီး သေလာꩻဖုံႏဆာႏသွူ။ 25ဝွေꩻသီးဟွိုန် မွူးယာနဝ်ꩻ ယောသပ် အီႏအံႏအွꩻငီꩻတွမ်ႏ ဝွေꩻသီးတဲင် ဝွေꩻသီး ဖျင်ရဲဉ်ꩻသေꩻခါꩻ ကအီႏဖေႏ ယောသပ်တာႏ လက်ဆောင်ႏသွူ။ 26ယောသပ် ထွိုင်ႏဖျော်သဲင်ꩻလွဉ်လမ်းနဝ်ꩻ ဝွေꩻသီးထူႏ လက်ဆောင်ႏ နွို့လွေꩻသော့ꩻလမ်းကို ဖေႏယောသပ်တဲင် ခံႏနွမ်ꩻအွပ်ꩻလင်ꩻ ယောသပ်ဆꩻငါသွူ။ 27ယောသပ် ရီဝွေꩻသီး အုံဟဝ်ခြွိုင်ႏသန်ꩻနေဟောင်း နုဲင်းနဝ်ꩻတဲင်ရိုꩻ “သီကဒေါ့ꩻနယ်ဒါႏခွေ သီဖါဖြားလဲဉ်း ကရိုꩻဒါႏနဝ်ꩻ အသက် အဝ်ႏမွန်ဒျာႏနဲ့ဟောင်း၊ အုံဟဝ် ခြွိုင်ႏသန်ꩻဒျာႏနဲ့ဟောင်း” နုဲင်းနဝ်ꩻသွူ။
28ဝွေꩻသီးလဝ်းချာ “နီသွဉ်းသီးဖါ အဝ်ႏမွန်ဒျာႏ အုံဟဝ်ခြွိုင်ႏသန်ꩻဒျာႏ” နုဲင်းနဝ်ꩻတဲင် ဝွေꩻသီး ထောက်လင်ꩻ ခင်ႏလေင်း အွပ်ꩻရိုႏသေႏစွဉ်ႏ ဝွေꩻဆꩻငါနဝ်ꩻသွူ။
29ယောသပ်ထွိုင်ႏထီႏ ဝွေꩻဖူးခိုရင်ꩻ ဗေင်ယာမိန် “ဝွေꩻယိုနဝ်ꩻ သီကရိုꩻဒါႏ သီဖူးခို ပေႏသွတ်ꩻနဝ်ꩻနဲ့ ၊ ဖူးပေႏ၊ ဗွေႏဘုရာꩻ ယံဖေႏသွော့နာꩻ မင်္ဂလာႏ” နုဲင်းနဝ်ꩻသွူ။ 30နဝ်ꩻထွူ ယောသပ်ထွိုင်ႏထီႏ ဝွေꩻဖူးခိုနဝ်ꩻ သꩻညင်ꩻငါႏနဝ်ꩻမꩻ ယွိုန်းမဲ့ꩻထီ တလꩻတဝ်းဒွုမ်တဲင် တလဲင်ႏချင်ႏ ထန်ႏလွေꩻ နွို့သော့ꩻစွဉ်ႏ ဝွေꩻခန်ꩻကိုတွော့ꩻ ငွိုးအွီႏစွဉ်ႏထာꩻသွူ။ 31ဝွေꩻဖြွားဝွေꩻမဲ့ငါထွူ အဝ်ႏဝွေꩻအခန်ꩻကို ထန်ႏလွဉ်တဲင် ထိန်ꩻချာဝွေꩻသꩻ ဖေႏအမိန်း ထွဉ်ႏဖျင်ရဲဉ်ꩻစွဉ်ႏ ထာꩻအံႏအွꩻနဝ်ꩻသွူ။ 32ယောသပ်တာႏနဝ်ꩻ ထွဉ်ႏဖျင်ဖေႏ ထာꩻအံႏခွုံႏတခွုံႏတဲင် ဝွေꩻဝေးဖုံႏတာႏနဝ်ꩻတခွုံႏ၊ အီဂျစ်လိုꩻမျိုꩻဖုံႏ မဉ်ႏအံႏထာꩻအံႏနဝ်ꩻ ဖျင်ခေါ်ခေါ်ဖေႏဗာႏ တခွုံႏသွူ၊ ကွပ်ပွိုး ဝွေꩻသီးမဉ်ႏအံႏငီꩻတွမ်ႏ ဟေဗြဲလိုꩻမျိုꩻဖုံႏနဝ်ꩻ ဝွေꩻသီးယူႏ တရေႏပေႏငါႏ အတွက်သွူ။ 33အဝေးခိုစွိုꩻဖုံႏနဝ်ꩻ တယ်ႏအတန် ဗꩻတွိုႏစွဉ်ႏ အပေႏသွတ်ꩻ အွဉ်ႏအုံလင်ꩻရဲဉ်ႏနေးတဲင် ခွုံႏနဝ်ꩻ အွဉ်ႏခွယ်ႏတောႏလွဉ် ယောသပ်ဖဲ့ꩻနဝ်ꩻသွူ။ ဝွေꩻသီးထွိုင်ႏထီႏ ရဲဉ်ꩻခါꩻ ဝွေꩻသီးခင်ႏလမ်းအုံနဝ်ꩻ အံႏဖြာႏငါႏတဲင် တဖြာꩻတွမ်ႏတဖြာꩻ ထွားလို့စွဉ်ႏဝင်ꩻလွိုးသွူ။ 34ထာꩻအံႏအွꩻကအဝ်ႏ ယောသပ် ထာꩻအံႏခွုံႏလောင်းနဝ်ꩻ ဝွေꩻသော့ꩻဖေႏ ဝွေꩻသီးတဲင် ဗေင်ယာမိန်နဝ်ꩻ လꩻလွိုကယ်ꩻ ဝွေꩻသီး ငတ်ꩻပွန်းသွူ။ နဝ်ꩻမꩻ ဝွေꩻသီး အံႏအွꩻငီꩻတွမ်ႏ ယောသပ်နဝ်ꩻ လဲင်ꩻမွန်ꩻနေးစွဉ်ႏဖုံႏသွူ။
ទើបបានជ្រើសរើសហើយ៖
ကမ္ဘာႏစ 43: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.