ကမ္ဘာႏစ 14
14
အာဗြံကယ်ႏချာယင်းလောတ
1ဗာဗုလုန်ခွန်တန် အမိုရဖီလ်း၊ ဧလသာခွန်တန် အာရုတ်၊ ဧလံခွန်တန် ခူဒူလဝ်းမဲတွမ်ႏ ဂိုးအိမ်ခွန်တန် တိဒလသီးဖုံႏ ကထွာခွန်တန်ယို လစ်ꩻပါꩻနဝ်ꩻ 2လွေꩻတွိုက်ꩻ ခွန်တန်ငတ်ꩻပါꩻ ကထွာဒါႏ သောဒုံခွန်တန် ဗီရ၊ ဂေါမောရခွန်တန် ဗီသျ၊ အာဒမာခွန်တန် သျီနပ်၊ ဇိဗုဲင်ခွန်တန် သျေမာဗာတွမ်ႏ ဗေလ (မဉ်ႏမွေးတဝ်း ကဟဲ့ꩻဒါႏ သောရခွန်)ဖုံႏနဝ်ꩻသွူ။ 3ခွန်တန်ငတ်ꩻပါꩻနဝ်ꩻ ပေါင်ꩻလို့ဝင်ꩻတဲင် ချစဲ့ꩻစခန်ꩻ စိဒ္ဒိမ်ထာꩻခြောင်ႏကို ယိုခါ ကဟဲ့ꩻဒျာႏ ပင်ႏလယ်ႏသီ ခင်ႏလမ်းအရပ်နဝ်ꩻသွူ။ 4ခွန်တန်နဝ်ꩻဖုံႏနဝ်ꩻ အဝ်ႏခံႏဗာႏ ခူဒူလဝ်းမဲ ခွန်တန်အုပ်စိုꩻ တဆီနီနေင်ႏသွူ၊ ကွဲႏတွော့ꩻ ထွိုင်ႏလꩻ တဆီသွံနေင်ႏကို ဝွေꩻသီး တောႏလန်ႏဆန်ချာ ခွန်တန်နဝ်ꩻသွူ။ 5ထွိုင်ႏလꩻ တဆီလစ်ꩻနေင်ႏကို ခူဒူလဝ်းမဲ ခွန်တန်တွမ်ႏ ဝွေꩻမဟာမိတ် စဲ့ꩻသားဖုံႏနဝ်ꩻ ထင်ႏလွဉ်တွိုက်ꩻ ယားကုဲင်ထိုꩻစွဉ်ႏ အာသျတရုတ် ကာနိမ် ဝေင်ꩻကို ကအဝ်ႏဒါႏ ရေဖိမ်လိုꩻမျိုꩻတဲ့ꩻနဝ်ꩻ၊ ဟာမဝေင်ꩻ သုသိမ်လိုꩻမျိုꩻတဲ့ꩻနဝ်ꩻ၊ ဧမိမ်လိုꩻမျိုꩻ ကအဝ်ႏဒါႏ ကိရိယာတိမ် ထာꩻပြင်ႏကိုသားဖုံႏတဲ့ꩻနဝ်ꩻ 6စွဉ်ႏဟောရိလိုꩻမျိုꩻ ကအဝ်ႏအုံဒါႏ ဧဒုံ ကောင်လောင်းတဲ့ꩻနဝ်ꩻ ခြေင်းတွိုက်ꩻအောင်ႏနွောင်ꩻ ဗတွိုႏစွဉ်ႏ ကန္တာရထာꩻခြာမော့ကို ကအဝ်ႏအယ်ပါရန် ဝေင်ꩻနဝ်ꩻသွူ။ 7နဝ်ꩻထွူ ဝွေꩻသီး ခွယ်သဲင်ꩻချာ ခါဒဲက်အာဝေင်ꩻ (အချိန်ႏနဝ်ꩻ အမဉ်ꩻတွင်ႏဒျာႏ အမ်မိသျဖတ်ဝေင်ꩻသွူ။) ဝွေꩻသီးတွိုက်ꩻအောင်ႏနွောင်ꩻလို့ အာမာလဲက် တခမ်းလွုမ်းတဲင် တွိုက်ꩻယားကုဲင် အောင်ႏနွောင်ꩻပါ အံမွန်ရိလိုꩻမျိုꩻ ကအဝ်ႏအုံဒါႏ ဟာဇဇုန္တာမာ ဝေင်ꩻကိုနဝ်ꩻသွူ။
8နဝ်ꩻထွူ သောဒုံခွန်တန်၊ ဂေါမောရခွန်တန်၊ အာဒမာခွန်တန်၊ ဇိဗုဲင်ခွန်တန် တွမ်ႏဗေလခွန်တန်ဖုံႏ စုအစဲ့ꩻသား စိဒ္ဒိမ်ထာꩻခြောင်ႏကိုတဲင် 9တွိုက်ꩻချာစွဉ်ႏ ဧလံခွန်တန်၊ ဂိုးအိမ်ခွန်တန်၊ ဗာဗုလုန်ခွန်တန်တွမ်ႏ ဧလသာခွန်တန်တဲင် ခွန်တန်ယိုငတ်ꩻပါꩻ တွမ်ႏခွန်တန်လစ်ꩻပါꩻ တွိုက်ꩻလို့ဝင်ꩻသွူ။ 10ထာꩻခြောင်ႏယိုနဝ်ꩻ အဝ်ႏဗွေတွမ်ႏ မဝ်ယုဲင်ဖုံႏတဲင် သောဒုံတွမ်ႏ ဂေါမောရခွန်တန် ထွိုင်ႏသွုမ်ꩻနဝ်ꩻ အဝ်ႏစဲ့ꩻပွယ်ꩻကို ထွိုင်ႏဖင်းထိုꩻချိန်ႏ ဝွေꩻသီး ထဲ့သော့ꩻလို့စွဉ်ႏ ထာꩻအောင်ကိုသွူ။ ကွဲတွော့ꩻ ခွန်တန်အလင် သွံပါꩻနဝ်ꩻ ဖင်းသျောင်ႏလွေꩻထိုꩻ ကောင်ခြာကိုသွူ။ 11စဲ့ꩻပွယ်ꩻ ကအောင်ႏဒါႏ ခွန်တန်လစ်ꩻပါꩻယိုနဝ်ꩻ သောဒုံဝေင်ꩻကိုတွမ်ႏ ဂေါမောရဝေင်ꩻကို ကအဝ်ႏဒါႏ ထာꩻခြိုꩻတွမ်ႏ ထာꩻအံႏအွꩻ ကားကအဝ်ႏနဝ်ꩻ ထူႏလွေꩻလို့စွဉ်ႏသွူ။ 12သောဒုံဝေင်ꩻကို ကအဝ်ႏသော့ꩻဒါႏ အာဗြံဖူးခို လောတတွမ်ႏ ဝွေꩻထာꩻခြိုꩻ ကားကအဝ်ႏနဝ်ꩻတဲ့ꩻ ဆွမ်ꩻထူႏလွေꩻလို့စွဉ်ႏသွူ။
13ကွဲႏတွော့ꩻ ကဖင်းလွစ်ထန်ႏလဒါႏ ပါꩻတဖြာꩻနဝ်ꩻ နုဲင်းထာꩻကထွာလဲဉ်းဒါႏ အခရာႏဖုံႏနဝ်ꩻ ဒေါ့ꩻနယ်ဖေႏ ဟေဗြဲလိုꩻမျိုꩻ အာဗြံသွူ။ အာဗြံနဝ်ꩻ အဝ်ႏအုံ အံမွန်ရိလိုꩻမျိုꩻ မံရေကပဲင်ႏဒါႏ သေင်ႏမွူးဖုံႏ နဝ်ꩻအထျꩻသွူ။ မံရေတွမ်ႏ ဝွေꩻဖူးခို အဲက်သျီခေါလာတွမ်ႏ အာနေရသီးနဝ်ꩻ ထွာအာဗြံ မဟာႏမိတ်ဖုံႏသွူ။ 14အာဗြံထွိုင်ႏဟွိုန် ဆွမ်ꩻလွေꩻထိုꩻလဲဉ်း ဝွေꩻဖူးခိုပိုနဝ်ꩻ ဝွေꩻဟဲ့ꩻစုလိုꩻ တွိုက်ꩻစဲ့ꩻယံ ကအဝ်ႏဒါႏ ဝွေꩻစခန်ꩻကို ၃၁၈ဖြာꩻတဲင် ခြေင်းလွဉ်ꩻစွဉ်ႏ ခွန်တန်လစ်ꩻပါꩻ ဆꩻချာ ဗꩻတွိုႏလွေꩻစွဉ်ႏ ဒန်ဝေင်ꩻသွူ။ 15နဝ်ꩻကိုနဝ်ꩻ ဖဖြယ် ဝွေꩻလိုꩻစွိုꩻတဲင် နွို့တွိုက်ꩻခေ့ꩻနေး ရန်ႏသူႏ နဝ်ꩻမ အောင်ႏနွောင်ꩻစွဉ်ႏသွူ။ ဝွေꩻခြေင်းတွိုက်ꩻလွဉ်ꩻ တွိုႏညာꩻလွေꩻစွဉ်ႏ ဒမာသကတ်ဝေင်ꩻဖဲ့ꩻထင်ꩻ၊ ဟောဘဝေင်ꩻ 16တဲင်ပါကထူႏလွေꩻဒါႏ ထာꩻခြိုꩻဖုံႏနဝ်ꩻ လꩻချာလို့စွဉ်ႏသွူ။ ဝွေꩻလꩻချာ ဝွေꩻဖူးခိုပို လောတတွမ်ႏ အထာꩻခြိုꩻဥစ္စာႏဖုံႏ၊ တဲ့ꩻနဝ်ꩻ ပါꩻကဆွမ်ꩻလွေꩻဒါႏ လိုꩻမူႏဖုံႏတွမ်ႏ လိုꩻလင်ဖုံႏတဲ့ꩻနဝ်ꩻ ဟဲ့ꩻသဲင်ꩻချာယင်းသွူ။
မာလခိသေဒဲက်ဖေႏအာဗြံမင်္ဂလာႏ
17အာဗြံအောင်ႏနွောင်ꩻ ခူဒူလဝ်းမဲ ခွန်တန်တွမ်ႏ ခွန်တန် အလင်ဖုံႏထွူ အဝ်ႏစဲ့ꩻပွယ်ꩻ သဲင်ꩻလွဉ်ချာချိန်ႏ သောဒုံခွန်တန် အီႏကျိုႏဆွုမ်ႏဝွေꩻနဝ်ꩻ ထန်ႏလွေꩻစွဉ်ႏ သျာဝွေ ထာꩻခြောင်ႏ (ခွန်တန်ခြောင်ႏတဲ့ꩻ ဟဲ့ꩻသွူ)၊ 18#ဟေဗြဲ ၇:၁–၁၀။ ထွာအထိုသွတ်ꩻ ဗွေႏဘုရာꩻ အယဇ်ပရောဟိတ်တွော့ꩻ ထွာပါက သာလဲမ်ခွန်တန် မာလခိသေဒဲက် အီလွဉ် တခိုးပေါင်မုတ် တွမ်ႏဝုဲင်အာဗြံထျꩻသွူ၊ 19ဝွေꩻဖေႏ အာဗြံ မင်္ဂလာႏရိုꩻ၊ “အထိုသွတ်ꩻ ဗွေႏဘုရာꩻ ကဖန်ဆင်ꩻ မာꩻထွာလွဉ်ဒါႏ မို့ꩻတွမ်ႏဟံႏနဝ်ꩻ ယံကဖေႏသွော့ အာဗြံမင်္ဂလာႏ၊၊ 20နာꩻဖေႏကအောင်ႏနွောင်ꩻ နာꩻရန်ႏသူႏ အကအပ်ဖေႏဒါႏ နာꩻစူကို အထိုသွတ်ꩻ ဗွေႏဘုရာꩻ အဂွုဏ်ႏတောႏ ကေꩻဇူꩻနဝ်ꩻ ယံကအုပ်ꩻထင်ႏ သွော့” နုဲင်းနဝ်ꩻသွူ။ အာဗြံနဝ်ꩻတဲ့ ကသိမ်ꩻလꩻလွဉ်ဒါႏ ထာꩻခြိုꩻဥစ္စာႏ ကားကအဝ်ႏ အပွန်းတဆီ တပွန်းနဝ်ꩻ လူႏဖေႏစွဉ်ႏ ယဇ်ပရောဟိတ် ခွန်တန်မာလခိသေဒဲက်နဝ်ꩻသွူ။
21သောဒုံခွန်တန် ရိုꩻဖေႏအာဗြံ၊ “နာꩻကသိမ်ꩻလဲဉ်းဒါႏ ထာꩻခြိုꩻ ကားကအဝ်ႏနဝ်ꩻ နာꩻထူႏထိုꩻလို့ခန်းဟုဲင်း ဖေႏချာငါ ခွေလိုꩻငါ” နုဲင်းနဝ်ꩻသွူ။
22နဝ်ꩻထွူ အာဗြံလဝ်းချာ၊ “ခွေတွိုင်ႏတယ်ႏနေးတွမ်ႏ ထာဝရဘုရာꩻ အထိုသွတ်ꩻ ဗွေႏဘုရာꩻ၊ ကဖန်ဆင်ꩻ မာꩻထွာလွဉ်ဒါႏ မို့ꩻတွမ်ႏဟံႏ အဗွေႏ၊ 23နာꩻထာꩻခြိုꩻနဝ်ꩻ လူႏယွို့တလီး ခင်ႏဖါႏတဒဲင် ဖြွီꩻငါတဲ့ ခွေအီႏတထူႏတဝ်း၊ နုဲင်းနဝ်ꩻမꩻ ‘ပါꩻအဖြာꩻကမာꩻခွေဖေႏဒါႏအာဗြံနဝ်ꩻ ထွာခွေ’ ဖေႏနေးနာꩻကရိုꩻနွောင်ꩻမွိုန်း နုဲင်းနဝ်ꩻသွူ။ 24ခွေနမ်းတာႏနဝ်ꩻ တစွိုးတမျိုꩻငါတဲ့ꩻ ခွေတထူႏတဝ်း၊ ပေါ့ꩻလွို ခွေလိုꩻဖုံႏ ကသွုံꩻစွဲꩻလဲဉ်းဒါႏနဝ်ꩻ မတ်သွော့ ခွေထူႏတဲင် ခွေမဟာမိတ် အာနေရ၊ အဲက်သျီခေါလာတွမ်ႏ မံရေ ကလꩻထွိုက် လꩻသင်ꩻဖုံႏနဝ်ꩻ မဉ်ႏမဉ်ဖန်းလို့ဝင်ꩻတဲ့ꩻ ဖန်းခန်းတယဝ်း” နုဲင်းနဝ်ꩻသွူ။
ទើបបានជ្រើសរើសហើយ៖
ကမ္ဘာႏစ 14: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.