တမန်ႏတောႏ 22
22
1“ခွေသွꩻ ဂျူးလိုꩻမျိုꩻဖုံႏ၊ နုဲင်းခွေကဒေါ့ꩻ ရဲကာႏကွယ်ႏချာ ခွေနမ်း သီဆꩻငါနဝ်ꩻ နာႏသွော့ ခွေငဝ်းဟုဲင်း” နုဲင်းနဝ်ꩻသွူ။ 2ဝွေꩻဒေါ့ꩻဖေႏ ဝွေꩻသီး စွဉ်ႏဟေဗြဲ ဘာႏသာႏငဝ်းချိန်ႏ ဝွေꩻသီး ထွိုင်ႏဟွိုန်နဝ်ꩻ ဝွေꩻသီး အုံယဉ်တစ်ꩻ စွဉ်ႏတဲင် ပေါလု အဝ်ႏဒေါ့ꩻသွုပ်လွေꩻ။
3 #
တ ၅:၃၄–၃၉။ ခွေနဝ်ꩻထွာဒျာႏ ဂျူးလိုꩻမျိုꩻတဖြာꩻ၊ လွူးလွဉ်သော့ꩻဒျာႏ ကိလိကိခမ်း ဝေင်ꩻတာသျုကို။ ကွဲႏတွော့ꩻ တန်လွဉ်သော့ꩻဒျာႏ ဝေင်ꩻယေရုသလမ်ႏကိုယို၊ ထွာဆရာႏတန် ဂါမလေလ တပဲ့တဖြာꩻအတွိုင်ꩻ ခွေလက်ခံႏ သွဉ်ထူႏတဲပ်ဟဝ်မွေး၊ အထွုံꩻနယ်ꩻ နုဲင်းနီမွိုးဖြား ဖါဖြားသီး ကလွောက်ꩻနာႏ ကံကျင်ꩻလွဉ်ꩻဒါႏ ကထွာ ပညတ်တရာꩻတောႏနဝ်ꩻ ဟန်ႏနီꩻ ဗွိုန်နုဲင်းသီ ကအဝ်ႏယိုကိုသားဖုံႏ ကားကအဝ်ႏ ကအဝ်ႏဆယ်ꩻကပ်ထင်ႏဖေႏ ဗွေႏဘုရာꩻအတွိုင်ꩻ ခွေတဲ့တွမ်ႏ သꩻအာႏတလာ အဝ်ႏဆယ်ꩻကပ်နဝ်ꩻသွူ။ 4#တ ၈:၃၊ ၂၆:၉–၁၁။ လိုꩻကထောင်လွဉ်ꩻဒါႏ ဘာႏသာႏအနယ်ꩻ ယိုသားဖုံႏနဝ်ꩻ ခွေနစ်စက် တွိုႏစွဉ်ႏမာꩻသီနေးသွူ။ ခွေဆွမ်ꩻထိုꩻ လိုꩻခိုဖုံႏ လိုꩻမူႏဖုံႏတဲင် အွဉ်ႏသော့ꩻ ဝွေꩻသီး ထောင်ႏကိုသွူ။ 5ခွေကအဝ်ႏဒေါ့ꩻနယ်ဖေႏဒါႏ သီယိုနဝ်ꩻထွာဒျာႏ အမဲဉ်ႏကျောင်ꩻ ယဇ်ပရောဟိတ်ခွန်တွမ်ႏ ကောင်စီတစွိုꩻလွုမ်း ထောက်ခံႏဒျာႏသွူ။ လိတ်ကတဲမ်းလွေꩻဖေႏဒါႏ သွꩻဂျူးလိုꩻမျိုꩻ ကအဝ်ႏသော့ꩻ ဝေင်ꩻဒမာသကတ်ကိုနဝ်ꩻ ခွေအဝ်ႏလက်ခံႏလꩻ ဝွေꩻသီထျꩻ၊ နဝ်ꩻမꩻ ဖေႏကဆွမ်ꩻ လိုꩻစားယိုဖုံႏတဲင် ဖေႏကဖေႏတံႏ ဝွေꩻသီးနဝ်ꩻ ဖေႏကစွိုင်နေး ပသီႏချင်ꩻတဲင် ဖေႏကဟဲ့ꩻသဲင်ꩻချာ ဝေင်ꩻယေရုသလမ်ႏကိုနဝ်ꩻ ခွေလွေꩻနဝ်ꩻကိုသွူ။
ပေါလုဒေါ့ꩻနယ်ဝွေꩻပြောင်ꩻကြုဲင်ꩻလွဉ်ခရာႏ
(တမန်ႏတောႏ ၉:၁–၁၉၊ ၂၆:၁၂–၁၈)
6“နုဲင်းခွေကအဝ်ႏထန်ႏလွေꩻ တဖူꩻ ထွိုင်ႏဖျော်လွဉ်ဗော့ꩻ ဝေင်ꩻဒမာသကတ်နဝ်ꩻ မွူးနွောင်းချိန်ႏရပ် ထာꩻလေရောင်ႏ အဝ်ႏမို့ꩻလောင်း တောင်ႏလိက်ꩻလင်ꩻ ခူစွော့ꩻစွဉ်ႏ ခွေနဝ်ꩻသွူ။ 7ခွေဝꩻလင်ꩻထိုꩻစွဉ်ႏ ဟံႏလောင်းတဲင် ဟွိုန်ငဝ်းတငွါ ရိုꩻဖေႏခွေ၊ ‘သျောလု၊ သျောလု၊ ပွိုးတမုဲင်ꩻ နာꩻနစ်စက်ဗာႏတွိုႏခွေ နုဲင်းမုဲင်ꩻဟောင်း’ နုဲင်းနဝ်ꩻသွူ။ 8ခွေရီ၊ ‘ဗွေႏ၊ နီဗွေႏနဝ်ꩻထွာ ပါꩻမုဲင်ꩻဟောင်း’ နုဲင်းနဝ်ꩻသွူ။ ဝွေꩻဗွေႏဒေါ့ꩻဖေႏခွေ၊ ‘ခွေနဝ်ꩻထွာ ပါꩻနာꩻကအဝ်ႏနစ်စက်ဒါႏ နာဇရဲစ်ဝေင်ꩻသား ယေသျု’ နုဲင်းနဝ်ꩻသွူ။ 9ပါꩻခိုဖုံႏ ကအဝ်ႏငီꩻစွဉ်ႏခွေနဝ်ꩻ အဝ်ႏထီႏ ထာꩻလေစွဉ်ႏတဲ့ ပါꩻအဖြာꩻ ကအဝ်ႏဒေါ့ꩻရီစွဉ်ႏခွေ အငဝ်းနဝ်ꩻ တဟွိုန်တဝ်းသွူ။ 10ခွေရီ၊ ‘ဗွေႏ၊ ခွေအီႏမာꩻဗာႏ တမုဲင်ꩻဟောင်း’ နုဲင်းနဝ်ꩻတဲင် ဗွေႏဒေါ့ꩻဖေႏခွေ၊ ‘ထွိုင်ႏတဲင် လွေꩻသွော့ ဝေင်ꩻဒမာသကတ်ကိုတွော့ꩻ နာꩻကအီႏမာꩻဗာႏဒါႏ ထာꩻမာꩻအတာႏ ဗွေႏဘုရာꩻ ကအဝ်ႏထွော့သေꩻခါꩻ လဲဉ်းဒါႏနဝ်ꩻ တွိုႏနဝ်ꩻကို အီႏဒေါ့ꩻနယ်ဖေႏလို့နာꩻ’ နုဲင်းနဝ်ꩻသွူ။ 11ကွပ်ပွိုး ထာꩻလေရောင်ႏ တောင်ႏလိက်ꩻနဝ်ꩻမꩻ ခွေမဲ့ခေ့ꩻထိုꩻစွဉ်ႏတဲင် ခွေသွꩻဖုံႏ စွီႏနေးခွေစူတွော့ꩻ အွဉ်လွေꩻသော့ꩻခွေ ဝေင်ꩻဒမာသကတ်ကိုသွူ။
12ဝေင်ꩻကိုနဝ်ꩻ ပါꩻတဖြာꩻမဉ်ꩻ အာနာနိကထွာ လိုꩻဘုရာꩻတရာꩻသား တဖြာꩻ ကလွောက်ꩻနာႏမွေးဒါႏ နီပညတ်တရာꩻတွော့ꩻ ဂျူးလိုꩻမျိုꩻဖုံႏ ကအဝ်ႏအုံသော့ꩻဒါႏ နဝ်ꩻကိုသားဖုံႏနဝ်ꩻ ရိုႏသေႏမွေးနေးစွဉ်ႏ ဝွေꩻနဝ်ꩻသွူ။ 13ဝွေꩻလွဉ်ထေ့ခွေတွော့ꩻ အုံထွိုင်ႏဗော့ꩻ ခွေထျꩻတဲင်ဒေါ့ꩻ၊ ‘ဖူးခိုသျောလု၊ ထီႏဖျင်ယင်းဟုဲင်း’ နုဲင်းနဝ်ꩻတဲင် တလဲင်ႏချင်ꩻ ခွေထီႏဗာႏဖျင်ယင်းတဲင် ထွားလွေꩻစွဉ်ႏ ဝွေꩻနဝ်ꩻသွူ။ 14ဝွေꩻဒေါ့ꩻ၊ ‘ ဖေႏကသေ ဝွေꩻဗွေႏအလိုႏတောႏ၊ ဖေႏကထီႏ ဝွေꩻဗွေႏအသွဉ်း စွို့ꩻစွဉ်ႏတွော့ꩻ ဖေႏကဟွိုန် ဝွေꩻဗွေႏကဒေါ့ꩻဒါႏ ဝွေꩻဗွေႏ အနမ်းငဝ်းနဝ်ꩻ နီမွိုးဖြား ဖါဖြားသီး ဗွေႏဘုရာꩻနဝ်ꩻ လွိုက်ထူႏလဲဉ်း နာꩻသွူ။ 15ပွိုးတွော့ꩻ နုဲင်းနာꩻကထီႏဗာႏစွဉ်ႏ ကဟွိုန်ဗာႏလဲဉ်းဖုံႏ ဖေႏကဒေါ့ꩻနယ်ဗာႏ လိုꩻစွုမ်ႏဖြာꩻနဝ်ꩻ နာꩻနဝ်ꩻ အီႏထွာဗာႏ ဝွေꩻဗွေႏအတာႏ သက်သေႏတဖြာꩻသွူ။ 16တဲင်ယိုခါ ပွိုးတမုဲင်ꩻ နာႏအဝ်ႏအုံပွေါး ညဗာတွိုႏ နုဲင်းမုဲင်ꩻဟောင်း၊ ထွိုင်ႏတဲင် ခံႏသွော့ ဗတ္တိဇံႏ ထီမင်္ဂလာႏတွော့ꩻ စွဉ်ႏထာꩻဆုတောင်ꩻထင်ႏ ဝွေꩻဗွေႏထျꩻနဝ်ꩻ ပသေကြောင်းစင်ထိုꩻသွော့ နာꩻအပဲစ်ဖုံႏဟုဲင်း’ နုဲင်းနဝ်ꩻသွူ။
ဖေႏကဟော်ꩻလိုꩻမျိုꩻလင်ဖုံႏတရာꩻနဝ်ꩻလွိုက်ဟဲ့ꩻပေါလု
17ခွေသဲင်ꩻချာ ဝေင်ꩻယေရုသလမ်ႏကိုတဲင် ခွေကအဝ်ႏဆုတောင်ꩻဘုရာꩻ ဗိမာန်ႏတောႏ ကျောင်ꩻကိုကျာꩻနဝ်ꩻ ခွေလꩻဗျာဒိတ်ရူႏပါႏရုံႏ တစွိုး၊ 18ခွေထီႏ ဗွေႏဘုရာꩻ နုဲင်းဝွေꩻဗွေႏ ကဒေါ့ꩻဖေႏဒါႏ ခွေအတွိုင်ꩻနဝ်ꩻ ၊ ‘နဲစ်တဲင် အဝ်ႏဝေင်ꩻယေရုသလမ်ႏနဝ်ꩻ ထန်ႏမွိုင်မွိုင်ထိုꩻခန်းဟုဲင်း။ ကအီႏခံႏဖေႏဒါႏ ခွေခရာႏ သက်သေႏနဝ်ꩻ ကွပ်ပွိုး လိုꩻနဝ်ꩻကို အီႏတလက္ခံႏတဝ်းနာꩻ’ နုဲင်းနဝ်ꩻသွူ။ 19ခွေလဝ်းချာ၊ ‘ဗွေႏ၊ ခွေနွို့သော့ꩻ တရာꩻစရွပ်ကိုတွော့ꩻ ဆွမ်ꩻတဲင် တွဲႏလိုꩻကယွုမ်းဒါႏ နီဗွေႏသားဖုံႏနဝ်ꩻ ဝွေꩻသီး အဝ်ႏသေစဲင်းဒျာႏသွူ။ 20#တ ၇:၅၈။ တဲင်ကမာꩻသီဒါႏ နီဗွေႏသက်သေႏခံႏ တတေဖန်တွင်ꩻနဝ်ꩻ ခွေသွဉ်းနမ်းတဲ့ အဝ်ႏနဝ်ꩻကိုတွော့ꩻ အဝ်ႏပါငီꩻ ကောမာꩻသီထိုꩻ ဝွေꩻသားဖဲ့ꩻတဲင် အဝ်ႏအုံပွေါးထွားဖေႏ လိုꩻကောကမာꩻသီ ဝွေꩻသားဖုံႏ အခွမ်ꩻလာꩻဖုံႏ’ နုဲင်းနဝ်ꩻသွူ။ 21ဗွေႏဘုရာꩻ ဒေါ့ꩻဖေႏခွေ၊ ‘လွေꩻဟုဲင်း။ ခွေအွဉ်ႏစွꩻ လွေꩻညာꩻထိုꩻနာꩻ လိုꩻမျိုꩻလင်ဖုံႏအထျꩻ’” နုဲင်းနဝ်ꩻသွူ။
22လိုꩻဖုံႏအဝ်ႏနာႏ ပေါလုငဝ်း ဗꩻတွိုႏ ဝွေꩻကဒေါ့ꩻ နုဲင်းယိုထွူ၊ “အွဉ်ႏမွိုန်းဒွုမ် ဝွေꩻဟုဲင်း။ မာꩻသီထိုꩻခန်း ဝွေꩻဟုဲင်း။ ဝွေꩻအသက် အီႏအဝ်ႏမွန်နဝ်ꩻ တထွိုက်တဝ်း” ဝွေꩻသီး စခြောဝ်သင်ႏသန် မွေးနေးစွဉ်ႏ ဝွေꩻသီးအငဝ်း နဝ်ꩻသွူ။ 23ဝွေꩻသီး အဝ်ႏခြောဝ်သန် အငဝ်းဖုံႏ၊ အဝ်ႏဝီအဆဲင်ꩻတန်ဖုံႏ၊ ရွပ်ဟံႏဖွန်ႏ ဖြေ့ꩻကီတလီꩻကိုဖုံႏ နဝ်ꩻသွူ။ 24ဖေႏကဟဲ့ꩻနွို့သော့ꩻ ပေါလု တပ်စခန်ꩻ ယဲꩻတွိုက်ကိုနဝ်ꩻ ရောမစဲ့ꩻပိုႏတန်ဖေႏစွဉ်ႏ ဝွေꩻလိုꩻဖုံႏအမိန်းတဲင် ပေါလု ဖေႏကဒေါ့ꩻနယ် ဝွေꩻသီး၊ ပွိုးတမုဲင်ꩻ ဂျူးလိုꩻမျိုꩻဖုံႏ အဝ်ႏခြောဝ် သန်ဆန်ချာဗာႏတွိုႏဝွေꩻ နုဲင်းယိုနဝ်ꩻ ဖေႏကတွဲႏ စဲစ်ဆေꩻထွားနေးနဝ်ꩻ ဖေႏစွဉ်ႏအမိန်းသွူ။ 25ကွဲႏတွော့ꩻ ဝွေꩻသီး အီႏတွဲႏ ဝွေꩻ အဝ်ႏစွိုင်နေးချိန်ႏနဝ်ꩻ ပေါလုဒေါ့ꩻဖေႏ စဲ့ꩻပိုႏ ကအဝ်ႏအုံထွိုင်ႏထာꩻ နဝ်ꩻကို၊ “ရောမ ခမ်းရင်ꩻသား တဖြာꩻနဝ်ꩻ ရီစဲစ်ဆေꩻတွော့ꩻ တမော့ꩻတဝ်းအပဲစ် တစွိုးတမျိုꩻတဲင် ဖေႏထိုꩻခွဉ်းတံႏနဝ်ꩻ တမဲဉ်ႏတဝ်း စွဉ်ႏတရာꩻဥပဒေႏ တမွေးတဝ်းဟောင်း” နုဲင်းနဝ်ꩻသွူ။
26တပ်ခွဲမူးထွိုင်ႏဟွိုန် ငဝ်းနုဲင်းယိုချိန်ႏ ဝွေꩻလွေꩻထေ့ စဲ့ꩻတပ်ပိုႏတန် ထျꩻတဲင်ရီဝွေꩻ၊ “နာꩻမာꩻ နုဲင်းမုဲင်ꩻဟောင်း။ ပါꩻခိုယိုနဝ်ꩻ ထွာဒျာႏ ရောမခမ်းရင်ꩻသား တဖြာꩻကွေး’ နုဲင်းနဝ်ꩻသွူ။
27နဝ်ꩻမꩻ စဲ့ꩻတပ်ပိုႏတန်နဝ်ꩻ လွေꩻထေ့ ပေါလုတဲင်ရီဝွေꩻ၊ “နာꩻနဝ်ꩻထွာမွေး ရောမခမ်းရင်ꩻသား တဖြာꩻဟောင်း၊ ဒေါ့ꩻနယ်ခွေမွိုင်” နုဲင်းနဝ်ꩻတဲင်
ပေါလုလဝ်းချာ၊ “မွေး” နုဲင်းနဝ်ꩻသွူ။
28စဲ့ꩻတပ်ပိုႏတန်ဒေါ့ꩻ၊ “ခွေကထွာလွဉ်ဗာႏ ရောမခမ်းရင်ꩻသား တဖြာꩻနဝ်ꩻ ဖေႏဗာႏ အာမွေးနေးစွဉ်ႏရွဉ်” နုဲင်းနဝ်ꩻသွူ။
ပေါလုလဝ်းချာ၊ “ကွဲႏတွော့ꩻ ခွေနဝ်ꩻ လွူးလွဉ်ခါႏကာႏ ထွာဒျာႏ ရောမခမ်းရင်ꩻသား တဖြာꩻ” နုဲင်းနဝ်ꩻသွူ။
29ပါꩻအဖြာꩻ ကအဝ်ႏလွေꩻရီဒါႏ ပေါလုသားနဝ်ꩻ အဝ်ႏဝွေꩻထျꩻ တလဲင်ႏချင်ꩻ ဆွတ်ချာထိုꩻစွဉ်ႏသွူ။ ပေါလုထွာ ရောမ ခမ်းရင်ꩻသား တဖြာꩻကျောင်ꩻ တဲ့နဝ်ꩻ ဝွေꩻအဝ်ႏစွိုင်ခါꩻနေး စွဉ်ႏပသီချင်ꩻဖြွီꩻဖုံႏ တဲ့နဝ်ꩻ စဲ့ꩻပိုႏတန် ထွိုင်ႏသေ ဝွေꩻငမ်းသꩻ မွေးနေးစွဉ်ႏနဝ်ꩻသွူ။
ပေါလုဖျော်ကောင်စီရွုမ်ꩻ
30နုဲင်းဂျူးလိုꩻမျိုꩻ အဝ်ႏစွဲꩻတရာꩻဒါႏ ပေါလုနဝ်ꩻ စဲ့ꩻပိုႏတန် မဉ်သေစဲင်း မွေးစွဉ်ႏသွူ။ နဝ်ꩻမꩻ ဆုဲင်ꩻတနီꩻ ဝွေꩻစေဖေႏ ပေါလု ပသီႏချင်ꩻဖြွီꩻဖုံႏတဲင် ယဇ်ပရောဟိတ် တန်ဖုံႏတွမ်ႏ လွတ်တောႏကောင်စီ တစွိုꩻလွုမ်း အီႏမော့ꩻခွဲ အုံကွံလို့ဝင်ꩻနဝ်ꩻ ဖေႏစွဉ်ႏအမိန်းသွူ။ နဝ်ꩻထွူ ဝွေꩻဟဲ့ꩻပေါလုတဲင် အွဉ်ႏဝွေꩻအုံထွိုင်ႏ ဝွေꩻသီး ဆꩻငါနဝ်ꩻသွူ။
ទើបបានជ្រើសរើសហើយ៖
တမန်ႏတောႏ 22: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
