Mateu 18
18
Ma Marli tu Amirãriljea a Tserlui
1Tu atsea oarã ucenitsilji s-apruchearã a Isusului sh-lu ntribarã: “Cai easti cama marli tu amirãriljea a tserurilor?” 2Sh-Isusul dupã tsi acljimã un cilimean njic ningã nãsu, lu bãgã namisa di nãshi, 3sh-dzãsi: “Dealihea ma vã dzãc, macã nu vã alãxits sh-nu vã fãtsets ca cilimenjilji atselji njitsilji, voi nu va intrats pute tu amirãriljea a tserurilor. 4Cai va s-apleacã ca aestu cilimean njic, easti cama marli tu amirãriljea a tserlui. 5Sh-caitsido tsi lu aproachi un cilimean njic ca aestu tu numa a mea, mi aproachi mini. 6Ma atsel tsi va s-fac s-cadã tu amãrtii un di aeshti njitsilji, tsi pistipsescu la mini, va hibã ma ghini trã nãsu s-lji spindzirã di gushi unã cheatrã di la moarã, shi s-neacã tu apa a amariljei. 7Cavai di dunjeaua tsi fatsi oaminjilji s-cadã tu amãrtii. Cã cicãrdisirili va yinã, ma cavai di atsel om, tsi trã sibepea a lui va yinã atseali cicãrdisiri! 8Tora macã mãna a ta, icã ciciorlu a tãu ti cicãrdiseashti trã amãrtii, talji-l sh-arucã-l diparti di tini. Easti ma ghini s-intsri tu banã fãrã unã mãnã icã scljiopu, di cãt s-ai doauã mãnji sh-doauã cicioari shi s-ti arucã tu foclu di totãna. 9Tutashã, macã ocljiu a tãu s-cicãrdiseashti trã amãrtii, scoati-l sh-arucã-l diparti di tini. Cã easti ma ghini s-intsri cu un ocljiu tu banã, di cãt s-ai doi oclji shi s-ti arucã tu Gheena a foclui.
10Afirits-vã s-nu dispretsuits vãrã di aeshti njitsilji, cã mini ma vã dzãc cã anghilji a lor tu tseruri mutrescu totãna fatsa a Tatãlui a meu tsi easti tu tseruri. 11[Cã Hiljiu a omlui vini ti ascãpari atsea tsi eara chirutã.]#18:11 atselu stih nu s-aflã tu alanti manuscrisi
12Cum minduits? Macã un om ari unã sutã di oi, sh-unã di nãsi cheari cala, nu va li alasã di noaudzãtsi nouãli tu munti, shi s-caftã atsea tsi chiru cala? 13Sh-cãndu va u aflã, dealihea vã dzãc cã elu va s-hãrseascã ma multu ti aestã dicãt di noaudzãtsi noauli, tsi nu avea chirutã cala. 14Ashã easti vrearea a Tatãlui a vostru tsi easti tu tseruri, tsi vãrã di aeshti njitsilji s-nu chearã.
Nvitsãtura di Ljirtari
15Macã fratili a tãu amãrtirseashti contra tini, duti sh-vãrghea-lu cãndu hits singuri voi doilji, macã ti ascultã, tini lu amintash fratili a tãu, 16macã nu ti ascultã, ljea cu tini ninga un icã doi oaminji, tsi cathi zbor si siguripseascã prit gura a doi icã a trei martiri.#Deut 19:15. 17Macã deapoea arniseashti s-ti ascultã, dzã-lji a-bisearicãljei, sh-macã arniseashti s-ascultã sh-bisearica, prilucrats-lu ca pãngãn icã ca taxidar. 18Dealihea vã dzãc cã tuti lucrili tsi va avets ligat pristi loc, va hibã ligati sh-tu tser, sh-tsi avets dizligat pri loc, va hibã dizligati sh-tu tser. 19Ma vã dzãc tutashã, cã macã doi di voi s-uidisescu pri loc trã itsido tsi caftã, aestã va s-facã a lor di la Tatãl a meu tsi easti tu tseruri. 20Cã, iutsido tsi doi icã trei suntu adunatsi tu numa a mea, mini escu aclo namisa di elji.”
21Atumtsea Petrul s-apruche la Isusul sh-lji dzãsi: “Doamne, macã fratili a meu amãrtiseashti cãtrã mini, cãti ori prindi s-lu ljeartã? Pãnã di shapti ori?” 22Isusul lji-dzãsi: “Mini nu tsã dzãc pãnã di shapti ori, ma pãnã shaptidzãtsi di ori cãti shapti. 23Trã atsea, amirãriljea a tserurilor undzeashti ca un amirã tsi vrea s-fãtsea luguriili cu huzmichearilji a lui. 24Dupã tsi apãrnji s-fãtsea lugurii, lj-adusirã un tsi lj-mprumuta dzatsi njilji di talentsã. 25Sh-metsi aestu nu avea tsi s-plãtea, nicuchirlu a lui ursi s-vindea elu cu muljeara a lui, cilimenjilji a lui, sh-tuti tsi avea, shi s-plãtea mprumutlu. 26Atumtsea huzmichearlu lj-cadzu pri dzinuclji sh-lji si rugã, dzãcãnda: ‘Doamne, s-ai arãvdari cu mini sh-mini va ts-li plãtescu tuti!’ 27Nicuchirlu lu njilui huzmichearlu a lui, lji lu ljirtã mprumutlu sh-lu-alãsã. 28Ma huzmichearlu atsel cum ishi, aflã un altu huzmichear tsi lji-avea ti dari unã sutã di denari. Dupã tsi lu acãtsã di grumadzu ma lu zgruma, dzãcãnda-lji: ‘Plãtea-nji mprumutlu tsi nj-ai.’ 29Atumtsea huzmichearlu sotslu a lui, cãdzu pri dzinuclji sh-lji si rugã, dzãcãnda-lji: ‘Ai arãvdari cu mini, sh-va ts-li plãtescu tuti.’ 30Ma elu nu vru, meti lu bãgã tu hapsi, pãnã cãndu elu s-plãtea mprumutlu. 31Ma alantsã huzmicheari, cãndu lu vidzurã tsi s-featsi, si nvirinarã shi s-dusirã lji dzãsirã a nicuchirlui a lor tutã tsi fu faptã. 32Atumtsea nicuchirlu a lui lu acljimã sh-lji dzãsi: ‘Huzmichear arãu, mini ts-ljirtai tutã aestu mprumut, cã tini nji fãtseshi rigeai. 33Nu lipsea sh-tini s-aveai njilã trã sotslu a tãu, ashã cum avui mini njilã trã tini?’ 34Sh-nicuchirlu a lui, nãrãitã, lu prideadi atsel tu mãna a tiranjilor, pãnã cãndu s-plãtea tut mprumutlu. 35Ashã va s-facã cu voi sh-Tatãl a meu tserescu, macã cathi un di voi nu lu ljearti cu tutã inimã fratili a lui.”
ទើបបានជ្រើសរើសហើយ៖
Mateu 18: BLRR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
