Hakaroma 8
8
Mu pare paMupepo
1Yodigho mbadiko makutetero kwawa ha tawa mwaKristus Jesusi. 2Muragho waMupepo oghu wa kupa moyo mwaKristus Jesusi, ghuna kushutura kumuragho ghodiharwero no kufa. 3Eyi wa dhirire kutenda muragho, pamurandu ghoghukashu wetu ghopamaharwero. Nyambi ye ne gha yi tendire. Aye gha teterire diharwero payikara yadyo, paMwanendi yofotji yu gha karire yira munu ghothiharuru. No gha pwire kutuma eshi na gha kare muyambo ghodiharwero. 4Pano ne tu kumitherere mo muragho. Eshi mbadi ya kona kutuhongaghura yipara yopamuve. Shimengwa yopaMupepo. 5Awa dya rawera diharwero paghunu, ha kara payinu yopamaharwero ghopaghunu. Ene wa warwera Mupepo, ha kara muyinu yaMupepo. 6Yinu yi gha rughanine munu pathina‐ghunu, ya tambire kukufa. Eyi gha rughanitha Mupepo ne, ya reta moyo no thiraro. 7Eyi dya rughanitha diharwero dyoghunu wamunu, ghukore ghokwaNyambi. Yoyishi mbadi ya tawa kumuragho waNyambi, no mbadi ya kona nokamanana temba. 8Awa wa rawera ghunu ghodiharwero, mbadi ha kona kutenda mahimeno ghaNyambi.
9Amwe mbadi wa kumurawera yikara yoyimango paghunu wenu. YopaMupepo ndani. Yoyi Mupepo waNyambi ne, mumwenu wa tunga. No ngeshi ghumweya ha piri Mupepo waKristusi, aye mbadi gha kundama kwaKristusi. 10Yoyi gha kara Kristusi mumwenu, yo wa tapa Mupepo moyo kukwenu pamurandu ghoghuhunga. Ngambi kenge ha yi tungwera yirama kukufa pamurandu ghomaharwero. 11Yoyishi Mupepo wendi oghu wa tumunine Jesusi mwawafu, mbo ghuna tungu mumwenu. No yoYu gha tumunine Kristusi mwawafu, yo mbo gha tumuna yirama yenu paMupepo wendi ghu wa tunga mumwenu.
12Yodigho ne, mwayendhange. Eshi twe tudi nomuragho tu pare momo, ene mbadi twa kona kupara noghuyi wetu. 13Yoyishi, ngeshi ha mu tapa yipara yenu kughuyi, muna kuwana kufa mwe. Ene ngeshi ha mu thighi yirughanitha yenu yoyimango paMupepo, mbo muna para. 14Wahe wa wa yenditha Mupepo waNyambi ne, hana Nyambi. 15Mupepo ghu ha mu pire, mbadi wa mu tenda ghupika no mbadi ghuna kumuparitha muwoma, kadi kemo. Amwe mwa tamburire Mupepo ghu wa mu tenda hana Nyambi, no ghu wa twithithanga Nyambi eshi: “Abba”. Kuninge eshi: “Tate”. 16Mupepo ghu wa nongonona pofotji nomidhimu dhetu eshi twana Nyambi twe. 17No ngeshi twanendi twe, ngo natwe karo twakakuyora. Atwe ne twakakuyora yaNyambi, pofotji naKristusi. Kuninga eshi ngeshi ha tu nyanda pofotji Nendi, mbo tuna fumana karo pofotji Nendi.
Ghuwa ghu mbo wiya
18Ame na kughayara shemwa eshi, kunyanda ku tuna kunyanda ne mbadi kwapiterera ghufumu waNyambi oghu mbo gha tupa kughutho. 19Yivareka yina kutaterera ghurura thikuma eshi, hadye wa mbo gha tenda Nyambi hanendi. 20Yivareka ya kutapa kukunyanda, ene kadi payihima yayo. Yoyi Nyambi thinda gha yitawa. No karo thinda gha tapire maturekero ghomakurupero. 21Yivareka mbo yina komonoka yothinda kughupika wayo, oghu wa pira horo, eshi mbo yi kare muhoro dhi dha fumanena hana Nyambi. 22Twa dimuka eshi, yivareka yoyihe kutonga yina kutonga pan̂anyi‐n̂anyi thikuma kumataterero. 23Ene mbadi yivareka pithayo keho. Natwe karo twe twa tambura Mupepo yira yitapa yokutanga kwaNyambi, kemo tuna kutonga natwe. Atwe twa dimuka eshi Nyambi mbo ghana dimukitha eshi gha tu tambura twe tu kare hanendi. Aye mbo ghana tu komwenena horo dhetu. 24Atwe twa para, no twa kurupera maghamweno. Thokumona munu, mbadi gha thi kurupera shime. Yidye yu ghana kukurupera shime kuyinu yi ghana kumona? 25Ene ngeshi ha tu kurupera koyi tuna kudhira kumona, ghudhughutjima tuna kutaterera.
26Mupepo netu ghudi karo mughukashu wetu. Atwe mbadi tuna dimuka yinye no ngepi di sho tu raperere. Ene Mupepo ghothinda ghuna kuhema kumatongero gha, mukupira kushwagha po n̂ando. 27NaNyambi yu gha dimuka mitjima dhawanu, yo gha dimuka thitambo thaMupepo. Yoyishi Aye gha kuhema pamahimeno ghaNyambi kwawatawi.
28Pano tudi twa dimuka eshi Nyambi ne, gha rughanitha ghuhunga koyu gha mu haka. Oyu ghapwa kwitha pamahimeno ghendi. 29Awa ha pwire kutorora pakare, ghawa rikanyitha pofotji naMwanendi. Kemo dyo sho gha wane Mwanendi hamina hohengi. Aye ne mukakutanga. 30Awa gha himenine koyi, nawo ha pwire kwitha karo. Nawa ghethire Ye, gha‐wa rongeka. Awa gha rongekire, ghawa fumanekire.
Mbadiko thokutuyakunutha kuruhakitho rwaKristusi
31Nye sho tu ghambe pano, kuyinu yoyihe yino? Thinu thofotji ne thino: Nyambi wetu, yidye sho gha tu tokotere? 32Aye mbadi gha ghamwenine Mwanendi. Ene gha mu tapire kwawahe eshi, ghawa ghamwene. Mbadi gha kona kutupa yinu yimweya pofotji nendi ndi? 33Yidye ghokukona kuheta hatorori waNyambi? Nyambi thinda ghawa hungeka. 34Yidye yu mbo gha tu tetera? Kristus Jesusi yu gha fire, karo eshi: Aye gha vumbukire mwawafu, ho gha hungumana kurudyo rwaNyambi no ghana kutukumberera! 35Yidye ne yu sho gha kone kutuyakunutha kuruhakitho rwaKristusi? Kunyanda ndi, endi ndundumera, kukutha‐kutha, ndhara, wira, endi maghukukutu ngambi dimende? 36Yapwa kutjanga eshi:
“Papoye kuna kutupethera kufa kehe diyuwa,
eshi tu kare yira ndjwi dhi hana kupagha.”
37Ene yinu yoyiheya yi, twa yi piterera twakakuwitha, papendi yu gha tu haka. 38Yino na yidimuka shemwa eshi, mbadiko kufa, endi moyo, endi haengeli, endi mangcamu, endi yopan̂anyi‐n̂anyi endi yokughutho, endi ngcamu. 39Endi ghure endi ghudhungi, ngambi kehe thivareka mbadi tha kona kutuyakunutha kuruhakitho rwaNyambi. Ruhakitho ru ne, mwaKristus Jesusi ghoHekudyetu rwa kara.
ទើបបានជ្រើសរើសហើយ៖
Hakaroma 8: MHW1986
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mbunga dhoBayibili dhaNamibia (Bible Society of Namibia) 1986
