Mikolo ye'ndumwa 18
18
Paulo mwa musi we'Korindo
1Era nyuma se'bi, Paulo era kutenga mwa musi we'Atene, era kuya mwa we'Korindo. 2Áikire'mo, era kubuana mu Muyuta muuma mbu i'Akila, mwesha mwa chio che'Pondo. Oyu Akila na mukai Purisila bábaa bàtasa kwêrisa bàtengire mwa chio che'Italiya, bushi mwami Kalautiyo ábaa àulusise eBayuta boshi mwa musi we'Roma. Paulo era kuya kubatangula, 3era kwire ánekala nabo bushi emulimo wai ne'wabo ánabaa muuma. No'yu mulimo wabo ábaa wa kukunganya mahema. 4Na chira lusuku lwa Sabato*, Paulo ábaa énjire êngirira mwa bushenge bwe'Bayuta*. Era kunde áenda ebwaka ne'Bayuta ala'uma ne'Bakiriki era luulu se'Chinwa cha Ongo, chasiya bábe bemeresi.
5Mango Sila na Timoteo bábaa bera báikaa bátengera eMaketoniya, Paulo era kwire ánabika ebihangi byai byoshi mwa kunde áhubanganya eChinwa cha Ongo. Era kunde ábura eBayuta kwa Yesu i'na Masiya*. 6Si eBayuta bera kunana emyasi ya Paulo ne'kumukamba. Era kwire ábakunguchira enjimba#18:6 Mwa Bayuta ekukunguchira emundu enjimba, kwábaa kuteta mbu àtachiri mwa myasi yai. sai ne'kubabura mbu: «Akaba mwera mùngaera, emikira yenyu ìri kwe'twe lwenyu. Nyono ndàchete mwinda wa mundu. Na kutengera lwarero, nyingére náchiira kukangirisa ebandu be'sinji mbaa.»
7Paulo era kutenga mwe'chi chisiki, era kuya mu nyumba nguma era yábaa iri ofu ne'bushenge bwe'Bayuta*. Ei nyumba yábaa ya mulume muuma mbu'i Tito Yusuto. Oyu Yusuto, ábaa atúla àtunjire Ongo. 8Emukulu-kulu wo'bu bushenge mbu i'Kirisipo era kwêmerera Enawetu ala'uma na besha mwa mwai boshi. Na besha Korindo banene ba béndee bômvirisa emyasi ya Paulo, nabo bera kunde bémerera na kubatisibwa.
9Lusuku luuma butufu, Enawetu era kubura Paulo mu byabunya biroto mbu: «Uténdaa wôbaa nesi wásira! Kuhubanganya ku unáendekeraa wáhubanganya, 10bushi nyìri ala'uma nao. Kanji kutáli mundu ola ungáereresa kukuira bulio bushi mwo'no musi, nyéte mu bandu banene.» 11Paulo era kumala mwaka muuma na myesi ndatu mwo'yu musi énjire ákangirisa ebandu eChinwa cha Ongo.
Paulo átongana era muhondo sa Kaliyo
12Mango Kaliyo ábaa àli mukulu-kulu we'chio che'Akaya, eBayuta bera kuchibika ala'uma mwa lwango lwe'kusimba Paulo na bámukululira era muhondo se'baishi be'manja. 13Bera kutangirisa báteta mbu: «Ono mundu énjire áshiirisa ebandu mbu béndaa bera Ongo kunji-kunji kwa kutakulikene ne'Mwaso wetu.»
14Ábere Paulo era álinga kuteta, Kaliyo era kubura abu Bayuta mbu: «Emu Bayuta, akaba mwasítakaa ono mundu mbu àkolire chibi chirebe nesi mbu àirire mwasi mubi ola usítoire, aola nyìngabômvirise. 15Si bushi ebwaka bwenyu bùnerekere emiomba*, ne'masina, ne'Mwaso wenyu, ebyera biberekere mubeine. Elubanja lùli ngo'lu, nyono ndàngaisha'lo.» 16Chasinda, era kuteta mbu bakólokanyaa abu bandu, baténge era muhondo se'baishi be'manja. 17Mwo'lu, ebandu bera kuumbikira emukulu-kulu we'bushenge bwe'Bayuta* mbu i'Sositene. Kuna kutangirisa bámupunjira mwa meho me'baishi be'manja. Si ebi byoshi, Kaliyo chiro ákanachìlaíra kubi.
Paulo áhuba eAndiyokiya
18Paulo era kumala sinji suku sinene mwo'yu musi we'Korindo. Chasinda, era kulaa bemeresi balikabo, era kutola ebwato áhabukira mwa chio che'Suriya àtondekene na Purisila na Akila. Rero bushi ábaa àlaisise mira kwa akákorera Ongo, era kukumulwa emviri#18:18 Mwa Bayuta, emundu ola wéndee wáira chiraane chirebe na Ongo, ábaa àtakumulwa emviri era muhondo alúmise esuku se'chi chiraane. Somaa Muanjo 6:5-18. era muhondo se'kutenga kwa chihabukiro che'Kengureya. 19Mango báikaa mwa musi we'Efeso, Paulo era kurekana na Akila na Purisila. Yeke era kuya mwa bushenge bwe'Bayuta* na átangirisa áhambala nabo. 20Bera kumwěma mbu ékalaa nabo suku sinene, si era kunana. 21Mango ábaa era aláaa'bo, era kubabura mbu: «Ongo ákasima nyingáhuba kuika ene mwenyu.» Chasinda, era kutenga Efeso mwa bwato.
22Ábere era áikaa mwa musi we'Kaisariya, era kwérukira tanga eYerusalemu akése ebemeresi. Chasinda, era kwaândaalira eAndiyokiya. 23Ábere amála suku burebe mwo'yu musi, era kuhuba kuchiuma áenda ásungula mwa chio che'Kalatiya musi ku unji, kuikira mwa chio che'Furikiya áenda ásesa ebemeresi emuchima.
Apolo áika mwa musi we'Efeso ne'we'Korindo
24Mwa musi we'Efeso mwáikaa Muyuta muuma mbu i'Apolo. Oyu Apolo ábaa mwesha mwa musi we'Alekisanduriya. Ábaa ndechi ya mulume kanji ábaa atúla eshi eMaanjiko Mabuya-buya busese. 25Ne'njira ye'kukulikira Enawetu, nai ábaa ákangirisibwe'i mira. Nai ábaa énjire áhubanganyisa ebandu na kubakangirisa na bushiru bunene ekanangana ke'myasi era yèrekere Yesu. Si ebubatiso bwa Yowani oshâo bu ábaa anêshi. 26Era kuya mwa bushenge bwe'Bayuta*, na átangirisa áhubanganyisa ebandu eChinwa cha Ongo busira buba. Ábere Purisila na Akila bera bàmômvirisaa, bera kuya nai ala mwabo, chasiya bàmukangirise enjira ye'kukulikira Ongo. 27Chasinda, Apolo era kuhonda áye mwa chio che'Akaya. Ebemeresi bera kumuwa emisi ye'kusera mwo'yu mwasi. Bera kwire báanjikira ebemeresi ba mwe'chi chio emaruba mbu bàmuhuukasaa kubuya. Áikire'yi, era kuachira mufa munene ebandu ba báhubaa bemeresi kwa buashi bwe'bonjo bwa Ongo, 28bushi yeke éndee ômya eBayuta emate changanama, mwa kubalosa kurengera eMaanjiko Mabuya-buya kwa Yesu i'na Masiya*.
ទើបបានជ្រើសរើសហើយ៖
Mikolo ye'ndumwa 18: tbt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017 Wycliffe Bible Translators, Inc.
