ကမ္ဘာႏစ 15
15
ဗွေႏဘုရာꩻမာꩻပဋိညာဉ်ႏတွမ်ႏအာဗြံ
1နဝ်ꩻထွူ အာဗြံလꩻ ရူႏပါရုံႏတဲင် ဟွိုန်ထာဝရဘုရာꩻ မိန်းဖေႏဝွေꩻ၊ “အာဗြံ ငမ်းမွိုန်း၊ ဘေꩻရန်ႏအန္တရာယ်ႏ အကိုနဝ်ꩻ ခွေအီႏကာႏကွယ်ႏ ရဲဖေႏနာꩻတဲင် အီႏဖေႏနာꩻ ဆုတန်မျတ်သွူ။”
2ကွဲႏတွော့ꩻ အာဗြံလဝ်းချာ၊ “အနန္တတန်ꩻခိုꩻ ဗွေႏထာဝရဘုရာꩻ ၊ ခွေသွဉ်းနဝ်ꩻ ပိုတဖြာꩻငါတဲ့ꩻ တလꩻတဝ်းဒွိုန်းနဝ်ꩻ အီႏစံႏစာꩻဗာႏ နီဗွေႏဆုတန်မျတ် နုဲင်းမုဲင်ꩻဟောင်း၊ ကအီႏစံႏစာꩻဒါႏ ခွေအမွီႏနဝ်ꩻ အဝ်ႏဒျာႏ ဒမာသကတ်ဝေင်ꩻသား အဲလိအာသာတဖြာꩻလွုမ်ꩻသွူ။ 3ပွိုးနီဗွေႏ တဖေႏတဝ်း ခွေပို တဖြာꩻဖြာꩻနဝ်ꩻမꩻ ခွေအမွီႏယို ခွေလမ်းကို သွဉ်းတဖြာꩻနဝ်ꩻ အီႏစံႏစာꩻထိုꩻဗာႏဒျာႏ” နုဲင်းနဝ်ꩻသွူ။
4နဝ်ꩻထွူ ဝွေꩻဟွိုန် ထာဝရဘုရာꩻ မိန်းဖေႏဖျင်ယင်းဝွေꩻ၊ “သွဉ်း အဲလိအာသာယို အီႏတပဲင်ႏဗာႏတဝ်း နာꩻအမွီႏ၊ နာꩻပိုသွီႏယာႏ အီႏပဲင်ႏဒျာႏ” နုဲင်းနဝ်ꩻသွူ။ 5#ရော ၄:၁၈၊ ဟေဗြဲ ၁၁:၁၂။ ထာဝရဘုရာꩻ ဟဲ့ꩻထန်ႏဝွေꩻ ကောင်းထန်ႏတဲင်၊ “ထွားထင်ႏသွော့ မို့ꩻလောင်းကီ ထွူတွော့ꩻ ကျံႏကဲႏ တွက်ထွားစမ်ꩻသွော့ ဆာႏဖုံႏ၊ နာꩻပိုလီꩻ စွိုးခွိုꩻနဝ်ꩻ အီႏအာတတွာနဝ်ꩻ” နုဲင်းနဝ်ꩻသွူ။
6 #
ရော ၄:၃၊ ဂလာ ၃:၆၊ ယာ ၂:၂၃။ အာဗြံနဝ်ꩻ ယွုမ်းအာႏကွိုꩻ ထာဝရဘုရာꩻနဝ်ꩻမꩻ ထာဝရဘုရာꩻ နစ်သက်တဲင် လက္ခံႏဝွေꩻသွူ။
7နဝ်ꩻထွူ ထာဝရဘုရာꩻ မိန်းဖေႏဝွေꩻ၊ “အီႏဖေႏပဲင်ႏနာꩻ ဟံႏတဲင် အဝ်ႏဥရဝေင်ꩻ ဗာဗုလုန်ခမ်းကို ကအွဉ်ႏထန်ႏလွဉ်ဒါႏ နာꩻနဝ်ꩻ ထွာခွေထာဝရဘုရာꩻဒျာႏ” နုဲင်းနဝ်ꩻသွူ။
8ကွဲႏတွော့ꩻ အာဗြံရီ၊ “အနန္တတန်ꩻခိုꩻ ဗွေႏထာဝရဘုရာꩻ၊ ခွေသွဉ်းအီႏပဲင်ႏဗာႏ ခမ်းယိုနဝ်ꩻ သေနွောင်ꩻ နုဲင်းမုဲင်ꩻဟောင်း” နုဲင်းနဝ်ꩻသွူ။
9ဝွေꩻဗွေႏလဝ်းချာ၊ “အသက် ကလꩻဒါႏ သွံနေင်ႏစီႏ ဖိုးမွူးတဗာႏ၊ ဗဲမွူးတဗာႏ၊ သွိုꩻထီးတဗာႏတွမ်ႏ ဝါးလွီးဗွါတဗာႏ ဝါးကွူတဗာႏနဝ်ꩻ ထူႏလွဉ်သွော့ ခွေထျꩻဟုဲင်း” နုဲင်းနဝ်ꩻသွူ။ 10တိရစ္ဆာန်ႏဖုံႏနဝ်ꩻ အာဗြံထူႏလွဉ် ဗွေႏဘုရာꩻထျꩻတဲင် ဝွေꩻဖꩻနီခဝ်ထွူ အယာႏခဝ်ဖုံႏနဝ်ꩻ အွဉ်ႏတဗန်ႏလို့နေးဝင်ꩻ နီရဲဉ်ႏသွူ။ ကွဲႏတွော့ꩻ ဝါးဖုံႏနဝ်ꩻ ဖꩻတခဝ်နေးတဝ်းသွူ။ 11လင်ႏတဖုံႏနဝ်ꩻ ကွင်ႏလင်ꩻဗွို့ꩻ ထာꩻယာႏလောင်းတဲင် အာဗြံဝါးထိုꩻသွူ။
12 # ယော ၄:၁၃၊၁၄။ မွူးထွိုင်ႏနွို့ချိန်ႏ အာဗြံ အဝ်ႏဗေင်ႏအွီႏထာꩻတွင်ꩻ ဝွေꩻငမ်းသန်လွဉ် မွေးနေးစွဉ်ႏထာꩻသွူ။ 13#ထလ ၁:၁–၁၄၊ တ ၇:၆။ ဗွေႏဘုရာꩻ မိန်းဖေႏဝွေꩻ၊ “နာꩻပိုလီꩻ စွိုးခွိုꩻနဝ်ꩻ အီႏထွာဗာႏ ထဉ်ႏလိုꩻတသဉ် ပါꩻခမ်းကို၊ ဝွေꩻသီးအီႏထွာဗာႏ ဝင်ꩻသွဉ်း ခမ်းနဝ်ꩻအကိုတဲင် ခံႏဗာႏဝင်ꩻနစ်စက်နေင်ႏပေါင်ꩻ လစ်ꩻရျာꩻသွူ။ 14#ထလ ၁၂:၄၀–၄၁၊ တ ၇:၇။ ကွဲႏတွော့ꩻ ဝွေꩻသီး ဖေႏကထွာသွဉ်း ကထွဉ်ႏအံႏဒါႏ ခမ်းသားနဝ်ꩻဖုံႏနဝ်ꩻ ခွေအီႏစီႏရင်ႏတဲင် ဝွေꩻသီးမဉ်ႏအဝ်ႏ ပါꩻခမ်းကို ထန်ႏလွဉ်ချိန်ႏနဝ်ꩻ၊ ဝွေꩻသီး အီႏအီထန်ႏပါ ထာꩻခြိုꩻပစ္စေꩻ ငါအာႏသွူ။ 15နာꩻနဝ်ꩻ အီႏအုံဗာႏ သက်ထိုစိုးဆွာꩻတဲင် အီႏသီခွꩻသꩻဗာႏ ဝင်ꩻအီႏသင်္ဂြိုဟ်ႏ ဟဝ်ဟဝ်ဒျာႏ နာꩻသွူ။ 16နာꩻပိုလီꩻစွိုးခွိုꩻနဝ်ꩻ ဗꩻလင်ꩻ လစ်ꩻစိုးထွူမꩻ အီႏသဲင်ꩻချာဗာႏယင်း ခမ်းယိုကိုသွူ။ ကွပ်ပွိုး အံမွန်ရိ လိုꩻမျိုꩻဖုံႏ ထာꩻမွိုက်ထာꩻကုဲင် မဉ်ႏတွိုႏ ခံႏထွိုက်တံႏချိန်ႏမꩻ ဝွေꩻသီး အဝ်ႏခမ်းယို ခွေအီႏစီႏရင်ႏ ဝါးထန်ႏထိုꩻ” မိန်းနုဲင်းနဝ်ꩻသွူ။
17မွူးနွို့တဲင် ထွိုင်ႏခေ့ꩻလွဉ်နဝ်ꩻ မေႏလူးမေႏပျော်ꩻ ကထန်ႏဒါႏ ဖွိုင်ꩻတဖြုံႏတွမ်ႏ မေႏကအဝ်ႏတင်ႏဒါႏ မေႏခြဲလွောင်ႏ ပေါႏလွဉ်စွော့ꩻတဲင် ဖျတ်ကာႏလွေꩻစွဉ်ႏ ထာꩻသားယာႏခဝ်ဖုံႏ ခါႏသွူ။ 18#တ ၇:၅။ နဝ်ꩻထွူ နဝ်ꩻကိုနဝ်ꩻ ထာဝရဘုရာꩻ တွမ်ႏအာဗြံ မာꩻပဋိညာဉ်ႏသွူ။ ဝွေꩻဗွေႏရိုꩻ “တယ်ႏအီဂျစ်ခမ်းကူ ဗꩻလွေꩻ ဥဖရတ် ထီခြောင်တန် တဲ့ꩻနဝ်ꩻ 19ပါလို့စွဉ်ႏ ကာနိစ်လိုꩻမျိုꩻ၊ ကာနိစ်သိလိုꩻမျိုꩻ၊ ကာဒါကိုနိစ်လိုꩻမျိုꩻ 20ဟိတ္တိလိုꩻမျိုꩻ၊ ဖေရဇိလိုꩻမျိုꩻ၊ ရေဖိမ်လိုꩻမျိုꩻ 21အံမွန်ရိလိုꩻမျိုꩻ၊ ခါနာနိလိုꩻမျိုꩻ၊ ဂိရဂါသျိလိုꩻမျိုꩻတွမ်ႏ ယေဗုသိလိုꩻမျိုꩻဖုံႏ အဟံႏတဲ့ꩻနဝ်ꩻ ဟံႏယို ကားကအဝ်ႏနဝ်ꩻ ခွေအီႏဖေႏဒျာႏ နာꩻပိုလီꩻစွိုးခွိုꩻနဝ်ꩻ ခွေအွဉ်ႏဂတိဒျာႏ” နုဲင်းနဝ်ꩻသွူ။
ទើបបានជ្រើសរើសហើយ៖
ကမ္ဘာႏစ 15: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.