لوقای انجیل 11
11
عیسی دعا گودنِ خو شاگردون آموجبِئنه
1یه روز عیسی یه جا دوعا کادبو. عیسی دعا تمنه بو پس، یکته از اونه شاگردؤن بوته: «آقا، دوعا گودَنِ اَمَرِه باموج، هیطو که تعمید دهنده یحیی خوشِ شاگردؤن باموته.» 2عیسی ایشونه بوته: «هر وخت دوعا کأدرین، بوگوین:
«”پئر،
تی ایسم مُقدّس ببی،
تی پادشاهی بَای،
3امه هرروزِ نونِ هر روز اَمَرِه هدی.
4امه گُناهونِ بَبَخش،
چونکه امَرَم همته امه قرضدارون بَخشنیم.
و اَمرِه امتحون میئن تؤندی.“»
5بازین ایشونه بوته: «کیسَه از شمه که یکته رفیق بدَاری، و نیصفِ شؤ اونه ورجه بشی و بوگوی: ”ریفق، سُه ته نون مَه قرض هَدی، 6چونکه یکته از می ریفقؤن سفراجی وگرسه، و مو هیچی ندانَم تا اونه ورجه بَنِم،“ 7و او از خونه میئنای جواب بَدای: ”مَع زحمت ندی. در قفل ایسّه، و می زاکون می امره جا میئن خوتَن. منِئم از می جا ویریسَم و یه چی تَه هدِئم.“ 8شمره گونَم، شاید خو ریفق واسه وینریسی و اونه نون هندای، اما اونه اصرار واسه ویریسنَه وهر چی که لازم دئنه اونه هَدئنه.
9«پَس شمره گونَم، بخوائین که شمره هَدَه بنه؛ واموجین که یابنین؛ و بَکوئین که در شیمه رو بازَ بنه. 10چونکه هرکی بخوای، اونه هده بنه وهر کی وامُوجی، یابنه؛ و هرکی بَکوئی، در اونه به بازَ بنه. 11کویکته از شمه پئرون، اگه اونه ریکه اونای ماهی بخوای، یکته میلون اونه هدِئنه؟ 12یا اگه مَرغونه بخوای، یکته عقرب اونِ هدئنه؟ 13شمه که بد ایسّین دوئنین که چوطو شیمه زاکون خُوروم چی هَدین، چَقدر بیشتر شیمه آسمؤنی پئر روح القدسِ هرکس که اونای بخوای، بخشنه.»
عیسی و بَعَلزِبول
14عیسی یکته لال دیو یه نفرای بیرونَ کائدبو. هیطو که دیو بِیرون بُشو، لال مَردکای بتونسه گب بزَنی و مَردم ماتَ بوئن. 15امّا بعضی أن بوتَن: «او دیوؤنِ، بِعِلزِبول یاری أمره، که دیوؤنِ پیله تر ایسه، بیرونَ کوئنه.» 16بقیه أم اونه امتحونِ به، دائم یکته آسمؤنی نیشونه خواسّن. 17عیسی اوشونه فیکرون بفهمسه و بوته: «هر مملکتی که ضد خودوش دسته دسته ببی، سر به نیستَ بنه، و هر خونه ای که ضد خودوش دسته دسته ببی، فبنه. 18اگه شیطون هم خوشِ ضد دسته دسته ببی، چُطو اونه مملکت برقرار مؤنه؟ چون گونین که مو بِعِلزِبول یاری امره دیوؤنِ بیرونَ کوئنَم. 19اگه مو بِعلزبول یاری امره دیوؤنِ بیرون کوئنم، شیمه شاگردؤن کی یاریِ أمره اوشونه بیرونَ کُوئنن؟ پَس ایشون، شمره قضاوت کوئنن. 20امّا اَگه مو خُدا قدرت امره دیوؤنِ بیرون کُوئنم، حَتم بدونین که خُدا پادشاهی شیمه به بومَه. 21هر وخت یکته قوی مَرداک که حیسابی مسلح بوبؤ، خوشِ خونه بپای، اونه مال و مَنال در امؤن مؤنه. 22امّا وختی یه نفر اونای قویتَر اونه سر فترکی و حریفَ بی، سلاحیِ که او مَرداک پوشت به او گرمه، اونای هگینه، دارایی تقسیمَ کوئنه. 23هرکس که می امره نیه، می ضیدِ، و هرکس که می أمره جومَه نکونی، پخشَ کوئنه.
پلید روح، وگردنه
24«اوزمون که پلید روح یه نفرای بیرون هنه، خشک و بی آؤ جیگانِ سو شنه تا یکته جا خوشِ استراحتِ به بیاجی. امّا چون نیاجنه خوشِ أمره گونه: ”او خونه ای که اورای بومام، وگردَنم.“ 25و هیطوکه اوره رسنه او خونَه تمیزَ گوده و قشنگ اینه، 26شنه و هفت ته روح بدتر از خودوش هم اَبِئنه، و همته شنن دیرون و اوره نیشنن. سراخر، او آدم حال از اونه اولِ حالم بدترَ بنه.»
27وختی که عیسی ایی گبؤنِ گوتدبو، یکته زناک جَمعیت میئنای بلند بلند بوته: «خوش به حال او زناکی که تَه بچِه و تَه شیر بَدَه.» 28امّا عیسی بوته: «نه، بلکه خوشا به حال اوشونی که خُدا کلام ایشتؤنَن و اونه بجا أبِنَن.»
یونسِ پیغمبر نیشونه
29هیطو که جَمعیت زیادترَ بؤدبو، عیسی بوته: «ایی نَسل، نَسلی ایسّه شرور. یکته نیشونه دومبال ایسّن! امّا نیشونه ای ایشونه هَدَه نبنه جز یونسِ پیغمبر نیشونه. 30چون هوطو که یونس، نیشونه ای بوُ نینوا مَردم به، انسون ریکه که مو ایسم هم، ایی نَسل به نیشونه ایسّه. 31داوری روز میئن، جنوب ملکه ایی نَسل امره ویریسنَه و ایشونه محکوم کوئنه، چونکه، او از اوسر دنیا بومه تا سلیمان حکمت بشتؤئه و بَین، که یه نفر پیله تر از سلیمان اِره ایسَه. 32نینوا مَردم داوری روز میئن ایی نَسل امره ویریسنَن و اوشونه محکومَ کوئنَن، چونکه اوشون یونس موعظه واسه توبه بوُدَن، که بَین، ینفر پیله تَر از یونس اِره ایسَه.
شیمه میئنِ روشنایی
33«هیشکی گردسوز وانگیرونبِئنه تا اونه جا بدای یا یکته بیدره جیر بَنای، بَلکه گردسوزه چراغدونِ سر نِئنَن تا هرکس دیرون بای اونه روشناییِ بَینه. 34تی چیشم، تی بدنِ چراغِ. وختی تی چیشم سالم ببی، تی تمام بدن روشنه بنه. امّا وختی تی چیشم فاسیدَ بی، تمام تی بدن ظلماتای پورا بنه. 35پَس واخوب بَبو نبی که او روشنایی ای که تی میئن هَنّه، ظلمات ببی. 36اَگه شیمه تمام بدن روشنایی میئن ببی و هیچ ذرّه ای از او ظلمات میئن نبی، هوموقع تمام شیمه بدن روشنایی میئن موئنه هوطوکه یکته چراغ پور نور شیمه سر فوتؤئنه.»
وای بر فریسی عالیمون و قاضی أن
37هیطو که عیسی خوشِ گبؤن تمنَه گوده، یکته از فرَیسی فرقه عالمون اونه غذا خوردن به دعوت بوده. پَس عیسی اونه خونه بُشو و بنیشته. 38امّا فَریسی وختی که بدِه عیسی خوشِ دَستؤنِ قبل غذا خوردن نوشُورده، خیلی تعجب بوده. 39هوموقع عیسای خُداوند اونه بوته: «شمه فرَیسی ان کاس پیاله بیرونِ پکا کؤنین، امّا از دیرون پور از حرص وطمع و شرارت ایسین! 40ای نادونون، مگه اونی که بیرونه بساته، دیرون نساته؟ 41اما از اوچیزی که شیمه میئن هنّه صدقه هَدین و بینین همه چی شیمه به پکا بنه.
42«اما وای برشمه ای فرَیسی ان! چونکه شمه از بینه و کوتکوتو و همه جوره سبزی، دَه‌یک هدِئنین، امّا عدالتَ و خُدا محبت نده بو گینین. ایشونِ بدون اونکه اوشونه نده بو بگیرین بایستی انجوم بدابین. 43وای بر شمه ای فرَیسی ان! چونکه دوست دأنین عبادتگاهون میئن بهترین جیگاه بنیشین و مَردم، کوچه و بازار میئن شمره سلام بوگؤن. 44وای برشمه! چونکه قبرؤنی بی نام نیشون مورسونین که مَردم نودُنسه اوشونه سر راه شنن و ردّا بنن.»
45یکته از قاضی أن اونه جواب میئن بوته: «اوستاد، تو ایی گبونِ أمره، اَمَرم توهین کأدری.» 46عیسی بوته: «وای بر شمه هم ای قاضی أن، که سنگین بارِ مَردم دوش سر نِئنین، امّا خودتون نخوانین حتی یکته انگوشت، کمک واسه اونه جیر بنین. 47وای برشمه که پیغمبرونی واسه که شیمه پئرون اوشونه بکوشتن مزار چاکونین! 48هینه واسه شمه گوایی دئنین و او کارونی که شیمه پئرون انجوم بدابوئنِ تصدیق کوئنین. چونکه اوشون پیغمبرون بکوشتن و شمه اوشونه به بوقاع چاگودین. 49هینه واسه خُدا حکمت بفرماسه که ”مو اوشون واسه پیغمبرون و رسولون سرا دِئنم. امّا بعضی أن کوشَنن و بعضی أنم آزار رسونبئنَن.“ 50تا، خون همۀ پیغمبرونی که از اول دونیا تا الؤن فُبُو بوُ، ایی نَسل گَردن ببی- 51از هابیل خون تا زکریا خون که قربانگاه و محرابگاه میئن فوبؤ. بله، شمره گونَم که ایی نَسل ایشونِ واسه حساب پَس دِئنه. 52وای بر شمه ای قاضی أن! چونکه معرفت کلید بدوزِیئن. خودتون دیرون نوشوئین و اوشونِ جلو که خوانَن دیرون بوشُئن هم گینین.»
53وختیکه عیسی بیرون بُشو، تورات معلمون و فرَیسی ان بنا بمخالفت اون امره بودن و اونه زور باردن تا خیلی چیزوناجی گب بزنی 54و اونه چرِ سر نیشتبون تا یکته گب اونه زبونای بیرون بای تا اونه گیرفتارَ کونن.
ទើបបានជ្រើសរើសហើយ៖
لوقای انجیل 11: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
