لوقای انجیل 12
12
فریسی خمیرمایه جی دوری بکونین
1ایی وخت میئن، هیزارون نفر جومَه بوبؤن، اونقدر که همدیگرِ پا دمتن. عیسی اول خوشِ شاگردؤنِ أمره گب زِئن بنا بوده و بوته: «فریسی فرقه عالمون خمیر مایه جی، که هو ریاکاری ایسّه، دورَ بین. 2هیچ چی دخوته نیه که آشکارا نبی و هیچّی جیگاه بوخورده نیه که بدِه نبی. 3اوچیکه ظلمات میئن بوتین، روشنایی میئن بشتؤسه بنه، و اوچیزیکه دَوسته درون پوشت پیچ پیچی بودین، بومؤن جؤرا جی اِعلؤم بنه.
4«ریفقون، شمره گونَم اوشؤنیای که جونِ کوشنن و هی یکته کارِ بیشتر گوده منِئن، واهیمه ندارین. 5شمره نیشون دِئنَم، کیا جی باید ترسِئن: اونای بترسین که وختی شیمه جونِ بیته، ایی قدرت و ایختیار دئنه که دوزخ میئن تؤدای. بله، شمره گونَم، اونای باید ترسِئن. 6مگه پنج ته چیشنکِ، دو قورون نفروشَنَن؟ هینه واسه، حتی یکته از اوشون خدا ورجه فراموشَ نبنه. 7حتی شیمه سر مو همته بوشمارده بوبوُ. پَس واهیمه ندارین، چونکه شیمه ایرزش هیزارون چیشنَکای بیشتره.
8«شمره گونَم، هرکسی ازمو، مَردم ورجه اعتراف بکونی، انسون ریکه که مو ایسم هم از اونای خُدا فرشته أن ورَجه اعتراف کوئنه. 9امّا هرکسی مَردم ورجه مَه حَشا بُکونی، خُدا فرشته أن ورَجه حَشا بنه. 10هرکسی یکته گب ضد انسون ریکه که مو ایسّم بوگوی، ببَخشه بنه، امّا هرکسی روح‌القدس کُفر بوگوی، بَبخشه نبنه. 11هیطو که شمره عبادتگاأن و حاکمون و پیله ترون ورجه ببُورَن، دیل ناگرون نبین که چُطو خودتونای دفاع بکونین یا چی بوگوین، 12چونکه او زمون، روح‌القدس اوچیزی که باید بوگوین شمره آموجبئنه.»
نادؤنِ ارباب حیکایت
13یه نفر جَمعیت میئنای اونه بوته: «اوستاد، می برارِ بگُو می پئر ارث می اَمَرِه قسمت بکونی.» 14اما عیسی جواب بَدَه: «مَرداک، کی مَه شیمه میئن قاضی یا موقسّیم بوده؟» 15پَس مَردمِ بوته: «واخُوب ببین و شمره حرص و طمعای دور بدارین، چونکه آدمی زندگی به زیادی اونه مال و منال نیه.» 16بازین ایی حیکایت ایشونه به بارده: «یکته اربابِ زمین، خیلی بار بأرده. 17پَس او ارباب خوشِ أمره فکر بوده،”چی بکونم، چونکه جایی ندئنم می بارِ بنئم؟“ 18بازین بُوته: ”دؤنَم چی بکونَم! می تیلمارؤن فگردونبِئنم و تیلمارؤنِ پیله تر چاکوئنم، و همۀ گندم و می دارایی اونه میئن انبار کوئنم. 19و می جؤنِ گونم: ای جؤن، خیلی سالِ که هنقدر دارایی جومَه گودی. الؤن ده آروم بگیر؛ بوخور و وودوش و خوش ببو.“ 20امّا خُدا اونه بوته: ”ای نادون! هی امشؤ تی جؤنِ بیته بنه. الون دارایی ای که جومَه گودی، کی شی بنه؟“ 21ایی ایسّه آخرعاقبت کسی که خوشه به دارایی جومَه کوئنه، امّا خُدا ورجه مالدار نیه.»
نیگرون نبین
22بازین عیسی خوشِ شاگردؤنِ بوته: «پَس شمره گونَم، شیمه زندگی به نیگرون نبین که چی بُخورین، و نه نیگرون شیمه جؤن که چی دکونین. 23زندگی از خوردن و جؤن، رخت و لباسای بیشتر ایرزش دَئنه. 24کلاجؤنِ نیگاه بکونین: نه کارنَن و نه بیئنَن، نه تیلمار دائنن و نه کندوج؛ با ایی همه خُدا اوشونم روزی هَدِئنه. و شمه چَقدر با ایرزشتر از پرنده انین! 25کیسِه از شمه که بتؤنهَ دیل نیگرونی امره، اَنِی خوشِ عمر زیادَ کونی؟ 26پَس، اَگه ایی کوشتای کارم انجؤم دَئ منیئن، چره بقیه به دیل نیگرونین؟ 27سوسنون نیگاه بکونین که چُطو پیله بنن؛ نه سختی کشنن و نه ریسنن. با ایحال شمره گونم که حتی سلیمان هم خوشِ ایی همه شکوه و جلال امره، یکته ایی سوسنون مورسؤن قشنگَ نبؤ. 28پَس اَگه خُدا صحرا وشَ که ایمرو هنّه و فردا تنوره میئن تَودَه بنه، ایطوری پوشنِئنه، چقدر بیشتر شمره، ای کم ایمؤنون! 29پَس اینه دومبال نبین که چی بُخورین یا چی وودوشین؛ ایشونه به نیگرون نبین. 30چونکه ایی دنیا قومؤن ایجور چیزؤنِ دمبال ایسّن امّا شیمه پئر دؤنه که، شمرم ایشون احتیاج دَئنین. 31پس بجای اوکار، شمه اونه پادشایی دومبال ببین و همۀ ایشون شمره هَدَه بنه.
32«اَی کوچ گله، واهیمه ندارین، چونکه شیمه پئرِ خوشحالی اینه که پادشاهیِ شمره هدای. 33اوچیزی که دئنینِ بفروشین و اوشونی که محتاجن هَدین؛ شیمه به کیسه أنی فراهم بکونین که نپیسّی، و گنجی آسمؤنِ میئن جومَه کونین که تمنَه نبی، جایی که نه دوزد هنه و نه بید زِئنه. 34چونکه هرجایی که شیمه گنج هنّه، شیمه دیل هم اوره هنّه.
حاضیر ببین
35«همیشه خدمت گودنِ به حاضیر ببین. 36هوشؤنی مورسؤن ببین که خوشون ارباب ریفا ایسَئن که عروسیاجی وگردی، تا هیطو که برسه و در بکوته، تاتأدی اونه به بازَ کُونن. 37خوشا به حال هو خدمتکارونی که وختی اوشون ارباب وگردنه، اوشونه بیدار بَینه. راست راستِ، شمره گونَم، خودش خو رخت خدمت دوکوئنه؛ اوشونه سفره سر نیشؤنبِئنه و هنه ایشونه خدمت کوئنه. 38خوشا به حال هو خدمتکارونی که وختی ایشونه ارباب هنه، چی نصف شؤ، چی صوبه دم، ایشونه بیدار بَینی.
39«اما اینه بدونین که اَگه صابخونه دونَس که دوز چی ساعت میئن هنه، نوگذاشت خو خونه آی دوزدی ببی. 40پَس شمه هم باید حاضیر بیسین، چونکه انسون ریکه هم، وختی هنه که اونه ریفا نیئن.»
41پِطرُس عیسای بپورسه: «آقا، ایی حیکایت اَمه به بأردی یا همتّه به؟» 42عیسای خُداوند بوته: «پس او امین و آگاه مباشیر کیسه که اونه ارباب اونه خوشِ خونه خدمتکارون پیلتر چاکوئنه تا اوشونه خوراک سهمِ بموقع هَدَی؟ 43خوش به حال او غلومی که وختیکه اونه ارباب وگردنه، اونه خو کار سر بَینی. 44حَقیقتاً شمره گونم که اونه خوشِ هَمَه ی دارایی، سرِ جؤر نِئنه. 45امّا اَگه او غلؤم خوشِ امره بوگوی که ”ارباب، دیرَ گوده،“ و بنا به آزار نوکرون و کلفتؤن بکونی، و بخوری و وودوشی و مستَ کونی، 46بازین او روزی که خو ارباب ریفا نیه و او ساعت میئن که او واخُب نیه هنه و اونه دوخَئله کوئنه و خیانتکارون جیگاه میئن تودِئنه.
47«غلؤمی که خوشِ ارباب خواسّه دونه و با هو حال، خوشِ او کارِ به آماده نوکُئنه، حَسابّی چوب خوئنه. 48امّا او که خو ارباب خواسه نودوئنه و کاری کوئنه که تنبیه گودن قابیل ایسّه، کمتر چوب خؤنه. هرکس که اونه بیشتر هَدَه ببی، اونای بیشتر حساب هیته بنه؛ و هر کس که اونه بیشتر بسپورده ببی، اونه جواب دهی هم بیشتر بنه.
آشتی نه، سیوا بوئن
49«مو بومَئم تا زمین سر آتش واگیرونم، و ای کاش که تا الؤن بَل بیته بو بؤبی! 50مو یکته تعمید دَئنم که باید بگیرم، و تا او به انجؤم برسی خیلی پریشونم. 51گُمون کوئنین که بومئم آشتی زمین سر بأرَم؟ نه، شمره گونم، بومئم تا سیوایی تَودِئم. 52چونکه از ایی ببعد، پنج نفر میئن از یکته خونه اهل، سیوایی دکِئنه؛ سُه ته بر ضد دوته بنن و دوته بر ضد سُه ته. 53اوشونِ میئن سیوایی دکته بنه، پئر ضد ریکه و ریکه ضد پئر، مَئر ضد لاکو و لاکو ضد مَئر، شومئر ضد عروس و عروس ضد شومئر.»
زمون تعبیر
54بازین جماعتِ بوته: «هیطو که بَینین یکته ابر مغربای پیدا بوبوُ، تاتأدی گونین: ”باروون هنه،“ و بارون هم وارنه. 55و هیطو که جنوبای باد هنه، گونین: ”هوا خیلی گرمَ بنه،“ و هیطورم بنه. 56ای دوروئؤن! شمه که خوب دوئنین زمین و آسمونِ وضعیتِ چُطو تعبیر بکونین، چُطو ایسّه که الؤن زمونی که اونه میئن ایساین، منیئن تعبیر گودَن؟
57«چرِه خودتون درباره اوچیزی که دُرُسته قضاوت نوکُئنین؟ 58زمؤنی که تی شاکی أمره حاکم ورجه شنی، تقلّا بَکون تا راهِ مِیئن اونه امره آشتی بکونی، نبی که تَه قاضی ورجه ببورن و قاضی هم تَه مأمورِ بسپوری، و زیندونِ میئن دکای. 59تَه گونَم که تاآخرین قرؤنَ هَندای، زیندؤنِ مئنای بیرون نأنی.»
ទើបបានជ្រើសរើសហើយ៖
لوقای انجیل 12: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
