رسولؤن اعمال 5
5
حَنانیا و سَفیره
1اما یکته مردکه که اینِ ایسم حَنانیا بو خو زناکِ أمره که سَفیره ایسم داشت، یه تیکه زمینِ بفورتبون، 2حنانیا اَنی زمینِ پولِ با اونکه اینه زناک دؤنس، جا بدا و بقیه بأرده، رسولؤنِ جلو بَنه. 3اما پطرس اونه بوته: «ای حَنانیا، چرِء بوگذاشتی شیطؤن تی دیلِ ایطؤ پورا كونی که روح‌القدسِ دروغ بوگوی و اَنی زمینِ پولِ ته به بدأری؟ 4مگه قبلِ فورتن تی‌شی نبو؟ و بعد فورتنم اونه پول تی ورجه نَناءبو؟ چی تَه واداشته تی دیلِ میئن ایطو فکر بکونی؟ تو نه آدمه، بلكه خدا دورُؤغ بوتی!»
5وختیکه حَنانیا ایی گبؤنِ بشتؤسه، زمین سر بکته و بمورده! همته كسؤنی که اینه بشتؤسَنِ میئن یکته پیله ترس دکته. 6بازین جووؤنؤن جلو بومَئن و حنانیا كفن فیبیتَن و بیرون ببوردن، دفنَ گودَن. 7بعد سُه ساعت، اونه زنأک که ایی اتفاقَ جی خبر نداشت، بومَه. 8پطرس اونای بپورسه: «مَه بگو که زمینِ هی قیمت بفورتین؟»
سَفیره جواب بده: «بله، هی قیمت.»
9پطرس اونه بوته: «چرِء همدیگر أمره ساخت و پاخت بودین تا خداوند روح امتحون بکونین؟ اوشؤنی که تی مردأکِ دفنَ گودَن هی الؤن دَر سَر ایسَئن و تنم بیرون بِئنَن.»
10هو دم، سَفیره پطرس پاأنِ جیر بکته و بمورده. جووؤنؤن دیرون بومَئن، اونم بموردَه بیاتّن. پس سفیرَه بیرون ببوردن و خو مَرد ورجه دفنَ گودَن. 11بزین یکته پیله ترس تمؤم كلیساأن و تمؤم اوشؤنی که اینه بشتؤسَنِ بیته.
رسولؤنِ معجزه أن و نیشونه أن
12رسولؤن همش نیشونه أن و خیلی معجزه أن مردومِ میئن انجوم دَئن و ایماندارؤن همته یكدل ایوانِ سلیمانِ میئن جومَه بوئن. 13ولی بقیه مردوم هیشكس نیارس اوشونه جمع میئن اضافه ببی، هرچند که مردوم همته، ایشؤنِ احترؤمَ داشتن. 14خیلی از مرداکؤن و زنأكؤن خداوندِ ایمؤن بأردَن و ایشونِ جمعِ میئن اضافه بوبوئن 15تا جایی که حتی ناخوشؤنِ، شهر میدؤنؤنِ سر اَردَن و اوشونِ تختؤن و دوشکون سر خوسنِئن تا وختی پطرس اورای ردا بنه، لااَقل اونه سایه بعضی از اوشؤن سر دکای و شفا هگیرن. 16مردمم دسته دسته اورشلیم اطرافِ شهرؤنِ جی اَمَئن و ناخوشؤن و اوشؤنی که پلیدِ ارواح گرفتار بوئنم اَردَن، و همته شفا گیتَن.
رسولون، زندونی بوبوئن و بعد آزادَ بوئن
17اما پیله كاهین و تموم کسونی که اونه أمره بوئن یعنی صَدّوقی فرقه عالمون، حسادَتَ جی دست به كار بوبوئن 18و رسولؤنِ بیتَن و او زندونی که همجوره آدم اونه میئن ایسابو، تودَئن. 19ولی شؤ میئن، خداوندِ یکته فرشته زندؤن دَرؤنِ باز گوده و ایشؤنِ بیرون بأرده 20و بوته: «بشین معبد میئن بَیسین و تموم ایی پیغؤمی که زیندگی بخشنه مردمِ به بوگوین.»
21پس صوبه دم بنا بر اوچیزی که ایشؤنِ بوته بوبؤبو معبد بوشؤن و بینا بودن مردم آموتَن.
وختی پیله كاهن و اوشونی که اینه همره بوئن بمان، تموم شورا آدمون و تموم یهودِ مردومِ شیخون دوخؤندَن و چندنفر سرادئن تا رسولؤنِ زندؤنِ جی بأرَن. 22اما وختی مأمورؤن بومئن، رسولؤن زندون میئن نیاتن، پس اوشؤن وگرسن خبر باردن که 23«أمه زندؤن درؤن بدیم که کاملا قفل بو و نگهبانؤنَم دَرؤنِ جلو ایسابؤن. ولی وختی دَرؤنِ واگودیم هیشكسِ زندؤنِ میئن نیاتیم.» 24وختیکه معبد نگهبونؤنِ فرمانده و كاهنؤن سرؤن، ایی خبر بشتوسَن، ماتَ بوئن، و فكرَ شؤئن كه « ایی كار عاقبت چی بنه؟»
25هی میئنه ینفر بومَه و اوشونِ خبر بده، بوته: « بینین اوشونِ که زندؤن تؤده بین، الؤن معبد میئن ایسَئن و مردمِ تعلیم دَئدرن.» 26پس معبدِ نگهبانؤن فرمؤنده، مأمورؤنِ أمره بوشؤئن و رسولؤنِ بأردَن، اما زور أمره نه، چون ترسِئن مردم ایشؤنِ سنگسار بکونن. 27وختی رسولؤنِ بأردَن، ایشؤنِ شورا جلو پا بداشتَن. هووخت پیله كاهین ایشؤنای بپورسه و بوته: 28«أمه شمره سخت قدغن بودبیم که دِه ایی ایسم أمره مردومِ تعلیم ندَین، با ایی حال شمه اورشلیمِ شهرِ شیمه تعلیم جی پورا گودین و خوائنین ایی مرداکِ خونِ تؤدین اَمه گردن.»
29ولی پطرس و بقیه رسولؤن جواب بدَئن: «أمه باء خدا جی اطاعت بکونیم نه آدمِ جی. 30اَمه پئرؤنِ خدا، عیسی مُرده‌أنِ جی زنده بوده، هو عیسی که شمه صلیب جؤر هکشِین، بکوشتین، 31و خدا اونه خو راست دست ور جؤر ببورده، رهبر و نجات دهنده بوده و فرصت بده تا یهودِ مردوم توبه بکونن و اوشونِ گناأن ببخشه ببی. 32و امه ایی چیزونِ شاهدیم، هوطو که روح‌القدسم شاهید ایسه، هو روحی که خدا اونه اوشونیه که اونا جی ایطاعت کوئنن هده.»
33وختی شورا آدمون ایی گبؤنِ بشتؤسَن اَنیچی برزخَ بؤئن که خواسّن ایشؤنه بکوشَن. 34اما ینفر فریسی أن فرقه عالمونَ جی که اینه ایسم گامالائیل بو،که شریعت معلم بو و همه اینه احتروم نَئن، مجلس میئن ویریسَه و دستور بده تا رسولؤنِ اَنی بیرون ببرن. 35بازین اوشؤنی که اوره ایسابؤنِ بوته: «ای یهودی أن، مواظب ببین ایی مرداکونِ أمره چی خوائنین بکونین. 36چونکه چند وخت پیشؤن، یکته مردکای که اینه ایسم تِئوداس بو ویریسَه و ادعا گود که خوشِ كسی‌ایسه، و حدود چهار صد نفرم خو دور جومَه گوده. ولی اونه بکوشتن و اونه دومباله رؤئنم همه پخش و پلا بوبوئن. 37بعدِ او، یهودای جلیلی سرشماری وخت شورش بودِه و یه دستَه خو دومبال هکشه. اما اونم هلاکَ بو و اونه دومباله رؤئن پخش و پلا بوبوُئن. 38پس ایی قضیه باره هم شمره سفارش دِئنم که ایی آدمؤنای دست ویگیرین و اوشونه به خوشون حال بنین. چون اگر ایشون قصد و نیت آدمَ جی ببی، هیچ جا نرسنن. 39اما اگه خدا جی ببی، منِیئن اوشونه جلو بگیرین، حتی ممکنه که هو موقع خدا ضد جنگ بکونید!»
40پس اوشون گامالائیلِ نصیحت گوش بودَن و رسولؤنِ دوخوندَن و شلّاق بزِئن و قدغن بودَن که دِه عیسی ایسم باره گب نزنن، بازین اجازه بدَئن که رسولؤن بوشؤئن.
41پس رسولؤن شورا جی ذوق أمره بیرون بوشؤئن، چون لایق ایی بوبؤئن که عیسی ایسم وسه بی حرمتی بینَن. 42و اوشون هرروز چی معبد میئن و چی خونه أن میئن، تعلیم دئن و خوروم خبرَ هدئن که عیسی هو مسیح موعود ایسّه، دست وینتَن.
ទើបបានជ្រើសរើសហើយ៖
رسولؤن اعمال 5: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
