ကမ္ဘာႏစ 18
18
ငဝ်းဂတိအဗြာဟံအီႏလꩻပိုခိုတဖြာꩻ
1ထာဝရဘုရာꩻ ပေါႏနယ်ဖေႏ အဗြာဟံ ကအဝ်ႏဒါႏ မံရေကပဲင်ႏဒါႏ သေင်ႏမွူးမျတ်ထျꩻသွူ။ မွူးယာခိုႏ ထာꩻလျားချိန်ႏ အဗြာဟံ အဝ်ႏအုံလင်ꩻ ဝွေꩻသုမ်းငွါ၊ 2#ဟေဗြဲ ၁၃:၂။ဝွေꩻအွော့ꩻထွားကီတဲင် ထီႏဗာႏ လိုꩻခိုဝင်ꩻသွံ အဝ်ႏအုံထွိုင်ႏထာꩻသွူ။ အဗြာဟံ ထွိုင်ႏထီႏ ဝွေꩻသီးနဝ်ꩻ တလဲင်ႏချင်ႏ ဝွေꩻဖင်းထန်ႏ ကျိုႏဆွုမ်ႏစွဉ်ႏသွူ။ ဝွေꩻအွပ်ꩻလင်ꩻ မဲ့ငါ လဲင်ꩻခွိုင်းနေးစွဉ်ႏဟံႏ၊ 3ဝွေꩻဒေါ့ꩻ “ဗွေႏ၊ မာꩻကေꩻဇူꩻတဲင် နွို့အုံပဆားနေက ခွေသွဉ်းလမ်း မာꩻထဉ်ႏက ခွေသွဉ်း တွမ်ႏလွေꩻထိုꩻမွိုန်းဒွိုန်း၊ 4ခွေသွဉ်းအီႏ အီလွဉ်ဖေႏ ထီဟွာႏခင်ႏ၊ နီဗွေႏသီး အုံပဆားဒွိုန်းက သေင်ႏယိုဆꩻလမွိုင်။ 5ခွေသွဉ်းအီႏ အီလွဉ်နေက ထာꩻအံႏအွꩻ တစူးတစိꩻ၊ အာႏအဝ်ႏလွဉ်ယင်းမꩻ အီႏလွေꩻသွုပ်နွောင်ꩻ နီဗွေႏသီးတဖူꩻသွူ၊ ခွေသွဉ်းမဉ်နေး နီဗွေႏသီးအဗွန် မဉ်စကဒွိုန်းက ထာꩻအံႏအွꩻနဝ်ꩻမꩻ ကျွꩻလွဉ်သွော့ ခွေသွဉ်းလမ်းမွိုင်” နုဲင်းနဝ်ꩻသွူ။
ဝွေꩻသီးလဝ်းချာ “ကေꩻဇူꩻတင်ႏငါႏ၊ အဝ်ႏလꩻဒျာႏ မာꩻဟုဲင်း” နုဲင်းနဝ်ꩻသွူ။
6အဗြာဟံ နဲစ်နွို့သော့ꩻ သုမ်းကိုတဲင် ဒေါ့ꩻဖေႏသာရာ “ထူႏတခိုးဖွန်ႏ ဟဝ်စားနဝ်ꩻ နုတ်ꩻတွော့ꩻ ဖို့ꩻမွိုင်မွိုင်တခိုးဟုဲင်း။” 7နဝ်ꩻထွူ ဝွေꩻဖင်းလွေꩻ ဖိုးဖုံႏ ကအဝ်ႏဒါႏ ခင်ႏလမ်းတဲင် လွိုက်ထူႏ ဖိုးပေႏပြွောင်ႏတဗာႏ အပ်ဖေႏစွဉ်ႏအသွဉ်းတဖြာꩻ ဖေႏကဖို့ꩻတဲင် ဖေႏကဖျင်ရဲင်ꩻ မွိုင်မွိုင်နဝ်ꩻသွူ။ 8ဝွေꩻထူႏလွဉ် ဖိုးနဲဉ်းထီအောင်ႏတွမ်ႏ ဖိုးနဲဉ်းထီ၊ ဟန်ႏအိုတနျာႏဒွိုႏ အွဉ်ႏထာꩻအံႏဖုံႏ ထဉ်ႏဖုံႏဆꩻငါတွော့ꩻ၊ ဝွေꩻအနမ်းကိုယ်ႏတဲင်ႏ လွူးဝွေꩻသီး သေင်ႏမွူးနဝ်ꩻ ဆꩻလတဲင် ဝွေꩻသီးတဲ့ꩻ အံႏအွꩻစွဉ်ႏသွူ။
9နဝ်ꩻထွူ ဝွေꩻသီးရီဝွေꩻ၊ “နာꩻမာ သာရာ အဝ်ႏမုဲင်ꩻကိုဟောင်း” နုဲင်းနဝ်ꩻသွူ။
အဗြာဟံလဝ်းချာ၊ “ဝွေꩻမူႏအဝ်ႏသော့ꩻ သုမ်းကို” နုဲင်းနဝ်ꩻသွူ။
10 #
ရော ၉:၉။ ဝွေꩻသီးကို တဖြာꩻနဝ်ꩻရိုꩻ၊ “တယ်ႏယိုခါ မဉ်ႏဗွေကွတ်ꩻလာ ခွေအီႏသဲင်ꩻလွဉ်ချာယင်းတဲင် တွိုႏအချိန်ႏနဝ်ꩻ နာꩻမာသာရာ အီႏလွူး ပိုခိုတဖြာꩻသွူ။”
အကျာꩻနဝ်ꩻနဝ်ꩻ ဝွေꩻဆꩻချာ သာရာ အဝ်ႏနာႏတေ့ꩻထာꩻ သုမ်းတခါꩻငွါထျꩻသွူ။ 11အဗြာဟံတွမ်ႏ သာရာနဝ်ꩻ သက်တန်ငါႏလဲဉ်းနဝ်ꩻမꩻ သာရာနဝ်ꩻ လိုꩻမူႏရာႏသီႏ သွတ်ꩻထိုꩻလဲဉ်းသွူ။ 12#၁ပေ ၃:၆။ နဝ်ꩻမꩻ သာရာနဝ်ꩻ၊ “ယိုခါ ခွေယို ဖြားလဲဉ်း၊ အာႏအဲဉ်ထဝ်းဒွုမ်တဲင် အီႏစံႏစာꩻပျောႏနွောင်ꩻ ကာႏမစေꩻစိန်ႏ နုဲင်းမုဲင်ꩻဟောင်း၊ ခွေဝါꩻ အဗြာဟံနဝ်ꩻတဲ့ꩻ အဝ်ႏဖြားလဲဉ်းဒျာႏ” ယူႏနုဲင်းနဝ်ꩻတဲင် ငတေ့ꩻထာꩻသွူ။ 13နဝ်ꩻထွူ ထာဝရဘုရာꩻရီ အဗြာဟံ၊ “ပွိုးတမုဲင်ꩻ သာရာ ရိုꩻဗာႏတွိုႏ ခွေယိုတန်လဲဉ်း အီႏလꩻနွောင်ꩻပို နုဲင်းမုဲင်ꩻဟောင်း နုဲင်းနဝ်ꩻတဲင် ငတေ့ꩻဗာႏတွိုႏထာꩻဟောင်း” နုဲင်းနဝ်ꩻသွူ။ 14#လု ၁:၃၇။ အမျိုꩻမုဲင်ꩻ တရိုꩻတဝ်း ထာဝရဘုရာꩻအတာႏနဝ်ꩻ ယပ်ꩻခုဲင်ႏငါႏ အဝ်ႏနေဟောင်း၊ နုဲင်းခွေကရိုꩻအတွိုင်ꩻ တယ်ႏယိုခါ မဉ်ႏဗွေကွတ်ꩻလာ ခွေအီႏလွဉ်ချာယင်းတဲင် သာရာနဝ်ꩻ အီႏလွူးပိုခိုတဖြာꩻ” နုဲင်းနဝ်ꩻသွူ။
15ကွပ်ပွိုးသာရာ ငမ်းသꩻငါႏနဝ်ꩻမꩻ ဝွေꩻဒေါ့ꩻတနွိုင်ချာ၊ “ခွေသွဉ်းမူႏ ငဗာႏတဝ်း” နုဲင်းနဝ်ꩻသွူ။
ဝွေꩻဗွေႏရိုꩻ “နာꩻင၊ နာꩻငဗာႏ မွေးလဲဉ်း” မိန်းဖေႏ နုဲင်းနဝ်ꩻသွူ။
အဗြာဟံလဝ်းဖေႏသောဒုံဝေင်ꩻတွက်တာႏ
16နဝ်ꩻထွူ ပါꩻခိုစားနဝ်ꩻဖုံႏ ထန်ႏလွေꩻ တွိုႏခင်ႏလမ်း ကထီႏလင်ꩻနွောင်ꩻဒါႏ သောဒုံဝေင်ꩻတဲင် အဗြာဟံတဲ့ꩻ အဝ်ႏပသာလွဉ်ꩻ ဝွေꩻသီး တဖူꩻလောင်းသွူ။ 17ထာဝရဘုရာꩻ ဒေါ့ꩻသꩻကို၊ “ခွေကအီႏမာꩻထာꩻနဝ်ꩻ ခွေတဒေါ့ꩻနယ်တဝ်း အဗြာဟံနဝ်ꩻ တထွာနွောင်ꩻတဝ်း။ 18ဝွေꩻပိုလီꩻစွိုးခွိုꩻဖုံႏနဝ်ꩻ အီႏထွာလွဉ် လိုꩻမျိုꩻတန်တဲင် တန်ꩻခိုꩻဩဇာႏ အာႏဏာႏအီႏအဝ်ႏသွူ။ တွမ်ႏဝွေꩻနဝ်ꩻ ခွေအီႏဖေႏ လိုꩻမျိုꩻဖုံႏ ကားကအဝ်ႏ မင်္ဂလာႏသွူ။ 19ဝွေꩻပိုလီꩻစွိုးခွိုꩻဖုံႏ ဖေႏနေး ကလွောက်ꩻနာႏ ခွေပညတ်တဲင် ဖေႏကမာꩻမဲဉ်ႏထာꩻ ဖေႏနေး ကဒေါ့ꩻသွဉ်နဝ်ꩻ ခွေလွိုက်ထူႏဗာႏ ဝွေꩻနဝ်ꩻသွူ။ ဝွေꩻသီး မဉ်ႏလွောက်ꩻနာႏ မာꩻလွဉ်နဝ်ꩻ ခွေကအွဉ်ႏဂတိလဲဉ်း ဝွေꩻအတွိုင်ꩻ ခွေအီႏမာꩻဖေႏလို့ စွုမ်ႏစွိုး” နုဲင်းနဝ်ꩻသွူ။
20နဝ်ꩻထွူ ထာဝရဘုရာꩻ ဒေါ့ꩻဖေႏအဗြာဟံ၊ “ကပဲစ်ဒင်ႏ ကစွဲꩻတရာꩻထင်ႏဒါႏ သောဒုံဝေင်ꩻတွမ်ႏ ဂေါမောရဝေင်ꩻ အလောင်းနဝ်ꩻ ဟဝ်ငမ်းသꩻငါႏသွူ။ ဝွေꩻသီးကမာꩻဒါႏ အပဲစ်နဝ်ꩻ တန်မွေးနေးစွဉ်ႏသွူ။ 21နုဲင်းခွေကဟွိုန်ဗာႏလဲဉ်း ပဲစ်ဒင်ႏ ကစွဲꩻတရာꩻဒါႏနဝ်ꩻ မဲဉ်ႏနဲ့ တမဲဉ်ႏတဝ်းနဲ့ ဖေႏကသေနဝ်ꩻ ခွေအီႏကျွꩻလင်ꩻ စဲစ်ဆေꩻထွား” နုဲင်းနဝ်ꩻသွူ။
22နဝ်ꩻထွူ လိုꩻဝင်ꩻနီနဝ်ꩻ ထန်ႏစွို့ꩻငါလွေꩻစွဉ်ႏ သောဒုံဝေင်ꩻ နဝ်ꩻသွူ၊ ကွဲႏတွော့ꩻ ထာဝရဘုရာꩻနဝ်ꩻ အဝ်ႏကုဲင်ငီꩻ စွူစွူဒျာႏတွမ်ႏ အဗြာဟံသွူ။ 23အဗြာဟံနဝ်ꩻ အုံထာဝရဘုရာꩻထျꩻတဲင်ရီ “လိုꩻစွို့ꩻစွဉ်ႏဖုံႏနဝ်ꩻ နီဗွေႏ အီႏလွေꩻယားကုဲင်ငီꩻ မွေးတွမ်ႏ အပဲစ်သားဖုံႏနဲ့၊ 24ဝေင်ꩻကို လိုꩻစွို့ꩻစွဉ်ႏ မဉ်ႏအဝ်ႏငတ်ꩻဆီနဝ်ꩻ နီဗွေႏ အီႏယားကုဲင်လို့စွဉ်ႏ တဝေင်ꩻလွုမ်းနဲ့၊ လိုꩻစွို့ꩻစွဉ်ႏ အဖြာꩻငတ်ꩻဆီ ဖေႏနေး ကလွစ်တာႏနဝ်ꩻ နီဗွေႏ ယားကုဲင်ထိုꩻတဝ်းဝေင်ꩻ လꩻတဝ်းနဲ့။ 25လိုꩻစွို့ꩻစွဉ်ႏတွမ်ႏ အပဲစ်အဝ်ႏသားဖုံႏနဝ်ꩻ နီဗွေႏ အီႏမာꩻသီငီꩻ လို့စွဉ်ႏဝင်ꩻနဲ့၊ နုဲင်းနဝ်ꩻနဝ်ꩻ တထွာနွောင်ꩻတဝ်း၊ နီဗွေႏ တမာꩻနွောင်ꩻတဝ်း နုဲင်းနဝ်ꩻသွူ။ နီဗွေႏမဉ်ႏမာꩻ နုဲင်းနဝ်ꩻနဝ်ꩻ လိုꩻစွို့ꩻစွဉ်ႏဖုံႏ အီႏကုဲင်ငီꩻထိုꩻဗာႏတွမ်ႏ လိုꩻအပဲစ်သားဖုံႏသွူ။ နုဲင်းနဝ်ꩻနဝ်ꩻ တထွာနွောင်ꩻတဝ်း၊ တဟံႏတန်လွုမ်း ထာꩻစီႏရင်ႏ အဗွေႏနဝ်ꩻ အီႏစီႏရင်ႏတရာꩻဒျာႏ မွေးတဝ်းနဲ့” နုဲင်းနဝ်ꩻသွူ။
26ထာဝရဘုရာꩻလဝ်းချာ၊ “ခွေမဉ်ႏမော့ꩻ လိုꩻစွို့ꩻစွဉ်ႏ အဖြာꩻငတ်ꩻဆီ သောဒုံဝေင်ꩻကိုနဝ်ꩻ ကွပ်ပွိုးစွဉ်ႏ ဝွေꩻသီး အတာႏတဲင် ခွေအီႏ တယားကုဲင်ထိုꩻတဝ်း တဝေင်ꩻလွုမ်း” နုဲင်းနဝ်ꩻသွူ။ 27အဗြာဟံ ဒေါ့ꩻဖျင်ယင်း၊ “ခွေသွဉ်းကကွီ တောင်ꩻပြန်ႏရုဲင်း သွုပ်သွုပ်ဗာႏထဲင်းယင်းနဝ်ꩻ မာကေꩻဇူꩻတဲင် ခွင်ꩻလွစ်ဖေႏသွော့ ခွေသွဉ်းမွိုင်ဗွေႏ၊ အွိုး ထာဝရဘုရာꩻ၊ ခွေသွဉ်းနဝ်ꩻ ထွာဒျာႏလိုꩻလွုမ်ꩻတဲင် အီဒေါ့ꩻတစွိုးစွိုးနဝ်ꩻ အခွင်ꩻ တမုဲင်ꩻမုဲင်ꩻ အဲဉ်ထဝ်းသွူ။ 28ကွဲႏတွော့ꩻ အဖြာꩻငတ်ꩻဆီခြောင်ꩻနဝ်ꩻ လိုꩻစွို့ꩻစွဉ်ႏ လစ်ꩻဆီငတ်ꩻဖြာꩻတဲ့ꩻ ကွဲအဝ်ႏဒါႏသွူ။ ယွမ်ꩻထိုꩻ ငတ်ꩻဖြာꩻတွော့ꩻ တဝေင်ꩻလွုမ်းနဝ်ꩻ နီဗွေႏအီႏယားကုဲင်နဲ့” နုဲင်းနဝ်ꩻသွူ။
ထာဝရဘုရာꩻလဝ်းချာ၊ “ခွေမဉ်ႏမော့ꩻ လိုꩻစွို့ꩻစွဉ်ႏ လစ်ꩻဆီငတ်ꩻဖြာꩻနဝ်ꩻ ဝေင်ꩻနဝ်ꩻ ခွေအီႏတယားကုဲင် ထိုꩻတဝ်း” နုဲင်းနဝ်ꩻသွူ။
29အဗြာဟံ ရီဖျင်ယင်းတလဲင်ႏ၊ “မဉ်ႏအဝ်ႏဒျာႏ လစ်ꩻဆီဖြာꩻလွုမ်ꩻဟာ” နုဲင်းနဝ်ꩻသွူ။
ဗွေႏဘုရာꩻလဝ်းချာ၊ “မဉ်ႏအဝ်ႏ လစ်ꩻဆီဖြာꩻနဝ်ꩻ ခွေတယားကုဲင်တဝ်း” နုဲင်းနဝ်ꩻသွူ။
30အဗြာဟံ ဒေါ့ꩻဖျင်၊ “ထာဝရဘုရာꩻ မာꩻကေꩻဇူꩻတဲင် တွမ်ႏသꩻလျားမွိုန်းမွိုင်ဗွေႏ၊ ခွေသွဉ်း တောင်ꩻပြန်ႏ ထဲင်းယင်းတလဲင်ႏ၊ လိုꩻစွို့ꩻစွဉ်ႏ မဉ်ႏအဝ်ႏ သွံဆီဖြာꩻလွုမ်ꩻနဝ်ꩻ အီႏယားကုဲင်ကနဲ့ဟောင်း။”
ဝွေꩻဗွေႏဒေါ့ꩻ၊ “ခွေမဉ်ႏမော့ꩻ သွံဆီဖြာꩻနဝ်ꩻ ခွေတယားကုဲင်တဝ်း” နုဲင်းနဝ်ꩻသွူ။
31အဗြာဟံ ဒေါ့ꩻဖျင်ယင်း၊ “ခွေသွဉ်းကကွီ ရုဲင်းသွုပ်သွုပ် ဗာႏယင်းနဝ်ꩻ မာကေꩻဇူꩻတဲင် ခွင်ꩻလွစ်ဗဲင်းသွော့ ခွေမွိုင်ဗွေႏ၊ ဗွေႏ မဉ်ႏမော့ꩻဒါႏ နီဆီဖြာꩻလွုမ်ꩻနဝ်ꩻ အီႏယားကုဲင်ကနဲ့ဟောင်း။”
ဝွေꩻဗွေႏဒေါ့ꩻ၊ “ခွေမဉ်ႏမော့ꩻ အဖြာꩻနီဆီနဝ်ꩻ ခွေအီႏတယားကုဲင်တဝ်း။”
32အဗြာဟံ ဒေါ့ꩻဖျင်၊ “မာꩻကေꩻဇူꩻတဲင် တွမ်ႏသꩻလျားမွိုန်းမွိုင်ဗွေႏ၊ ခွေသွဉ်း တောင်ꩻပြန်ႏ ဖျင်ယင်းတလဲင်ႏငါ မဉ်ႏမော့ꩻ တဆီဖြာꩻလွုမ်ꩻနဝ်ꩻ အီႏယားကုဲင်နေဟောင်း။”
ဝွေꩻဗွေႏရိုꩻ၊ “ခွေမဉ်ႏမော့ꩻ အဖြာꩻတဆီနဝ်ꩻ ခွေအီႏတယားကုဲင်ထိုꩻတဝ်း” မိန်းနုဲင်းနဝ်ꩻသွူ။ 33ဝွေꩻဗွေႏဒေါ့ꩻရီ အဗြာဟံ ထွိုင်ႏထွူ ထာဝရဘုရာꩻ ကျွꩻလွေꩻထိုꩻတဲင် အဗြာဟံနဝ်ꩻတဲ့ꩻ သဲင်ꩻချာယင်း အလမ်းသွူ။
ទើបបានជ្រើសរើសហើយ៖
ကမ္ဘာႏစ 18: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.