Hakaroma 10
10
1Mwandenge, yihaka yomutjima wange no ndapero dhange dhokwaNyambi, eshi hapwe kughamwena hakadiko dyange. 2Yoyishi na kona kuwanongwenena eshi, ha toghoropa thikuma kwaNyambi. Keho ne hapira madimukero ghoshemwa. 3Mbadi ha dimuka ndhira dhaNyambi dhoghuhunga, gho hana kuyereka kutenda ghuhunga wawo hathinda. Yoyishi wo, mbadi ha kuthire ndhira dhoghuhunga waNyambi. 4Kristusi ne yoghuhura ghomuragho eshi, kehe yu ghokutawa gha kone kuwana ghuhunga.
Makomweneno ne kwakehe yu ghokutawa
5Mosesi gha tjanga ghuhunga ghopamuragho eshi, munu yu ghokutenda yi wa rawera muragho, mbo ghana para. 6Ghuhunga ghopamatawero ne wa ninga ngeno: “Wa kuninga ghothinda eshi: ‘Yidye mbo gha dhina kudiwiru?’ ” Eshi gha kashuruthe Kristusi. 7“Ngambi: ‘Yidye mbo gha shuruka?’ ” mwawakamwishi eshi, gha katumune Kristusi mukufa. 8Kadi kemo, Yitjanga ya ninga eshi:
“Nando ne pepi noye dha kara,
mukanwa koye no mumutjima ghoye.”
Nando dhi ne, dhombudhi dhomatawero, edhi tuna kuyuvitha twe eshi: 9Ngeshi honongonona nokanwa koye eshi Jesusi ne Fumu, ho tawa nomutjima ghoye eshi, Nyambi gha mu tumunine mwawafu, mbo ghuna pu kughamwena. 10Atwe twa tawa nomutjima, no twa hungeka non̂ando, no twa nongonona nokanwa, gho twapwa kughamwena. 11Yitjanga ne ngeno eshi:
“Mbadiko yu ghokutawa muMwendi,
oyu mbo gha tokota.”
12“Noyofotji temba!” Mbadiko karo makutjakero kwamunu gha kare Mujuda endi Muhirika: Waheya Fumu wawo ne yofotji. Ho gha kara mutungi kuyitapa kwawahe wa hana kumwitha. 13Yoyishi, yomuhe ghokwitha Dina dyaNyambi, mbo ghana pu kughamwena.
14Ngepi ne keho di sho gha mwithe munu, ngeshi ku mbadi gha tawa muMwendi? No ngepi di sho tawe muMwendi, oku we mbadi wa muyuva? No ngepi sho mu yuve ngeshi mbadiko yu ghana kumuyaghura? 15Ngepi ne keho sho gha yaghure munu, ngeshi mbadi ha mu tuma? Yapwa kutjanga eshi: “Ngepi di wa tetukitha mughuma ghomapadhi ghamukakureta mbudhi dhodhiwa.” 16Haisraghelite, mbadi ha teghererire wahe kumbudhi dhodhiwa. Jesaya gha ningire ngeno: “Fumu, yidye yu gha tawa kuyiyaghura yi twa yuva twe?” 17Matawero meshi gha kara kwamukakuyuva yiyaghura. No yiyaghura yi tuna kuyuva ne ghomayuvithero ghaKristusi.
18Ene munu kukona kwipura ngeno eshi: Awo Haisraghelite ne mbadi ha yuvire nawo yiyaghura ndi? Shemwa ha yiyuvire! Yitjanga ne eshi:
“Yiyaghura yawo, ya yukathanine mukaye kokahe,
no man̂ando ghawo kate kuyiyeghekamuto yokaye.”
19Dipwero dimweya dino: Aye Isragheli ne mbadi gha tjwathanine ndi? Pakutanga na kuneghedha eyi gha ghambire Nyambi paMosesi:
“Eshi mbo na paka nya dhenu pawanu
kwawanu wa ha pira diko,
no mbo na mu patitha kudiko
di dya dhira kumutjwathana.”
20Jesaya shime ha rundurura kughutho: Ame wa Nyambi eshi:
“Na kuwanitha me nothinda kwawanu
wa ha dhirire kunishana,
na hokoka kwawanu
wa ha dhirire kunipura.”
21KwaIsragheli ne ngeno ghana kuninga Ye:
“Kehe diyuwa na ghonyonine moko ghange
kwawathururu no kudiko dyomutomonono.”
ទើបបានជ្រើសរើសហើយ៖
Hakaroma 10: MHW1986
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mbunga dhoBayibili dhaNamibia (Bible Society of Namibia) 1986
