Mikolo ye'ndumwa 20
20
Paulo ábalamira kanji mwa chio che'Maketoniya ne'che'Bukiriki
1Mango elwayo lwábaa lwera lwawáa mwa musi we'Efeso, Paulo era kubuanyanya ebemeresi, na ábasesa emuchima. Chasinda, era kubalaa, na áya mwa chio che'Maketoniya. 2Era kurenga mwe'chi chio áenda ábura ebemeresi myasi inene ya kubasesa emuchima. Chasinda, era kuya mwa chio che'Bukiriki, 3na ámala'yi myesi ehatu. Mango ábaa era áhonda kutola ebwato ahábukire mwa chio che'Suriya, eBayuta bera kumuira lwango. Bushi no'ku, byera kumwěma ahúbe kurengera eMaketoniya. 4Babano bu bámwerekesaa: Sopateri muala wa Piro, mwesha Beroya, na Arisitariko, na Sekundo besha Tesalonika, na Kayo mwesha Teribe, na Timoteo, na Tikiko, na Torofimo, besha mwa chio che'Asiya. 5Abu bandu boshi, bera kutuhondorera mwa musi we'Torowa, bàtulinjire'mo. 6Mango elusuku lukulu lwe'mikati era itáli mu'chachu* lwábaa lwera lwàrengaa, tubano twera kutola ebwato twátenga mwa musi we'Firipi. Ábere twamála suku etano mwo'lu lubalamo, twera kubuana abu baliketu mwa musi we'Torowa. Mwo'yu musi namo, twera kumala'mu linji einga lya mutenga.
Paulo ômwola Eutiko
7Mango elwe'inga#20:7 Mwa Bayuta, elwe'inga lwéndee lwátangirisa elwe'ndatu luolo-olo. lwáikaa, twera kubuanana kwa kuhangira emukati. Rero, bushi byábaa byěmire Paulo alámukire mwe'i mishangya, era kutangirisa áhubanganyisa ebandu eChinwa cha Ongo kuikira kachi-kachi ka butufu. 8Echumba cha twábaa tubúananyire'mo, chábaa cha kahatu kwa ngangamo se'nyumba. Mwe'chi chumba, mwábaa mwákorera tumore tunene. 9Kwe'tirisha lye'chi chumba, kwábaa kwékese mutabana muuma mbu i'Eutiko. Oyu Eutiko, era kutangirisa ásindaana bushi Paulo ámalaa bihangi binene ákangirisa ebandu. Na mango óndoberaa mwa tulo, kuna kutowera ala'shi átengera kwe'chi chimbi cha kahatu che'i nyumba. Ebandu bera kulibichira kumubatula, si bera kubuana afíre mira.
10Paulo era kwândaala, era kwínamirira ku'Eutiko, era kumurembera. Chasinda, era kubura ebandu mbu: «Mùtaliraa, bushi achíri áumula!» 11Era nyuma se'bi, Paulo era kuhuba kwérukira mwe'chi chumba, era kuisha kanji mwa mukati, na álya'o. Kanji era kunaendekera ákangirisa ebandu bihangi binene kuikira lumbuli-mbuli. Chasinjire, era kuùluka mwe'i nyumba na áchiuma. 12Ebemeresi bera kwêrekesa oyu Eutiko kwa wabo era àli muuma-uma. Bera kusesibwa emuchima busese.
Paulo ábalamira mwa musi we'Mileto
13Paulo ábaa áhonda kuya mwa musi we'Asosi mwa maulu. Bushi no'ku, twera kwêmeresanya kwa omola mu tungábuanana nai. Twera kumureka na twámuhondorera mwa bwato. 14Mango átubuanaa eAsosi, twera kumutola mwo'bu bwato, na twáhabukira tunabo mwa musi we'Mitileni. 15Ábere elusuku lwa kabiri, twera kutenga kanji eMitileni mwa bwato, na twáhabukira ofu ne'chisimba che'Kiyo. Ábere elusuku lwa kahatu, twera kuhabukira kwa chisimba che'Samosi. Chasinda, elusuku lwe'kane, twera kuhabukira mwa musi we'Mileto. 16Paulo ábaa áhonda mbu tunáulukanaa eEfeso mwa bwato busira kwîmanga, bushi ábaa àtasimire ebihangi bimúrengere mwa chio che'Asiya. Kanji ábaa álibichira eYerusalemu chasiya elusuku lukulu lwe'Pendekosite* lùmubuane'yi, akaba bìngaalikana.
Paulo áhambala ne'bangumwa be'luhu lwa Ongo lwe'Efeso
17Ábere Paulo anáchiri eMileto, era kutumisa ebangumwa be'luhu lwa Ongo lwe'Efeso. 18Mango báikaa era ábaa àli, era kubabura mbu: «Kutengera elusuku lubere lwa naíkaa mwe'chine chio che'Asiya, mubeine munêshi kute emyanya yanyi yabáa iri. 19Mango nabáa nálibuka ne'ndaane sibi se'Bayuta, kukorera ku nabáa nénjire nánakorera Enawetu mwa burembu boshi no'mwa malira. 20Kanji munêshi kwa akaba kwabáa kùli mwasi ola wábaa ubêtere mufa, ndàbabishaa'o chiro na hicha. Si nabáa nénjire nábahubanganyisa na kubakangirisa byoshi era muhondo se'bandu, no'mwa nyumba senyu. 21Nabáa nénjire nábura eBayuta ne'bandu be'sinji mbaa changanama kwa babíndukaa kutenga mwa bibi byabo baálukire Ongo, běmerere Enawetu Yesu.
22«Rero nyono, eMuchima Mubuya-buya énjire ányibura kwa binyěmire kuya eYerusalemu. Eyera, ndeshi emyasi era ingányikira'yi, 23si cha nyìshi kubuya-buya cheke, eMuchima Mubuya-buya ànyilosise mira kwa chira musi ola nyingárenga'mo, ekuminwa ne'kurenga mwa malibuko bi byányirinjira. 24Si chiro bacha, ekalamo kanyi ndàkasene'ko nga kandu. Cha náhonda, kùli kumala emulimo wanyi ola Enawetu Yesu ányeresise. No'yu mulimo, análi ola we'kuhubanganyisa ebandu eMwasi Mubuya-buya we'bonjo bwa Ongo.
25«Kanji nabáa nénjire násungula mwa kachi-kachi kenyu náenda nábahubanganyisa era luulu se'Bwami bwa Ongo*. Si rero kutengera lwarero, nyono nyìshi kwa kutachiri chiro na muuma mu mwabo ola ukáchinyilola'ko. 26Bushi no'ku, che'chine chi nábabura lwarero: múkere mwáera, emikira yenyu iri kwe'twe lwenyu, 27bushi emyasi yoshi ye'kuhonda kwa Ongo, nàbabwirire'i mira busira kubabisha kandu. 28Rero, mundaa mwáchilanga kubuya mubeine, mwánalanga ne'luamba loshi lwe'bemeresi lwa eMuchima Mubuya-buya áberesise mbu mubalángaa. Bushi abu bemeresi, Yesu iwánaa emikira yai kwa kubanunula. 29Nyìshi kwa era nyuma se'kuenda kwanyi, ebandu ba bàkaliire nga nyishibwabwa bangêngirira mwa kachi-kachi kenyu, batánabafire bonjo. 30No'mwa kachi-kachi kenyu mubeine, namo munáchiri mungánaboneka banji bandu ba bangénde báteta myasi ya kuhonda kuesa ebanji, chasiya bakúlulire ebemeresi kwa lunda lwabo. 31Bushi no'ku, muchilángaa kubuya! Kanji mwánende mwákengera kwa ku myaka ehatu, emushi ne'butufu, mwa malira ndarékaa kunde néresa chira muuma mu mwabo emáno!
32«Rero, nabábikire mwa maboko ma Ongo. eChinwa chai che'bonjo nachi, chíndaa chábalanga, bushi echi Chinwa chi chète ebuashi bwe'kubaasa kukula mwa bwemeresi, ne'kuberesa emwandu ola ábikirire ebandu bai boshi ba ánunwire. 33Kubinali! Nyono ndahúmiraa, buteya bwabene, nesi horo yabene, nesi njimba sabene. 34Kanji mubeine munêshi kwa mwe'sine mino sanyi mu'néndee nákola bushi ne'bilao byanyi ne'bya baliketu ba nabáa nyìri nabo. 35Mwa myasi yoshi, nabáa nénjire nábalosa kwa bitwěmire twínde twáshika endubano mwa kukola, chasiya tubóne bya tùngaasa'mo ba bàtachialire. Mundaa mwákengera kwa Enawetu Yesu yeine átetaa mbu: ‹Ola wâna i'uáhanyirwe kurenza ola wêresibwa.›»
36Ábere Paulo era amálaa kuteta ei myasi, era kukoma emafi ala'uma nabo boshi, era kwéma Ongo. 37Ebandu boshi bera kutangirisa báchiumanga mwa maboko mai, ne'kumuoberanga bálira na busese. 38Báliraa bacha, bushi áburaa'bo kwa batákachimulole'ko. Chasinjire, bera kumwerekesa kuikira ala bwato bwe'kumweka bwábaa bùli.
ទើបបានជ្រើសរើសហើយ៖
Mikolo ye'ndumwa 20: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.
