Mateu 17
17
Fãnirusirea al Isus
1Dupã shasi dzãli Isusul lo cu nãsu Petrul, Iacovul, sh-Ioanul fratili a lui, sh-lji alinã pri un munti analtu dinãparti. 2Shi elu s-alãxi nãintea a lor. Lji si strãlutsi fatsa ca soarili shi stranjili a lui s-featsirã albã ca lunjina. 3Sh-ia, lã si fãnirusirã a lor Moisiul sh-Ilia tsi zbura cu nãsu. 4Atumtsea Petrul lji dzãsi al Isus: “Doamne, easti ghini tsi noi him aoa. Ma s-vrei, mini va fac aoa trei tendi, unã trã tini, unã trã Moisiul sh-unã trã Ilia.” 5Cãndu elu zbura ninga, ia un nior lunjinos lã amvãli sh-dit nior s-avdzã unã boatsi tsi dzãtsea: “Aestu easti Hiljiu a meu vrut, di la cai escu hãrisit, ascultats-lu!” 6Ucenitsilji cãndu u-avdzãrã aestã, cãdzurã pri dintsã mpadi shi s-aspãrarã multu. 7Sh-Isusul s-apruche, bãgã mãna pri nãshi sh-lã dzãsi: “Sculats-vã sh-nu vã aspãrats!” 8Sh-elji sculãnda ocljilji, nu vidzurã om, mash Isusul singur.
9Deapoea cãndu ma dipuna dit munti, Isusul lã ursi dzãcãnda: “S-nu lji dzãtsets a vãrui trã aestã viziuni pãnã cãndu Hiljiu a omlui s-nyeadzã dit mortsã.” 10Atumtsea ucenitsilji a lui lu ntribarã: “Cãtse scriblji dzãc cã prindi s-yinã ma nãinti Ilia?” 11Sh-Isusul lã apãndisi: “Dealihea cã Ilia va yinã ma nãinti sh-va adarã napoi itsido. 12Ma mini vã dzãc, cã Ilia ari vinitã sh-elji nu lu cunuscurã, ma featsirã cu nãsu cum vrurã. Ashã cã Hiljiu a omlui va s-mundueascã di nãshi.” 13Atumtsea ucenitsilji lu aduchirã cã lã avea zburãtã di Ioan Pãtidzãtorlu.
Vindicarea a Ficiorlui Demonizat
14Cãndu elji vinirã aproapi di multsãmea, un bãrbat s-apruche sh-dzinucljãnda nãintea a lui, 15dzãsi: “Doamne, s-ai njilã ti hiljiu a meu cã easti epileptic, tradzi multu sh-di multi ori cadi tu foc icã tu apã. 16Tora mini lu-dush la ucenitsilji a tãlji, ma elji nu puturã s-lu vindicã.” 17Sh-Isusul apãndisinda, dzãsi: “O farã fãrã pisti sh-anapudzã! Pãnã cãndu va armãnã cu voi? Pãnã cãndu va vã aravdã?” Adutsets-lu aoa la mini! 18Sh-Isusul lu vãrghi demonul sh-elu ishi dit ficiorlu, sh-di atsea oarã ficiorlu s-vindicã. 19Atumtsea ucenitsilji lji s-apruchearã al Isus sh-dinãparti lu ntribarã: “Cãtse noi nu putum s-lu aĝunim?” 20Sh-Isusul lã dzãsi a lor: “Di pistipsirea atsea njica a voastrã. Cã dealihea mini ma vã dzãc: ma s-avets pisti cãt gãrnutslu di sinapi va lji dzãtsets a muntilui aishtui: ‘Mutã-ti di aoa, aclo,’ sh-elu va si s-mutã. Sh-tsiva nu va hibã niputut di voi. 21[Sh-aestu soi di demon nu easi di cãt mash cu rugãciunji sh-cu pãreasinj.]”
Isusul Prividzu di a Doaua Oarã Moartea a Lui
22Cãndu elji s-afla tu Galilea, Isusul lã dzãsi: “Hiljiu a omlui va s-prida tu mãnjilji a oaminjilor, 23sh-va lu vatãmã, sh-tu dzua a treia va s-nyeadzã.” Sh-elji s-nvirinarã multu.
Plãtirea a Taxiljei
24Cãndu agiumsirã tu Capernaum, taxidarlji di doauã dhrahmadzi a tempului lji s-apruchearã a Petrului, sh-lji dzãsirã: “Nvitsãtorlu a vostru nu u plãteashti taxa a templui?” 25Sh-elu dzãsi: “Ie!” Sh-cãndu intrã n-casã, Isusul lu ashtiptã protlu sh-lji dzãsi: “Cum mindueshti tini Simon? Di la cai ljea taxili icã hãracili amirãrilji a loclui? Di la hiljilji a lor icã di la xenjilji?” 26Petrul lji dzãsi: “Di la xenjilji.” Isusul dzãsi: “Hiljilji atumtsea nu prindi s-plãtescu. 27Cu tut atsea tsi s-nu lji cicãrdisim atselji, du-ti la amari, arucã greplu sh-ljea protlu pescu tsi va yinã nsus, ljea-lu, discljid-lji gura, sh-va s-aflji un statiru. Ljea-lu sh-plãtea taxa a lor ti tini sh-ti mini.”
ទើបបានជ្រើសរើសហើយ៖
Mateu 17: BLRR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
