I Corinthiens 15
15
Gékundugéô saJésus‐Christ
1Ana aTéta n’ami, me Paul nanôbangôéda Tsangô Eamôsôba éaJésus‐Christ émeekédu anye. Nômasinga yangô. Nômagésangana mitéma mianyô na Nzambé gô yangô. 2Nôobou gô ngudi yaTsangône Eamôsôba édué ôkô nôsipi gô yangô gamanôékéda me. Okô nôsisipa nômeetsa mitémamie te bobo.
3Namanôékéda bandôa v’ebandô mabégôme mavôni mameetsô me. Nameekéda anye mbe Jésus‐Christ amawa gô ébéva éasô n’anyô te gamatôévédu na Matendeo MaNzambé. 4Amagunyu gô ngii na amakunduga gô pitsine éamôtatô te gamatôévédu na Matendeo MaNzambé. 5Vamakunduga Jésus ameenanô na Pierre, buéyé n’akedi muetso, ahngô nzima n’abaé. 6Na amatsutsuga dôta va miso mamikama mitayi mianeengi edi na va mbene. Vanôtendéa me éva, ayekani va gatse aô agédôngaka n’avo amamana éwa. 7Va mbenene vane amatsutsuga na vandé Jacques na dôta vandé ane amasevouni na amatômukuni n’amuene Jésus.
8Angô amayusuméda étsutsuga te vandé me. Me nasôbasôbana. Natsapéô gômatsutsugangô vandé me. Me va gatse akasô nandé ga muana amabôtu géôdé. 9Va gatse ane amasevouni na amatômukuni na Jésus, môngimee na ngaa te me Paul. Buéyé vane tsaba kuanakue gôétetu mbe ône amatômu na Jésus gôébégô va mbeego namakuanaka pepe asi mbumu éaNzambé. 10Veenanye me deo noo, me nandé nane te gô mate meetsô me na Nzambé. Mate medi mamayanza gôndé me na ngudi dipôni. Eenakani, éne éyanzéa me Nzambé éôtéa n’ene éyanza akasô muetso. Ivô kaka me, te mateme maNzambé mane. 11Endé te nane. Buéyé mbe akasô eékédani buéyé mbe me neekédani, meekédume mane te mavô. Na te mangô mamasinganye na mitémamie mianyô mietso.
Gékundugéô sasô n’anyô
12We tôékéda mbe: Jésus amakunduga g’ôwa. ?Tambô avo va gatse anyô nayee nôvovo mbe, ane amawani asangakunduga g’ôwa‐a? 13Okô mbe éne évovo anye éndé kuanakue, tambô n’amuene Jésus‐Christ asikundugé g’ôwa. 14Okô mbe Christ asikundugé g’ôwa tambô tôsaba na mabégô gôéékéda. N’anye nômamôétsa mitémamie te bobo gébé na tsoongo. 15Na va ngongone vane, we eekédi tôpata te pataga vatôvovo mane maNzambé mbe, na gô pie amakundua Christ g’ôwa, tambô anye nôvovo mbe asimôkundué. Metso mane, ôkô mbe te na gô pie tambô ane amawani asangakunduga. 16Tambô ôkô mbe ane amawani asangakunduga g’owa eembe na amuene Christ asikundugé. 17Okô mbe Christ asitimôgé g’ôwa gôéba na monyo, anye mbe nômamôétsa mitémamie te bobo gébé na tsoongo. Na anye nôgébaka nômadimbana gô ébévee éanyô. 18Na buéyé n’ane amawa amasinga Christ, tambô ahngô dôta amakea gôébungana. 19Okô mbe tsoongone éasô n’anyô étôdiiani gôtôvamba na Christ ébandôa na ékôdéa te gô monyoe ava tsina ôtévo tambô wa n’anyô te asi maguga na maguga, na asi ngeba na ngeba.
20Tôtsika vita pagaye. Tôôta na gô édué. Jésus‐Christ amatimôga na gô pie g’ôwa gôéba na monyo. Vane te gémbégéa gématôtubédu na Nzambé mbe: Gamakundua me Jésus g’ôwa, nanganôkundua muetso nômawani te mônongovo. 21Endé te nane. Owa ômaviga na gô tsina na môma môvo. Na gékundugéô sowa gémaviga na gô tsina na môma môvo. 22Wa n’anyô muetso tôwa te gômatôvamba n’Adam. Na wa n’anyô muetso tôngakunduga gômatôvamba na Jésus‐Christ. 23Ivô ékundugéôe éndé gô ngéko na ngéko. Mapangame te amuene Christ. Va ngimedi te wa n’anyô oma aJésus‐Christ gô ndéône énganikangô na gô tsina. 24Va mbenene vane te ékôdéô éatsinane. Vane te ndéône éngabunzéda Christ manyangame metso, na ditômuye yetso na ngudiye yetso yedidie éasagô. Na Christ anganikéda ôkumue na gôndé Tétedi Nzambé. 25Tambô ôtômue ôbaké na Kumu Jésus‐Christ gôétôma ngu na vangatseda Nzambé adudeo muetso aka gô tsina amatambé maJésus. 26Môdudeone angayusumédu ébunzuni te ôwee. 27Endéké te gatônigôu na Matendeo MaNzambé mbe: Nzambé amavumba éetso gô tsina amatambé maJésus gôéyetu. Vatôtanga mbe: éetso évumbu mbe éyetu na Christ, ivô kaka Nzambé amuene andé gô tsina amatambé maJésus. Gôébégô Nzambé te môétsine na Christ te môyetine. 28Vangasugédu éôma éetso g’ôtômu aChrist vane amuene Muana ANzambé, Jésus‐Christ angaasugéda amuene vandé Tétedi Nzambé, ône amamôétsa éôma éetso. Tambô ôtômue n’okumaka wetso ôngaba na amuene Nzambé.
29Anye nôdigaa gô paga yagékundugéô. Tasani gô gésima géndéké n’avo gôédiia bateme gôényepeda ane amawani. Okô mbe ane amawani asangakunduga ?bateme nene tsoongo ndé? ?Gôébégô ndé abuta édiia bateme gôényepeda ane asangadôkundugani? 30?Okô mbe ane amawani asangakunduga, tambô we eekédie tôbuta ôwa gôndé? ?Tôbambana ndéô yetso n’owa gôndé? 31Ana aTéta n’ami, me nanôbeenda mbe me Paul pitsi yetso navétsu n’owa. Nanônigôa gôébégô anye te anami atsôkéa me, na tôndéké monyo ôvo gô vitoone éndé wa n’anyô na Kumu asô n’anyô Jésus‐Christ. 32Vagenya me nandé gô Ephèse môgenye ôvôni gandé môma agenya na gémbungu ?te gôéba na monyo ava tsina éva ôtévo‐a? ?Buéyé mbe nadiia vagenya me, tsoongo ndé? Okô mbe va mbene owa gôsaba gékundugéô tambô tsava égunyuni ésapata. Tsavane eendô mbe: ôka deo noo tôaakéni na tônyuakéni. Mene tôngawa.
33Tômbiabômédu. Mavamba mabévani mabévéda midigédi miamisôba. 34Anye tsikani diyunga yasagô ganôsaba na mitéma. Tsikani matasa mabévani. Nanôbeenda mbe avo va gatse anyô nôsamenya Nzambé ta na pesu. Te tsoyi épôni gôndé wa n’anyô.
Otôe ôngaba n’ane angakundugani
35Mavooe nôndé na nyivô mbe: ?Ane amawani angakunduga nayéé? ?Yôtôye yaô dingaba yamônongo ndé? 36Anye ti asi éboki. Tôkanéga gatôgaaba môbie. Vagaabô môbie ôsangakanda éne édôngani ta môbie madeo ôsiboo gô tsina. 37Ene étôgaaba gô toto te môbie ôtévo gandé éso éapôtô na mivo mibie. Géétété sapôtô#15:37 Paul amateta mibie miéndô mbe blé. tôsagaaba môkubee wetso gôépika na toto mbe géômba ékanda sene géétété ivô tôpika na toto te môbie ôtévo. 38Nzambé eetsa gô môbie na môbie wedi môkubee ôngakandangô ganyôngéô amuene Nzambé.
39Eôma éetso évégumani ésaba éetso ôtô ôvo na môsoyi ôvo. Môma andé na wedi mônongo otô. Nyama andé na wedi mônongo amôsoyi. Nyoyi na ône wedi mônongo na nyama yagô mbéyi na waô mônongo.
40Gôndéké dôta ôtô ag’ôba na ôtô agô tsina. One ag’ôba ônyepa n’obébayi awene mônongo na ône agô tsina. 41Kômbéne étanéda te wedi mônongo obébayi. Ngondene étanéda te wedi mônongo. Na minangamie te waô mônongo. Buéyé minangamie misatana mietso mônongovo.
42Edué étubéda gangaba wa n’anyô vangatôkunduga g’ôwa. Vangunyu môma aka nzumbi, ôtô edi te sôma gémadônga va tsina g’ôtangô apitsi. Vangakunduga angô ôsabadô ava tsina, ôsangadôtanga pitsi. 43Vagunyu ôtô gô ngii ôndé gékonzo na ôsanyepa. Vangakunduga angô ôngaba n’ondômbee na ngudi. 44Vagunyu ôtô gô ngii ôndé ôbandôni na ôôkanôni. Vangakunduga angô ôngabaka sôma sagétsutsuku. Tôsabômu mbe gôndéké ôtô ôbandôni na ôôkanôni tambô menyani dôta mbe gôndéké na ôtô ôsangoongôa môma énigôa. 45Endé te gatônigôu na Matendeo MaNzambé mbe: Mômane amapanga Adam, amavangô sôma gévégumani. Na Adamene amôyusumédu te Gédidi SaNzambé gétôétsa monyo. 46Mapangame, kaka géne sag’ôba te géne sava tsina. Môbaé te géne sag’ôba. 47Adamene amapanga amavangô na toto. Adamene amôbaé te Kumu amaviga g’ôba. 48Muetso asi tsinane agono n’one amavangô na totone éava tsina. Muetso asi g’ôba agono n’one amaviga g’ôba. 49Tambô wa n’anyô tôgono deo noo n’one amavangô na totone na tôngagono dôta n’one amaviga g’ôba.
50Oôkôni éne ébuta me énônigôa ana aTéta. Ene émavangôni éndé éotô na nzina ésaba na tsoongo g’ôkumu aNzambé. Géne sapitsi yatangaga, gésaba n’evamba na géne samôbô na môbô.
51Nanôtsutsuéa éne éav’esooe ésinigôganéôni édué. Wa n’anyô tôsangawa muetso, ivô muetso tôngakou te kogu. 52Tôngakou tsina na tsina, ôgi yadingani, gémbômbage samôyusumédu géndé gôétoongu. Vangatoongu gémbômbage ane amawani angakunduga na yene yôtô disangadôomba ébooni, na wa n’anyô tôgédôngakani tôngakou. 53Engaba te nane. Ene ébooni, éngakou éka éne ésabookoni. Ene éawaakaga, éngakou éka éne ésaviwaani. 54Vangaba yôtô yasô n’anyô édi dibooni dimakou dika disabooni, na yôtô yasô n’anyô édi diwaakani, dimakou dika disaviwaani, te vangaduga éne émavovo Nzambé gô Matendeo medi mbe:
Monyo ôngatseda ôwa.
55?Owa ôtômue woo ôndé gôni?
?Owa miangaga mioo mindé gôni?
56Ebéva éamôma te éangô éétsa ôwa miangaga. Mige miaNzambé te miangô miitsa ébéva ngudi gô môtéma amôma. 57Tôkumédékéni Nzambé atôétsa ngudi gô ina aJésus‐Christ gôétseda ôwa.
58Ana aTéta n’ami amôtéma, t’ebandô me Paul nanôongô mbe oodoni gô mabégô mema kabaga nôsasipa. Bakani na géviôviô gôéyanzéa Kumu gôébégô éagékundugéô. Nôsabômu mbe éne éyanzanye pitsi yedi éndé anye na vitoo na Kumu Jésus, éndéké na tsoongo.
ទើបបានជ្រើសរើសហើយ៖
I Corinthiens 15: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983