رسولؤن اعمال 4
4
پطرس و یوحنا، یهود شورای ورجه
1پطرس و یوحنا حلِه مردم أمره گب زِئدبون که كاهنؤن و معبد نگهبانؤنِ فرمانده‌ِ و صَدّوقی فرقه عالمون برسِئن. 2اوشؤن اینه وسه که رسولون مردومِ آموتن و اعلوم گودن که عیسی مرده أنَ جی زنده بوبؤ، خیلی برزخ بوئن. 3پس ایشؤنِ بیتن و چون غروب دمی بو تا فردایی اوشونِ زندؤنِ میئن بداشتَن. 4اما خیلی از اوشؤن که ایی کلام بشتؤسبون، ایمؤن بأردن و مرداکؤن تعداد حدود پنج هزار نفر بوبؤبو.
5فردایی، قوم پیلترون و شیخؤن و توراتِ معلمون، اورشلیم شهر میئن جومَه بوئن. 6ایی مجلس میئن، حَنّا پیله كاهین و قیافا و یوحنا و اسكندر و تموم پیله کاهینِ خانواده ایسأبؤن. 7اوشؤن پطرس و یوحنا هو وسط بداشتن، ایشؤنای بپورسِئن: « شمه به چی قدرت و ایسمی ایی كاره بودین؟»
8بازین پطرس روح‌القدس جی پورا بؤ، اوشونه بوته: «ای قوم پیلترون و شیخؤن، 9اگه امروز ایی خوروم کار وسه که ایی شلِ مردکه به بودیم، اَمرای بازخواس کادرین، و پورسِئدرین که او چوطو شفا هیته، 10پس شمه همته و تموم یهود مردم بودؤنین که عیسی مسیح ناصری ایسمِ أمره ایسه که ایی مردکه شیمه جلو سالم سرپا ایسَه، به ایسم هونی که شمه اونه صلیب سر هکشِیئن اما خدا اونه مُرده‌أن جی زنده بوده. 11ای عیسی هو سنگی ایسّه که شمه بناّأن اونه رّدَ گودین و الؤن مهمترین سنگ بنا بوبؤ. 12بغیر او هیشكس دیرون نجات نَنه، چون هیچ ایسمی آسمؤن جیر، آدمؤن هدء نوُبو تا اوناجی نجات پیدا كونیم.»
13وختی که اوشون پطرس و یوحنا جرأتِ بدِئن و بفهمسَن که بیسوادن و معمولی آدمونی ایسّن، ایشؤن مات بخوشته و بفهمسن که عیسی أمره بوئن. 14ولی چون او شلِ مردکای که شفا بیاته‌بو پطرس و یوحنا ورجه ایسا بو، نوتونسَن هیچی اشون ضد بوگوئن. 15ولی دستور بدَئن که اوشون، مجلسای بیرون بوشؤئن و خوشؤن أمره به گب بنیشتَن. 16اوشون همدیگر امره بوتَن: «ایی دو نفر أمره چی بکونیم؟ چون اورشلیم همته مردوم دؤنَن که یکته معجزه ایشؤن دست أمره انجوم بُوبؤ و أمه منِیئم اونه مونكر ببیم. 17ولی هینه وسه که ایی اتفاق بیشتر از ایی مردوم میئن چو دنکای، بئین ایشونِ اخطار بدیم که دِه هیشكس أمره، عیسی ایسم باره گب نزنن.» 18بازین ایشؤن، یبارده پطرس و یوحنا دوخُوندن و اوشونه غدقن بودن که هرگی عیسی ایسمِ أمره گب نزنید و تعلیم ندَید. 19اما پطرس و یوحنا اوشونِ جواب بدئن: «شمه خودتون داوری بکونین، کویکتِه، خدا نظر میئن درست ایسّه، شمرای اطاعت گودن یا خدای اطاعت گودن؟ 20چون امه منّیم اوچیِ که بدیم و بشتؤسیم، نوگُویم.»
21شورا آدمون بعد اینکه پطرس و یوحنا خیلی تهدید بودَن، اوشونِ ویلَه گودن چون هیچ راهی اوشونه مجازات گودنِ به نیاتّن، چره که مردم همته، خدا اوچی وسه که اتفاق دکته بو، ستایش گودَن. 22چون او شلِ مرداکای که معجزه أمره شفا بیاته بو، چهل سال بیشتر داشت.
ایماندارؤنِ دُعا، پطرس و یوحنا وسه
23پطرس و یوحنا بعدِ اونکه آزادَ بوُئن خوشؤنِ ریفقؤن ورجه وگرسن و اوچیِ که كاهنؤن سرؤن و شیخؤن اوشونِ بوته بوئن، تعریف بودَن. 24هیطو که ایماندارون اینه بشتؤسَن، یکصدا خدا حضور میئن دعا بودَن، بوتَن: «ای خداوندی که همه چیون سر حاکم ایسّی، ای خدایی که آسمؤن و زمین و دریا و هر اونچی که اوشؤن میئن هنّه، خلق بودی، 25تو خودت بواسطه روح‌القدس اَمه پئر زبؤنای، تی خدمتگزار داوودِ پادشاه، بوتی:
«”چی وَسه قومؤن شورش کوئنن
و مردمؤن هَچی توطیئه کوئنن؟
26زمینِ پادشاأن همدستَ بنن
و حاكمؤن جومَه بنن،
خداوند ضید
و اونه مسیح ضید.
27راست راستِ که هی شهر میئن، هیرودیسِ حاکیم و پُنتیوس پیلاتُس غیر یهودی أن و یهودی أن أمره، ضدِ تی مقدس خدمتگزار عیسی که تو اونه مسح بودی، همدستَ بؤئن، 28تا اوچی که تی دست و تی اراده پیشتر تعیین بوده‌بو، انجوم بدِئن. 29الؤن، ای خداوند، ایشؤنِ تهدیدؤنِ بَین و تی خدمتکارونِ لطف بکون تا تمام جرأت أمره تی كلامِ بوگوئن، 30و تی دستم شفا هدئن بِه درازَ كون و تی مقدس خدمتگزار، عیسی ایسم أمره، نیشونه أن و معجزات انجوم بدی.»
31بعدِ ایشؤنِ دعا گودَن، او جایی که اوشؤن اوره جومَه بوبوئن بلرزسه و همته روح‌القدس جی پورا بوئن، خدا كلامِ جرأت أمره گوتن.
ایماندارؤنِ خوشون مال و مینال دیرون شریک بوئن
32همه ایماندارؤن، یكدیل و یكجؤن بوئن و هیشكس خو مال و مینالِ خوشی نودونَس بلكه همه چی میئن همدیگرِ أمره شریك بوئن. 33رسولؤن پیله قوت أمره عیسای خداوندِ زنده بوئن باره گوایی دَئن و خدا پیله فیض همته سر قرار بیته بو. 34اوشؤن میئن هیشكس محتاج نبو، چون هرکس که یکته زمین یا یکته خونه داشت، فورت و اونه پولِ 35رسولؤنِ ورجه نَئ تا هرکس احتیاج قد همه کسِ میئن سَهم ببی. 36یوسفم که لاوی قبیله جی و قبرس شی بو و رسولؤن اونه بَرنابا یعنی ’تشویق ریکه‘ لقب هده بون، 37زمینیِ که داشت، بفورته و اونه پولِ بأرده، رسولؤنِ ورجه بَنه.
ទើបបានជ្រើសរើសហើយ៖
رسولؤن اعمال 4: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
