တမန်ႏတောႏ 23
23
1ပေါလု ထွားစွို့ꩻငါလွေꩻ ကောင်စီစွိုꩻဖုံႏတဲင်ဒေါ့ꩻ၊ ‘ခွေသွꩻ ဣသရေး လိုꩻမျိုꩻဖုံႏ၊ ပွိုင်းဝွို့တွမ်ႏ ခွေကအဝ်ႏအုံဒါႏ ဗွေႏဘုရာꩻဆꩻငါ အနယ်နဝ်ꩻ ဗꩻတွိုႏစွဉ်ႏ ဟန်ႏနီꩻယို ခွေဩတ္တပ္ပသꩻ အဝ်ႏကြောင်းစင်ဒျာႏ” နုဲင်းနဝ်ꩻသွူ။ 2လိုꩻကအဝ်ႏအုံထွိုင်ႏ ဗော့ꩻဒါႏ ပေါလု ဖေႏကတွဲႏ ပေါလုဖြောင်းနဝ်ꩻ ယဇ်ပရောဟိတ်ခွန် အာနာနိ ဖေႏအမိန်းသွူ။ 3#မ ၂၃:၂၇၊ ၂၈။ ပေါလုဒေါ့ꩻဖေႏဝွေꩻ၊ “နာꩻနဝ်ꩻထွာ ထာꩻဆေင်ႏတန်ꩻတွိုင်ꩻ သူႏဗွါထွန်၊ နာꩻအုံလင်ꩻ နဝ်ꩻကိုတွော့ꩻ စီႏရင်ႏဒါႏခွေနဝ်ꩻ ဖေႏကမဲဉ်ႏလွဉ်ꩻစွဉ်ႏ တရာꩻဥပဒေႏ အတွိုင်ꩻမွိုင်၊ ကွဲႏတွော့ꩻ စွဉ်ႏနာꩻကဖေႏ ဝွေꩻသီးအမိန်း တွဲႏခွေနဝ်ꩻ နာꩻယားကုဲင် တရာꩻဥပဒေႏတဲင် ဗွေႏဘုရာꩻ အီႏတွဲႏမွေးနာꩻ” နုဲင်းနဝ်ꩻသွူ။
4ပါꩻခို ကအဝ်ႏဗော့ꩻဒါႏ ပေါလုနဝ်ꩻ ဒေါ့ꩻဖေႏဝွေꩻ၊ “နာꩻအဝ်ႏကဲ့ꩻရဲ့ꩻဗာႏတွိုႏ ဗွေႏဘုရာꩻ ယဇ်ပရောဟိတ်ခွန် နုဲင်းမုဲင်ꩻဟောင်း” နုဲင်းနဝ်ꩻသွူ။
5 #
ထလ ၂၂:၂၈။ ပေါလုလဝ်းချာ၊ “ခွေသွꩻ ဣသရေး လိုꩻမျိုꩻဖုံႏ၊ ဝွေꩻအဝ်ႏထွာ ယဇ်ပရောဟိတ် ခွန်တန်ကျောင်ꩻနဝ်ꩻ ခွေတသေတဝ်းသွူ။ လိတ်ကျမ်ꩻနဝ်ꩻရိုꩻ၊ ‘လိုꩻကအုပ်စိုꩻဒါႏ သီနဝ်ꩻ သီတဒေါ့ꩻကုဲင်ဗာႏတဝ်း’” နုဲင်းနဝ်ꩻသွူ။
6 #
တ ၂၆:၅၊ ဖိ ၃:၅။ လိုꩻစွိုꩻယင်ဟန်ႏ အဝ်ႏထွာသာဒုကဲတွမ်ႏ အလင်ဖုံႏ အဝ်ႏထွာ ဖါရိသဲဖုံႏ ပေါလုထွိုင်ႏသေနဝ်ꩻ ဝွေꩻခြောဝ်ထန်ႏ ကောင်စီပွယ်ꩻအုံကွံကို၊ “သွꩻဣသရေး လိုꩻမျိုꩻဖုံႏ၊ ခွေနဝ်ꩻထွာ ဖါရိသဲအပိုခို၊ ထွာဒျာႏ ဖါရိသဲတဖြာꩻသွူ။ ကွပ်ပွိုး အဝ်ႏထာꩻသီ အီႏထွိုင်ႏမွန်ချာနဝ်ꩻ ခွေအဝ်ႏမောင်ꩻ ခွေအဝ်ႏခံဗာႏ အစဲစ်ဆေꩻယိုကို” နုဲင်းနဝ်ꩻသွူ။
7ဝွေꩻဒေါ့ꩻနုဲင်းယိုထွူ တလဲင်ႏချင်ႏ ဖါရိသဲဖုံႏတွမ်ႏ သာဒုကဲသီးဖုံႏနဝ်ꩻ စတဲင် ထေင်ငဝ်းအာ လို့စွဉ်ႏဝင်ꩻတွော့ꩻ အစွိုꩻလီစွဉ်ႏ နီခဝ်နဝ်ꩻသွူ။ ( 8#မ ၂၂:၂၃၊ မာ ၁၂:၁၈၊ လု ၂၀:၂၇။ လိုꩻဖုံႏနဝ်ꩻ အဝ်ႏထာꩻသီကို အီႏတထွိုင်ႏမွန်ချာတဝ်းတဲင် မို့ꩻလောင်းတမန်ႏ တဲ့နဝ်ꩻ ဝိညာဉ်ႏတဲ့နဝ်ꩻ တအဲဉ်ထဝ်း ပွိုးသာဒုကဲသီးဖုံႏ အဝ်ႏရိုꩻဒျာႏ နုဲင်းနဝ်ꩻ၊ ကွဲႏတွော့ꩻ ဖါရိသဲဖုံႏနဝ်ꩻ အဝ်ႏယွုမ်းလို့ဒျာႏ ယိုသွံစွိုးသွူ။) 9ကအဝ်ႏခြောဝ်ထာꩻနဝ်ꩻ ကယိန်းသန်လွဉ်တဲင် ကျမ်ꩻဒါႏဆရာႏဖုံႏ ယင်ဟန်ႏ ကဆဲင်ႏဒါႏ ဖါရိသဲစွုမ်ꩻစွိုꩻနဝ်ꩻ အုံထွိုင်ႏတွော့ꩻ ဆန်ချာမွေးနေးစွဉ်ႏ၊ “ပါꩻခိုယိုနဝ်ꩻ နီတမော့ꩻတဝ်း အပဲစ် တစွိုးစွိုး၊ ထွာနွောင်ꩻဒျာႏ ဝိညာဉ်ႏတပါꩻပါꩻ မဉ်ႏမွေးတဝ်း မို့ꩻလောင်းတမန်ႏ တပါꩻပါꩻ အအွဉ်ႏဒေါ့ꩻဒါႏဝွေꩻ” နုဲင်းနဝ်ꩻသွူ။
10ဝွေꩻသီး ငဝ်းအာ ထေင်လို့ဝင်ꩻနဝ်ꩻ ကယိန်းဟုဲင်း ကျံꩻလွဉ်နဝ်ꩻမꩻ စဲ့ꩻပိုႏတန်နဝ်ꩻ အဝ်ႏငမ်းသꩻ လိုꩻဖုံႏထွို့ꩻငင်ႏထိုꩻ ပေါလု ပဉ်ခဝ်ခဝ်နဝ်ꩻသွူ။ နဝ်ꩻမꩻ ဖေႏကဟဲ့ꩻလွေꩻညာꩻထိုꩻ ပေါလု ဝွေꩻသီးကိုတဲင် ဖေႏကဟဲ့ꩻလွေꩻသော့ꩻ ဝွေꩻယဲꩻတွိုက်ကိုနဝ်ꩻ ဝွေꩻဖေႏစွဉ်ႏ ဝွေꩻစဲ့ꩻသားဖုံႏ အမိန်းသွူ။
11အဟာနဝ်ꩻ ဗွေႏဘုရာꩻ အုံထွိုင်ႏ ပေါလုထျꩻတဲင်ဒေါ့ꩻ၊ “တွမ်ႏငမ်းသꩻမွိုန်း၊ ခွေတာႏ နာꩻကအဝ်ႏခံႏဖေႏ သက်သေႏ ဝေင်ꩻယေရုသလမ်ႏကို ယိုအတွိုင်ꩻ ဗွိုန်နုဲင်းနဝ်ꩻနေနေ ရောမဝေင်ꩻကို နဝ်ꩻတဲ့ နာꩻအီႏခံႏဖေႏဗာႏ” နုဲင်းနဝ်ꩻသွူ။
ကျံႏမာꩻသီတေ့ꩻပေါလုအသက်
12တွိုႏနုဲင်းမွူးရဝ်ꩻ ဂျူးလိုꩻမျိုꩻဖုံႏ ယင်ဟန်ႏ မော့ꩻခွဲစုဗူႏလို့ဝင်ꩻ မာꩻစွဉ်ႏ အစီႏစဲဉ်ႏ တစွိုးသွူ။ ဗꩻတွိုႏစွဉ်ႏ မာꩻသီဗာႏတဝ်း ပေါလုနဝ်ꩻ ဝွေꩻသီး အီႏတအံႏအွꩻတဝ်း ထာꩻတစွိုးစွိုးနဝ်ꩻ ဝွေꩻသီးတွိုင်ႏတယ်ႏ ခံႏစွဉ်ႏ ဂတိ တစွိုးနဝ်ꩻသွူ။ 13ကစုဗူႏကျံႏတေ့ꩻ နုဲင်းယို နဝ်ꩻကို လိုꩻအဝ်ႏအဖြာꩻ လစ်ꩻဆီလွိုရပ်နဝ်ꩻသွူ။ 14နဝ်ꩻထွူ၊ ဝွေꩻသီးလွေꩻထေ့ ယဇ်ပရောဟိတ် တန်ဖုံႏတွမ်ႏ ဘာႏသာႏရေꩻ လိုꩻတန်ဖုံႏထျꩻတဲင်ဒေါ့ꩻ၊ “ဗတွိုႏစွဉ်ႏ နီတမာꩻသီဗာႏတဝ်း ပေါလုနဝ်ꩻ နီတအံႏတအွꩻတဝ်း တစွိုးစွိုးနဝ်ꩻ နီတွိုင်ႏတယ်ႏ အွဉ်ႏဂတိငီꩻလို့ဝင်ꩻ နဝ်ꩻသွူ။ 15နဝ်ꩻမꩻ ယိုခါ မာꩻနုဲင်းဒျာႏ နီဗွေႏ မဉ်သေစဲင်း ဝွေꩻအခရာႏတွော့ꩻ ဖေႏကထေထန်ႏလင်ꩻလွဉ် ပေါလု နီဗွေႏထျꩻနဝ်ꩻ နီဗွေႏတွမ်ႏ လွတ်တောႏကောင်စီနဝ်ꩻ ပသာထေ့ဖေႏသွော့ငဝ်း ရောမပိုႏတန်ထျꩻ နဝ်ꩻသွူ။ ကွဲႏတွော့ꩻ ခလားဝွေꩻကဖျော်လွဉ် ယိုကို အီႏမာꩻသီထိုꩻဝွေꩻနဝ်ꩻ နီအီႏဖျင်ရဲဉ်ꩻသေꩻမꩻ” နုဲင်းနဝ်ꩻသွူ။
16ကွဲႏတွော့ꩻ ကျံႏမာꩻသီတေ့ꩻ ပေါလုခရာႏနဝ်ꩻ ပေါလုဖူးမူႏ၊ အပိုခိုဟွိုန်စွဉ်ႏသွူ။ နဝ်ꩻမꩻ ဝွေꩻလွေꩻစဲ့ꩻတပ်ယဲꩻတွိုက်တဲင် ဒေါ့ꩻနယ်စွဉ်ႏ ပေါလုသွူ။ 17နဝ်ꩻထွူ ပေါလုဟဲ့ꩻစဲ့ꩻပိုႏ တဖြာꩻတဲင် ဒေါ့ꩻဖေႏဝွေꩻ၊ “ပါꩻခိုပေႏယိုနဝ်ꩻ ဟဲ့ꩻလွေꩻထေ့သွော့ စဲ့ꩻပိုႏတန်ထျꩻဟုဲင်း။ ဝွေꩻအဝ်ႏလိုႏ ဒေါ့ꩻနယ်ဖေႏ စဲ့ꩻပိုႏတန် အဝ်ႏတစွိုး” နုဲင်းနဝ်ꩻသွူ။ 18စဲ့ꩻပိုႏဟဲ့ꩻဝွေꩻ၊ အွဉ်လွေꩻဝွေꩻ စဲ့ꩻတပ်ပိုႏတန် ထျꩻတွော့ꩻဒေါ့ꩻ၊ “ပွိုးတွော့ꩻ ဝွေꩻအဝ်ႏလိုႏ ဒေါ့ꩻနယ်ဖေႏ နီပိုႏတန် အဝ်ႏတစွိုးနဝ်ꩻမꩻ ထောင်ႏသားပေါလုနဝ်ꩻ ဟဲ့ꩻခွေတွော့ꩻ အွဉ်ႏဟဲ့ꩻလွဉ် ပါꩻခိုပေႏယို ပိုႏတန်ထျꩻ” နုဲင်းနဝ်ꩻသွူ။
19စဲ့ꩻပိုႏတန် စွီႏဝွေꩻစူ အွဉ်ထန်ႏဝွေꩻ ထာꩻယဉ်ခင်ႏလမ်းတဲင် ရီဝွေꩻ၊ “နာꩻအဝ်ႏလိုႏဒေါ့ꩻနယ်ခွေ တမုဲင်ꩻဟောင်း” နုဲင်းနဝ်ꩻသွူ။
20ဝွေꩻဒေါ့ꩻ၊ “ကဉ်းမာꩻနုဲင်း ကောင်စီစွိုꩻ မဉ်သေစဲင်း ဝွေꩻခရာႏတွော့ꩻ ဖေႏကဟဲ့ꩻလင်ꩻပေါလု ကောင်စီစွိုꩻထျꩻ မွူးရဝ်ꩻနီꩻနဝ်ꩻ အီႏကွီနီစဲ့ꩻပိုႏတန်တဲင် ဂျူးအာႏဏာႏပဲင်ႏ သားဖုံႏ သဘော်ꩻတူႏ လို့လဲဉ်းဝင်ꩻသွူ။ 21ကွဲႏတွော့ꩻ တွမ်ႏနာႏမွိုန်းတဝ်း ဝွေꩻသီးငဝ်း၊ ပွိုးတွော့ꩻ နဝ်ꩻကို လိုꩻခိုအဖြာꩻ လစ်ꩻဆီလွို အီႏအုံငိပ်ꩻ ပွေါးတေ့ꩻဝွေꩻနဝ်ꩻသွူ။ ပေါႏဝွေꩻသီး တမာꩻသီဗာႏတဝ်း ပေါလုနဝ်ꩻ အီႏတအံႏတဝ်း တအွꩻတဝ်းနဝ်ꩻ ဝွေꩻသီး အဝ်ႏမာꩻသေꩻခါꩻလဲဉ်း ဂတိ တစွိုးသွူ။ ယိုခါ ဝွေꩻသီး အီႏမာꩻသီ ပေါလုနဝ်ꩻ အဝ်ႏဖျင်ရဲဉ်ꩻတဲင် အဝ်ႏမောင်ꩻ နီပိုႏတန် ထာꩻဆွုံꩻဖျတ်” နုဲင်းနဝ်ꩻသွူ။
22စဲ့ꩻပိုႏတန်ဒေါ့ꩻ၊ “နာꩻကဒေါ့ꩻဟွိုန် ဖေႏဒါႏခွေ နုဲင်းယိုနဝ်ꩻ တွမ်ႏအွဉ်ႏဒေါ့ꩻနယ်မွိုန်း ပါꩻတဖြာꩻဖြာꩻဟုဲင်း” နုဲင်းနဝ်ꩻတဲင် ဝွေꩻအွဉ်ႏစွꩻညာꩻထိုꩻစွဉ်ႏ ပါꩻခိုပေႏနဝ်ꩻသွူ။
ပေါလုနဝ်ꩻပသာထေ့လွေꩻခွန်ခံႏဖေလစ်ထျꩻ
23တွိုႏနဝ်ꩻ စဲ့ꩻပိုႏတန် ဟဲ့ꩻဝွေꩻစဲ့ꩻပိုႏ ဝင်ꩻနီတွော့ꩻ ဒေါ့ꩻ၊ “ကအီႏလွေꩻ ဝေင်ꩻကဲသရိနဝ်ꩻ ဖျင်ရဲဉ်ꩻသေꩻမꩻ စဲ့ꩻသား၂၀ဝ၊ ပါစွဉ်ႏသေတပ် နွတ်ꩻဆီ၊ စွဉ်ႏဗင်တပ်၂၀ဝတဲင် ဖေႏကထန်ႏဗာႏ ဟန်ႏနာꩻ ကွတ်ꩻနားရီႏနဝ်ꩻ ဖျင်ရဲဉ်ꩻသေꩻဟုဲင်း။ 24ပေါလုတာႏနဝ်ꩻတဲ့ ဖျင်သေꩻမꩻဖေႏ သေထုမ်းတဲင် ထိန်ꩻထွား ရံႏဟဝ်ဟဝ်လွေꩻ ဝွေꩻယို ဗꩻတွိုႏလွေꩻစွဉ်ႏ ခွန်ခံႏဖေလစ်ထျꩻဟုဲင်း” နုဲင်းနဝ်ꩻသွူ။ 25နဝ်ꩻထွူ စဲ့ꩻပိုႏတန် တဲမ်းထေ့လွေꩻဖေႏ လိတ်တစောင်ႏ နုဲင်းယိုသွူ။
26“အဝ်ႏကလောဒိ လုသိထျꩻ တွမ်ႏထာꩻရိုႏသေႏနဝ်ꩻ တဲမ်းထေ့ဖေႏဒျာႏ နီဗွေႏခွန်ခံႏ ဖေလစ်နဝ်ꩻသွူ။ ယံကအုံဟဝ် ခြွိုင်ႏသန်ꩻသွော့။ 27ဂျူးလိုꩻမျိုꩻဖုံႏနဝ်ꩻ ဆွမ်ꩻပါꩻခိုယိုတဲင် ရေႏမာꩻသီထိုꩻ ဝွေꩻနဝ်ꩻသွူ။ ဝွေꩻနဝ်ꩻထွာ ရောမခမ်းရင်ꩻသား တဖြာꩻကျောင်ꩻ ခွေအဝ်ႏသေသွူ။ နဝ်ꩻမꩻ ခွေစွဉ်ႏ ခွေစဲ့ꩻသားဖုံႏနဝ်ꩻ လွေꩻတွော့ꩻ ကယ်ႏဝွေꩻနဝ်ꩻသွူ။ 28နုဲင်းဂျူးလိုꩻမျိုꩻဖုံႏ ကအဝ်ႏစွဲꩻတရာꩻ ဝွေꩻနဝ်ꩻ ခွေမဉ်သေနဝ်ꩻမꩻ ခွေဟဲ့ꩻလင်ꩻဝွေꩻ ဝွေꩻသီး ကောင်စီ တရာꩻရွုမ်ꩻကို နဝ်ꩻသွူ။ 29ဝွေꩻယို ကအီႏခံႏထွိုက် ထာꩻသီတံႏ၊ မဉ်ႏတမွေးတဝ်း ကအီႏအဝ်ႏခံထွိုက် ထောင်ႏနဝ်ꩻ ဝွေꩻတမာꩻတဝ်း အမုပဲစ် တစွိုးစွိုးကျောင်ꩻ ခွေထီႏဗာႏသွူ။ ကစွဲꩻတရာꩻ ဝွေꩻနဝ်ꩻ ပွိုင်းဝွို့ဒျာႏ ဝွေꩻသီးနမ်း ပညတ်တရာꩻဖုံႏသွူ။ 30တဲင်ခွေထွိုင်ႏလꩻသတင်ꩻ ဝွေꩻသီး ကျံႏမာꩻသီတေ့ꩻထိုꩻ ဝွေꩻနဝ်ꩻ တလဲင်ႏချင်ꩻ ခွေအီႏပသာထေ့ဝွေꩻ နီဗွေႏထျꩻနဝ်ꩻ ခွေဆွုံꩻဖျတ်သွူ။ ဖေႏဝွေꩻသီး ကခေးပြဲင်ႏဒျာႏဝွေꩻ တရာꩻ နီဗွေႏဆꩻငါနဝ်ꩻ ခွေဒေါ့ꩻနယ်ဖေႏ ကစွဲꩻတရာꩻဒါႏ ဝွေꩻသား” နုဲင်းနဝ်ꩻသွူ။
31ကမိန်းဖေႏဒါႏ ဝွေꩻသီး အတွိုင်ꩻနဝ်ꩻ စဲ့ꩻသားဖုံႏနဝ်ꩻ အဝ်ႏဆောင်ႏရွက်မာꩻလွေꩻစွဉ်ႏသွူ။ ဝွေꩻသီးဟဲ့ꩻ ပေါလုတဲင် အနာꩻနဝ်ꩻ ဟဲ့ꩻလွေꩻဝွေꩻ တွိုႏညာꩻလွေꩻစွဉ်ႏ ဝေင်ꩻအန္တိပတရိနဝ်ꩻသွူ။ 32ဆုဲင်ꩻတနီꩻ စဲ့ꩻသား ကထောင်ခင်ႏလွေꩻနေးသားနဝ်ꩻ သဲင်ꩻချာ အစဲ့ꩻတပ်တဲင် ကအဝ်ႏကုဲင် သေတပ်သားဖုံႏနဝ်ꩻ လွေꩻငီꩻသွုပ်စွဉ်ႏ ဝွေꩻနဝ်ꩻသွူ။ 33သေတပ်သားဖုံႏနဝ်ꩻ ဟဲ့ꩻလွေꩻဝွေꩻ ဝေင်ꩻကဲသရိကိုတဲင် လိတ်နဝ်ꩻ ဖေႏထေ့စွဉ်ႏ ခွန်ခံႏတွော့ꩻ ပေါလုနဝ်ꩻ အပ်ဖေႏစွဥ်ႏ ဝွေꩻစူကိုနဝ်ꩻသွူ။ 34ခွန်ခံႏနဝ်ꩻ ဖတ်လိတ်တဲင် ဝွေꩻအဝ်ႏခမ်းမုဲင်ꩻလွဉ်နဝ်ꩻ ရီပေါလုသွူ။ ပေါလုနဝ်ꩻ အဝ်ႏကိလိကိခမ်း လွဉ်ကျောင်ꩻ ဝွေꩻထွိုင်ႏသေနဝ်ꩻ၊ 35ဝွေꩻဒေါ့ꩻ၊ “ကစွဲꩻတရာꩻဒါႏ နာꩻသား မဉ်ႏဖျော်လွဉ်ချိန်ႏ ခွေအီႏနာႏခံႏနာꩻ” နုဲင်းနဝ်ꩻထွူ ဖေႏကထိန်ꩻခါꩻ ပေါလု ခွန်ခံႏအဟော်နန်ꩻ ပတ္တဝွိုင်ꩻ စဲ့ꩻတပ်ကိုနဝ်ꩻ ဝွေꩻဖေႏအမိန်းသွူ။
ទើបបានជ្រើសរើសហើយ៖
တမန်ႏတောႏ 23: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
