رسولؤن اعمال 3
3
یکته شَل مادرزاد شفا
1یه روز پطرس و یهودا ساعت سه بعدظهر که دعا وخت بو، معبد شوئدبون. 2هووخت، چندنفر، یکته مرداکِ که مادرزادی شَل بو، اَرده بوئن. اوشؤن اونه هر روز او معبدِ دروازه ورجه که ’قشنگ دروازه ‘ ایسم داشت، نَئن تا مردمَ جی که معبدِ میئن شوئدبون، صدقه هگیری. 3هیطوکه او شلِ مردکای پطرس و یوحنا بدِه که خؤانَن معبد دیرون بوشؤن، اوشونای صدقه بخواسّه. 4پطرس و یوحنا او شلِ مردکاکه چال بزِئن؛ پطرس او مردکاکه بوته: « اَمره بَین!» 5بازین او شلِ مردکای اوشونه نیگاه گوده و منتظر بو یه چی اونه هدِئن.
6ولی پطرس اونه بوته: «مو نه طلا دئنم و نه نقره دَئنَم، ولی از اوچی که دئنم تَه هَدِنَم! به ایسم عیسی مسیح ناصری ویریس و راه بشو!» 7بازین پطرس او شلِ مردکاکه راستِ دستِ بیته و اونه ویریسؤنه. هو دم اونه پا و اونه زانوئن قوت بیته 8و خو جا جی ویریسَه و خو پا سر بِیسه، راه دکته. بازین هوطو که واز واز کائدبو، خدا شكر کونؤن، ایشؤنِ أمره معبدِ دیرون بوشو. 9همته مردم اونه هوطو که راه شوئدبو و خدا شكر کائدبو، بدِئن، 10و بفهمسن ایی هو شلِ مردکاکه که پیشتر صدقه گیتن وَسه ’ قشنگ دروازه ‘ ورجه نیشت، و اوچی وَسه که اونه سر بومابو، مات بخوشته و قاقَ بوئن.
پِطرس گبؤن ایوانِ سلیمانِ میئن
11هو زمؤن که او مردکای پطرس و یوحنا أمره شوئدبو و اوشونای سیوا نبنه بو، مردم همته حیرونَ بو ’ایوان سلیمان‘ میئن، ایشونِ سو بودوؤسَن. 12وختی پطرس اینه بدِه، وگرسه جماعتِ بوته: «ای یهود مرداکؤن، چرِء ایی كار وَسه هنیچی حیرونَ بوین؟ چرِء اَمره چال بزین، انگار که أمه، خودمونه قوت و دینداری أمره، کاری بودیم که ای مردکه راه بشو 13ابراهیم خدا و اسحاق خدا و یعقوبِ خدا، اَمه پئرؤن خدا، خو خدمتگزار عیسی جلال بده، هونی که شمه اونه تسلیمَ گودین و پیلاتُس فرماندارِ ورجه اونه حَشا گودین، گرچه پیلاتس تصمیم ایی بو که اونه آزادَ كونی. 14ولی شمه او قدوس و صالح، حشا بودین و بخواستین یکته قاتیل بجای او، شیمه به آزادَ بی. 15شمه اونیِ که زیندگی سرچشمه بو بکوشتین، اما خدا اونه مُرده‌أنِ میئنای زنده بوده و أمه اینه واسه ای چیونه شاهیدون ایسّیم 16و عیسی ایسم، و ایمؤن به اونه ایسمِ أمره ایسه که ایی مردکای قوت هیته، ایی مردکای که اونه اینین و شناسنین. ایمؤنی که بواسطه اونه ایسم، ایی مَردکه شیمه همته جلو کامیل شفا بدَه.
17«و الؤن ای برأرؤن، دؤنم که شمه و شیمه قوم پیلترونِ كار، نادونی جی بو. 18ولی خدا هی کار أمره اوچیزی که تمؤم پیغمبرؤن زبونَ جی پیشگویی بوده بو انجوم برسونه که: اونه مسیح، عذاب کشنَه . 19پس توبه بکونین و خدا سو وگردین تا شیمه گوناهؤن پکا بی 20تا او زمون برسی که خداوند حضور جی تازگی شیمه به بای، تا خدا، مسیح موعود که پیشتر شیمه بِه انتخاب بؤ بو، سرا دای، یعنی هو عیسی. 21که آسمؤن بأیسی اونه قبول بوده بی تا روزونی که همه چیز طبق او چیزی که خدا از قدیم خوشه تموم مقدس پیغمبرؤنِ زبونَ جی بوته، به انجوم برسونی. 22موسای پیغمبر بوته: ”خداوندْ خدا، شمه برارونِ میئن یکته پیغمبر می مورسون شیمه به سرا دِئنه و هرچی که او شمره گونه، باء گوش بدین. 23هر کس او پیغمبر گب گوش ندای، مردومِ میئنای هلاک بنه.“ 24«همه‌ء پیغمبرؤنم، کی بعد سموئیل بومَئبوئن، یکصدا ایی روزؤنِ باره پیشگویی بودِه بوئن. 25و شمه پیغمبرؤن زأکؤنین و وارثِ او عهدی ایسیّن که خدا شیمه پئرؤنِ أمره دوَسّه. هو موقع که خدا ابراهیمِ بوته: ”به واسطه تی نسل تمؤم زمین مردومؤن برکت هگینن.“ 26هوموقع که خدا خو خدمتگزار، عیسی انتخاب بوده، اول اونه شیمه ورجه سرا دا تا هرته از شمره بركت بدای، و ایی کار أمره شمره شیمه شرور راهؤنَ جی وگاردوئنه.»
ទើបបានជ្រើសរើសហើយ៖
رسولؤن اعمال 3: EGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company
