Mateu 19
19
Dispãrtsãri
1Dupã tsi Isusul li ascãpã ti aspuneari aesti nvitsãturi, s-nchisi di Galilea, sh-vini tu loclu a Iudeiljei, napãrti di Iordan. 2Multsãnji mãri l-urma sh-elu lji vindicã aclo. 3Atumtsea lji s-apruchearã niscãntsã Farisei s-lu cãrtea, sh-lji dzãsirã: “Easti tu lege tsi bãrbatlu s-u dispartã muljearea di itsido itii?” 4Sh-elu apãndisinda lã dzãsi a lor: “Nu avets cãntatã cã atsel cai lji adrã di tu apãrnjitã ‘lji adrã mascru sh-theaminã.’#Ahr 1:27; 5:2. 5Sh-Dumnidzãlu dzãsi: ‘Trã aestã bãrbatul va s-alasã tatãl sh-muma a lui sh-va si s-mpriuneadzã cu muljearea a lui, sh-amindoilji va hibã un trup singur’?#Ahr 2:24. 6Sh-ashã elji nu suntu ma doi, ma un trup. Atsea tsi Dumnidzãlu ari mpriunatã, omlu s-nu u-dispartã.” 7Elji lji dsãsirã: “Atumtsea cãtse Moisiul ursi s-lji si da cartea di dispãrtsãri shi si-u alasã.”#Deut 24:1-4. 8Elu lã dzãsi a-lor: “Moisiul vã deadi volje s-li alãsats muljerili a voastri trã itia a chitrisiriljei a ininjilor a voastri. Ma tu ahurhitã nu eara ashã. 9Ma mini vã dzãc cã caitsido tsi u-alasã muljerea a lui, dicãt mash trã itia a putãnsiriljei, shi si nsoari cu unã altã, ncalcã curuna. [Sh-atsel tsi si nsoari cu muljeari alãsatã, ncalcã curuna.]”#19:8-9 nu sã aflã tu altã manuscrisi 10Ucenitsilji a lui lji dzãsirã: “Macã cunditsili a bãrbatlui cãtrã muljearea suntu ahtãri, ma ghini si nu si nsoarã dip.” 11Ma elu lã dzãsi a lor: “Nu tuts lã aduchescu aesti zboari, ma singur atselji a cui lã easti datã. 12Suntu eunuchi#19:12 eunuchi sãntu atselji oaminji tsi nu poatã si nsoarã shi nu poatã s-facã cilimenji., cai suntu amintats ashã dit pãnticlu a mumãljei, shi suntu eunuchi cai suntu faptã di la oaminji, shi suntu eunuchi cai au apofãsitã singur s-faca eunuchi trã amirãriljea a tserurilor. Atsel tsi poati s-aducheascã, s-aducheascã.”
Isusul Ghinicuvãteadzi Cilimenjilji
13Atumtsea adusirã cilimenji njitsi la Isusul tra s-bãga mãnjili pri nãshi, shi s-ruga, ma ucenitsilji a lui lji vãrghirã. 14Atumtsea Isusul dzãsi: “Alãsats cilimenjilji atselji nitsilji s-yinã la mini sh-nu li nchidicats, cã a lor easti amirãriljea a tserurilor.” 15Atumtsea elu bãgã mãnjili pri elji, sh-deapoea s-nchisi di aclo.
Avutlu Tinir
16Sh-ia, s-apruche un la Isusul sh-lu ntribã: “Nvitsãtore, tsi buneatsã prindi s-fac tsi s-amintã bana eternã?” 17Sh-elu dzãsi: “Cãtse mi ntreghi tsi easti bun? Singur un easti bun. Macã vrei s-intsri tu banã, veaglji dimãndãrili.” 18Elu ntribã: “Cai?” Atumtsea, Isusul lj-apãndisi: “Nu vatãmã, nu ncalcã curuna, nu furã, nu dã mãrtirii arãdioasã, 19tinjisea tatãl a tãu sh-muma a ta, shi s-vrei aproapilu a tãu ca cum ti vrei tini.” 20Tinirlu lj-dzãsi: “Tuti aesti lucri mini li am vigljatã. Tsi nji lipseashti altã?” 21Isusul lj-dzãsi: “Macã vrei s-hii perfectu, duti sh-vindi tsi ai, sh-dã-li a niavutslor, shi tini va s-ai un ayishteari tu tser. Deapoea haidi sh-urmeadz-mi.” 22Ma tinirlu cãndu li avdzã aesti zboari, fudzi nvirinat, cã avea multã aveari. 23Atumtsea, Isusul lã dzãsi a ucenitsilor a lui: “Dealihea vã dzãc cã un avut cu zori va s-intrã tu amirãriljea a tserurilor. 24Sh-nãpoi ma va dzãc: Easti ma lishioarã s-treacã cãmila tu guva a aclui, dicãt avutlu s-intrã tu amirãriljea a Dumnidzãlui.” 25Cãndu li avdzãrã aesti zboari, ucenitsilji a lui s-ciudisirã multu shi ntribarã: “Atumtsea, cai va s-ascapã vahi?” 26Sh-Isusul mutrinda cãtrã nãshi dzãsi: “Trã ominjilji aestã easti nipututã, ma trã Dumnidzãlu itsido easti putut.” 27Atumtsea Petrul lj-apãndisi: “Ia, noi li alãsãm tuti sh-vinim dupã tini, ma tsi va s-amintãm noi?” 28Sh-Isusul lã-dzãsi a lor: “Dealihea ma vã dzãc, tu adãrãtura atsea noaua, cãndu Hiljiu a omlui va sheadã pri thronlu a mãririljei a lui, sh-voi tsi mi avets urmat, va shidets pi doisprãdzatsi thronuri ti guidicari di doisprãdzatsi fãrili a Israelui. 29Sh-caitsido tsi ari alãsat trã numa a mea cãsi, fratsi, surãri, tatã, mumã, [muljeari]#19:29 nu s-aflã tu cathi manuscrisi., cilimenji, agri, va ljea unã sutã di ori ma multu, sh-va aibã banã eternã. 30Ma multsã di protslji va hibã tu coadã, sh-atselji di tu coadã va hibã protslji.”
ទើបបានជ្រើសរើសហើយ៖
Mateu 19: BLRR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
