Hakaroma 9
9
Matorwero ghaIsragheli kwaNyambi
1Mumakupakerero naKristusi, ame na kughamba ghushemwa. Mbadi na kughamba mbango. No yighayara yange paMupepo ghoKupongoka, yina kunongonona pofotji nange. 2Eshi poyidi yitokota yoyikuru thikuma yo kehe pano kumutjima wange, 3kwawayendhange, hakadiko dyange hoshemwa. Ngo na kukuta nothinda, ngo na yakunuka kwaKristusi. Ngeshi ku yina wa roghera. 4Awo ne Haisraghelite. Awo gha wa tamburire Nyambi yira hanendi no ghawa yeranithire mughufumu wendi. Nawo gha nungire ghundambo, no gha tapire kukwawo muragho noyikarera yomutembeli nomaturekero. 5Matunderero ghawo ne kwawakerekandongo wawo. No mumwawo ne Kristusi yu ha shamurukire yira munu — Aye ne Nyambi no gha yeyuka peghuru dhoyinu yoyihe, gho ha mu kugha roruheya! Amen.
6Eyi mbadi yina kuninga eshi, man̂ando ghaNyambi ne kadi thinu karo. Karo hakakakoghatji kaIsragheli ne eshi, kadi Haisragheli hoshemwa. 7Kemo eshi, kadi kehe hanahoka waAbrahamu ne eshi hanahoka waAbrahamu shemwa. Maturekero ne gha karire ngeno: “MwaIsaka mo mbo mu tunda hanahoka woye.” 8Eyi ne kuninga eshi: Kadi yira hana wa ha shamurukera mumoyo ghoghunu, awa ha dhira kukara hana Nyambi. Awa ne hana wa hapwa kushamurukera pamaturekero ghaNyambi. Awa ha kundama kwawanahoka waAbrahamu. 9Man̂ando ne ghano eshi: “Munako dhi mbo neya karo, naSara mbo ghana wana mwana ghokatughuru.” Oyu ne ya mu turekera roruhe.
10Ene kadi yoyi keho. Rebeka gha karire mudira rofotji keho, pawihetu Isaka. 11-12Oku mbadi hapwa kushamuruka hanuke no mbadi ha tenda karo ghuwa ngambi ghuyi. Ko kumutongwera kwawo mukamadi eshi: “Mbedi yo mbo gha rughanena n̂omba.” 13Thika di yapwa kutjanga eshi: “Jakopu na mu hakire, Esaghu ne na mu dhimbire.” Manungero gha, gha tunda pamatorwero, no mbadi yina kuninga payikara yamunu, ene koyu ghana kukwitha.
14Ngepi di sho tu ninge keho twe? Eshi Nyambi ne kadi muhunga ndi? Yapira! 15Aye gha ningire kwaMosesi eshi:
“Mbo na kara nothin̂eke
koyu mbo ni nongopa,
no mbo na fera n̂eke
koyu na hima kufera n̂eke.”
16Eyi ne mbadi ya kundama kuyihima yamunu ngambi kuthitambo thendi. Ene kuthin̂eke thaNyambi. 17Muyitjanga, Nyambi kuna kuninga kwaFaragho eshi: “N̂anyi‐n̂anyi na kutendi fumu shokuru. Ni neghedhe ngcamu dhange mumoye, no Dina dyange dipupane mukaye kokahe.” 18Yaghushemwa eshi, Nyambi gha fera n̂eke yu ghana himi, no ghuthururu koyu ghana haka.
Matetero no n̂eke dhaNyambi
19Pano ni tongwere me eshi: “Nye ghana kutuhumbithera shime? Yidye ghokutjinaghana pamahimeno ghendi?” 20Owe munu, yowe dye ghokukona kupiterera Nyambi patughano toye? Ngepi tha kona kuninga thivareka kwamuvareki watho eshi: “Nye wa ni varekerire kemo?” 21Nane mumbi ne mbadi gha kara nongcamu kudyumbe dyofotji eshi, thi kare po thinu no kutenda po thinu ndi?
22Ngeshi ngo dyo gha tendire naye Nyambi ne? Aye gha shanine kuneghedha ghupata wendi nongcamu dhendi. Yodigho yirughanitho yoghupata wendi, gha shanine kudhimitha hanu wa ha karire po. Ene gha karire noghudhughutjima kukwawo. 23No ngo dyo gha yuvithire karo ghutungi ghoghufumu wendi, kuyinu yothin̂eke thendi. No wa hanu gha roghitherire pakutanga ghufumu wawo. 24Mukatji kawo ne natwe tudi mo. Kadi mwaWajuda pithamo gha shwagha, ene no mumarudhi ghamweya ha mwitha. 25Dyo gha ningire karo murukwaro rwaHoseya eshi:
“Awa ha dhira kukara hakadiko dyange,
mbo na wa toyo eshi, ‘diko dyange,’
nambuyama yu gha dhirire kuwana ruhakitho:
‘muhakwa wange.’
26Mukuninga ni wa tongwere eshi:
‘Amwe ne kadi mwadiko dyange,’
mbana wa toyo eshi, ‘hana Nyambi ghomuyumi.’ ”
27NaJesaya ghana kukugherera kwaIsragheli eshi:
“Ngambi kenge ha vurire Haisraghelite yira dive dyodikuruviya,
hapu mbo hapwa kughamwena.
28Yoyishi Fumu, gha kara po kuroruhe
ho gha rikanyitha yinu pakaye.”
29Dyo gha ningire Jesaya karo pakare‐kare eshi:
“Ngeshi Fumu ghomukangcamu dhodhihe,
ngo mbadi sho gha tu thighere dimbuto —
ngo natwe thika Hakasodoma tu di,
no thika di gha dhimana Gomora.”
Haisraghelite no mbudhi dhodhiwa
30Nye ne keho sho tu ghambe? Hahayidena mbadi ha shana ghuhunga, ene ha ghu wana — ghuhunga ghopamatawero. 31NaIsragheli karo gha shanine muragho, ghokuwana ghuhunga, muragho ghu mbadi gha ghu wanine. 32Pathinu munye ha dhirire kuwana ghuhunga? Yoyishi awo, mbadi ha himine kupara mumatawero. Ene payitenda yawo hathinda ndani. Awo ha pundukire kudimuwe. 33Thika di ha yitjanga eshi:
“Mone, ame na gateka diwe muSiyoni edi gha kupunduka munu,
diwe di mbo dikuginda.
Ene yu ghokutawa muMwendi,
mbadi mbo gha tokota.”
ទើបបានជ្រើសរើសហើយ៖
Hakaroma 9: MHW1986
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mbunga dhoBayibili dhaNamibia (Bible Society of Namibia) 1986
