I Corinthiens 14
14
Mavo mabégô mamigôô miétsa Gédidi SaNzambé
1Butani gôéba na étondo éaNzambé gô mitéma mianyô. Butani dôta migôô miétsa Gédidi SaNzambé. Ti gandé ône epandôéda ndongi diviga gôndé Nzambé. 2One avovo aanga ôgi ômeetsô angô na Nzambé gôévovo, asavovo n’oma gôébégô asookô ôgie ône, ivô avovo na Nzambé. Gô ngudi yaGédidi SaNzambé anigôa mabégô mapie mamabaka v’esooe. 3Ivô bononi ône apandôéda ndongi diviga gôndé Nzambé, angô avovo n’oma gôéweseda ahngô gô nzéane éaNzambé ékea ahngô, na gôékasôgéda ahngô na gôéongô ahngô ndongi. 4One avovo aanga ôgi ôsookanô n’akedi, oodeda amuene gô nzéa éaNzambé. Ivô ône apandôéda ndongi diviga gôndé Nzambé oodeda asi mbumu éaNzambé muetso gô nzéa éaNzambé.
5Me neena buedi mbe wa n’anyô muetso tôvovo yaanga yôgi disiikédu wa n’anyô na môma. Ivô nootéa ényôngéô mbe tôpandôédé ndongi diviga gôndé Nzambé. Endé te nane. One atôpandôéda ndongi dimeetsa Nzambé te tsoongo épôni gôndé wa n’anyô tôôkôni. Géé ône avovo aanga ôgi ?tsoongo ndé gôndé wa n’anyô tôsookôni? Buétsé te gôdenganô môma gôétônigôa g’ôgie wasô n’anyô mane mavoviôni. Vane asi mbumu éaNzambé muetso angoodedu gô mabégô maNzambé na mavoviame mane. 6Te nane ana aTéta, nanôévôa mbe vangaviga me na gôndé anye nanôékéda g’ôgi ôsookô anye ?tsoongo ndé gôndé anye? Gôsaba tsoongo mbe nôngadiia sôma gôndé me. Buétsé te me nanônigôa ébégô ga te amuene Nzambé anônigôani, vo nanôsupua ébégô mbe nôyavôga éôkô éangô. Na ôkô nanôpandôéda ndongi diviga gôndé Nzambé, na nanôékéda Mane Mamavovo angô, éetso éne te éne éndé na tsoongo gôndé anye.
7Tôkanéga ébégôe na éôma ésavégumani, ga ngombi na gémbômba. ?Okô môma agôba ngombi, ndumaye gébé kuanakue akedi angamenya embô égôbango‐a? Na gémbômba gétoongo môma te mônongovo. ?Okô angô atoongo gémbômba sagô géngookanô‐a? 8Vatimôga oma gô mbôka gôékea gôégenya ébadi te gémbômba gétimôa ahngô. ?Okô môtoongine asimenya étoongo, mbeeane éngookanô‐a? 9Gôndé wa n’anyô gô mbumu éaNzambé te mônongovo. Okô môma eekéda gô waanga ôgi ômeetsô angô na Nzambé, wa n’anyô géôkô angô ?tônganigôgéô meekédume nayee? Mandé gameetéô gô mbéyi. 10Gôndéké va tsina yôgi diyekani divovo oma. Ogi n’ogi ôôkanô na vede na kumu yangô. Géé gôndé mé disaba na tsoongo. 11One avovo n’ami g’ôgi edi, me géôkô angô tsabômu mbe te môgenda. Me dôta gôndé angô nandé te môgenda. 12Me nanôongô mbe gôndé anye nôbuta na môvinéné édiia migôô miétsa Gédidi SaNzambé, butani édiia mine miweseda mbumu éaNzambé muetso gô nzéa éamabégô maNzambé matôétsa mitémamie.
13T’ebandô ône eetsô wene ôgi gôéékéda mabégôme, buedi mbe aduké Nzambé môgôô eekoa na eesupua ôgi ôvovo angô ône. 14Okô navovo na Nzambé gô wene ôgi ômeetsô me, gédidi sami géndé gôésambéda ivô matasa mami masaba wangô na masamenya éne évovo me. 15?Tambô nangeenda nayee? Me nangavovo na Nzambé gô gédidige sami, me géôkô na vede. Nangavovo na Nzambé dôta na matasame mbe nookô na vede éne évovo me. Na mimbôme te mônongovo. Nangatôa gô gédidige, nangatôa dôta na éodo éetso. 16Endé te nane. ?Okô ôkuméda Nzambé gô gédidi gétévo, akoo andé vangô gôéôkô angoongôa éaabéa mbe: Amen‐a? Angô genigôgéô éne ékuméda éwe Nzambé asangamenya éne évovo éwe. 17Buéyé mbe ôsambôe woo ôndé ti amôsôba, akoo asangoodedu n’angô gô mabégô maNzambé matôgobedani.
18Nakuméda Nzambé gôébégô nootéa anye muetso gôévovo waanga ôgi ômeetsô me na Nzambé. 19Ivô gô géwanyéô gédigaa asi mbumu éaNzambé ?na gôévovo mabégô mabaé, matatô mag’ôgi ôkanôni, na gôévovo mabégô mayekani mag’ôgi ôsookanôni me nangeenda nayee? Me nootéa ényôngéô évovo mabégô mabaé, matatô mbe akasô angookô mangô.
20Ana aTéta n’ami gô mabégô mema nômbiaba gandé anéngé asamenya éne éénda ahngô. Gô mabégô mabévani bakani g’anéngé asamenya évanga mangô. Géé gô mane mamisôba bakani oma oodini gôéénda mangô. 21Oôkéôni éne étônigôu na Matendeo MaNzambé.
Kumu Nzambé amavovo mbe:
Nangavovo n’omami
Nangavovo gô yaanga yôgi disangookô omami.
Nangavovo gô miônya miagenda.
Buéyé vane, omami asangookéô me.
22Menyani mbe môgôô evovo waanga ôgi ôsiikédu éwe te gémbégéa sangudi yaNzambé gôndé ane asasinga Nzambé, kaka gôndé ane amamôétsa mitémamie. Na môgôô epandôéda ndongi diviga gôndé Nzambé te gémbégéa sangudi yaNzambé gôndé ane amamôétsa mitémamie, kaka gôndé ane asasinga Nzambé.
23Tôkanéga te mbe asi mbumu éaNzambé muetso akôkangana vavo na andé gôévovo gô yaanga yôgi disiikédu ahngô. Na avo eengéa, te ane asamenya mabégôme mane na ane asavamba na Nzambé. ?Gô nzongodine yanyô asanganôénda mbe: Eedi te tsôga‐a? 24Tôkanéga dôta mbe môma na môma gô mbumu éaNzambé apandôéda ndongi dimeetsô angô na Nzambé. Na avo eengéa, ane asamenya mabégôme mane na ane asavamba na Nzambé. Gô mane mookiô angô, ahngookô na vede gô mitéma miaô mbe: Me te môbévi. Môtémedi ôngadumédu na ôngeesédu gô mane mapandôédiôni. 25Vookô angô, tambô matasa medi mav’esooe maka v’ekanga. N’angô angasiba mabongo medi gôéneegenda Nzambé mbe: Na gô pie Nzambé andé va gatse anyô.
Gôédigaa gébé na môyungéda gô géwanyéô
26Wa n’anyô ana aTéta ?tôngaba nayee gô ébégô éamigôô? Vatôkôkangana vavo gô géwanyéô samabégô metso maNzambé éndé te nane. Môvo va gatse asô n’anyô andé na embô. Môvo andé n ndongi. Môvo dôta atsutsuédu ébégô na Nzambé. Na môvo andé na meekédume magô aanga ôgi ômeetsô angô na Nzambé. Na môkedi eetsô éodo gôémakoa g’ôgi asô n’anyô. Buedi mbe migôômie mietso mine miwesede mbumu éaNzambé muetso gô nzéa éaNzambé étôgobedani. 27Okô nônyôngéô évovo gô yaanga yôgi gangeetsô anye na Nzambé gôévovo, vovoni abaé vo atatô, môvo môvo. Nôkôdéa te vane. Buedi mbe muene dôta akoa éne évovuni g’ôgi ôngookanô muetso. 28Okô Nzambé asiitsa môma gôékoa mabégôme mbe mookanô, buedi mbe ane eetsiô gôévovo gô yaanga yôgi asatema gô géwanyéô gôévovo. Asuméa te digaa gôévovo anguene na Nzambé. 29Na gôndé ane adiia ndongi diviga gôndé Nzambé gôédipandôéda buedi mbe abaé vo atatô apandôédé. N’akaô andé gôétanganéda ndongiye dine mbe dinyepa vo disanyepa. 30Okô môvo andé gôévovo na môkedi adiia ébégô gôndé Nzambé, atsôéda ône amapanga évovoni, buedi mbe ône amapanga akitsé mavoviame maamuene gôétsika dôta akedi ahvovo. 31Vane nôngaduganéô muetso gôépandôéda môvo môvo mane maviga gôndé Nzambé gôénôékéda na gôénôkasôgéda. 32Môma atôma môgôô, kaka môgôô atôma môma. 33Nzambé kaka Kumu amabégô masagôsagô, na madiyunga. Na asanyôngéô wa n’anyô tôénda mane, ivô tôbaké gô gétabé.
Indakani geenda asi mbumu éaNzambé muetso. 34Buedi mbe ageto adigaa na suii gô éwanyéô ékôkangana asi mbumu éaNzambé. Ageto asaba n’otômu gôévovo. Te gabeenda mitôma miaNzambé mbe agobede ane atômani. 35Okô môgeto abuta énigôgéô ébégôe, buedi mbe éévôé mômiedi gô ebedi. Esaba buedi môgeto avovo gô géwanyéô.
36?Nôsiséda me‐a? ?Anye yaanda? ?Mabégô maNzambé mamabandôa te gôndé anye‐a? Na mangô mangakôdéa te gôndé anye‐a? 37Okô va gatse anyô gôndéké môma atômu na gô pie na Nzambé na môma andé na môgôô ômeetsô angô na Nzambé gôépandôéda ndongi yedi, angookô mane matendéa me anye éma mbe na gô pie te môtôma amuene Kumu Jésus. 38Okô môma atsuma paga gô mabégô mema g’ôdungée wedi, nzeegedani angô.
39Te nane ana aTéta n’ami asi mbumu éaNzambé. Gényôgani gôédiia môgôô epandôéda ndongi diviga gôndé Nzambé. Ivô ômbiadékéda môma gôévovo waanga ôgi ôétsô angô na Nzambé. 40Gô mabégô mema metso tsôkéakani na mavôma gébé na môyungéda.
ទើបបានជ្រើសរើសហើយ៖
I Corinthiens 14: TSV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alliance Biblique du Gabon (Bible Society in Gabon) 1983