ကမ္ဘာႏစ 44
44
တကောက်ꩻရွဉ်ထိုꩻမား
1ယောသပ်မိန်းဖေႏ သွဉ်း ကအဝ်ႏထိန်ꩻဒါႏ ဝွေꩻလမ်း “ခွိုင်းကားဝွေꩻသီး ကတောသဲင်ꩻနွောင်ꩻနဝ်ꩻ သော့ꩻဖေႏ ဗွေဗွေသွော့ ဗွူအံႏ ဝွေꩻသီး ဗွူပုန်ႏကိုဟုဲင်း၊ ဗွူငိုꩻရွဉ်နဝ်ꩻတဲ့ သော့ꩻချာဖေႏသွော့ ဝွေꩻသီးဗွူပုန်ႏကို ပငါပရာꩻဟုဲင်း၊ 2ဝွေꩻသီးဖူး အပေႏသွတ်ꩻ ဗွူပုန်ႏငွါနဝ်ꩻ သော့ꩻဖေႏပါသွော့ ခွေတကောက်ꩻရွဉ်တွမ်ႏ ဝွေꩻဗွူငိုꩻဟုဲင်း” နုဲင်းနဝ်ꩻသွူ။ သွဉ်းနဝ်ꩻတဲ့ မာꩻလွဉ်ꩻနုဲင်းယောသပ် မိန်းအတွိုင်ꩻနဝ်ꩻသွူ။ 3မွူးရဝ်ꩻစဝ်း ထာꩻထွိုင်ႏလေနဝ်ꩻ ဝွေꩻအွဉ်ႏသဲင်ꩻ အဝေးခိုဖုံႏတွမ်ႏ အသေလာꩻဖုံႏသွူ။ 4ဝွေꩻသီးထန်ႏလွေꩻ တပေါႏလဲဉ်းညာꩻငါႏတဝ်းဒွိုန်း တွမ်ႏဝေင်ꩻနဝ်ꩻ ယောသပ်မိန်းအသွဉ်း ကထိန်ꩻထွားဒါႏ ဝွေꩻလမ်းနဝ်ꩻတဲင် “ခြေင်းလွဉ်ꩻမွိုင်မွိုင် ဝွေꩻသီးဟုဲင်း၊ နာꩻမဉ်ႏထွꩻဝွေꩻသီးနဝ်ꩻ ရီသွော့ ‘ထာꩻဟဝ်နဝ်ꩻ ကွပ်ပွိုးတမုဲင်ꩻ သီမွော့ꩻဖြော်အီဗာႏတွိုႏ ထာꩻကုဲင်ဟောင်း၊ 5ကွပ်ပွိုးတမုဲင်ꩻ သီတခွန်ꩻလွေꩻတွိုႏ ခွေဗွေႏ တကောက်ꩻရွဉ်ဟောင်း၊ တကောက်ꩻနဝ်ꩻနဝ်ꩻ ခွေဗွေႏ အဝ်ႏအွꩻသော့ꩻအီ အဝ်ႏဟော်ꩻထွားအီ နိမိတ်ဖုံႏသွူ၊ သီမွော့ꩻ မာꩻဗာႏတွိုႏ အပဲစ်နုဲင်းနဝ်ꩻ’ ”မိန်းနုဲင်းနဝ်ꩻသွူ။
6သွဉ်းထွိုင်ႏထွꩻလွဉ်ꩻ ဝွေꩻသီး ဝွေꩻဒေါ့ꩻ နုဲင်းယောသပ် ကထွန်ႏသေꩻ အတွိုင်ꩻနဝ်ꩻသွူ။ 7ဝွေꩻသီးလဝ်းချာ “ဗွေႏ တွမ်ႏယွူးမွိုန်းနီ နုဲင်းနဝ်ꩻမွိုင်၊ နီတမာꩻဗာႏတဝ်း အပဲစ်နုဲင်းနဝ်ꩻကျောင်ꩻ ခံႏဗွိုန်ႏဒျာႏ ငဝ်းကဉ်ႏစာႏသွူ။ 8နီကမော့ꩻဒါႏရွဉ် ဗွူပုန်ႏငွါနဝ်ꩻမဉ်ႏတဲ့ အဝ်ႏခါနန်ခမ်း နီအီလွဉ်ချာယင်းနဝ်ꩻ နီဗွေႏအဝ်ႏသေဒျာႏ၊ ပွိုးတမုဲင်ꩻ နီတခွန်ꩻဗာႏတွိုႏရွဉ်ခံꩻ သီအဗွေႏလမ်းဟောင်း။ 9နီအကိုတဖြာꩻဖြာꩻထျꩻ မဉ်ႏမော့ꩻဒါႏ တကောက်ꩻရွဉ်နဝ်ꩻ ဖေႏသွော့ဝွေꩻ ထာꩻသီတံႏတဲင် ကအဝ်ႏကုဲင်ဒါႏ နီနဝ်ꩻတဲ့ မဲ့ခံႏသွဉ်း နီဗွေႏထျꩻ” နုဲင်းနဝ်ꩻသွူ။
10ဝွေꩻရိုꩻ “သီကဒေါ့ꩻနဝ်ꩻ ခွေသဘော်ꩻတူႏဒျာႏ ကွဲႏတွော့ꩻ အဖြာꩻက တခွန်ꩻခွေတကောက်ꩻရွဉ်နဝ်ꩻလွုမ်ꩻ အီႏမာꩻဖေႏဗာႏခွေသွဉ်း ကအဝ်ႏကုဲင်ဒါႏ လိုꩻလင်ဖုံႏနဝ်ꩻ သဲင်ꩻချာလꩻဒျာႏ” နုဲင်းနဝ်ꩻသွူ။ 11နဝ်ꩻမꩻ ဝွေꩻသီး အွဉ်ႏလင်ꩻမွိုင် အဗွူပုန်ႏဟံႏလောင်း ပငါပရာꩻတဲင် ဗွောင်နယ်ဖေႏစွဉ်ႏ အဗွူပုန်ႏဖုံႏနဝ်ꩻသွူ။ 12ယောသပ်သွဉ်းနဝ်ꩻ ထုမ်ႏထွား တယ်ႏအတန်သွတ်ꩻဗွူပုန်ႏ ဗတွိုႏလွေꩻ အပေႏသွတ်ꩻဗွူပုန်ႏကိုတဲင် တကောက်ꩻရွဉ်နဝ်ꩻ မော့ꩻစွဉ်ႏ ဗေင်ယာမိန် ဗွူပုန်ႏကိုသွူ။ 13အဝေးခိုဖုံႏ သꩻပေႏငါႏတွော့ꩻ အဲ့ꩻသဲ့စွဉ်ႏ ဝွေꩻသီးအဆဲင်ꩻဖုံႏသွူ၊ ဒင်ႏချာ ကွန်ႏထာꩻခြိုꩻ သေလာꩻငင်းလောင်းတဲင် သဲင်ꩻချာယင်း ဝေင်ꩻတန်ကိုသွူ။
14ယုဒတွမ်ႏအဖူးခိုဖုံႏ ထွိုင်ႏဖျော်ချာ ယောသပ်လမ်းနဝ်ꩻ ယောသပ် အဝ်ႏနေဒွိုန်းက လမ်းသွူ။ ဝွေꩻသီး ရိုႏသေႏအွပ်ꩻလင်ꩻ ယောသပ်ဆꩻငါသွူ။ 15ယောသပ်ဒေါ့ꩻ “သီမွော့ꩻမာꩻဗာႏတွိုႏ နုဲင်းယိုဟောင်း၊ ခွိုင်းကား သီကမာꩻလဲဉ်းဒါႏနဝ်ꩻ နေးတွမ်ႏခွေဉာဏ်ႏဆန်ꩻ သေနွောင်ꩻနဝ်ꩻ သီတသေတဝ်းနဲ့ဟောင်း” နုဲင်းနဝ်ꩻသွူ။
16ယုဒလဝ်းချာ “နီအီႏလဝ်းချာနွောင်ꩻဒွုမ် နီဗွေႏ နုဲင်းမုဲင်ꩻဟောင်း၊ နီအီႏထေင်ဒွုမ် နုဲင်းမုဲင်ꩻဟောင်း၊ နီတမာꩻဗာႏတဝ်းကျောင်ꩻနဝ်ꩻ သျင်ꩻနယ်နွောင်ꩻဒွုမ် နုဲင်းမုဲင်ꩻဟောင်း၊ ဗွေႏဘုရာꩻနဝ်ꩻ ဖေါႏထန်ႏလဲဉ်း နီအပဲစ်ဖုံႏသွူ။ အဖြာꩻကမော့ꩻ တကောက်ꩻရွဉ်လွုမ်ꩻ တကာႏတဝ်း နီကားကအဝ်ႏနဝ်ꩻ အီႏခံႏဖေႏဒျာႏ နီဗွေႏအသွဉ်း” နုဲင်းနဝ်ꩻသွူ။
17ယောသပ်ဒေါ့ꩻ “မွေးတဝ်း ခွေတမာꩻတဝ်းနုဲင်းနဝ်ꩻ၊ ကမော့ꩻဒါႏ တကောက်ꩻရွဉ် အဖြာꩻနဝ်ꩻလွုမ်ꩻ အီႏမာꩻဗာႏ ခွေအသွဉ်း သီကအဝ်ႏကုဲင်သားနဝ်ꩻ ခွꩻခွꩻသꩻသꩻသဲင်ꩻချာသွော့ သီဖါထျꩻ” နုဲင်းနဝ်ꩻသွူ။
ယုဒတောင်ꩻပြန်ႏ
18ယုဒနွို့ငါလွေꩻ ယောသပ်ထျꩻတဲင်ဒေါ့ꩻ “ဗွေႏ၊ ခွေမဉ်ဒေါ့ꩻလဝ်းထင်ႏငါႏ ငဝ်းတငွါဩ၊ တွမ်ႏသꩻလျားမွိုန်းတဝ်းခွေ၊ နီဗွေႏနဝ်ꩻ တန်မျတ် ဗွိုန်နုဲင်းအီဂျစ်ခွန်တန်နမ်းသွူ။ 19ဗွေႏ၊ နီဗွေႏရီထွားလဲဉ်းနီ ‘သီဖါနဝ်ꩻ အဝ်ႏနေဒွိုန်းကနဲ့၊ သီဖူး အလင်အဝ်ႏနေကနဲ့ဟောင်း’ နုဲင်းနဝ်ꩻတဲင် 20နီလဝ်းဖြေႏချာ နီဖါနဝ်ꩻ အဝ်ႏဒျာႏတွော့ꩻ ဖြားလဲဉ်းတဲင် နီဖါသက်တန်မꩻ ကလꩻလွဉ် နီဖူးပေႏနဝ်ꩻ အဝ်ႏတဖြာꩻ၊ ဖူးပေႏ အဝေးခိုရင်ꩻနဝ်ꩻ သီထိုꩻလဲဉ်းသွူ၊ ဝွေꩻမွိုးနဝ်ꩻ အပို အဝ်ႏမွန်ကုဲင်ဒျာႏ ဝွေꩻယိုတဖြာꩻလွုမ်ꩻတဲင် ဝွေꩻဖါနဝ်ꩻ ရက်မွေးနေးစွဉ်ႏ ဝွေꩻသွူ။ 21ဗွေႏ၊ ဖေႏနေးနီဗွေႏ ကထီႏဗာႏဝွေꩻနဝ်ꩻ နီဗွေႏထွဉ်ႏနီဟဲ့ꩻလွဉ် ဝွေꩻယိုကိုသွူ။ 22တဲင်နီလဝ်းချာ နီဖါနဝ်ꩻ ဖꩻထိုꩻလိုꩻပေႏ တလꩻတဝ်း မဉ်ႏဖနဝ်ꩻ နီဖါသီထိုꩻဒါႏ။ 23နဝ်ꩻထွူ နီဗွေႏရိုꩻ ‘ပေါႏသီဖူးပေႏ တပါတဝ်းနဝ်ꩻ နွို့သော့ꩻဗာႏတဝ်း ခွေဆꩻငါ ’ နုဲင်းနဝ်ꩻသွူ။ 24နီထွိုင်ႏတွိုႏသဲင်ꩻချာ နီဖါထျꩻနဝ်ꩻ နီဒေါ့ꩻနယ်လို့နီဖါ နုဲင်းနီဗွေႏ ကဒေါ့ꩻနဝ်ꩻသွူ။ 25နဝ်ꩻထွူ နီဖါထွန်ႏယင်း နီလွဉ်ဖြေꩻ ထာꩻအံႏသွူ။ 26နီလဝ်းချာ ‘နီတလွေꩻနွောင်ꩻတဝ်း ပေါႏနီဖူးပေႏ တပါတဝ်းနဝ်ꩻ နီနွို့ထေ့ဝွေꩻထျꩻ တလꩻတဝ်း။ နီဖူးပေႏ မဉ်ႏလွေꩻလွဉ်ꩻ တွမ်ႏနီမꩻ နီလွေꩻနွောင်ꩻ’ ဒေါ့ꩻဖေႏနီဖါနုဲင်းနဝ်ꩻသွူ။ 27နီဖါဒေါ့ꩻဖေႏနီ ‘သီအဝ်ႏသေဒျာႏအတွိုင်ꩻ ခွေမာရာခေလနဝ်ꩻ လွူးဖေႏ ခွေပိုခိုဝင်ꩻနီလွုမ်ꩻ။ 28တဖြာꩻနဝ်ꩻ လွေꩻနꩻထိုꩻလဲဉ်းခွေ၊ ဝွေꩻနဝ်ꩻ ထာꩻသားမီꩻ အဲင်ႏထိုꩻမွေးလဲဉ်းဒျာႏရင်ꩻ၊ နဝ်ꩻမꩻ တယ်ႏဝွေꩻကထန်ႏလွေꩻခါကာႏ တွိုႏစွဉ်ႏဟန်ႏနီꩻ ခွေတထီႏချာဗာႏတဝ်းဒွုမ် ဝွေꩻသွူ။ 29ယိုခါ ဝွေꩻယိုအဝ်ႏခွေထျꩻ သီမဉ်ဟဲ့ꩻလွေꩻထိုꩻ ဖျင်ယင်းတဲင် ဝွေꩻယိုမဉ်ႏထွာ တစွိုးတမျိုꩻ၊ သီဖါဖြားဖြား ခွေယိုနဝ်ꩻ သꩻပေႏတဲင် အီႏသီထိုꩻဒျာႏရင်ꩻ’” နုဲင်းနဝ်ꩻသွူ။
30-31ယုဒလဝ်းသွုပ် “ဗွေႏ၊ ယိုခါ လိုꩻပေႏတပါတဝ်းတွော့ꩻ ခွေမဉ်ႏသဲင်ꩻချာ နီဖါထျꩻနဝ်ꩻ ဝွေꩻမဉ်ႏထီႏ ပါꩻပေႏ တပါသဲင်ꩻတဝ်း တွမ်ႏခွေနဝ်ꩻ ဝွေꩻအီႏသီထိုꩻနဝ်ꩻသွူ။ နီဖါနဝ်ꩻ သက်အဝ်ႏမွန်အီဒျာႏတွမ်ႏ ပါꩻပေႏယိုသွူ။ နီဖါနဝ်ꩻ သက်တန်ငါႏလဲဉ်းနဝ်ꩻမꩻ နီမဉ်ႏမာꩻသꩻပေႏဝွေꩻနဝ်ꩻ စွဉ်ႏနီကမာꩻသီနီဖါနဝ်ꩻ ဗွိုန်ဗွိုန်ဝင်ꩻသွူ။ 32နဝ်ꩻသွူတကာႏတဝ်း ပါꩻပေႏယိုတာႏနဝ်ꩻ တွမ်ႏခွေအသက် ခွေအာႏမခံႏသေꩻခါꩻ နီဖါထျꩻသွူ။ ခွေမဉ်ႏတဟဲ့ꩻသဲင်ꩻချာတဝ်း ပါꩻပေႏ နီဖါထျꩻနဝ်ꩻ ခွေအီႏခံႏဗာႏ အပဲစ်တံႏ တသက်လွုမ်းနဝ်ꩻ ဖေႏဂတိလဲဉ်းနီဖါသွူ။ 33ဗွေႏ ယိုခါ ပါꩻပေႏယိုခြောင်ꩻ ခွေအုံကုဲင်လုဲင်ႏဗော့ꩻ ယိုကိုတဲင် ခွေအီႏခံႏသွဉ်းဖေႏမွေးသွူ။ ပါꩻပေႏနဝ်ꩻ အွဉ်ႏသဲင်ꩻချာသွော့ တွမ်ႏဝွေꩻဝေးခိုဖုံႏဟုဲင်း။ 34ဗွေႏ ပါꩻပေႏတပါတဝ်းနဝ်ꩻ ခွေအီႏသဲင်ꩻချာနီဖါထျꩻ နုဲင်းမုဲင်ꩻဟောင်း၊ ထာꩻဒုက္ခဆင်ꩻရယ်ꩻ ကအီႏတေင် နီဖါလောင်းနဝ်ꩻ ခွေတမဉ်ထီႏတဝ်း” နုဲင်းနဝ်ꩻသွူ။
ទើបបានជ្រើសរើសហើយ៖
ကမ္ဘာႏစ 44: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.