लुका 4
4
येशुला छो़ता
(मेथा ४:१-११; मारकु १:१२-१३)
1येशु धाम्पे थुक्ङीगी खारी, योरदान चाङबुने लोक्ती फेप्पालाक धेनी थुक्ङीगी खोङबाला रीतोङ स्योकला ठीया जेपालाक। 2होदुरु श्याक्मो श्यीपच्यु थुक्पे, खोङबाला धी़कगी छो़ता झ्येवालाक। होदे श्याक्मो श्यीपच्यु घाङला, खोङबागी श्येलाक घीन्दा माश्येबा थाला खोङबा टेवालाक।
3धी़कगी येशुला ॱनेवालाक, “खेराङ को़न्क्षोकगी से हीन्ना दे धोगोङ देला ग्याङगाला ग्युर ॱनेरी का ॱनाङाजे।”
4धेनी येशुगी सुवालाक, “सुङरापला ‘मी ग्याङगागी च्यीगा ॱमीछोगीलाक।’#काठीम ८:३ ॱनेरी ढीक हो़तालाक।”
5धेनी धी़कगी खोङबाला री थोवा च्यीकला ठीक्ती, लेमु च्यीकला जाम्बुलीङगी ग्याखाप घीरी तो़न्दी ॱनेवालाक, 6“ङी खेराङला दे घीरीगी वाङ धाङ देक्याई शीजे तेरु, घीझ्येरी ॱनाना दे घीरी ङी वाङला हो़क धेनी ङी थेगीन मीला ङा तेराहीन। 7खेराङगी ङाला क्षाक छाना, दे घीरी खेराङगी झ्युङगीलाक।”
8धेनी येशुगी सुवालाक, “सुङरापला ‘ख्यो़ ख्यो़री को़न्क्षोक चोवोला च्यीगा क्षाक्क्षो़ धेनी खोङबाला च्यीगा श्याप्ची श्यी़।’#काठीम ६:१३ ॱनेरी ढीक हो़तालाक।”
9धेनी धी़कगी खोङबाला येरुसालेमदु ठीक्ती, क्षो़खाङगी उच्चीला लाङदु च्युक्ती, खोङबाला ॱनेवालाक, “खेराङ को़न्क्षोकगी से हीन्ना देने माला छोम। 10घीझ्येरी ॱनाना सुङरापला ढीक हो़तालाक,
‘खोङबागी खेराङला क्योप्येला,
खेराङगी क्षीला राङगी भाङछेनक्याला का ॱनाङा जेगीलाक,
11धेनी धोगोङ खाला खेराङगी श्याप ॱमेफोक्येगी क्षीला,
खुङक्याई लाक्पागी खेराङला शीम्गीलाक।’#सुङगुर ९१:११,१२”
12धेनी येशुगी सुवालाक, “सुङरापला ‘ख्यो़ खेरी को़न्क्षोक चोवोला छो़ता माझ्यी।’#काठीम ६:१६ ॱनेरी ढीक हो़तालाक।” 13धेनी धी़कगी खोङबाला छो़ता घीरी लेन्सारती, धाब्ले घुकाप ॱमाथोप्कीन थुक्पे खोङबाला भोरती सोवालाक।
येशुगी गालीलदु क्षाक्ले गो चुक्वा
(मेथा ४:१२-१७; मारकु १:१४-१५)
14धेनी येशु धाम्पे थुक्ङीगी नी़थु जोरती, गालीलला लोक्ती फेप्पालाक। होदुरु खोङबागी कोरला ॱये-ॱयो़नगी यु घीरीला ख्याप्पालाक। 15धेनी खोङबागी खुङक्याई छोक्खाङक्या नाङदु, क्षो़ तो़न जेपालाक। धेनी मी घीरीगी खोङबाला तो़टा तावालाक।
नाजारेतदु येशुला ॱमाचीवा
(मेथा १३:५३-५८; मारकु ६:१-६)
16येशु खोराङ छारछा यु नाजारेतगोला लोक्ती फेप्पालाक। धेनी च्योई च्योक्रे, खोङबा ङासुगीन ङीमागोला छोक्खाङला फेप्ती धेनी को़न्क्षोकगी का ॱलोक्येला श्याङा जेपालाक। 17खोङबाला यस्याया ॱङो़नस्येखेनगी ढीक्टा धेबगो ढोक्येला ॱनावालाक। धेनी खोङबागी धेबगो स्यीक्ती दे ढोवा जेपालाक,
18“चोवोगी थुक्ङी ङी खाला ॱने हो़तालाक,
घीझ्येरी ॱनाना उटेक्याला ताम्शाङ स्येयेला, खोङबागी ङाला दामा जेपालाक।
धेनी चो़न्पाक्याला राङवाङगी लो़न सेटाक झ्यीये,
धाङ श्याराक्याई ॱमीक थोङगीन शोये,
धाङ ॱनेम्दी धेताक्याला राङवाङ ॱनाङये,
19धाङ चोवोगी थुक्जेगी लो ॱलेप्जु ॱनेरी, सेटाक झ्यीयेगी क्षीला,
चोवोगी ङाला ॱङाक जेपालाक।”#यस्याया ६१:१,२;५८:६
20धेनी येशुगी धेबगो टीरी श्याप्तोक्पा च्यीकला ची ग्याप्ती, खोङबा श्युक्पालाक। धेनी छोक्खाङ नाङ हो़गीन घीरीगी खोङबाला तेरी धेबालाक। 21धेनी खोङबागी खुङक्याला सुवालाक, “धीरीङ सुङरापगी का दे, खेक्याई ङेन्दी घाङलाराङ डुप्सुङ।”
22मी घीरीगी खोङबाला तो़टा तावालाक। धेनी खोङबागी श्यालने थो़न्दा सुङ ॱङेम्बोक्या ङेन्दी ॱहाङसावालाक। धेनी खुङक्याई ॱनेवालाक, “दे योसेफगी भीजागो माले?”
23धेनी येशुगी सुवालाक, “धा ॱङोन्नेराङ, खेक्यागी ङाला पे दे ॱनागुलाक, ‘आम्ची, ख्यो़ राङला चो़गा झ्यी।’ धेनी याङ ॱनागीलाक, ‘काफारनाहुमदु ख्यी़ घी झ्यीगीनगो, हीकी घोरकीन च्योक्रे, राङगी यु दुरुवा झ्यी’।”
24“हीना ङा धेन्पाराङ खेक्याला ॱनाहीन, ॱङो़नस्येखेन सुलाः खोरी लुङबादु खेमेलेन्दालाक। 25धेनी ङी ॱङोन्ने ॱनाये हीन्ना, ॱङो़नस्येखेन एलीयागी धी़चो़ला लो सुम धाङ दावा ढुक थुक्पे क्षावा छेदी, यु घीरी मुगे क्षेला स्योरी घाङला, ईस्राएलदु ॱमीच्यीकी माङा युक्जामाक्या हो़तालाक। 26हीना को़न्क्षोकगी एलीयाला देक्या सुवाः चारु मेन्दा, सीदोन ग्यारापला हो़गीन सारेबता युगी युक्जामा च्यीक चारु च्यीगा झावालाक। 27याङ ॱङो़नस्येखेन एलीस्यागी धी़ला ईस्राएलदु जेने माङा हो़ना, सीरीयागी नामान माना श्येम्मा खुङक्याने सुवाः चाङमा माजेपालाक।”
28दे लाब ङेन्दी छोक्खाङला हो़गीन घीरी, ॱमीच्यीकी खोङडो लावालाक। 29धेनी खुङक्या लाङदी येशुला ग्याजाने फीला तो़न्बालाक। दे ग्याजा दे रीगी खाला हो़तालाक। धेनी खुङक्याई खोङबाला रीगी थोक्ने ॱयुक्ये झ्येवालाक। 30हीना खोङबा खुङक्याई खोक्ने थो़न्दी फीला फेप्पालाक।
ॱनो़पा जुजा मी ढाक्पा
(मारकु १:२१-२८)
31होदे स्याम्ने येशु गालील युगी काफारनाहुमदु फेप्पालाक। धेनी ङासुगीन ङीमाला खोङबागी खुङक्याला क्षो़ तो़न जेपालाक। 32खोङबागी कालोपला मी घीरी ॱहालेवालाक घीझ्येरी ॱनाना खोङबागी काला वाङ हो़तालाक।
33धेनी छोक्खाङ नाङदु ॱनो़पा ॱमेचाङा ज्युजा मी च्यीक हो़तालाक। खी़ फेरा ग्याप्ती ॱनेवालाक, 34“के नाजारेतगी येशु, हीकीमुला खेराङगी घी ढेवा? हेला मेताला ताङयेला खेराङ फेप्पाले? खेराङ को़न्क्षोकगी धाम्पे मीगो लाक ॱनेरी, ङाला स्येयेहो़क।”
35धेनी येशुगी होदेला काको़न जेदी सुवालाक, “खाबा धो़क धेनी खी़ नाङने थो़न।” धेनी मी घीरीगी दोङदु होदे ॱनो़पागी मीगोला साला धाप्ती, ॱनो़ घीया ॱमाक्यावा थो़न्दी सोवालाक।
36धेनी मी घीरी ॱहालेरी खोराङक्या नाङदु ॱनेवालाक, “दे का दे घी ले? वाङ धाङ नी़थुगी थोक्ने, खी़ ॱनो़पा आक्याला का ॱनाङी धेनी देक्या थो़न्दी डी़।” 37धेनी येशुगी क्षाक्लेगी कोरला, होदे युगी साजा ॱये-ॱयो़न घीरीला ख्याप्पालाक।
येशुगी मी माङक्षेला चो़गा जेवा
(मेथा ८:१४-१७; मारकु १:२९-३४)
38येशु छोक्खाङने थो़न्दी, सीमोनगी नाङला फेप्पालाक। होदी घाङला, सीमोनगी केमीगी आमा ॱमीच्यीकी छावा ॱनेरी धे हो़तालाक। धेनी नाङगी मीक्याई, “मोला चो़गा जेरोनाङ” ॱनेरी येशुला श्यी़वालाक। 39धेनी खोङबा मी़ दोङदु श्याङा जेदी, छावा नाजागोला काको़न जेपालाक धेनी छावा येवालाक। धेनी लाम्साङ मो लारी, खोङबाक्याला श्याप्ची श्यी़ये गो चुक्पालाक।
40धेनी ङीमा फेप्ती, मीक्याई नाजा ॱना श्येम्मा-श्येम्मागी नेपाक्या येशुचारु खेरती होवालाक। धेनी खोङबागी होदे घीरीगी खाला क्षाक श्याक जेदी, ढाक्सो़ जेपालाक। 41मी माङक्षेने ॱनो़पाक्या देरे फेरा ग्याप्ती थो़न्बालाक, “खेराङ को़न्क्षोकगी से लाक।” हीना येशुगी होदे ॱनो़पाक्याला काको़न जेदी, लाब ताङदु ॱमाच्युक्पालाक घीझ्येरी ॱनाना खोङबा मास्यीकागो लाक ॱनेरी खुङक्याला स्येये हो़तालाक।
येशुगी क्षाक्ले
(मारकु १:३५-३९)
42धेनी ॱङारोक झ्युरी येशु साजा एन्दोङ च्यीकला फेप्पालाक। धेनी मीक्या खोङबाला चारी ग्युक्पालाक धेनी खुङक्या खोङबा हो़सारु ॱलेप्ती, खोङबाला लोक्ती ॱमेफेप्येला, काक्ये थापस्यी झ्येवालाक। 43हीना येशुगी खुङक्याला सुवालाक, “ङा को़न्क्षोकगी ग्यासीगी ताम्शाङ दे, ग्याजा श्येम्माक्यालाः स्ये घो़गुलाक घीझ्येरी ॱनाना ङा दी क्षीलाराङ झावालाक।” 44होझ्येरी खोङबा युदेयागी छोक्खाङक्याला फेप्ती, क्षो़ तो़न जेपालाक।
ទើបបានជ្រើសរើសហើយ៖
लुका 4: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
