တမန်ႏတောႏ 24
24
စွဲꩻတရာꩻဆန်ဒါႏပေါလုအမု
1ငတ်ꩻနီꩻထွူ ယဇ်ပရောဟိတ်ခွန် အာနာနိ ပါတွမ်ႏဘာႏသာႏရေꩻ လိုꩻတန်ဖုံႏ ယင်ဟန်ႏစွဉ်ႏ ဆေ့နေႏတဖြာꩻ မဉ်ꩻတေရတုလုနဝ်ꩻ လွေꩻစွဉ်ႏ ဝေင်ꩻကဲသရိနဝ်ꩻသွူ။ ဝွေꩻသီးဖျော်လွဉ် ခွန်ခံႏဖေလစ်ꩻ ဆꩻငါတဲင် ဝွေꩻသီးစွဲꩻတရာꩻ ဆန်ချာစွဉ်ႏ ပေါလုနဝ်ꩻသွူ။ 2တွိုႏနဝ်ꩻ ဟဲ့ꩻသော့ꩻ ပေါလုကောင်းကိုတဲင် ဆေ့နေႏ တေရတုလု စွဲꩻတရာꩻစွဉ်ႏဝွေꩻ နုဲင်းဆꩻလယိုနဝ်ꩻသွူ။
“ယံဖေႏ နီဗွေႏ ဘွုန်ꩻသရေႏတောႏ ကတန်ထိုသွော့၊ နီဗွေႏနဝ်ꩻထွာ ခေါင်းဆောင် ဉာဏ်ႏအဝ်ႏတဖြာꩻ နဝ်ꩻမꩻ နီအုံအဝ်ႏ ငိမ်ꩻချမ်ꩻသာႏယာႏဗာႏ အချိန်ႏကာႏလ ညငါႏလဲဉ်းတဲင် အဝ်ႏဖျင်ဟဝ်တသာ ပြောင်ꩻကြုဲင်ꩻဖေႏ နီခမ်းထီတာႏ အကျိုꩻဟဝ်မျတ်ဖုံႏနဝ်ꩻ အာငါႏသွူ။ 3ယိုနဝ်ꩻ နီအဝ်ႏလက္ခံႏ ဆွမ်ꩻဒျာႏ ခင်ႏလမ်းစွုမ်ႏထွောင်း တချိန်ႏလွုမ်းတဲင် နီအဝ်ႏကေꩻဇူꩻတင်ႏ မွေးနေးစွဉ်ႏ နီဗွေႏနဝ်ꩻသွူ။ 4ခွေသွဉ်းနဝ်ꩻ မဉ်ထူႏညတဝ်း နီဗွေႏအချိန်ႏနဝ်ꩻသွူ။ ကွဲႏတွော့ꩻ နီဗွေႏအွဉ်ႏ ထာꩻယွိုန်းယော သယ်ꩻခံႏသꩻတွော့ꩻ နာႏခံႏဖေႏ နီကဒင်ႏနယ်ဖေႏဒါႏ ငဝ်းအချုပ်ယိုနဝ်ꩻ ခွေသွဉ်း မဉ်တောင်ꩻပြန်ႏ နီဗွေႏ။ 5ပါꩻခိုယိုနဝ်ꩻ မာꩻသျွုတ်တရေင် အန္တရာယ်ႏတန်ထာꩻ တဖြာꩻနဝ်ꩻ နီထီႏသေဗာႏသွူ။ ဝွေꩻနဝ်ꩻတယ်ႏစ ဂျူးလိုꩻမျိုꩻဖုံႏခါႏ မာꩻသျွုတ်တရေင်စွဉ်ႏ တဟံႏတန်လွုမ်းတဲင် ထွာနာဇရဲစ်ဂွိုဏ်ꩻသား ခေါင်းဆောင်တဖြာꩻသွူ။ 6ဝွေꩻကျံႏမာꩻ တဗော့ꩻလဲ့ꩻထိုꩻပါ နီဗိမာန်ႏတောႏကျောင်ꩻ နဝ်ꩻမꩻ နီဆွမ်ꩻဝွေꩻနဝ်ꩻသွူ။ 7ကွဲႏတွော့ꩻ စဲ့ꩻပိုတန် လုဲင်သိယပ်လွဉ်တဲင် မာꩻကျမ်ꩻကြမ်ꩻ သန်မွေးစွဉ်ႏထာꩻတွော့ꩻ အဝ်ႏနီထျꩻ ဟဲ့ꩻလွေꩻထိုꩻစွဉ်ႏဝွေꩻသွူ။ 8နီဗွေႏ မဉ်ႏရီစဲစ်ဆေꩻ ပါꩻခိုယိုနဝ်ꩻ နီကအဝ်ႏစွဲꩻတရာꩻဒါႏ ဝွေꩻအခရာႏ ကားကအဝ်ႏနဝ်ꩻ နီဗွေႏနမ်းအီႏသေ နွောင်ꩻဒျာႏ” နုဲင်းနဝ်ꩻသွူ။ 9ထာꩻယိုကားကအဝ်ႏနဝ်ꩻ ထွာအမဲဉ်ႏဒျာႏကျောင်ꩻ ဂျူးလိုꩻမျိုꩻဖုံႏ ကပေါင်ꩻငီꩻသော့ꩻဒါႏ ကောစွဲꩻတရာꩻသား အကိုနဝ်ꩻ ဒေါ့ꩻနုဲင်းနဝ်ꩻသွူ။
ပေါလုဒေါ့ꩻရဲကာႏကွယ်ႏချာအနမ်းခွန်ဖေလစ်ဆꩻငါ
10နဝ်ꩻထွူ ပေါလု ဖေႏကဒေါ့ꩻနဝ်ꩻ ခွန်ခံႏယွိုင်ႏနယ် အစူတွော့ꩻ ပေါလုဒေါ့ꩻ၊
“နီခွန် အဝ်ႏစီႏရင်ႏ တရျားဖေႏဒျာႏ လိုꩻမျိုꩻနုဲင်းယိုဖုံႏနဝ်ꩻ နေင်ႏပေါင်ꩻ အာငါႏလဲဉ်းနဝ်ꩻ ခွေသွဉ်းအဝ်ႏသေသွူ။ နဝ်ꩻမꩻ ကအီႏဒေါ့ꩻ ရဲကာႏကွယ်ႏချာဗာႏ ခွေသွဉ်းနမ်းတာႏ နီဗွေႏဆꩻငါနဝ်ꩻ ခွေသွဉ်းသꩻပျောႏငါႏသွူ။ 11ကအီႏ ဝုဲင်ႏကိုꩻကွယ်ႏဘုရာꩻ ခွေသွဉ်း ကလွေꩻလဲဉ်းဒါႏ ဝေင်ꩻယေရုသလမ်ႏနဝ်ꩻ တလွိုကယ်ꩻတဝ်း တဆီနီနီꩻနဝ်ꩻ နီဗွေႏနမ်း မဉ်ႏစော်ႏတနာႏနဝ်ꩻ နီဗွေႏ အဝ်ႏသေနွောင်ꩻဒျာႏသွူ။ 12ဗိမာန်ႏတောႏ ကျောင်ꩻကိုတဲ့နဝ်ꩻတရာꩻစရွပ်ကို တဲ့နဝ်ꩻ၊ မဉ်ႏမွေးတဝ်း ဝေင်ꩻကိုခင်ႏလမ်း အလင် မုဲင်ꩻကိုတယဝ်း ခွေသွဉ်း တမာဖေႏအာႏလိုꩻဖုံႏ စွဉ်ႏပါꩻတဖြာꩻဖြာꩻ ငဝ်းအာလို့ဝင်ꩻ စွဉ်ႏခွေသွဉ်းနဝ်ꩻ ဂျူးလိုꩻမျိုꩻဖုံႏ တမော့ꩻဗာႏဖိုတဝ်းသွူ။ 13ဝွေꩻသီး ကစွဲꩻတရာꩻ ဆန်ချာဒါႏခွေ ယိုခါနဝ်ꩻတဲ့ ဝွေꩻသီး တအွဉ်ႏနယ်နွောင်ꩻတဝ်း သက်သေႏဖုံႏသွူ။ 14ခွေသွဉ်း ကအဝ်ႏဝုဲင်ႏ ကိုꩻကွယ်ႏဒါႏ နီမွိုးဖြားဖါဖြားသီး ဗွေႏဘုရာꩻယိုစွဉ်ႏ ကအဝ်ႏထောင်လွဉ်ꩻဒါႏ အနယ်နဝ်ꩻ ဝွေꩻသီးရိုꩻဒျာႏ အမာႏနဝ်ꩻ ခွေသွဉ်း အဝ်ႏဝွန်ႏခံႏဒျာႏ နီခွန်။ ကွဲႏတွော့ꩻ ကတဲမ်းခါꩻဒါႏ မောသျေပညတ်ကျမ်ꩻတွမ်ႏ ပရောဖဲစ်ကျမ်ꩻအုပ်ဖုံႏ နဝ်ꩻတဲ့ ခွေသွဉ်း အဝ်ႏယွုမ်းပါဒျာႏကသွူ။ 15ဗွိုန်နုဲင်း ဝွေꩻသီးနမ်းဖုံႏယို ကအဝ်ႏမောင်ꩻဒါႏ ဗွေႏဘုရာꩻနဝ်ꩻ ခွေသွဉ်းတဲ့ အဝ်ႏမောင်ꩻသွူ။ အမဉ်ꩻစွဉ်ႏအမဉ်ꩻဒျာႏ လိုꩻဖုံႏ ကားကအဝ်ႏနဝ်ꩻ အဟဝ်စွဉ်ႏ အကုဲင်နီမျိုꩻလွုမ်း အဝ်ႏထာꩻသီကို အီႏထွိုင်ႏမွန်လွဉ် ချာယင်းနဝ်ꩻသွူ။ 16နဝ်ꩻမꩻ ဗွေႏဘုရာꩻဆꩻငါတွမ်ႏ လိုꩻဖုံႏဆꩻငါ ဖေႏကလꩻ ဩတ္တပ္ပသꩻ စင်ဗွါနဝ်ꩻ ခွေသွဉ်းအဝ်ႏမာꩻ သေႏသေႏဒျာႏ အဟဝ်သွတ်ꩻသွူ။
17 #
တ ၂၁:၁၇–၂၈။ “အဝ်ႏဝေင်ꩻယေရုသလမ်ႏ ထန်ႏလွေꩻညာꩻနဝ်ꩻ နေင်ႏပေါင်ꩻ အာငါႏလဲဉ်းသွူ။ ခွေနမ်း လိုꩻမျိုꩻဖုံႏတာႏ အီႏထူႏဖေႏ ရွဉ်ယင်ဟန်ႏတဲင် ဖေႏကပူႏဇောႏဗာႏ ယဇ်ထာꩻပူႏဇောႏ တဲ့နဝ်ꩻ ခွေလွေꩻဗာႏ နဝ်ꩻကိုသွူ။ 18ခွေကမာꩻ ကြောင်းစင်ဝွတ် ထွူချိန်ႏ ကအဝ်ႏ ပူႏဇောႏယဇ် နုဲင်းယိုကျာꩻနဝ်ꩻ ဝွေꩻသီး အဝ်ႏထီႏခွေ ဗိမာန်ႏတောႏ ကျောင်ꩻကိုသွူ။ နဝ်ꩻကိုနဝ်ꩻ လိုꩻစွိုꩻ တအဝ်ႏငီꩻတဝ်း စွဉ်ႏခွေတဲင် ထာꩻသျွုတ်တရေင် တအဲဉ်ထဝ်းသွူ။ 19ကွဲႏတွော့ꩻ အဝ်ႏအာသျနယ်ႏကို ကလွဉ်ဒါႏ ဂျူးလိုꩻမျိုꩻဖုံႏ ယင်ဟန်ႏ အဝ်ႏနဝ်ꩻကိုသွူ။ ဝွေꩻသီး မဉ်ႏစွဲꩻတရာꩻ ဆန်ချာခွေ တစွိုးတမျိုꩻ မဉ်ႏအဝ်ႏနဝ်ꩻ ဝွေꩻသီးနမ်း ဟဝ်လွဉ် နီခွန်ဆꩻငါတဲင် အဝ်ႏလိုႏစွဲꩻတရာꩻသွူ။ 20မဉ်ႏတမွေးတဝ်း နုဲင်းခွေကအဝ်ႏ အုံထွိုင်ႏဒါႏ ကောင်စီဆꩻငါချိန်ႏနဝ်ꩻ ဝွေꩻသီးထီႏလဲဉ်း ခွေမာꩻဗာႏ ရာႏဇဝွတ်မုပဲစ် အမျိုꩻမုဲင်ꩻနဝ်ꩻ အွဉ်ႏသွော့ လိုꩻစားယိုဖုံႏ လွဉ်ယိုကိုတွော့ꩻ ဒေါ့ꩻနယ်သွော့။ 21#တ ၂၃:၆။ ခွေကအုံထွိုင်ႏဗာႏ ဝွေꩻသီး ကောင်စီဆꩻငါချိန်ႏ ပေါႏလွိုသွူ ခွေကခြောဝ်ထန်ႏ၊ ‘ အဝ်ႏထာꩻသီကိုနဝ်ꩻ အီႏထွိုင်ႏမွန် ကရိုꩻဒါႏ ’ ထာꩻယွုမ်းနုဲင်းနဝ်ꩻ တစွိုးအတွက် ခွေအဝ်ႏ ကျိုꩻစာꩻဗာႏ ဗꩻတွိုႏစွဉ်ႏ ဟန်ႏနီꩻ” နုဲင်းနဝ်ꩻသွူ။
22တွိုႏနဝ်ꩻ တရာꩻအထွုံꩻနယ်ꩻ နဝ်ꩻခရာႏ ခွန်ဖေလစ်နဝ်ꩻ အဝ်ႏသေနာႏစဲင်းမွေး အတွက် ကအီႏအွဉ်ႏဆွိုးထိုꩻ ဟွိုန်နာႏ အမုတွဲꩻနဝ်ꩻ ဝွေꩻဒေါ့ꩻဖေႏ ဝွေꩻသီး၊ “စဲ့ꩻပိုႏတန်လုသိ မဉ်ႏဖျော်လွဉ်မꩻ သီအမုယိုနဝ်ꩻ ခွေအီႏဆွုံꩻဖျတ်ဖေႏ” နုဲင်းနဝ်ꩻသွူ။ 23ဖေႏကရံႏဟဝ်ဟဝ် ဝွေꩻတွမ်ႏ ဖေႏကအုံသာႏဗာႏ အခွင်ꩻတွော့ꩻ ဝွေꩻကအဝ်ႏလိုႏဖုံႏနဝ်ꩻတဲ့ ဖေႏဝွေꩻအသွꩻခွဖုံႏ ကလွဉ်ဖေႏနွောင်ꩻ ဝွေꩻအခွင်ꩻနဝ်ꩻ ခွန်ဖေလစ်ꩻ ချဖေႏစွဉ်ႏ စဲ့ꩻပိုႏ ကအဝ်ႏထိန်ꩻထွားဒါႏ ပေါလုနဝ်ꩻ အမိန်းသွူ။
ပေါလုဖျော်ဖေလစ်တွမ်ႏဒြုသိလဆꩻငါ
24မွူးနီꩻထွိုင်ႏညလွဉ် ခွန်ဖေလစ်တွမ်ႏ ဝွေꩻမာ ဒြုသိလ ကထွာဒါႏ ဂျူးလိုꩻမူႏ တဖြာꩻနဝ်ꩻ ဝွေꩻအွဉ်ႏဟဲ့ꩻလွဉ် ပေါလုတဲင် အီႏနာႏဝွေꩻတရာꩻ ပွိုင်းဝွို့တွမ်ႏ ဝွေꩻကဒေါ့ꩻဒါႏ ထာꩻယွုမ်း ဗွေႏယေသျု ခရစ်တောႏ ခရာႏနဝ်ꩻသွူ။ 25ကွဲႏတွော့ꩻ နုဲင်းပေါလု ကအဝ်ႏဟော်ꩻဒါႏ ပွိုင်းဝွို့တွမ်ႏ ထာꩻဟဝ်မျတ်ခရာႏ တဲ့နဝ်ꩻ ဖေႏကထိန်ꩻချွုပ်လꩻ ကာႏမဂွုဏ်ႏခရာႏ တဲ့နဝ်ꩻ ကအီႏလွဉ်ဒါႏ ထာꩻစီႏရင်ႏမွူးနီꩻခရာႏ တဲ့နဝ်ꩻ ဟော်ꩻအုံကွံပါနဝ်ꩻမꩻ ခွန်ဖေလစ်ꩻ ငမ်းသꩻငါႏတဲင်ဒေါ့ꩻ၊ “ယိုခါ နာꩻထန်ႏလွေꩻ လꩻလဲဉ်း။ ဆုဲင်ꩻခွေမဉ်ႏလꩻ အခွင်ꩻအရေꩻမꩻ ခွေဟဲ့ꩻယင်းဒျာႏနာꩻ” နုဲင်းနဝ်ꩻသွူ။ 26အတွင်ꩻနဝ်ꩻ ခွန်ဖေလစ်အဝ်ႏမောင်ꩻ ပေါလုအီႏဖေႏဝွေꩻ ရွဉ်ယင်ဟန်ႏနဝ်ꩻသွူ။ ပွိုးအကျောင်ꩻခရာႏ နုဲင်းယိုအတွက် တဆင်ႏဆင်ႏ ဝွေꩻအဝ်ႏဟဲ့ꩻဒေါ့ꩻရီစွဉ်ႏ ပေါလုနဝ်ꩻသွူ။
27နီနေင်ႏထွိုင်ႏလဲဉ်းထိုꩻနဝ်ꩻ ပေါတိဖေတ္တု ထင်ႏစွဉ်ႏ ခွန်ဖေလစ်ꩻ ခင်ႏလမ်း နုဲင်းခွန်ခံႏနဝ်ꩻသွူ။ ခွန်ဖေလစ်နဝ်ꩻ မဉ်လꩻမဲ့ငါ ဂျူးလိုꩻမျိုꩻဖုံႏထျꩻ နဝ်ꩻမꩻ ဝွေꩻအွဉ်ႏခံခါꩻစွဉ်ႏ ပေါလုထောင်ႏကိုသွူ။
ទើបបានជ្រើសរើសហើយ៖
တမန်ႏတောႏ 24: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
