ကမ္ဘာႏစ 39
39
ယောသပ်တွမ်ႏပေါတိဖါအမာ
1ဣသျမေလလိုꩻမျိုꩻဖုံႏနဝ်ꩻ ဟဲ့ꩻလွေꩻယောသပ် အီဂျစ်ခမ်းတဲင် စာထိုꩻဝွေꩻ ခွန်တန်ဖါရော စဲ့ꩻတပ် ကပွေါးရံႏဒါႏ ဟော်နန်ꩻပိုႏတန် ပေါတိဖါထျꩻသွူ။ 2#တ ၇:၉။ ထာဝရဘုရာꩻနဝ်ꩻ အဝ်ႏငီꩻတွမ်ႏ ယောသပ်နဝ်ꩻမꩻ ဝွေꩻမာꩻထာꩻ အမျိုꩻမုဲင်ꩻတဲ့ꩻ အောင်ႏစွဥ်ႏသွူ။ ဝွေꩻနဝ်ꩻ အုံသော့ꩻဒျာႏ အဗွေႏအီဂျစ်လိုꩻမျိုꩻ လမ်းကိုသွူ။ 3ထာဝရဘုရာꩻနဝ်ꩻ အဝ်ႏငီꩻတွမ်ႏ ယောသပ်တဲင် ဝွေꩻမာꩻထာꩻ အမျိုꩻမုဲင်ꩻမုဲင်ꩻတဲ့ꩻ အောင်ႏစွဉ်ႏကျောင်ꩻ အဗွေႏအဝ်ႏထီႏသွူ။ 4ပေါတိဖါနဝ်ꩻ ကျွိုက်နစ်သက်ငါႏ ယောသပ်တဲင် ဝွေꩻအွဉ်ႏစွဉ်ႏ ဝွေꩻနမ်းရေꩻရာႏတာႏ သွဉ်းတဲင် ဝွေꩻလမ်းကိုတွမ်ႏ ဝွေꩻဥစ္စာႏ ကားကအဝ်ႏနဝ်ꩻ ဝွေꩻအွဉ်ႏစွဉ်ႏယောသပ် ထိန်ꩻထွားနဝ်ꩻသွူ။ 5တယ်ႏစွဉ်ႏ အချိန်ႏနဝ်ꩻ ကွပ်ပွိုး ယောသပ်တဲင် အီဂျစ်လိုꩻမျိုꩻ တမွိုးဖါပိုစွိုꩻဖုံႏတွမ်ႏ အထာꩻခြိုꩻကအဝ်ႏဒါႏ ဝွေꩻလမ်းကို သွိုꩻ၊ လုဲင်း၊ ခြံဖုံႏနဝ်ꩻ ထာဝရဘုရာꩻ ဖေႏမွေးစွဉ်ႏ မင်္ဂလာႏသွူ။ 6ပေါတိဖါ ကပဲင်ႏဒါႏ ထာꩻခြိုꩻဥစ္စာႏ ကားကအဝ်ႏနဝ်ꩻ အွဉ်ႏထိန်ꩻထွားလို့စွဉ်ႏ ယောသပ်သွူ။ ပေါႏလွိုဝွေꩻ အအံႏအအွꩻနဝ်ꩻ ထာꩻမာꩻအမျိုꩻမုဲင်ꩻတဲ့ꩻ ဝွေꩻတယူႏဗာႏ တဝ်းဒွုမ်သွူ။
ယောသပ်နဝ်ꩻ ထွာလိုꩻနမ်းပွိုင်ယံ ယောင်ꩻရေꩻငါႏနဝ်ꩻမꩻ 7အချိန်ႏထွိုင်ႏည ဝွေꩻအဗွေႏမာနဝ်ꩻ သꩻစွဲꩻလွဉ် ယောသပ်တဲင် ဝွေꩻမူႏ ကွီဗေင်ႏငီꩻစွဉ်ႏ ဝွေꩻသွူ။ 8ကွဲႏတွော့ꩻ ယောသပ် တစူꩻတဝ်းတဲင် ဒေါ့ꩻချာဝွေꩻမူႏ “ထွားမွိုင်၊ ကွပ်ပွိုး ခွေအဝ်ႏလမ်းကိုတဲင် ခွေဗွေႏနဝ်ꩻ ကိစ္စအမျိုꩻမုဲင်ꩻမုဲင်ꩻတဲ့ꩻ ဝွေꩻတယူႏ ဗာႏတဝ်းဒွုမ်သွူ။ ဝွေꩻကပဲင်ႏဒါႏ ဥစ္စာႏဖုံႏ ကားကအဝ်ႏ ဖေႏကထိန်ꩻထွားနဝ်ꩻ ဝွေꩻအပ်လို့လဲဉ်း ခွေသွူ။ 9လမ်းကိုယိုနဝ်ꩻ ခွေဩဇာႏ အာႏဏာႏအဝ်ႏ နုဲင်းခွေဗွေႏဩဇာႏ အာႏဏာႏ နဝ်ꩻသွူ။ ပေါႏလွိုနာꩻ ထာꩻခြိုꩻလမ်းကိုနဝ်ꩻ တအပ်သေꩻတဝ်းခွေ တအဲဉ်ထဝ်း။ နဝ်ꩻမꩻ မာꩻဒုစရဲက် အကျင်ꩻစားယိုတွမ်ႏ ကအီႏပဲစ်မာႏ ဗွေႏဘုရာꩻနဝ်ꩻ ခွေအီႏမာꩻနွောင်ꩻ နုဲင်းမုဲင်ꩻဟောင်း” နုဲင်းနဝ်ꩻသွူ။ 10ပါꩻမူႏနဝ်ꩻ အဝ်ႏကဝ်ꩻသွုပ်ဒျာႏ ယောသပ် စွုမ်ႏနီꩻနီꩻတဲင် ဝွေꩻတအုဲင်ႏ ဗေင်ႏငီꩻတဝ်း တွမ်ႏပါꩻမူႏသွူ။
11ကွဲႏတွော့ꩻ တနီꩻသား လမ်းကို သွဉ်းအလင်ဖုံႏ အဲဉ်ထဝ်းချိန်ႏ ယောသပ်အီႏလွေꩻမာꩻ အထာꩻမာꩻ နွို့လွေꩻသော့ꩻလမ်းကိုတဲင်၊ 12ဝွေꩻမူႏနဝ်ꩻ ငင်ႏဆွုမ်ႏစွဉ်ႏ ယောသပ် အဆဲင်ꩻတန်တဲင်ဒေါ့ꩻ “လွဉ်နွို့ ဗေင်ႏငီꩻ စွဉ်ႏခွေဟုဲင်း” နုဲင်းနဝ်ꩻသွူ။ ကွဲႏတွော့ꩻ ဝွေꩻရွန်ꩻတွော့ꩻ ဖင်းထန်ႏတဲင် ဝွေꩻဆဲင်ꩻတန် အဝ်ႏကုဲင်သော့ꩻစွဉ်ႏ ဝွေꩻမူႏ စူကိုနဝ်ꩻသွူ။ 13ဝွေꩻမူႏ ထွိုင်ႏထီႏ ယောသပ် အွဉ်ႏကုဲင် အဆဲင်ꩻတန်တွော့ꩻ ဖင်းထန်ႏထိုꩻ လမ်းကောင်းထန်ႏနဝ်ꩻ၊ 14ဝွေꩻမူႏ ဟဲ့ꩻခြဝ် အသွဉ်းဖုံႏတဲင်ဒေါ့ꩻ “ထွားယိုမွိုင်၊ ခွေဝါꩻကဟဲ့ꩻလွဉ်ဒါႏ ဟေဗြဲလိုꩻမျိုꩻနဝ်ꩻ စောက်ꩻကာꩻလဲဉ်းနီ။ ဝွေꩻနွို့လွဉ်သော့ꩻ ခွေခန်ꩻကိုတဲင် ကျံႏထွို့ꩻငင်ႏခွေ နဝ်ꩻမꩻ ခွေခြောဝ်သန်ဗာႏ မွေးနေးစွဉ်ႏ ခွေငဝ်းသွူ။ 15ဝွေꩻထွိုင်ႏဟွိုန် ခွေခြောဝ်ငဝ်းနဝ်ꩻ အွဉ်ႏကုဲင် ဝွေꩻဆဲင်ꩻတန် ခွေထျꩻတဲင် ဝွေꩻဖင်းထန်ႏထိုꩻစွဉ်ႏ ကောင်းထန်ႏ” နုဲင်းနဝ်ꩻသွူ။
16ယောသပ် ဆဲင်ꩻတန်နဝ်ꩻ ဝွေꩻမူႏ ထူႏသိမ်ꩻခါꩻထိုꩻ ဗတွိုႏစွဥ်ႏ ယောသပ် အဗွေႏခို ကသဲင်ꩻလွဉ်ချာ လမ်းနဝ်ꩻသွူ။ 17နဝ်ꩻထွူ ဝွေꩻမူႏဒေါ့ꩻနယ်အဝါꩻ “နီဗွေႏကဟဲ့ꩻလွဉ်ဒါႏ သွဉ်းပေႏ ဟေဗြဲလိုꩻမျိုꩻနဝ်ꩻ နွို့လွဉ်သော့ꩻ ခွေလမ်းမီကိုတဲင် ကျံႏစောက်ꩻကာꩻခွေ။ 18ခွေထွိုင်ႏခြောဝ်သန် ခွေငဝ်းနဝ်ꩻ ဝွေꩻအွဉ်ႏကုဲင် အဆဲင်ꩻတန်တဲင် ဖင်းထန်ႏထိုꩻစွဉ်ႏ ကောင်းထန်ႏ” နုဲင်းနဝ်ꩻသွူ။
19ယောသပ်အဗွေႏခိုနဝ်ꩻ သꩻလျား မွေးနေးစွဉ်ႏထာꩻတဲင် 20ဆွမ်ꩻယောသပ်တွော့ꩻ အွဉ်ႏခံသော့ꩻစွဉ်ႏထောင်ႏ၊ ခွန်တန် ကအွဉ်ႏခံဒါႏ ထောင်ႏသား ခင်ႏလမ်းကိုတဲင် ဝွေꩻအုံသော့ꩻဗာႏစွဉ်ႏ ထောင်ႏကိုသွူ။ 21#တ ၇:၉။ ကွဲႏတွော့ꩻ ထာဝရဘုရာꩻနဝ်ꩻ အဝ်ႏငီꩻတွမ်ႏ ယောသပ်တဲင် ဖေႏဝွေꩻ မင်္ဂလာႏနဝ်ꩻမꩻ ထောင်ႏမူꩻနဝ်ꩻ ကျွိုက်နစ်သက်ငါႏ ဝွေꩻသွူ။ 22ထောင်ႏမူꩻနဝ်ꩻ အွဉ်ႏယောသပ် ထိန်ꩻထွားတောစွဉ်ႏ ထောင်ႏသားအလင်ဖုံႏ ကားကအဝ်ႏတဲင် ထောင်ႏကို ကိစ္စကားကအဝ်ႏနဝ်ꩻတဲ့ ယောသပ်ဖေႏ ကစီႏမံႏနဝ်ꩻ ဖေႏစွဉ်ႏ ဝွေꩻတာႏဝွန်ႏသွူ။ 23ထောင်ႏမူꩻလိုꩻတန်နဝ်ꩻ အပ်ဖေႏလဲဉ်း ယောသပ် တာႏဝွန်ႏကားကအဝ်ႏ နဝ်ꩻမꩻ ဝွေꩻတထွားချာဗာႏတဝ်းဒွုမ် တစွိုးစွိုးသွူ။ ကွပ်ပွိုး ထာဝရဘုရာꩻ အဝ်ႏငီꩻတွမ်ႏ ယောသပ်နဝ်ꩻမꩻ ဝွေꩻမာꩻထာꩻ အမျိုꩻမုဲင်ꩻမုဲင်ꩻတဲ့ ဖေႏအောင်ႏမျင်ႏလို့စွဉ်ႏသွူ။
ទើបបានជ្រើសរើសហើយ៖
ကမ္ဘာႏစ 39: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.