Mikolo ye'ndumwa 19
19
Paulo áhubanganya eChinwa cha Ongo mwa musi we'Efeso
1Mango Apolo ábaa achíri eKorindo, Paulo nai ábaa ásungula mwa miruko ye'bio bye'Asiya. Chasinda, era kwândaalira mwa musi we'Efeso. Era kubuana'mo bemeresi bauma. 2Era kubabusa mbu: «Mango mweméreraa Yesu, mwàbonaa eMuchima Mubuya-buya?» Nabo mbu: «Nânga, ne'kunômva kwa kutula Muchima Mubuya-buya, tùtanafuraa kûmva'ko.» 3Era kuhuba kubabusa mbu: «Ewashe! Bubatiso buchiye bu mwéraa mwábona mubeke?» Nabo mbu: «Ebubatiso bwa Yowani ákangirisaa.» 4Paulo kukwera kubabura mbu: «Yowani abáa énjire ábatisa ebandu ba béndee bábinduka kutenga mwa bibi byabo. Kanji abáa énjire ábura'bo kwa běmereraa ola ungábaha era nyuma sai, no'yu i'Yesu.»
5Ábere bera bômvaa kwe'i myasi, bera kubatisibwa kwe'sina lya Enawetu Yesu. 6Mango Paulo ábaa anáchiri abábikire kwe'mino, unao-unao eMuchima Mubuya-buya kuna kubandaalira. Bera kutangirisa báteta mu manji mateta, na kúreba. 7Boshi bábaa bàngaika ku balume ekumi na babiri.
8Paulo era kuira myesi ehatu énjire êngirira mwa bushenge bwe'Bayuta*. Era kunde ábabura emyasi ye'Bwami bwa Ongo* na bushiru bunene, bushi ábaa áhonda bayêmerere. 9Si bauma mubo, bera kuata michima isibu, na bánana kwêmerera. Bera kutangirisa bákamba ei myasi era muhondo se'bandu. Bushi no'ku, Paulo era kubareka, na áya ne'bemeresi mu chumba chiuma, cha mulume muuma mbu i'Tirano éndee ákangirisisai mwe'bandu. Mwe'chi chumba, mu Paulo ábaa énjire ákangirisisa ebemeresi eChinwa cha Ongo chira lusuku. 10Paulo era kunaendekera áira bacha ku myaka ebiri, kuikira kwa chihangi eBayuta ne'Bakiriki boshi ba bábaa batúla mwa chio che'Asiya bômva eChinwa cha Enawetu.
Baala ba Sikewa báhutwa ne'chihwasi
11Ongo ábaa énjire áira bisomerano bya bìtafuraa kulorekana'ko kurengera Paulo. 12Ebandu bera kunde bátolanga ebitambara ne'njimba sa sàumaa kwa mubiri wa Paulo, bera kunde bábireteranga ebalwala na bálama. Ebihwasi nabi, byera kunde byánabatenga'ko. 13Kwábaa kuli Bayuta bauma ba bábaa bénjire bárenga-renga báenda bâmbula ebihwasi kwa bandu. Nabo mwa kwâmbula ebihwasi, bera kunde bárengera mwe'sina lya Enawetu Yesu mbu: «Kwe'sina lya Yesu ola Paulo énjire áhubanganya, nàbabwirire muténgaa kwo'no mundu!» 14Mwa ba béndee báira ei myasi, mwábaa mùli baala ba Sikewa balinda. Oyu Sikewa, ábaa muuma mwa bakulu-kulu be'bakuhanyi be'Bayuta.
15Lusuku luuma, echihwasi chábaa chìri ku mundu muuma. Echi chihwasi, chera kubura'bo mbu: «Yesu, nyitúla nyimwîshi, na Paulo nai nyimwîshi. Si mwabo, mu mwera bande?» 16Mwo'lu, ola wábaa usímbirwe ne'chihwasi kuna kubaumbikira, era kubarenza ne'misi boshi. Kunakutangirisa ábapunda-punda. Bera kunálinda báuluka mwa nyumba yo'yu mulwala báenda báhaa, bera bàli butambara, bàchikangire ne'biulu.
17Besha Efeso boshi, eBayuta ne'Bakiriki bera kunômva kwo'yu mwasi. Ebuba bwera kwire bwábasimba boshi. Esina lya Enawetu Yesu lyera kuya ngulu. 18Rero, banene mwa ba báhubaa bemeresi, bábaa bénjire báika kuchiaya changanama kwa mabi mabo era muhondo se'bandu. 19Banene mubo, ba béndee bálaula, nabo bera kunde báreta ebitabo bya béndee bákoresa mwa kulaula ne'kunde bábyochera era muhondo se'bandu boshi. Mwa kuhola echichiro che'bi bitabo, bera kulola kwa byábaa bìngafa byumbi matano bya buteya.#19:19 Byumbi matano bya butea: Byábaa bìngaula ngafu singaika ku maana mabiri na matano. 20Mwo'lu, eChinwa cha Enawetu chera kunaendekera cháhandabana mwa bisiki byoshi kwa buashi bwai, cháata na misi inene.
Elwayo lwába mwa musi we'Efeso
21Era nyuma se'bi, Paulo era kulola kwa kukomire aréngere mwa chio che'Maketoniya, ne'che'Akaya, chasinda érukire eYerusalemu. Kanji era kuteta mbu: «Era nyuma se'kuika eYerusalemu, bingányema nyiíke no'mwa musi we'Roma namo.» 22Era kwire átola bandu babiri mwa'ba béndee bámwerekesa, Timoteo na Erasito mbu bàmuhondoreraa eMaketoniya. Si yeke era kwishiba tanga mwa chio che'Asiya ku suku burebe.
23Rero mwe'si suku, mwa musi we'Efeso mwera kuba lwayo lunene bushi ne'myasi ye'kukulikira Enawetu. 24Mwo'yu musi mwábaa mutúla murenga muuma mbu i'Temetiriyo. Oyu Temetiriyo, ábaa atúsa mulimo wa kwêsa bihuhanyi bieke-eke mwa bikoroto bya bihúhire eluhu lwa ongo muuma mbu i'Aritemi. Oyu mulimo, era kunde áretera barenga bálikabo mutoloke munene.#19:24 Mwa Bakiriki, Aritemi ábaa ongo wa chikasi ola wéndee wêresa ebandu emiisha ye'kwesa emyaka. 25Temetiriyo era kubuanyanya abu barenga ala'uma ne'banji bandu ba béndee bákola emulimo ola ulí ngo'yu. Era kubabura mbu: «E betu! Si mwìshi kwo'no mulimo i'utúla utúbukire! 26Rero, mubeine mwàchilorere na kuchumvira kwa ono Paulo ashíirise na kwéka bandu banene muno musi we'Efeso, na mu bisiki binene byo'muno chio choshi che'Asiya. Énjire áteta mbu ebaongo ba bandu bénde bákwisa, bàtatula baongo ba kanangana. 27Rero, nyiséne kwa ono mulimo wetu kufa kwa álinga kufa. Ne'luhu lwa ongo wetu munene Aritemi, nalo lutáchilorekane'ko nga kandu, ne'tunda lyai, nali lingáera no'ku i'ongo ola ebandu boshi bo'muno Asiya ne'bo'mwa butala boshi bénde bêra.»
28Abu barenga bômvire bya Temetiriyo ábaa áteta, bera kusibuka busese na bátangirisa bálakanga mbu: «Aritemi we'Baefeso áye ngulu!» 29Olu lwayo, lwera kunaendekera lwáluwa mwa musi woshi. Ebandu bera kusimba besha Maketoniya babiri, Kayo na Arisitariko, bu béndee bêrekesa Paulo mwa mulimo. Kuna kubeka mwa nyumba inene era ebandu béndee bábuanana'mo. 30Paulo ábaa áhonda kuchikangana era muhondo sa'bu bandu, si ebemeresi bera kumwanga. 31Bakulu-kulu bauma bo'mwa chio che'Asiya ba bábaa batúla bera bai, nabo bera kumutumira emwasi kwa àtaereresaa áya mwe'i nyumba.
32Mwo'lu lubuanano mwábaa mùli lwayo lunene, bushi bandu bauma bábaa bálakanga kwabo, ne'banji kwabo. Na banene mubo, bábaa bàtanêshi cha chatúmire bábuanana. 33Bauma mwa Bayuta bera kubura mulume muuma mbu i'Alesanduro mbu aréngaa era muhondo se'bandu abúre'bo bya bìri. Nai kukwera kubika emino mwa chanya chasiya ebandu basíre, bushi ábaa áhonda achítetere yeine era muhondo sabo. 34Si mango bámenyereraa kwa kasi àli Muyuta, boshi kuna kulakangira chakuuma kanji mbu: «Aritemi we'Baefeso áye ngulu!» Bera kumala saa singáika kwe'biri bénjire bánateta bacha.
35Chasinjire, ekaranyi we'musi era kubanda kwa'bu bandu mbu: «Emu besha Efeso, kuchiri mundu ola ùteshi kwa ono musi wetu iwénde wálanga eluhu lwa ongo munene Aritemi ne'chihuhanyi chai cha chátowaa kutengera kwa nguba? 36Si kutáli mundu ola ùnganana echera! Bushi no'ku, mwiree mwásira, mùtanalibichiraa kuira mwasi asibya busira kuanyisa. 37Nàtechire bacha, bushi bano bandu mwàrechire anola, bàtebire kandu mwa luhu, nesi kukamba ongo wetu Aritemi. 38Rero, akaba Temetiriyo ala'uma na barenga balikabo béte lubanja na mundu murebe, si bèshi kwa tutúsa tiribinali, tutúsa ne'baishi be'manja. Eyera yi běmire kwéka elubanja lwabo! 39Kanji, akaba muchéte chinji cha kuteta, mwa lubuanano lwa lutúla lwìshibwe ne'mwaso wetu mu chìngahambalibwa'ko. 40Mulólaa! Emyasi era yàbere lwarero, ingátuma twásitakibwa kwa tubano tu twàrechire elwayo. Kanji kutáli chiro na mwasi asibya ola tùngalosa kwa iwatúmire luno lubuanano lwába.»
41Ábere era ámalaa kuteta bacha, era kwire ábura ebandu mbu bafúlukaa kwa musi.
ទើបបានជ្រើសរើសហើយ៖
Mikolo ye'ndumwa 19: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.
